मर्कूस 2
2
पक्षाघात बीदजे नव तम् चीम्मेब
मत्ती ९:१-८; लूका ५:१७-२६
1ते दिनङ्येदे येशू कफर्नहुम यब नेने ल्वारदे, मेस्ये मीयूदे ङू कीम्ने ख्यङ्, यब तदे। 2होर्दे हैयाने सोरो कूम मीयू रूप् क्यूत्दे, थमयू हैयाने अन्-यूक्, अन्छ्वा सेमेक्यूत्दे यी ख्यो-लदेमेस्ये फीनेसेमेने मी अन्-यूक क्यूत्दे, हन्छ्वाब येशूदे थमयूने परमेश्वरजे वचन स्योन्न ख्य। 3हैयाने मी स्यीदे पक्षाघातदे नव त्या प्लेत्देबे येशू ट्याने रेत्दे। 4मी हुलदे चीत्देबे येशूजे ट्याने हम्ब नव कूब अङ्ख्व क्यूरीदेबे थमयूदे ङू टूनब कीम्जे त्वो धूरी ल्वादेबे हम्ब नव ङ्यूम्नब कपतीक सजने मो ङू ट्याने तेल्पीदे। 5येशूदे थमयूजे विश्वास तङ्देबे हम्ब पक्षाघातजे नवने यदे, “च, नैजे पापयू क्षमा क्यूत्दे।”
6मेस्ये हैयाने कोइ यहूदी पन्डेयू टून ख्य, होर्दे रङ्सेजे सेम्ने येरे यदेबे मन्न ख्य, 7“अम्ब मीदे चेने येर्बे क्यम? अम्ब परमेश्वरजे न प्वे ख्यङ्! परमेश्वरदेत्यामे पाप क्षमा चे खूइय सूजो सू मीदेये चे अन्खू?”
8होर्दे थमयूदे येरे मन्नब पो येशूदे आत्माने था प्रेत्देबे थमयूने यदे। “चेने नमयू रङ्से सेम्ने येरे मन्न? 9पक्षाघात बीदजे नवने, ‘नैजे पापयू क्षमा क्यूत्दे,’ यब सूस्योलो ख्यङ्यी, ‘लङ्, नैजे कपतीक प्लेत्देबे प्र’ यब सूस्योलो ख्यङ्? 10तर पृथ्वीने पाप क्षमा चेब हक मीजे चने ख्यङ् यदेबे नमयूदे स्येस्य” होर्दे येशूदे हम्ब पक्षाघातजे नवने यदे, 11“ङ नने यीय, लङ्, नैजे कपतीक प्लेत्देबे कीम्ने प्र।” 12मेस्ये खात्याने हम्ब नव लङ्देबे रङ्से कपतीक प्लेत्देबे क्वाजे खूम्देने गीलीदे। अन्छ्वासेमे क्यूत्दे यी, मीयू क्वाने हार्मन्दीकदे। “येर कामब ङीदे कलङ्बेये अन्तङ्!” यदेबे थमयूदे परमेश्वरजे महिमा चीत्दे।
येशूदे लेवीने क्वब
मत्ती ९:९-१३; लूका ५:२७-३२
13फेरि येशू त्याफे समुद्रजे नने गीलीदे। होर्दे मी हुल केन् त्या ङू ट्याने फूङ् क्यूट्टदे, मेस्ये ङूदे थमयूने शिक्षा पीन्दे। 14होर्दे ङ्येदे प्रेनूब येशूदे अल्फयसजे च लेवी स्यर्म लङब अड्डने टूनब तङ्दे, मेस्ये ङूने यदे, “ङै ङ्ये-ङ्ये ख” लेवी लङ्देबे ङूजे ङ्येदे गीलीदे।
15येशू लेवीजे कीम्ने कङ् चने टूङ्ब स्यर्म लङब कूम मीयू मेस्ये पापीयूये येशू मेस्ये ङूजे स्यूस्स्यायूप्रे टून ख्य। चेनेयलो येशू ङ्ये-ङ्ये प्रब मीयू कूम ख्य। 16पापीयू मेस्ये स्यर्म लङब मीयूप्रे येशू चसे-चेनब तङ्देबे फरिसीयू दलजे यहूदी पन्डेयूदे ङूजे स्यूस्स्यायूने यदे, “चेने ङू स्यर्म लङयू मेस्ये पापीयूप्रे टूङ्देबे च?”
