मर्कूस 11
11
यरूशलेमने येशू गीलेब
मत्ती २१:१-११; लूका १९:२९-३८; यूहन्ना १२:१२-१५
1थमयू यरूशलेम ट्याने जैतून गङ्जे नने बेथफागे मेस्ये बेथानिया यब नेने फ्योरदे, हैयाने येशूदे ङूजे स्यूस्स्यायू नङ्ने स्यूस्स्या ङ्हीने येरे यदे कूल्पीदेबे, 2“नमयूजे खूम्ने ख्यब तने प्र, मेस्ये दीनीसेमे सूये अन्डब प क्यूरब गधा चीद त्या नमयू फ्योबबने तूय हम्बने हैयादे फादेबे नमयूदे यैयाने सीक। 3होर्दे कोइ मीदे नमयूने, अम्ब च चेमे यदेबे लोल्लो, प्रभुने अम्ब चैदे ख्यङ् मेस्ये ङूदे खात्याने अम्ब ल्वाबीय यदेबे य।”
4होर्दे थमयू गीलीदे, हम्ब प क्यूरब गधा चीद गल्लीने कीम्त्याजे फीने ख्यो ल तेले च्यूनेब तङ्दे मेस्ये थमयूदे फादे। 5हैयाने मेर्नब मीयूनङ्ने कोइ-कोइदे थमयूने लोत्दे, “प क्यूरब गधा चीद फादेबे नमयूदे च चेमे?” 6येशूदे थमयूने च्योलप्रने थमयूदे यदे, मेस्ये हम्ब मीयूदे येशूजे स्यूस्स्यायूने प्रस्ये पीन्दे। 7स्यूस्स्यायूदे प क्यूरब गधा चीद येशू ट्याने रेत्दे, मेस्ये थमयूजे कोलायू हम्ब गधा फ्याने तीक्मीदे मेस्ये येशू हम्ब फ्याने टदेबे गीलीदे। 8लम्ने कूम मीयूदे थमयूजे टूकूयू पूखूइयू तीक्मीदे मेस्ये सूजो मीयूदे पखने ख्यब तङ्बोजे स्यालेम्यू चदे कूदीदेबे लम्ने तीक्मीदे। 9#भजनसंग्रह 118:25,26येशूजे खूम्खूम् प्रेनब मेस्ये ङ्ये-ङ्येदे रेनब मीयूदे बोङ्बे के केन् योन्देबे परमेश्वरजे जै-जै चीत्दे,
“होसन्ना!” “परम्प्रभुजे मीन्ने रबने परमेश्वरदे असी पीन्स्य!”
10“ङीनजे प दाऊद मूरुम्जे रब राज्यने परमेश्वरदे असी पीन्स्य!” “पात्ताफ्याजे स्वर्गने होसन्ना!”
11येशू यरूशलेमने फ्योरदेबे मन्दिर नङ्ने गीलीदे। ङूदे ती-छो ख्यब सेयू ले जेन ङ्येदे नोरे क्यूरीदेबे बाह्रा जना स्यूस्स्यायूप्रे ङू बेथानियाने गीलीदे।
येशूदे मन्दिर शुद्ध चीत्दे
मत्ती २१:१२-१७,१८-२२; लूका १९:४५-४७; यूहन्ना २:१३-१६
12नैदेरेदे थमयू बेथानियादे रेनूब येशू ठीदे। 13होर्दे चीन्तङ्दे अञ्जीरजे लेम् ख्यब तोङ्बो तङ्देबे हम्ब तोङ्बोने सी लोनीयी च यदेबे येशू हैयाने गीलीदे, मेस्ये हैयाने फ्योयीब ङूदे तोङ्बोजे लेम् त्यामे तङ्दे, चेनेयलो हम्ब बीलने अञ्जीरजे सी ल्वब सेमे अन्क्यूर ख्य। 14होर्दे येशूदे हम्ब तोङ्बोने यदे, “जेम्सेमेस्ये सूदेये नैजे सी कलङ्बेये अन्चस्य।” अम्ब पो ङूजे स्यूस्स्यायूदे तदे।
15होर्दे यरूशलेमने फ्योरमेस्ये येशू मन्दिर नङ्ने गीलीदे, होर्दे मन्दिरने कीन्नब सोङ्नब मीयूने फीने योम्बीदे, मेस्ये नोर् स्योलब मीयूजे टेबलयू मेस्ये पूर्व सोङ्ब मीयूजे टूङ नेयू ग्यर्बीदे। 16येशूदे सूनेये मन्दिरदे चैत्याये कूबसे अम्पीन्। 17#यशैया 56:7; यर्मिया 7:11होर्दे येशूदे मीयूने शिक्षा पीन्देबे यदे, “च येरे लिख्दीये ते? ‘ङैजे कीम् टक्क मीयूजे प्रार्थना चेब कीम् यदेबे यीय’ तर नमयूदे अम्बने खूमान्यू टूङ ने चे ख्यङ्।”
