मत्ती 20
20
अङ्गुर रङ्ने काम फरब मीयूजे उखान
1‘‘स्वर्गजे राज्य रङ्जे नोबो त्याप्र ख्यङ्, ङू नप्मून्देने रङ्से अङ्गुरजे रङ्ने मेलाने काम फर मीयू मलने फीने योङ्गीदे। 2तीयाजे मेला कामफरब मीयूप्रे तोक्दीदेबे ङूदे थमयूने रङ्से अङ्गुर रङ्ने कूल्बीदे।
3“कन्छ्वाब घडीने गू तप्रब ङू फीने योङ्गीदे, हन्छ्वाब ङूदे सूजो मीयू बजारने काम अम्फर्लाबे मेर्नब तङ्दे, 4मेस्ये ङूदे थमयूने यदे, ‘नमयूये अङ्गुरजे रङ्ने प्र, मेस्ये कम्ब ज्य ख्य ङ नमयूने पीन्क्य।’ 5होरदे थमयू गीलीदे।
“फेरि नोगूङ्ब मेस्ये नोजे सोम् तपब बीलतेले ङू फीने योङ्देबे होरप्रने चीत्दे। 6मेस्ये घडीने ङ तप्रब बीलने ङू फीने योङ्गीब सूजो मीयू मेर्नब तङ्देबे थमयूने यदे, ‘नमयू अन्-याने नोस्सेने चैत्याये अन्चील्लाबे चेने मेर्न?’
7“थमयूदे ङूने यदे, ‘सूमीदेये ङीने मेलाने काम अन्च्योल्र।’
“ङूदे थमयूने यदे, ‘नमयूये प्रदेबे ङैजे अङ्गुर रङ्ने काम फर्ब।’
8 #
लेवी 19:13; व्यवस्था 24:15 “कन्छ्वाब नूस्यूङ् क्यूट्टदे, हन्छ्वाब अङ्गुर रङ्जे नोबोदे रङ्सेजे काम फरब मी केन्ने यदे, मेलाने काम फरब मीयूने कोदेबे पात्ता ङ्येदे रबयूमेस्ये होर्दे नप्देने रबयूनेये थमयूजे मीला पीन्।
9“घडीने ङ तप्प काम फरेब मीयू रदे, मेस्ये थमयू क्वादेने नोस्सेजे मेला प्रेत्दे। 10कन्छ्वाब नप्देमेस्येने काम फरबयू रदे, हन्छ्वाब थमयूदे थेप्ने प्रेक्क्यी च मन्न ख्य, तर थमयू क्वादेने तीयाजे मेलात्या प्रेत्दे। 11मेला प्रेमेस्ये स नोबोजे विरुद्धने थमयूदे गन्गन् चीत्दे। 12थमयूदे यदे, ‘ले, अम्ब ङ्येदे रब मीयूदे घण्टा तीत्या काम फर्त्दे, ङीदे नोस्सेने मीया ठोलीने काम फर्त्दे। तर नदे थमयूनेये ङीने ताकीने मेला पीन्दे!’
13“तर रङ् नोबोदे थमयू नङ्ने त्याने जवाफ पीन्दे, “ख्योन्, ङैदे नैफ्याने चेअन्क्यूरब कम्ब अन्चीक्क। नदे ङैप्रे तीयाजे मेलाने काम फरब कबुल चे तेया? 14नदे प्रे-पर्देब मेला टेल्देबे प्र। ङ्येदे काम फर्ने रब मीनेये ङ नैजे ताकीने पीन्तीङ् रीको। 15ङैजे कोला ख्य, हम्ब ङ रङ्सेदे सेम्दे मेनप्र चेअम्प्रेया? ङैदे दया चेब तङ्देबे न चेने म्याने अन्र?
16 #
मत्ती 19:30; मर्कूस 10:31; लूका 13:30 “येर्बेने ङ्येजे खूम् क्यूक्क्य मेस्ये खूम्जे ङ्येदे क्यूक्क्य।”
सीबयली खूम्ने येशूदे रङ्से सीबबजे बारेने सोम्खेप् स्य्वेब
मर्कूस १०:३२-३४; लूका १८:३१-३४
17यरूशलेमतेले प्रेनूब येशूदे बाह्र जना स्यूस्स्यायूने अलग्गे कूदीदेबे लम्ने यदे, 18“ले, ङीन यरूशलेमतेले प्रेन ख्यङ्। जेम्से मीजे च केन् पूस्र्यायू मेस्ये पन्डेयूजे लाने पीम्पीय, होरदे थमयूदे ङूने ज्यान सजाइजे दोषी ठर्दीय। 19ङूने खिसी चेने, कोर्रा लैदेने, मेस्ये क्रूसने खील् ठोक्दीदेबे पील्बी यदेबे थमयूदे यहूदी तेब मीयूजे लाने पीम्पीय, होरदे सोम्म्या नीदे ङू सोम्बो क्यूत्देबे लङ्रीय।”
मदे चेब बिन्ती
मर्कूस १०:३५-४५
20होर्दे जब्दियाजे चयूजे मदे रङ्से चयूने प्रे-टेल्देबे येशूजे खूम्दे पूजी चोदेबे येशूने बिन्ती चीत्दे। 21येशूदे ङूने लोत्दे, “नने च चैत्ये?”
