मत्ती 14
14
बप्तिस्मा पीनब यूहन्ना सीयेब
मर्कूस ६:१४-२९; लूका ९:७-९
1हम्ब बीलने गालीलजे मूरुम् हेरोददे येशूजे न-मीनजे बारेने तदे। 2ङूदे रङ्से दरबारने काम फरबयूने यदे, “ङू बप्तिस्मा-पीनब यूहन्ना ख्यङ्। ङू सीइदेबे सोम्बो क्यूट्ट ख्यङ् येरेक्यूत्देबे ङूदे यर हार्मन्दीलाबे चेब शक्तिजे कामयू चीन्न ख्यङ्।”
3 #
लूका 3:19,20 चेनेयलो हेरोददे रङ्से च्योन्, फिलिपजे मज हेरोदियासजे लागि यदेबे यूहन्नाने चूङ्दे मेस्ये ख्यादेबे झ्यालखानाने स्योप्के ख्य। 4#लेवी 18:16; 20:21यूहन्नादे हेरोदने येरे य ख्य, “नदे ङूने कीम्मप्र चीत्देबे प्रे-येब ज्य अन्क्यूर्।” 5येरेक्यूत्देबे हेरोददे ङूने सेमे ख्य, तर मीयू तङ्देबे ङू फ ख्य, चेनेयलो थमयूदे ङूने अगमवक्ता यदेबे मन्दे ख्य।
6तर कन्छ्वाब हेरोद प्रेब दिन रदे, हन्छ्वाब हेरोदियासजे चीमीदे थमयूजे खूम्ने सोरो ज्य-स्यदेबे हेरोदने बेस्से सूग्ला चीम्मीदे। 7होरेक्यूत्देबे हेरोददे ङूने चनेस्यलीने पीन्क्य यब कसम चदेबे हेरोददे कबुल चीत्दे। 8तर ङूजे मदे लोम्मीदेबे ङूदे यदे, “बप्तिस्मा पीनब यूहन्नाजे ट अम्ब थल्ने स्ये।” 9होर्दे हेरोदने सूर्त क्यूत्दे, तर रङ्सेदे ङ्योव-डोम्बोयूजे खूम्ने कसम चेकब कारण ङूदे होरप्रने चेब हुकुम पीन्दे, 10मेस्ये ङूदे झ्यालखानाने यूहन्नाजे ट-चसे पीन्दे। 11होर्दे यूहन्नाजे ट थल्ने रेत्देबे हम्ब चम्चने पीन्दे। ङूदे हम्ब रङ्से म ट्याने कूदीदे। 12होर्देङ्येदे यूहन्नाजे स्यूस्स्यायू रदेबे ङूजे सीयेब ङ्व कूदीदेबे पोप्दे। होर्दे थमयू गीलीदेबे येशूने अम्ब पो स्योत्दे।
येशूदे हजार ङ मीने चसेपीन्दे
मर्कूस ६:३०-४४; लूका ९:१०-१७; यूहन्ना ६:१-१४
13कन्छ्वाब येशूदे अम्ब पो तदे येशू डुङ्गाने टदेबे हैयादे आलाक्के सूत्याये त्वब चनमन नेने गीलीदे। अम्ब तमेस्ये मीहुल सहरयूदे येशू त्वने ङ्ये-ङ्ये तोप्देने गीलीदे। 14येशू डुङ्गादे फीने तल्रब ङूदे मीहुल केन् त्या तङ्दे। हम्ब मीहुलने येशूदे ङ्येम्दे मेस्ये थमयूप्रे ख्यब नवयूने तम् चीम्मीदे।
15नूस्यूङ्लाबे स्यूस्स्यायू येशूट्याने रदेबे येरे यदे, “अलाङ्गी ने ख्यङ्, मेस्ये नो चैके-चेन ख्यङ्। अम्ब नेदे मीहुलने कूल्बी, मेस्ये थमयूदे त-तने प्रदेबे रङ्सेजे लागि चसे कीन्स्य।”
16तर येशूदे थमयूने यदे, “थमयू प्र अम्पर्ती। नमयूदेने थमयूने चनेयली चसे पीन्।”
17थमयूदे येशूने यदे, “अन्-याने ङीप्रे क्यङ् ङ मेस्ये ङ-ङ्ही त्या ख्यङ्।”