18होर्दे पूस्र्या केन्यू मेस्ये यहूदी पन्डेयूदे अम्ब पो तदेबे येशूने केर्बे से यदेबे थमयूदे ह्वे चीत्दे। चेनेयलो येशूप्रे थमयू फ ख्य, मेस्ये मीहुल क्वाने ङूजे शिक्षाने सोरो हार्मन्दीन ख्य।
19होर्दे नूस्यूङ् क्यूट्टब येशू सहरदे फीने योङ्देबे गीलीदे।
विश्वासजे शक्ति
मत्ती २१:१८-२२
20नेदेरे नप्दे खूम्जे लम्दे ल्वारब थमयूदे हम्ब अञ्जीरजे तोङ्बो तङ्दे हम्ब टदे मो छ सजने खरे ख्य। 21होर्दे पत्रुसदे हम्ब येशूदे यब पो ह्वेरदे मेस्ये ङूदे येशूने यदे, “गुरुज्यू, ले नदे श्राप पीनेब, अञ्जीरजे तोङ्बोब खर्यो।”
22येशूदे थमयूने जवाफ पीन्दे, “परमेश्वरने विश्वास ची। 23#मत्ती 17:20; १ कोरिन्थी 13:2तम्दम् पो ङ नमयूने यीय, सूदे रङ्से सेम्ने शङ्का अन्ची तर रङ्सेदे यब पो पूरा क्यूक्क्य यदेबे परमेश्वरने विश्वास चीत्देबे अम्ब गङ्ने ‘न ग्वे ल्वाबदेबे समुद्रने तल्ब’ यदे यलो, ङूदे यब हम्ब पो क्वाने क्यूक्क्य। 24होरेक्यूत्देबे ङ नमयूने यीय, नमयूदे परमेश्वरने प्रार्थना चीत्देबे स्यब सेयू क्वाने तम्दम्ने प्रे ख्यङ् यदेबे विश्वास ची, मेस्ये नमयूदे प्रेक्क्य। 25#मत्ती 6:14,15कन्छ्वाब नमयू परमेश्वरप्रे प्रार्थना चेने मेर्क्य, हन्छ्वाब सूजो मीयूजे विरुद्धने चत्या ख्यङ्लो हम्ब मीने क्षमा पीन्। मेस्ये स्वर्गने ख्यब नमयूजे परमेश्वरदेये नमयूजे पापने क्षमा पीन्क्य। 26[तर नमयूदे सूजो मीयूने क्षमा अम्पीन्लो, स्वर्गने ख्यब नमयूजे प परमेश्वरदेये नमयूजे अपराधयू क्षमा पीन्स्ये त्वो।]#११:२६ मीयूङ्जे कोइ कोइ ग्रीक पाण्डूलिपीयूने अम्ब पद अन्लीख्दीये ख्यङ्।
येशूजे हकजे बारेने ल्वेब
मत्ती २१:२३-२७; लूका २०:१-८
27फेरि थमयू यरूशलेमने ल्वारदे। मेस्ये येशू मन्दिरने ती-छो प्रेनूब पूस्र्या केन्यू, यहूदी पन्डेयू मेस्ये धर्म-गुरुयू, ङू ट्याने रदे। 28थमयूदे येशूने लोत्दे, “कम्ब हकदे नदे अम्ब कामयू चे? अम्ब कामयू चेब हक नने सूदे पीन्दे?”
29येशूदे थमयूने जवाफ पीन्दे, “ङ नमयूने पोत्या लोक्क्य, मेस्ये नमयूदे हम्ब पोजे जवाफ पीन्, मेस्ये कम्ब हकदे ङैदे अम्ब काम चीन्न ख्यङ्, हम्ब नमयूने यीय। 30यूहन्नादे पीनब बप्तिस्मा स्वर्गदे यी मीदे, ङैने जवाफ पीन्।”
31होर्दे थमयू त्यादे त्याने ती ल्वे छो ल्वे चीत्दे, “ ‘स्वर्गदे’ ये यलो ‘नमयूदे परमेश्वरने चेने विश्वास’ अन्चे यदेबे येशूदे यीय। 32तर ‘मीयूदे येयलो’ केर्बे य?” येरे यने थमयू मी हुल तङ्देबे फदे। चेनेयलो क्वादेने यूहन्ना तम्दम्ने अगमवक्ता यदेबे मन्दे ख्य।
33होर्दे थमयूदे येशूने जवाफ पीन्दे, “ङीने था त्वो।”
येशूदे थमयूने यदे, “ङैदे केर्दे अम्ब हक प्रेत्देबे अम्ब कामयू चीन्न ख्यङ्, ङैये नमयूने अन्-य।”
Currently Selected:
मर्कूस 11: सर् कबुल
Highlight
Share
Copy
Want to have your highlights saved across all your devices? Sign up or sign in
Ghale New Testament © Nepal Bible Society, 2011.
