मर्कूस 10
10
प्ल्यङ् मज लम्प्रब पो
मत्ती १९:१-९
1होर्दे येशूदे हम्ब ने पोङ्गीदेबे यर्दन होङ्जे तीप्ल्या यहूदियाजे नेने गीलीदे मेस्ये मीहुल ङू ट्याने रूप् क्यूत्दे, मेस्ये ङूजे पे अनुसार थमयूने फेरि ङूदे शिक्षा पीन्दे।
2ङू ट्याने फरिसीयू रदेबे ङूने जाँच चेने लोत्दे, “कोइ मीदे रङ्सेजे मजप्रे लम्प्रब नियमदे पीन्क्या?”
3येशूदे थमयूने जवाफ पीन्दे, “मोशादे नमयूने चे आज्ञा पीने ख्यङ्।”
4 #
व्यवस्था 24:1-4; मत्ती 5:31 थमयूदे यदे, “लम्प्रब भर्पाइ लिख्दीदेबे मीदे रङ्सेजे मज क्याबे खूइय यदेबे मोशादे येये ख्यङ्।”
5तर येशूदे थमयूने यदे, “नमयूजे सेम् सोरो कोङ क्यूत्देबे नमयूने अम्ब आज्ञा लिख्दीदे। 6#उत्पत्ति 1:27; 5:2तर परमेश्वरदे सुरु मेस्येने पती मेस्ये मदी बन्दीदे। 7#उत्पत्ति 2:24‘होरेक्यूत्देबे मीदे रङ्से प-म पोङ्देबे रङ्से मजप्रे थून्देबे टूङ्क्य। 8मेस्ये थम ङ्ही ङ्व त्या क्यूक्क्य।’ थमयू फेरि ङ्ही दीलाबे ङव् त्या क्यूक्क्य। 9येरेक्यूत्देबे परमेश्वरदे थम ङ्हीने त्या चीत्देबे फूङ् चे ख्यङ्, मीदे अन्स्यास्य।”
10थमयू कीम्ने ख्यङ्बने स्यूस्स्यायूदे फेरि येशूने अम्ब पो लोत्दे। 11#मत्ती 5:32; १ कोरिन्थी 7:10,11येशूदे थमयूने यदे, “सूदे रङ्से मजप्रे लम् प्रदेबे सूजो मदीप्रे ङ्येन् चीक्क्य, ङूदे रङ्से मजजे विरुद्धने वेश्य काम चेब क्यूक्क्य। 12होरप्रने मजदे रङ्से पतीप्रे लम्प्रदेबे सूजो पतीप्रे ङ्येन् चील्लो, ङूदे वेश्य काम चेब क्यूक्क्य।”
पीचयूने येशूजे असी
मत्ती १९:१३-१५; लूका १८:१५-१७
13मीयूदे पीच चीदयूने येशूदे छूत्देबे असी पीन्स्य यदेबे ङूट्याने रेत्दे, तर ङूजे स्यूस्स्यायूदे थमयूने फ्राचीदे। 14तर अम्ब तङ्देबे येशू प्रो लङ्दे मेस्ये रङ्से स्यूस्स्यायूने यदे, “ङै ट्याने चीद पीचयूने रस्येपीन्। थमयूने अङ्कालाची चेनेयलो परमेश्वरजे राज्य यरप्रयूजेने ख्यङ्। 15#मत्ती 18:3तम्दम्ने ङ नमयूने यीय, परमेश्वरजे राज्यने पीच चीद त्यादेप्र रङ्सेजे यदेबे सूदे ग्रहण अन्ची, केरेनेचील्लीने हम्ब परमेश्वरजे राज्य नङ्ने क्योब अम्प्रे।” 16होर्दे येशूदे पीचयूने पैन्ने थम्देबे थमयू फ्याने ङूदे ला हीत्देबे थमयूने असी पीन्दे।
फ्योबो मी मेस्ये स्वर्गजे राज्य
मत्ती १९:१६-३०; लूका १८:१८-३०
17येशू लम्ने प्रेनूब, मीत्या ग्येरदेबे ङूजे खूम्ने पूजी चोदेबे ङूने लोत्दे, “ओ ज्यब गुरु, कलङ्बेये अन्सीबब जीया प्रेने ङैदे च चे पर्दीय?”
