ປະຖົມມະການ 22
22
ພຣະເຈົ້າສັ່ງອັບຣາຮາມໃຫ້ຖວາຍອີຊາກ
1ຕໍ່ມາ ພຣະເຈົ້າໄດ້ລອງໃຈອັບຣາຮາມ; ພຣະອົງເອີ້ນເພິ່ນວ່າ, “ອັບຣາຮາມເອີຍ” ແລະອັບຣາຮາມກໍຕອບວ່າ, “ໂດຍ ຂ້ານ້ອຍກຳລັງຟັງຢູ່.”
2ພຣະເຈົ້າສັ່ງວ່າ, “ເອົາອີຊາກລູກຊາຍຂອງເຈົ້າ ຄືລູກຊາຍຄົນດຽວທີ່ເຈົ້າຮັກຫລາຍນັ້ນ ໄປທີ່ແຄວ້ນໂມຣິຢາ. ໃຫ້ເຈົ້າເຜົາລາວຖວາຍເປັນເຄື່ອງບູຊາແກ່ເຮົາຢູ່ເທິງພູເຂົາແຫ່ງໜຶ່ງ ຊຶ່ງເຮົາຈະບອກເຈົ້າທີ່ນັ້ນ.”
3ອັບຣາຮາມຈຶ່ງລຸກຂຶ້ນແຕ່ເຊົ້າມືດ ຈັດຕຽມເອົາຟືນເພື່ອເຜົາເຄື່ອງບູຊາ, ເອົາເຄື່ອງຂອງບັນທຸກໃສ່ເທິງຫລັງລໍ ແລະເອົາອີຊາກກັບຄົນຮັບໃຊ້ສອງຄົນໄປນຳຕົນ. ພວກເຂົາອອກເດີນທາງມຸ່ງໜ້າໄປສູ່ບ່ອນທີ່ພຣະເຈົ້າໄດ້ບອກ. 4ເມື່ອເດີນທາງມາໄດ້ສາມວັນແລ້ວ ອັບຣາຮາມກໍຫລຽວເຫັນບ່ອນນັ້ນແຕ່ໄກ. 5ແລ້ວເພິ່ນກໍກ່າວແກ່ຄົນຮັບໃຊ້ວ່າ, “ພວກເຈົ້າກັບລໍ ຈົ່ງຖ້າຂ້ອຍຢູ່ທີ່ນີ້. ຂ້ອຍກັບລູກຈະຂຶ້ນໄປນະມັດສະການພຣະເຈົ້າຢູ່ເທິງພຸ້ນ ແລະຈະກັບມາຫາພວກເຈົ້າ.”
6ອັບຣາຮາມເອົາຟືນສຳລັບເຜົາເຄື່ອງບູຊາໃຫ້ອີຊາກແບກຂຶ້ນໄປ ສ່ວນເພິ່ນເອງຖືມີດກັບຖ່ານໄຟທີ່ກຳລັງລຸກຢູ່. ເມື່ອເດີນທາງໄປນັ້ນ 7ອີຊາກເວົ້າກັບອັບຣາຮາມວ່າ, “ພໍ່ເອີຍ”
ພໍ່ຈຶ່ງຕອບວ່າ, “ແມ່ນຫຍັງລູກ?”
ອີຊາກຖາມວ່າ, “ຟືນກັບໄຟກໍມີແລ້ວ, ແຕ່ລູກແກະທີ່ຈະເຜົາບູຊານັ້ນຢູ່ໃສ?”
8ອັບຣາຮາມຕອບວ່າ, “ພຣະເຈົ້າຈະຈັດຫາໃຫ້ເອງ.” ແລ້ວສອງພໍ່ລູກກໍຍ່າງຕໍ່ໄປ.
9ເມື່ອເດີນທາງມາຮອດບ່ອນທີ່ພຣະເຈົ້າໄດ້ບອກໄວ້ແລ້ວ ອັບຣາຮາມໄດ້ສ້າງແທ່ນບູຊາຂຶ້ນ ແລະຈັດເອົາຟືນວາງໄວ້ເທິງແທ່ນນັ້ນ. ເພິ່ນມັດລູກຊາຍຂອງຕົນວາງໄວ້ທີ່ກອງຟືນເທິງແທ່ນບູຊາ. 10ແລ້ວເພິ່ນກໍຈັບເອົາມີດຕຽມຈະລົງມືຂ້າ 11ແຕ່ໃນທັນໃດນັ້ນ ເທວະດາຂອງພຣະເຈົ້າຢາເວໄດ້ເອີ້ນມາແຕ່ສະຫວັນວ່າ, “ອັບຣາຮາມ ອັບຣາຮາມເອີຍ!”
ເພິ່ນຈຶ່ງຕອບວ່າ, “ໂດຍ ຂ້ານ້ອຍກຳລັງຟັງຢູ່.”
