मर्कूस 8
8
येशूदे हजार स्यी मीयूने चसे पीनब
मत्ती १५:३२-३९
1तेदिन ङ्येदे फेरि मीहुल केन्त्या फूङ्क्यूत्दे, मेस्ये थमयूप्रे चसे चैत्याये त्व ख्य। येशूदे स्यूस्स्यायूने कोदेबे यदे, 2“अम्ब मीहुलने ङ सोरो ङ्येम ख्यङ्, चेनेयलो थमयू ङैप्रे टूङ्देबे सोम्म्या क्यूत्दे, मेस्ये थमयूप्रे चसे चैत्याये त्वो। 3होर्दे थमयूने चसे अम्पीन्लाबे तक्प कीम्ने कूल्बीलो थमयू ठीदेबे लम्ने मूस्ल प्रीय। थमयू कोइ चीन्तङ्दे र ख्यङ्।”
4येशूजे स्यूस्स्यायूदे ङूने लोत्दे, “येर मी अन्टोङब चनमन नेने केर्दे रेत्देबे थमयूने क्यङ् चसेपीन्?”
5येशूदे स्यूस्स्यायूने लोत्दे, “नमयूप्रे क्यङ् कोला ख्यङ्?”
थमयूदे, “ङ्यी त्या ख्यङ् यदे।”
6येशूदे मीहुलने च्येने टूङ् यदे हुकुम पीन्देबे, ङूदे हम्ब क्यङ् ङ्यी लाने टेल्देबे धन्यवाद पीन्देबे क्यङ् ठूङ्गा पूत्दे, मेस्ये मीयूने पीन् यदेबे स्यूस्स्यायूने पीन्दे। थमयूदे मीयूने कोम्मीदे। 7थमयूप्रे चीद ङये छीत्या ख्य, मेस्ये येशूदे असी पीन्देबे ङूजे स्यूस्स्याने यदे, “मीहुलने कोम्मी।” 8होर्दे मीयूदे कलाबे चदे, मेस्ये लम रब क्यङ् फाच्यायू स्यूस्स्यायूदे टोलो ङ्यी म्यूर्-म्यूर् रूप् पूत्दे। 9हैयाने चब मीयू हजार स्यीला ख्य, येशूदे थमयूने कीम्ने कूल्बीदे। 10होर्देङ्येदेने येशू रङ्सेजे स्यूस्स्यायूप्रे डुङ्गाने टदेबे दलमानुथा यब नेने गीलीदे।
11 #
मत्ती 12:38; लूका 11:16 फरिसीयू येशू ट्याने रदेबे ङूप्रे सवाल-जवाफ चेमेदे, मेस्ये ङूने जाँच चेने स्वर्गजे च्यूनू त्या स्यदे। 12#मत्ती 12:39; लूका 11:29येशूदे स रेङ थेन्देबे यदे, “अम्ब पुस्ताजे मीयूदे चेने च्यूनू मे? तम्दम्ने, ङ नमयूने यीय, अम्ब पुस्ताजे मीयूने च्यूनू चेये अम्पीन्।” 13होर्दे थमयूने पोङ्यीदेबे येशू फेरि डुङ्गाने टदेबे तीप्ल्या गीलीदे।
फरिसीयू मेस्ये हेरोदजे खमीर
मत्ती १६:५-१२
14स्यूस्स्यायूदे क्यङ् रेब येल्गदे, मेस्ये थमयूप्रे डुङ्गाने क्यङ् तीत्या त्या ख्य। 15#लूका 12:1येशूदे थमयूने यदे, “नमयू फरिसीयूजे मेस्ये हेरोदजे खमिरप्रे होस्स्यार क्यूर्।”
16“तर ङीनप्रे क्यङ् त्वोदेबे येशूदे येरे ययी च” यदेबे स्यूस्स्यायू त्यादे त्याप्रे सवाल-जवाफ चीत्दे।
17येशूदे अम्ब था प्रेत्देबे थमयूने यदे, “नमयूप्रे क्यङ् त्वो यदेबे नमयू चेने त्यादे त्याप्रे सवाल-जवाफ चे? च नमयूदे चूजोसेमेने अन्तङ या अन्क्व? नमयूजे सेम् बोदो क्यूरे औ? 18#यर्मिया 5:21; इजकिएल 12:2; मर्कूस 4:12म्या ख्यङ्लीने नमयूदे अन्तङ्? न ख्याङ्लीने नमयूदे अन्त? नमयूदे अन्ह्वेर, 19कन्छ्वाब ङैदे क्यङ् ङ हम्ब हजार ङ मीयूजे खूम्दे क्य्वे ख्य, हन्छ्वाब लम रब क्यङ् फाच्यायू कोला टोलो नमयूदे रूप् पूत्दे?”
थमयूदे येशूने “बाह्र” यदेबे जवाफ पीन्दे।”
20“होर्दे हम्ब क्यङ् ङ्यीब हजार स्यी मीयूदे चदेबे लम रब क्यङ् फाच्यायू कोला टोलो नमयूदे रूप् पूत्दे?”
थमयूदे ङूने “ङ्यी यदे।”
21होर्दे येशूदे थमयूने यदे, “चूजोसेमेने क्व अङ्ख्व?”