18येशूदे ङूने यदे, “नदे ङैने चेने ज्य य स्व? परमेश्वर तीत्यात्या ज्य ख्यङ्, सूजो सूत्याये ज्य त्वो। 19#प्रस्थान 20:13; व्यवस्था 5:17; प्रस्थान 20:14; व्यवस्था 5:18; प्रस्थान 20:15; व्यवस्था 5:19; प्रस्थान 20:16; व्यवस्था 5:20; प्रस्थान 20:12; व्यवस्था 5:16नदे परमेश्वरजे आज्ञायू स्ये ख्यङ्- मी सेब काम अन्चील्लाची, वेश्य काम अन्चील्लाची, अन्खूलाची, लूच्च गवाही अम्पीन्लाची, मीयूने अन्ठग्दीलाची, रङ्सेजे प-मने गेसेन् ची।”
20होर्दे येशूने ङूदे जवाफ पीन्दे, “गुरुज्यू, अम्ब टक्कने ङैदे चीदमेस्येने चीन्न ख्यङ्।”
21येशूदे ङूने लेत्दे, मेस्ये ङूने ङ्येम्देबे यदे, “अझ नदे कामत्या अन्चे ख्यङ्। प्र, नेप्रे ख्यब सेयू क्वाने सोङ्देबे दूख्प्रेब मीयूने पीन्, मेस्ये स्वर्गने नदे सीर-सम्पत्ति प्रेक्क्य। होर्दे ङै ङ्ये-ङ्ये ख।”
22तर अम्ब पोदे ङूजे त्वा मून्दूङ् क्यूरी, मेस्ये ङू सेम् ठोदेबे गीली, चेनेयेलो ङूप्रे सीर-सम्पत्ति कूम ख्य।
23होर्दे येशूदे ख्यूरीरी लेत्देबे रङ्से स्यूस्स्यायूने यदे, “फ्योबो मीयू परमेश्वरजे राज्य नङ्ने क्योबने सोरो मूस्स्यूल् ख्यङ्।”
24ङूदे यब अम्ब पोने ङूजे स्यूस्स्यायू हार्मन्दीकदे। मेस्ये येशूदे फेरि थमयूने यदे, “ङैजे पीचयू, सीर्-सम्पत्ति फ्याने भर् पर्देयू परमेश्वरजे राज्य नङ्ने क्योबने कन्छ्वा मूस्स्यूल् ख्यङ्। 25फ्योबो मीने परमेश्वरजे राज्य नङ्ने क्योब यली ऊँट कप्जे म्यादे क्योबने सूस्योलो ख्यङ्।”
26होरे यब थमयू सोरो हार्मन्दीकदे मेस्ये येशूने लोत्दे, “होरेयलो सू बच्दे खूइय?”
27येशूदे रङ्से स्यूस्स्यायूने लेत्देबे यदे, “अम्ब पो मीयूदे चे अन्खू, तर परमेश्वरदे चे खूइय, चेनेयलो परमेश्वरदे त्या साप्ता पोने चे खूइय।”
28होर्देङ्येदे पत्रुसदे येशूने यदे, “ले ङीदे टक्कने पोङ्गीदेबे, नैजे ङ्येदे रेन ख्यङ्।”
29येशूदे यदे, “तम्दम्ने ङ नमयूने यीय, सू मीदे ङैजे लागि मेस्ये सूगब खबर स्य्वेने कीम् या अत-च्योन् या अजी-च्योन् या प-म या च-चीमी या स-क्यू पोङ्गीलो, 30ङूदे सतनम् प्रे-प्रे सैत्या थेप् कीम्, अत-च्योन्, अची-च्योन्, प-म, च-चीमी मेस्ये स-क्यू अम्ब जूग्नेने प्रेक्क्य, होर्दे फेरि रब जूग्ने कलङ्बेये अन्सीबब जीया प्रेक्क्य। 31#मत्ती 20:16; लूका 13:30चूजो खूम्दे क्यूरब कूम मीयू ङ्येदे क्यूक्क्य। मेस्ये ङ्येदे क्यूरब कूम मीयू खूम्दे क्यूक्क्य।”
येशूदे फेरि रङ्से सीबब पो खूम्ने यब
मत्ती २०:१७-१९; लूका १८:३१-३३
32होर्दे थमयू यरूशलेमतेले प्रेन ख्य, मेस्ये येशू थमयूजे खूम्खूम् प्रेन ख्य, स्यूस्स्यायू हार्मन्दीदे, मेस्ये सूजो ङूजे ङ्ये-ङ्ये रेनब मीयू फैग ख्य, होर्दे ङूदे बाह्र जना स्यूस्स्यायूने फेरि नेत्याने कूदीदेबे रङ्से फ्याने ङ्येदे क्यूस्से ख्यब पोयू थमयूने स्य्वेत्दे। 33येशूदे यदे, “ले, ङीन यरूशलेमतेले प्रेन ख्यङ्। हैयाने मीजे च मीयूदे, पूस्र्या केन्यू मेस्ये यहूदी पन्डेयूजे लाने सूम्दीपीदेबे, मेस्ये थमयूदे ङूने सेक्क्य, मेस्ये यहूदी तेब मीयूजे लाने सूम्दीपीय। 34होर्दे थमयूदे ङूने खिसी चीक्क्य, छ्योम थर्क्य, कोर्रादे ठरीय मेस्ये सेक्क्य। मेस्ये सोम्म्या ङीदे ङू सोम्बो क्यूत्देबे फेरि लङ्रीय।”
याकूब मेस्ये यूहन्नाजे बिन्ती
मत्ती २०:२०-२८
35जब्दियाजे च ङ्ही, याकूब मेस्ये यूहन्ना येशू ट्याने रदेबे यदे, “गुरुज्यू, ङीजे सेम्दे मनब पूरा चीम्मी यदेबे ङी बिन्ती चेने र ख्यङ्।”
36येशूदे थमयूने लोत्दे, “ङैदे नमयूने च चीम्मीस्य मन ख्यङ् स्व?”