ङूदे येशूने यदे, बिन्ती ख्यङ् “नैजे राज्यने, ङैजे अम्ब च ङ्ही नङ्ने च त्या नैजे स्येत्तेयोर, मेस्ये सूजो च त्याब योन्देयोर टूङ प्रेस्स्य।”
22तर येशूदे जवाफ पीन्दे, “नमयू च स्येन हम्ब नमयूदेने अन्स्ये। कम्ब ढोल्कने ङैदे थूङ मल्न ख्यङ्, हम्ब नमयूदे थूङ खूया?”
थमयूदे यदे, “खूइय।”
23येशूदे यदे, “ङैदे थूङब ढोल्कने नमयूदे थूङ्क्य, तर ङैजे स्येत्तेयोर् मेस्ये योन्देयोर टूङ्स्ये पीनब पो ङैजे लाने त्वो। अम्ब ने ङैजे पदे सूजे लागि तयार चीते हम्बजेने क्यूक्क्य।”
24कन्छ्वाब स्यूस्स्या च्यूदे अम्ब पो तदे, हन्छ्वाब थमयू हम्ब च्योन् ङ्हीप्रे प्रो लङ्दे। 25#लूका 22:25,26तर येशूदे थमयूने रङ्सेट्याने कोदेबे यदे, “नमयूने थाने ख्यङ्, यहूदी तेब मीजे हुकुम चेबयूदे थमयूफ्याने सोरो अन्-न्याय चीत्देबे राज्य चीक्क्य, मेस्ये मूख्यायूदे थमयूफ्याने हुकुम चील्लीय। 26#मत्ती 23:11; मर्कूस 9:35; लूका 22:26नमयूजे अन्द्रने येर अन्क्यूर्, तर नमयू नङ्ने सूदे केन् क्यूरब सेम् चीक्क्य, हम्ब नमयूजे सेवा चेब क्यूर पर्दीय। 27नमयू नङ्ने सू खूम् क्यूरब सेम् चीक्क्य, हम्ब नमयूजे त्वो क्यूर पर्दीय, 28केर्बे मीजे चये सेवा प्रेस्ये यदेबे रदी, तर सेवा चीत्देबे कूम पापीयूजे पाप छूर्देमेजे लागि रङ्सेजे प्राण पीनने रदे।”
म्या अन्तङब मी ङ्ही
मर्कूस १०:४६-५२; लूका १८:३५-४३
29थमयू यरीहो सहरदे प्रेनूब मीहुल केन् येशूजे ङ्ये-ङ्ये रदे। 30म्या अन्तङब मी ङ्ही लम्जे नने टूनूब येशू हम्ब लम्दे प्रेन ख्यङ् यब तदेबे यरे यदेबे बोङ्बे पारा पूत्दे, “ओ प्रभु, दाऊदजे च, ङीने दया चीम्मी।”
31मीहुलदे थमयूने पारा अम्पूल्लाची यदेबे बोङ्बे फ्राचीदे, तर थमयू येरे यदेबे बोङ्बे पारा पूत्दे, “ओ प्रभु, दाऊदजे च, ङीने दया चीम्मी।”
32होरदे येशू रोक्तीदे मेस्ये थमयूने कोदेबे लोत्दे, “ङैदे नमयूजे लागि च चीम्मे?”
33थमयूदे येशूने यदे, “ओ प्रभु, ङीजे म्या तङ्ला चीम्मी।”
34येशूदे ङ्येम्देबे थमयूजे म्या छूम्मीदे मेस्ये हन्छ्वाबने थमयूजे म्या तङ क्यूत्देबे थमयू येशूजे ङ्ये-ङ्ये गीलीदे।
Currently Selected:
मत्ती 20: सर् कबुल
Highlight
Share
Copy
Want to have your highlights saved across all your devices? Sign up or sign in
Ghale New Testament © Nepal Bible Society, 2011.