17अम्ब पो तदेबे येशूदे थमयूने यदे, “बीद त्वब मीने डाक्टर अन्चैदी, तर नव मीने त्या कर्पर्दीय। ङ धर्मी मीयूजे लागि रदी, तर पापीयूने क्वने र ख्यङ्।”
बर्तजे बारेने ल्वेब
मत्ती ९:१४-१७; लूका ५:३३-३९
18यूहन्नाजे स्यूस्स्यायू मेस्ये फरिसीयू बर्त टूङ ख्य। कोइ मीयू रदेबे येशूने यदे, “यूहन्नाजे स्यूस्स्यायू मेस्ये फरिसीयू बर्त टूङ्क्य, तर नैजे स्यूस्स्यायू चेने बर्त अन्टूङ?”
19येशूदे थमयूने यदे, “दूल थमयूप्रे टूङ्दा जन्तीयूदे बर्त टूङ्क्या? कन्छ्वासेमे दूल थमयूप्रे टूङ्क्य हन्छ्वासेमे थमयूदे बर्त अन्टूङ्। 20तर दिन रीय, हन्छ्वाब दूल थमयूप्रे स्यागीय, मेस्ये थमयूदे हम्ब दिनने बर्त टूङ्क्य।
21“सूदेये ङीङ् कोलाने सर् कोलाजे टलो अङ्ख्य, नत्र खेयेब सर् टलो रूम्बदेबे ङीङ् कोला प्राङ्गीय, या खूम्जे यली सोरो थेप् प्र्याङ्बीय। 22होर्दे सूदेये अङ्गुरजे ची सर् ङीङ् खूस्यजे पीजीने अन्चङ्, चेनेयलो हम्ब अङ्गुरजे चीदे ङीङ् खूस्यजे पीजीयू पर्गीय, मेस्ये अङ्गुरजे ची मेस्ये पीजी काम अन्लादे क्यूप्पीय। तर अङ्गुरजे ची सर् खूस्यजे पीजी सर्ने चङ्क्य।”
आराम टूङब दिनजे प्रभु
मत्ती १२:१-१४; लूका ६:१-११
23 #
व्यवस्था 23:25
आराम टूङब दिन त्याने येशू बली लैदीयेब रङ्दे प्रेन ख्य। हैयादे प्रेनूब ङूजे स्यूस्स्यायूदे प्रेये-प्रेये सेजे ट थ्वने सुरु चीत्दे। 24हम्ब तङ्देबे फरिसीयूदे येशूने यदे, “ले, आराम टूङब दिनने चे अङ्क्यूरब काम थमयूदे चेने चे?”
25येशूदे थमयूने यदे, “च नमयूदे कलङ्बेये अन्-छ्य्वे? दाऊद मेस्ये ङूप्रे ख्यब ख्योन्यू ठीदेबे चसे चेत्याये त्वब बीलने दाऊददे च चीत्दे? 26#लेवी 24:9#१ शमूएल 21:1-6पात्ता नङ्ने केन् पूस्र्या अबियाथारजे पलोने दाऊद परमेश्वरजे कीम्ने क्योइदेबे परमेश्वरने चेर्दीयेब क्यङ् चदे, मेस्ये ङूप्रे ख्यबयूनेये पीन्दे। हम्ब क्यङ् पूस्र्यायूदेत्या च क्यूर ख्य, सूजो सूदेये च अन्क्यूर ख्य।”
27होर्देङ्येदे येशूदे थमयूने यदे, “आराम टूङब दिन मीने यदेबे बन्दीये ख्यङ्, मी आराम टूङब दिनजे यदेबे बन्दे दी। 28होरेक्यूत्देबे मीजे च आराम टूङब दिनजेये प्रभु ख्यङ्।”
Currently Selected:
मर्कूस 2: सर् कबुल
Highlight
Share
Copy
Want to have your highlights saved across all your devices? Sign up or sign in
Ghale New Testament © Nepal Bible Society, 2011.
