मत्ती 22
22
ङ्येन्जे भत्यारजे उखान
लूका १४:१५-२४
1येशूदे फेरि थमयूने उखानयू पूत्देबे यदे, 2“स्वर्गजे राज्यने मूरुम् त्याप्रे तुलना चे खूइय, ङूदे रङ्से चजे ङ्येन्ने भत्यार् तयार चीत्दे, 3मेस्ये भत्यार्ने निम्तो पीनेब मीयूने कोब यदेबे रङ्से त्वोयू कूल्बीदे, तर थमयूदे रब सेम् अन्ची।
4“फेरि ङूदे सूजो त्वोयूने येरे यदेबे कूल्बीदे, “निम्तो पीनेब मीयूने य, ले, ङैदे ङैजे भात्यार् तयार चे ख्यङ्, ङैजे खोर्बयू मेस्ये च्वब रोलायू सेत्देबे, साप्ता थोकने तयार ख्यङ्। भात्यार् चने ख।’
5“तर थमयूदे ख्यालने अन्चील्लाबे त्या रङ्सेजे रङ्तेले, सूजो रङ्सेजे छोङ् चेनेतेले गीलीदे। 6बाँकी मीयूदे ङूजे त्वोयूने चूङ्देबे अन्ज्य व्यवहार चीत्देबे थमयूने सेत्दे। 7होर्दे मूरुम् सोरो छी लङ्देबे रङ्सेजे सिपाईयू कूल्बीदेबे हम्ब मी सेब मीयूने नाश चीत्दे, मेस्ये थमयूजे सहरने मी नेम्बीदे।
8“होर्दे ङूदे रङ्से त्वोयूने यदे, ‘ङ्येन्जे भात्यार् तयार ख्यङ्, तर निम्तो प्रेब मीयू लायकजे त्वो। 9येरेक्यूत्देबे नमयू लम्यूने प्र मेस्ये लम्ने सूने तूलीने ङ्येन्जे निम्तो पीन्।’ 10होर्दे हम्ब त्वोयूदे लम्यूने गीलीदेबे त्वब मीयू क्वानेने, ज्य प्रे अन्ज्य ङ्हीने फूङ् पूत्देबे ङ्येन् चेब कीम्सेम् ङ्योवयूदे फ्यादे।
11“तर कन्छ्वाब मूरुम् ङ्योवयू लेने नङ्ने रदे, हन्छ्वाब ङूदे ङ्येन्जे कोला अन्ह्वेब मी त्या तङ्दे। 12मूरुम्दे ङूने लोत्दे, ‘ख्योन्, ङ्येन्जे कोला अन्होल्लाबे न येने नङ्ने केर्बे रदे?’ ङूदे चेये य अङ्खू।
13 #
मत्ती 8:12; 25:30; लूका 13:28 “होर्दे मूरुम्दे त्वोयूने यदे, ‘ङूजे ला-तोप् ख्यादेबे फीने मून्दूङ्ने छाबी, हैयाने मीयू ङूय मेस्ये स कीटीटी चीक्क्य।’ 14चेनेयलो क्वबयू कूम ख्यङ्, तर सेलबयू छीत्या ख्यङ्।”
स्यर्म फाब शिक्षा
मर्कूस १२:१३-१७; लूका २०:२०-२६
15होर्दे फरिसीयू गीलीदेबे येशूने केर्बे ङूजे पोने फस्ते यदेबे मोतो चीत्दे। 16होर्दे थमयूदे रङ्सेजे स्यूस्स्यायूने मूरुम्जे मीयूप्रे येशू ट्याने कूल्बीदे। थमयूदे यदे, “गुरुज्यू, नदे तम्दम् पो क्यम्क्य यदेबे ङीने था ख्यङ्। नदे परमेश्वरजे तम्दम् लम् तम्मीय, मेस्ये न सूप्रेये अम्फ, चेनेयलो न मीयूजे त्वा लेत्देबे काम अन्ची। 17येरेक्यूत्देबे ङीने य, कैसरने स्यर्म फाब ज्य ख्यङ् यी त्वो?”
18तर थमयूदे चलाख चेब था प्रेत्देबे येशूदे यदे, “कप्टीयू, नमयूदे ङैने चैने जाँचदे? 19स्यर्म फाब मन्द्रमूली ङैने तम्मी।” होर्दे थमयूदे ङू ट्याने मन्द्रमूली त्या रेत्दे। 20येशूदे थमयूने यदे, अम्ब सूजे फोटो मेस्ये अन्-याने सूजे मीन् खोप्तीये ख्यङ्?”