37थमयूदे यदे, “नैजे महिमाजे राज्यने ङीयू नङ्ने त्या नैजे स्येत्तेयोर् मेस्ये त्या योन्देयोर् टूङ्स्येपीन्।”
38 #
लूका 12:50
तर येशूदे जवाफ पीन्दे, “नमयू च स्येन हम्ब नमयूदे अन्स्ये। ङैदे थूङब दु:खजे ढोल्कदे नमयूदे थूङ खूइया? कम्ब बप्तिस्मा ङैदे कीन ख्य, हम्ब नमयूदे कीन खूइया?”
39थमयूदे जवाफ पीन्दे, “ङीदे खूइय।”
येशूदे थमयूने यदे, “ङैदे थूङब दु:खजे ढोल्कदे नमयूदे थूङ्क्य, मेस्ये ङैदे चेब बप्तिस्मा नमयूदे चीक्क्य। 40मेस्ये ङैजे स्येत्दे या योन्दे टूङ्से पीनब ङैदे दी, अम्बब सू-सूने परमेश्वरदे तयार चीदे ख्य हम्बयूजेने क्यूक्क्य।”
41अम्ब पो तदेबे सूजो स्यूस्स्या च्यू याकूब, यूहन्नाप्रे प्रोलङ्दे। 42#लूका 22:25,26होर्देमेस्ये थमयूने येशूदे ङू ट्याने कोदेबे यदे, “नमयूने था ख्यङ् सूजो मीयू फ्याने हुकुम चील्लेब यहूदी तेब मीयूदे थमयू फ्याने हुकुम चीक्क्य। होर्दे मी केन्यूदे थमयू फ्याने राज्य चीत्देबे साप्ता हक चील्लीय। 43#मत्ती 23:11; मर्कूस 9:35; लूका 22:26नमयूनेब होर अन्क्यूर्। मेस्ये नमयू नङ्ने सू मी केन् क्यूत्दीङ् रीय, हम्ब मीदे नमयूजे सेवा चेपर्दीय। 44मेस्ये नमयू नङ्ने सू खूम् क्यूरब सेम् चीक्क्य, हम्ब क्वाजे त्वो क्यूरने पर्दीय। 45चेनेयलो मीजे च सेवा प्रेस्स्य यदेबे र दी, मेस्ये सेवा पीनने र ख्यङ्, होर्दे कूम मीयूने चूक्दीमेब लू फाने रङ्सेजे प्राण पीनने र ख्यङ्।”
म्या अन्तङब बारतिमै
मत्ती २०:२९-३४; लूका १८:३५-४३
46होर्दे ङ्येदे थमयू यरीहोने रदे, मेस्ये येशू ङूजे स्यूस्स्यायूप्रे मीहुल केन्प्रे यरीहोदे योङ्रीनूब तिमै यबजे च बारतिमै, स्य्वादे चब म्या अन्तङब मी त्या लम्जे कूनत्याने टून ख्य। 47कन्छ्वाब ङूदे ङू नासरतजे येशू ख्यङ् यब तदे, हन्छ्वाब पारा पूत्देबे ङूदे यदे, “ओ येशू, दाऊदजे च, ङै फ्याने दया चीम्मी।”
48कूम मीयूदे ङूने पारा अम्पूल्लाची यदेबे बोङ्बे क्यम्दे। तर ङूदे थेप् के केन् योन्देबे पारा पूत्दे, “ओ दाऊदजे च ङै फ्याने दया चीम्मी।”
49होर्दे येशू केत्रा मेर्दे मेस्ये, “ङूने छो-को।”
यदे, होर्दे थमयूदे हम्ब म्या अन्तङब मीने येरे यदेबे कोदे, “अम्फलाची, लङ्, येशूदे नने कोन ख्यङ्।” 50होर्दे रङ्सेदे कूनब टूकू छाबीदेबे ङू ग्वे-लङ्देबे येशू ट्याने रदे।
51येशूदे ङूने लोत्दे, “नने ङैदे च चीम्मीस्य मन?”
हम्ब म्या अन्तङब मीदे येशूने, “गुरुज्यू, ङैजे म्यादे तङ खूस्य” यदे।
52होर्दे येशूदे ङूने यदे, “प्र, नैजे विश्वासदे न तम्क्यूरे ख्यङ्”, हन्छ्वाबने ङूजे म्या तङ ख्व क्यूत्दे मेस्ये लम्ने येशूजे ङ्ये-ङ्ये गीलीदे।
Currently Selected:
मर्कूस 10: सर् कबुल
Highlight
Share
Copy
Want to have your highlights saved across all your devices? Sign up or sign in
Ghale New Testament © Nepal Bible Society, 2011.