बेथसेदाजे म्या अन्तङ्ब मी
22होर्देङ्येदे येशू बेथसेदाने फ्योरदे, हैयाने मीयूदे म्या अन्तङ्ब मी त्या ङू ट्याने रेत्दे, मेस्ये ङूने छूम्मी यदेबे बिन्ती चीत्दे। 23येशूदे हम्ब म्या अन्तङ्ब मीजे ला चूङ्देबे ङूने तदे फीने रेत्दे, मेस्ये हम्ब मीजे म्याने छ्योम पूत्देबे हम्ब फ्याने रङ्से ला हीत्देबे ङूने लोत्दे, “नदे तेते तङ खूवा?”
24होर्दे हम्बदे तो लेत्देबे यदे, “ङैदे मीयूने तोङ्बोप्र प्रेनब तङ्को।”
25होर्दे येशूदे फेरि ङूजे म्याने ला हीत्दे, मेस्ये ङूदे इसारा थूङ् लेत्दे। ङूजे रङ्से म्यादे तङ ख्व क्यूत्दे मेस्ये साप्ता थोकने चेलाबे तङ खूदे। 26होर्दे येशूदे मीने हम्ब ततेले प्रने अम्प्रलाची यदेबे ङूजे कीम्ने कूल्बीदे।
पत्रुसजे स्वीकार
मत्ती १६:१३-१६; लूका ९:१८-२१
27येशू मेस्ये ङूजे स्यूस्स्यायू कैसरिया फिलिप्पीजे तयूने गीलीदे। लम्ने ङूजे स्यूस्स्यायूने येरे यदेबे लोत्दे, “मीयूदे ङ सू यदेबे येको स्व?”
28 #
मर्कूस 6:14,15; लूका 9:7,8 थमयूदे येशूने यदे, “कोइदे य ख्यङ्, ‘बप्तिस्मा पीनब यूहन्ना।’ सूजो मीयूदे ‘एलिया,’ होर्दे कोइ सूजो मीयूदे य ख्यङ्, ‘अगमवक्तायू नङ्जे त्या ख्यङ्’।”
29 #
यूहन्ना 6:68,69 होर्दे येशूदे थमयूने लोत्दे, “तर नमयूदे च यीय, ङ सू ख्यङ्?”
पत्रुसदे ङूने, “न ख्रीष्ट ख्यङ् यदे।”
30येशूदे अम्ब पो सूनेये चैत्याये अन्स्योल्लाची यदेबे थमयूने बोङ्बे आर्तीदे!
रङ्से सीब पो येशूदे खूम्ने यब
मत्ती १६:२१-२८; लूका ९:२२-२७
31“मीजे चदे कूम छरङ् प्रे पर्दीय, मेस्ये धर्म-गुरुयू, पूस्र्या केन्यू मेस्ये यहूदी पन्डेयूदे अम्मन्दे चीक्क्य मेस्ये सेक्कीय होर्दे सोम्म्या ङ्येदे सोम्बो क्यूत्देबे लङ पर्दीय” यदेबे येशूदे ङूजे स्यूस्स्यायूने लोम्मीदे। 32येर्बे येशूदे हम्ब पो स्यूस्स्यायूने चेलाबे लोम्मीदे। तर अम्ब पो तदेबे पत्रुसदे येशूने तीला कूदीदेबे फ्राजीदे।
33तर येशू ल्वादेबे रङ्से स्यूस्स्यायू तेले लेत्देबे पत्रुसने फ्राजीदे, “ओ शैतान, ङै ट्यादे प्र, चेनेयलो नैजे सेम् परमेश्वर तेले त्वो, तर मीयूतेले ख्यङ्।”
34 #
मत्ती 10:38; लूका 14:27 होर्देङ्येदे येशूदे ङूजे स्यूस्स्यायूप्रे मीहुलने कोदेबे थमयूने यदे, “सू ङैजे स्यूस्स्या क्यूत्दीङ्रीय ङूदे रङ्सेने माया मर्दे पर्दीय होर्दे रङ्से क्रूस प्लेत्देबे ङै ङ्येदे रस्य। 35#मत्ती 10:39; लूका 17:33; यूहन्ना 12:25चेनेयलो रङ्सेजे जीया जूक्तेमेब सेम् चेब मीदे जीया अम्प्रे, तर रङ्से प्राण ङैजे लागि मेस्ये सूगब खबरजे लागि पीनब मीदे जीया प्रेक्क्य।
36चेनेयलो मीदे संसार टक्कने ङूजे लाने कीन्देबे रङ्से प्राणब मल्पीलो ङूने चै फाइदा क्यूक्क्य? 37या मीदे रङ्से प्राणजे भा च पीन खूइय? 38अम्ब पापी मेस्ये वेश्य पुस्ताने सूदे ङ मेस्ये ङैजे शिक्षाने त्वाय, मीजे चदेये पजे महिमा टेल्देबे पवित्र स्वर्गदूतयूप्रे रब ङूने रङ्से मी यने त्वाय।”
Currently Selected:
मर्कूस 8: सर् कबुल
Highlight
Share
Copy
Want to have your highlights saved across all your devices? Sign up or sign in
Ghale New Testament © Nepal Bible Society, 2011.