12ແລະພຣະອົງໄດ້ກ່າວວ່າ, “ຢ່າທຳຮ້າຍຫລືເຮັດຫຍັງແກ່ເດັກຊາຍນີ້ເລີຍ. ບັດນີ້ ເຮົາຮູ້ແລ້ວວ່າ ເຈົ້າເຊື່ອຟັງແລະຢຳເກງພຣະເຈົ້າຢູ່ສະເໝີ; ດ້ວຍວ່າ ເຈົ້າບໍ່ໄດ້ຫວງລູກຊາຍຄົນດຽວຂອງເຈົ້າໄວ້ຈາກພຣະອົງ.”
13ອັບຣາຮາມແນມໄປຮອບໆຕົວ ແລະເຫັນແກະເຖິກໂຕໜຶ່ງ ຊຶ່ງເຂົາຂອງມັນຄາພຸ່ມໄມ້ຢູ່. ເພິ່ນຈຶ່ງໄປອຸ້ມເອົາມັນມາຂ້າຖວາຍແທນລູກຊາຍຂອງຕົນ. 14ອັບຣາຮາມໃສ່ຊື່ບ່ອນນັ້ນວ່າ, “ພຣະເຈົ້າຢາເວຈັດຕຽມໃຫ້” ແລະຈົນເຖິງທຸກວັນນີ້ ຊາວເມືອງກໍຍັງເວົ້າຕໍ່ໆກັນມາວ່າ, “ເທິງພູຂອງພຣະເຈົ້າຢາເວຜູ້ຈັດຫາໃຫ້.”
15ເທວະດາຂອງພຣະເຈົ້າຢາເວກໍໄດ້ເອີ້ນອັບຣາຮາມເປັນເທື່ອທີສອງມາແຕ່ສະຫວັນວ່າ, 16 “ເຮົາຂໍສາບານໃນນາມຂອງເຮົາຄືພຣະເຈົ້າຢາເວຜູ້ກຳລັງກ່າວຢູ່ນີ້ວ່າ, ເຮົາຈະອວຍພອນເຈົ້າຢ່າງຫລວງຫລາຍ. ເພາະເຈົ້າໄດ້ເຮັດຕາມສິ່ງທີ່ເຮົາບອກ ແລະບໍ່ໄດ້ຫວງລູກຊາຍຄົນດຽວຂອງເຈົ້າໄວ້; 17ເຮົາຂໍສັນຍາວ່າ ຈະໃຫ້ເຈົ້າມີເຊື້ອສາຍຢ່າງຫລວງຫລາຍ ດັ່ງດວງດາວໃນທ້ອງຟ້າຫລືເມັດດິນຊາຍທີ່ແຄມທະເລ. ເຊື້ອສາຍຂອງເຈົ້າຈະຕີຊະນະສັດຕູທັງປວງ. 18ຊົນຊາດທັງປວງໃນໂລກຈະຂໍຮ້ອງເຮົາໃຫ້ອວຍພອນພວກເຂົາ ດັ່ງທີ່ເຮົາໄດ້ອວຍພອນເຊື້ອສາຍຂອງເຈົ້າ. ເຮົາຈະເຮັດສິ່ງທັງໝົດນີ້ ເພາະເຈົ້າເຊື່ອຟັງຄຳສັ່ງຂອງເຮົາ.” 19ອັບຣາຮາມກັບຄືນມາຫາຄົນຮັບໃຊ້ທັງສອງຂອງຕົນ ແລະພາກັນກັບເມືອເມືອງເບເອນເຊບາ ບ່ອນທີ່ຕົນອາໄສຢູ່.
ບັນດາເຊື້ອສາຍຂອງນາໂຮ
20ຕໍ່ມາ ອັບຣາຮາມກໍຮູ້ວ່າມີລະກາເມຍຂອງນາໂຮນ້ອງຊາຍຂອງຕົນນັ້ນ ມີລູກແປດຄົນດັ່ງນີ້: 21ອູເຊອ້າຍກົກ, ບູເຊນ້ອງຊາຍ, ເກມູເອນພໍ່ຂອງອາຣາມ, 22ເກເສັດ, ຮາໂຊ, ປິນດາດ, ຢິດລັບ ແລະເບທູເອນ 23ຜູ້ທີ່ເປັນພໍ່ຂອງນາງເຣເບກາ. ມີລະກາໄດ້ເກີດລູກຊາຍແປດຄົນນີ້ໃຫ້ນາໂຮ ນ້ອງຊາຍຂອງອັບຣາຮາມ. 24ນາງຣູມາ ເມຍຜູ້ທີສອງຂອງນາໂຮໄດ້ເກີດລູກສີ່ຄົນດັ່ງນີ້: ເຕບາ, ກາຮາມ, ຕາຮັດ ແລະມາອາກາ.
Currently Selected:
ປະຖົມມະການ 22: ພຄພ
Highlight
Share
Copy
Want to have your highlights saved across all your devices? Sign up or sign in
@ 2012 United Bible Societies. All Rights Reserved.