21थमयूदे येशूने यदे, “कैसरजे फोटो।”
होरदे ङूदे थमयूने यदे, “येरेक्यूत्देबे कम्ब से कैसरजे ख्यङ्, हम्ब कैसरने पीन्, मेस्ये कम्ब से परमेश्वरजे ख्यङ् हम्ब परमेश्वरने पीन्।” 22अम्ब पो तदेबे थमयू हार्मन्दीकदे, मेस्ये येशूने पोङ्गीदेबे थमयू गीलीदे।
सीयेबयू लङ्रब मेस्ये ङ्येन्जे बारेने
मर्कूस १२:१८-२७; लूका २०:२७-४०
23 #
मूल स्यूस्स्यायूजे कामजे किताब 23:8
हम्ब दिनने सीयेबयू सोम्बो क्यूत्देबे अन्लङ् यब सदुकीयूदे येशू ट्याने रदेबे अम्ब पो लोत्दे, 24#व्यवस्था 25:5“गुरुज्यू, मोशादे येरे य ख्यङ्, कोइ मी पीच अम्प्रेल्लाबेने सीबदेयलो ङूजे च्योन्बदे अतजे मज ङ्येन् चीत्देबे अतजे लागि च-चीमी बन्दीस्य। 25ङीनजे अन्द्रने खे-ङ्यी ख्य। अतदे ङ्येन् चीत्दे, तर च-चीमी अन्क्यूप्पने सीइ। होरेक्यूत्देबे च्योन् माइलदे अतजे मज ङ्येन् चीत्दे। 26ङूये होरप्रने च-चीमी अन्क्यूल्लाने सीइ। च्योन् साइलदेये होरप्रन चीत्दे, मेस्ये खे ङ्यीदेने होरप्रने चीत्दे। 27आखिरीने थमयू क्वाने सीयेमेस्ये हम्ब मदीये सीइ। 28येरेक्यूत्देबे सीयेबयू लङ्रब हम्ब खे ङ्यी नङने हम्ब मदी सूजे मज क्यूक्क्य? चेनेयलो हम्ब खे ङ्यीजेने मज क्यूक्क ख्यङ्।”
29येशूदे थमयूने जवाफ पीन्दे, “नमयू भूल परदीक ख्यङ्, चेनेयलो नमयूदे धर्मशास्त्रने लिख्दीयेब पो मेस्ये परमेश्वरजे शक्तिजे पो स्ये अङ्ख्व ख्यङ्। 30चेनेयलो सीयेबयू लङ्रमेस्ये मीयूदे ङ्येन्ये अन्ची, ङ्येन् चीस्येये अम्पीन, तर थमयू स्वर्गजे स्वर्गदूतयू प्र क्यूक्क्य। 31तर सीयेबयू लङ्रबजे बारेने परमेश्वरदे नमयूने च येये ख्य, हम्ब नमयूदे धर्मशास्त्रने अन्छ्य्वे? 32#प्रस्थान 3:6‘ङ अब्राहामजे परमेश्वर, इसहाकजे परमेश्वर मेस्ये याकूबजे परमेश्वर ख्यङ्।’ परमेश्वर सीयेब मीयूजे परमेश्वर दी, तर सोम्बोयूजे परमेश्वर ख्यङ्।”
33कन्छ्वाब मीहुलदे अम्ब पो तदे, हन्छ्वाब येशूजे शिक्षादे थमयू छक्के पर्तीकदे।
पात्ता केन्ब आज्ञा
मर्कूस १२:२८-३४; लूका १०:२५-२८
34येशूदे सदुकीयूने पारा पूस्स्ये अम्पीन चीत्दे यब पो तदेबे फरिसीयू ङूट्याने रूप् क्यूत्दे। 35थमयू नङ्ने मोशाजे नियम लोम्मेब गुरुत्यादे येशूजे जाँच चेब विचारदे ङूने लोत्दे, 36“गुरुज्यू मोशाजे नियमजे पात्ता केन् आज्ञा कम्ब ख्यङ्?”
37 #
व्यवस्था 6:5
येशूदे ङूने जवाफ पीन्दे, “नदे रङ्से परमप्रभु परमेश्वरने रङ्सेजे पूरा सेम्दे, पूरा प्राणदे मेस्ये पूरा बुद्धिदे प्रेम ची। 38परमेश्वरदे पीनब नियम नङ्ने पाता केन् मेस्ये पाता खूम्जे आज्ञा अम्बने ख्यङ्। 39#लेवी 19:18दोस्रोये येरने ख्यङ्, नदे रङ्से खीम्चेयूने रङ्सेने प्रने प्रेम ची। 40#लूका 10:25-28साप्ता नियमयू प्रे अगमवक्तायूदे पीनब शिक्षाजे मूख्या पो अम्ब ङ्हीने ख्यङ्।”
ख्रीष्ट सूजे च?
मर्कूस १२:३५-३७; लूका २०:४१-४४
41कन्छ्वाब फरिसीयू रूप् क्यूर ख्य, हन्छ्वाब येशूदे थमयूने पो त्या लोत्दे, 42“ख्रीष्टजे बारेने नमयूदे चमन्क्य? ङू सूजे च ख्यङ्?”
थमयूदे येशूने यदे, “दाऊदजे च।”
43येशूदे थमयूने यदे, “होरेयलो दाऊदने परमेश्वरजे आत्मादे पीनब बोङ् प्रेत्देबे ङूने केर्बे प्रभु यदेबे क्व-खूइय? ङूदे यदे,
44 #
भजनसंग्रह 110:1
‘परमप्रभुदे ङैजे प्रभुने यदे,
“ङ नैजे शत्रुयूने नैजे तोप् त्याङ्नङ्ने अन्हीदासेमे, न ङैजे स्येत्तेयोर् टूङ्”।’
45कादेये दाऊददे ङूने प्रभु यीय यलो, ङू केर्बे दाऊदजे च क्यूक्क्य? 46होर्दे जवाफने सूदेये बोली त्याये ल्वाअङ्खू। हम्ब दिनदेमेस्ये सूदेये येशूप्रे पो त्याये ल्वेब आँट अन्ची।
Currently Selected:
मत्ती 22: सर् कबुल
Highlight
Share
Copy
Want to have your highlights saved across all your devices? Sign up or sign in
Ghale New Testament © Nepal Bible Society, 2011.
