मत्ती 18
18
स्वर्गजे राज्यने पात्ता केन्
मर्कूस ९:३३-३७,४२-४८; लूका ९:४६-४८; १७:१-२
1 #
लूका 22:24
हन्छ्वाबने येशूट्याने स्यूस्स्यायू रदेबे लोत्दे, “स्वर्गजे राज्यने पात्ता केन् सू ख्यङ्?”
2येशूदे रङ्से ट्याने पीच चीदत्या कोदेबे थमयूजे अन्द्रने मेर्स्येपीन्दे, 3#मर्कूस 10:15; लूका 18:17मेस्ये यदे, “तम्दम्ने, ङ नमयूने यीय, रङ्से सेम् ल्वादेबे नमयू पीच चीदयूप्र अन्क्यूत्दे यलो स्वर्गजे राज्यने कलङ्बेये क्योब प्रेस्ये त्वो। 4सूदे रङ्सेने अम्ब पीच चीदजे सेम्प्र चीक्क्य, हम्बने स्वर्गजे राज्यने पात्ता केन् क्यूक्क्य। 5ङैजे मीन्ने सूदे येरप्र पीच चीदत्याने ग्रहण चीक्क्य, हम्बदे ङैने ग्रहण चेब क्यूक्क्य।
6“तर ङैफ्याने विश्वास चेब अम्ब पीचयूत्याने सूदे पाप चेने च्योल्क्य, हम्बजे नीजीने रान्ता केन् च्यून्देबे समुद्र केन्ने छाबेब सोरो ज्य क्यूक्क्य।
7‘‘मीयूने पाप चीस्स्ये पीनब सेयूजे लागि अम्ब संसारने धिक्कार ख्यङ्। पाप चीस्से पीनब जाँचयू रीय, तर होर मीयूने धिक्कार ख्यङ्, सूजे कारणदे पाप चीस्से पीनब जाँचयू रीय! 8#मत्ती 5:30कादेये नैजे ला या तोप्दे नने पाप चीस्स्ये पीन्क्य यलो हम्बने थेचदेबे छाबी। ला ङ्ही या तोप् ङ्हीने प्रे टेल्देबे कलङ्बेये अन्सीबब मी-भोप्रोने छाबेयलीने बूरू डून्या या खोन्ड्याल्या क्यूत्देबे जीया प्रेब नेने क्योबब नैजे लागि सोरो ज्य क्यूक्क्य।
9 #
मत्ती 5:29
कादेये नैजे म्यादे नने पाप चीस्स्ये पीन्क्य यलो हम्ब म्याने योन्देबे छाबी। म्या ङ्ही टेल्देबे नरकजे मीने छाबेयलीने बरू म्या अन्तङब कन क्यूत्देबे जीया प्रेब नेने क्योबब नैजे लागि सोरो ज्य क्यूक्क्य।
मलेब स्वान्जे उखान
लूका १५:३-७
10 #
लूका 19:10
“होस्स्यार क्यूर्, नदे अम्ब पीच चीदयूनङ्जे कम्बत्यानेये ह्यल अन्चील्लाची। चेनेयलो ङ नमयूने यीय, स्वर्गने थमयूजे दूतयू, स्वर्गने ख्यब ङैजे पजे खूम्ने येतार्ने ख्यङ्। 11[चेनेयलो मीजे च मलेब मीयूने बच्देमेने र ख्यङ्।]#१८:११ मीयूङ्जे कोइ कोइ ग्रीक पाण्डूलिपीयूने अम्ब पद अन्लीख्दीये ख्यङ्।
12“नमयू च ह्वे चीन्न? कादेये मीत्याजे सैत्या स्वान् नङ्ने स्वान् त्या लम् छ्योल्देबे मल्बलो ङूदे सील्लङ्दे उन्नीस् स्वान् गङ्ने पोङ्गीदेबे हम्ब मलेब स्वान्त्या मलने अम्प्रया? 13तम्दम्ने ङ नमयूने यीय कादेये ङूदे हम्ब स्वान् तूदेयलो, हम्ब अम्मलेब सील्लङ्दे उनीस् स्वान्यूयली हम्ब मलेब स्वान् त्याजे लागि ङू कोला थेप् सूग्क्य। 14येर्बे अम्ब पीचचीदयू तीत्याये नाश अन्क्यूस्स्य यब सेम् नमयूजे स्वर्गने ख्यब पदे चे ख्यङ्।
अपराध चेब च्योन्
15 #
लूका 17:3
“कादेये नैजे च्योन्दे नैजे विरुद्धने पाप चीत्देयलो, प्रदेबे नम ङ्हीत्या फूङ् क्यूरब बीलने ङूजे नोकोस् तम्मी। कादेये ङूदे नैजे पो ङ्यीन्देयलो, हम्ब फेरि नैजे रङ्से च्योन्ने क्यूक्क्य। 16#व्यवस्था 19:15तर कादेये ङूदे नैजे पो अन्ङ्यीन्देयलो सूजो मीत्या ङ्हीप्रे-प्रे कूब मेस्ये साप्ता पो पक्क चेजे लागि ङ्ही या सोम् गवाहीयूप्रे क्यूर पर्तीय। 17कादेये ङूदे थमयूजे पो अन्ङ्यीन्देयलो मण्डलीने प्रदेबे यब। होर्दे ङूदे मण्डलीजे पोये अन्ङ्यीन्देयलो नैजे लागि ङू परमेश्वर अम्मन्देब मेस्ये स्योर्म लङब मीप्र क्यूस्स्य।
18 #
मत्ती 16:19; यूहन्ना 20:23 “तम्दम्ने ङ नमयूने यीय, नमयूदे पृथ्वीने च ख्याय, हम्ब स्वर्गनेये ख्याबीय, होर्दे नमयूदे पृथ्वीने ख्यायेब च फाय हम्ब स्वर्गनेये फाय।”
19“फेरि ङ नमयूने यीय, कादेये पृथ्वीने नमयूनङ्ने मी ङ्ही मील्लीदेबे चत्या स्यलो, स्वर्गने ख्यब ङैजे पदे नमयूजे लागि हम्ब पीन्क्य, 20चेनेयलो केने मी ङ्ही या सोम् ङैजे मीन्ने रूप् क्यूक्क्य, हैयाने ङ थमयूजे अन्द्रने क्यूक्क्य।”
अन्ङ्येमब त्वोजे उखान
21 #
लूका 17:3,4 होर्दे येशू ट्याने पत्रुस रदेबे लोत्दे, “प्रभु, ङैजे च्योन्दे ङैजे विरुद्धने पाप चीत्देयलो ङैदे कोला खेप्सेमे ङूने क्षमा पीन पर्दे? ङ्यीफेसेमे यीर?”