18होर्दे येशूदे यदे, “हम्ब ङैट्याने सीक।” 19येशूदे चूकूर्ने टूङ् यदेबे मीहुलने आज्ञा चीत्दे, मेस्ये हम्ब क्यङ् ङ मेस्ये ङ-ङ्ही लाने टेल्देबे तो स्वर्गतेले लेत्देबे परमेश्वरने धन्यवाद पीन्दे, मेस्ये क्यङ्यू फाच्या चीत्देबे स्यूस्स्यायूने पीन्दे, मेस्ये स्यूस्स्यायूदे मीयूने कोम्मीदे। 20हम्ब क्यङ् क्वादेने कलाबे चदेबे लम रब ढूटूमूटू क्यङ्यू थमयूदे बाह्र टोलो रूप् पूत्दे। 21मदी मेस्ये पीचयू अन्चील्लाबे क्यङ् चब: हजार ङलाप्र पतीचयू ख्य।
येशू क्यूफ्याने प्रेनब
मर्कूस ६:४५-५६; यूहन्ना ६:१५-२१
22येशूदे मी हुलने कूल्बेङ्येदे स्यूस्स्यायूने डुङ्गा टदेबे ङूयली खूम् तीप्ल्या कूल्बीदे। 23मीहुलने कूल्बे जेन ङ्येदे गङ्ने प्रार्थना चेने ङूत्याने गीलीदे। नूस्यूङ् क्यूरीब हैयाने येशू तीत्या ख्य। 24तर हम्ब बीलने डुङ्गा समुद्र नदे कूम चीन्तङ् फ्योये ख्य। मेस्ये उन्दू थमयूतेलेयोर् चील्लीदेबे क्यूजे छल्दे डुङ्गा यूङ्देबे अप्ठर् क्यून्न ख्य।
25नप्दे घडीने सोम् तप्लोखब येशू समुद्रजे क्यू फ्या-फ्यादे तोप्देने थमयूट्याने रदे। 26कन्छ्वाब स्यूस्स्यायूदे येशू समुद्र फ्याने प्रेनब तङ्दे, हन्छ्वाब थमयू फदेबे यदे, “अम्ब ब सीमी टूङ्!” मेस्ये थमयू फदेबे पारा पूत्दे।
27तर येशूदे छाट्टे थमयूने यरे यदे, “बोङ् ची, ङ न, अम्फलाची।”
28पत्रुसदे येशूने यदे, “ओ प्रभु, कादेये न यलो, ङैने क्यू फ्या-फ्याने नै-ट्याने रब आज्ञा पीन्।”
29येशूदे यदे, “ख।”
पत्रुस डुङ्गादे तल्देबे येशू ट्याने क्यू फ्याने प्रमेदे। 30तर उन्दू बोङ्बे चील्लेब तङ्देबे ङू फैगदे, मेस्ये कन्छ्वाब ङू समुद्रने नूम्ब मल्कीदे हन्छ्वाब ङूदे बोङ्बे पारा पूत्देबे यदे, “ओ प्रभु, ङैने जूक्तीमी।”
31छाट्टे येशूदे ला तान्तीदेबे ङूने फ्याङ् चूङ्देबे ङूने यदे, “ओ, चूक्बत्या विश्वासी चेब, नदे चेने शङ्का चे?”
32कन्छ्वाब थमयू डुङ्गाने टदे हन्छ्वाब बोङ्बे चील्लीनब उन्दू थम्दीयी। 33डुङ्गाने ख्यबयूदे “न तम्दम्ने परमेश्वरजे च टोङ्।” यदेबे येशूने स्यूव पीन्दे।
34समुद्र तीप्ल्या थेक्क जेनमेस्ये थमयू गनेसरेत यब नेने फ्योरदे। 35कन्छ्वाब हैयाजे मीयूदे येशू यदेबे स्येदे हन्छ्वाब थमयूदे तीप्ल्या छोप्ल्या नेयूने खबर चङ्पीदे मेस्ये मीयूदे नवयू क्वाने टेल्देबे येशूट्याने रेत्दे। 36नवयूदे येशूजे कोलानत्या यलीने छ्वे प्रेदे येदेबे येशूने बिन्ती चीत्दे, मेस्ये सू-सूदे छूत्दे थमयू क्वाने तम् क्यूत्दे।
Currently Selected:
मत्ती 14: सर् कबुल
Highlight
Share
Copy
Want to have your highlights saved across all your devices? Sign up or sign in
Ghale New Testament © Nepal Bible Society, 2011.