22 #
उत्पत्ति 4:24
येशूदे पत्रुसने यदे, “ङ नने यीय, ङ्यीफे दी, तर सोम्लङ्दे च्यूखेप् गूणा चीत्देबे ङ्यीखेप्सेमे नदे ङूने क्षमा पीन पर्दीय।
23“येरेक्यूत्देबे स्वर्गजे राज्य मूरूम् त्याप्रे तुलना चे खूइय, ङूदे रङ्से त्वोयूप्रे हिसाब स्यब सेम् चीत्दे। 24कन्छ्वाब हम्ब मूरुम्दे हिसाब-किताब स्यने सुरु चीत्दे, हजार च्यू मर्जे मन्द्रमूली छेर् ख्यब मीत्या ङूट्याने रेत्दे। 25तर हम्ब मीदे छेर् फा अङ्खूदेबे हम्ब मूरुम्दे छेर् फाजे लागि ङू, ङूजे मज, च-चीमी होर्दे ङूजे साप्ता कूरूने सोङ्देबे छेर् फाने हुकुम चीत्दे।
26“हम्ब त्वोदे पूजी चोदेबे मूरुम्जे तोप्ने स्यूव पीन्देबे यदे, ‘मूरूम्, तेदिन रेम्मी, ङ नैजे छेर् टक्कने फाय।’ 27होर्दे मूरूमदे ङ्येम्देबे हम्ब त्वोने क्षमा पीन्दे मेस्ये ङूजे छेर् फा अम्पर्दे चीप्पीदे।
28“तर हम्ब त्वो योङ्देबे गीलीब रङ्सेप्रे काम फरब त्वोयू नङ्जे ख्योन्त्या तूदे, हम्बदे ङूजे सैत्या चाँदीजे मून्द्रमूली खीक्के ख्य। ङूजे नीजीने ङ्येब्देबे यदे, ‘ङैजे छेर् छ्योटो फा।’
29“तर हम्ब रङ्सेप्रे काम फरब त्वो ख्योन्दे पून्छ्यल क्यूत्देबे ङूने बिन्ती चीत्दे, “ङैने तेदिन रेम्मी, ङैदे नैजे छेर् टक्कने फाय।’
30“तर ङू अन्ङ्यीन् मेस्ये गीलीदेबे छेर् अम्फातासेमे ङूने झ्यालखानने चङ्पीदे। 31ङूप्रे काम फरब त्वो ख्योन्यूदेये अम्ब क्वाने तङ्देबे सोरो अन्सूग क्यूत्दे। थमयूदे गीलीदेबे अम्ब घटनायू क्वाने रङ्से मूरूमने स्योत्दे।
32“होर्दे मूरुमदे हम्ब त्वो ङूट्याने कोदेबे यदे, ‘ओ दुष्ट त्वो, नदे ङैप्रे बिन्तीचीत्देबे ङैदे नैजे छेर् फा अम्पर्दे चीम्मीदे। 33ङैदे नने ङ्येम्देबे छेर् टक्कने फा अम्पर्दे चीम्मेप्र नदेये नैप्रे काम फरब त्वो ख्योन्ने ङ्येम अम्पर्दे?’ 34होर्दे मूरुम् सोरो छी लङ्देबे हम्ब त्वोदे छेर् टक्कने अम्फातासेमे ङू झ्यालखानने स्योपजे लागि हाकिमजे लाने सूम्दीपीदे।”
35“कादेये नमयूदे रङ्से अत-च्योन्यूने सेम्देमेस्येने क्षमा अम्पीन्देयलो, स्वर्गने ख्यब ङैजे पदेये नमयूने होरप्रने चीक्क्य।”
Currently Selected:
मत्ती 18: सर् कबुल
Highlight
Share
Copy
Want to have your highlights saved across all your devices? Sign up or sign in
Ghale New Testament © Nepal Bible Society, 2011.
