ມາຣະໂກ 16
16
ພຣະເຢຊູເຈົ້າເປັນຄືນມາຈາກຕາຍ
(ມທ 28:1-8; ລກ 24:1-12; ຢຮ 20:1-10)
1ເມື່ອວັນຊະບາໂຕຜ່ານພົ້ນໄປແລ້ວ ມາຣີໄທມັກດາລາ ມາຣີແມ່ຂອງຢາໂກໂບ ແລະ ນາງຊາໂລເມກໍຊື້ເຄື່ອງຫອມ ເພື່ອເອົາໄປຫົດສົງພຣະສົບຂອງພຣະເຢຊູເຈົ້າ. 2ໃນວັນອາທິດແຕ່ເຊົ້າພໍຕາເວັນກຳລັງຂຶ້ນ ພວກນາງກໍໄປເຖິງອຸບມຸງນັ້ນ. 3ພວກນາງຖາມກັນວ່າ, “ຜູ້ໃດໜໍ ຈະກື່ງກ້ອນຫີນນັ້ນ ອອກຈາກປາກອຸບມຸງໃຫ້ພວກເຮົາ?” 4ແຕ່ພໍເມື່ອພວກນາງແນມເບິ່ງ ກໍເຫັນວ່າຫີນກ້ອນໃຫຍ່ນັ້ນ ຖືກກຶ່ງອອກໄປໄວ້ທາງຂ້າງແລ້ວ (ເພາະເປັນຫີນກ້ອນໃຫຍ່ຫລາຍ). 5ເມື່ອພວກນາງເຂົ້າໄປໃນອຸບມຸງແລ້ວ ກໍໄດ້ເຫັນຊາຍໜຸ່ມຜູ້ໜຶ່ງ ນຸ່ງເສື້ອລ່າມສີຂາວນັ່ງຢູ່ເບື້ອງຂວາ ພວກນາງກໍມີຄວາມສະທ້ານຢ້ານກົວ ຕົກໃຈຫລາຍ. 6ຊາຍໜຸ່ມກ່າວແກ່ພວກນາງວ່າ, “ຢ່າສູ່ຕົກໃຈເລີຍ ພວກນາງມາຊອກຫາເຢຊູໄທນາຊາເຣັດ ຜູ້ຖືກຄຶງໄວ້ທີ່ໄມ້ກາງແຂນ ພຣະອົງເປັນຄືນມາແລ້ວ ພຣະອົງບໍ່ໄດ້ຢູ່ທີ່ນີ້ ເພາະນີ້ແຫຼະ ບ່ອນທີ່ພວກເຂົາວາງພຣະສົບຂອງພຣະອົງໄວ້ 7ບັດນີ້ ຈົ່ງໄປບອກພວກສາວົກຂອງພຣະອົງພ້ອມທັງເປໂຕດ້ວຍ ວ່າ, ‘ພຣະອົງຈະໄປທີ່ແຂວງຄາລີເລກ່ອນເຈົ້າທັງຫລາຍ. ເຈົ້າທັງຫລາຍຈະເຫັນພຣະອົງໃນທີ່ນັ້ນ ຕາມທີ່ພຣະອົງໄດ້ບອກພວກເຈົ້າໄວ້ແລ້ວ.”’
8ສະນັ້ນ ພວກນາງຈຶ່ງຟ້າວແລ່ນອອກໄປຈາກອຸບມຸງ ທັງວຸ້ນວາຍສັບສົນ ຈົນຕົວສັ່ນເຊັນ ແລະຫວາດກົວ. ພວກນາງບໍ່ໄດ້ບອກເລື່ອງນີ້ສູ່ຜູ້ໃດຟັງເພາະຢ້ານ.
ພຣະເຢຊູເຈົ້າປາກົດແກ່ນາງມາຣີໄທມັກດາລາ
(ມທ 28:9-10; ຢຮ 20:11-18)
[9ເມື່ອຮຸ່ງເຊົ້າຂອງວັນອາທິດ ຫລັງຈາກພຣະເຢຊູເຈົ້າ ເປັນຄືນມາຈາກຕາຍແລ້ວ ພຣະອົງໄດ້ປາກົດແກ່ນາງມາຣີໄທມັກດາລາເປັນຜູ້ທຳອິດ ຄືຜູ້ທີ່ພຣະອົງໄດ້ຂັບໄລ່ຜີມານຮ້າຍເຈັດໂຕອອກນັ້ນ. 10ນາງຈຶ່ງໄປບອກພວກທີ່ເຄີຍຢູ່ກັບພຣະອົງ ພວກເຂົາກຳລັງໄວ້ທຸກ ແລະຮ້ອງໄຫ້ຢູ່, 11ເມື່ອພວກເຂົາໄດ້ຍິນວ່າພຣະເຢຊູເຈົ້າມີຊີວິດຢູ່ ແລະທັງໄດ້ຍິນນາງເວົ້າວ່າ ຕົນໄດ້ເຫັນພຣະອົງດ້ວຍ ພວກເຂົາກໍບໍ່ໄດ້ເຊື່ອ.
ພຣະເຢຊູເຈົ້າປາກົດແກ່ພວກສາວົກສອງຄົນ
(ລກ 24:13-35)
12ຫລັງຈາກນັ້ນແລ້ວ ພຣະເຢຊູເຈົ້າກໍໄດ້ປາກົດໃນລັກສະນະໜຶ່ງອີກ ແກ່ສາວົກສອງຄົນ ໃນຂະນະທີ່ພວກເພິ່ນເດີນທາງອອກໄປບ້ານນອກ. 13ທັງສອງໄດ້ກັບຄືນມາບອກສາວົກຄົນອື່ນໆ, ແຕ່ພວກເພິ່ນກໍຍັງບໍ່ເຊື່ອ.
ພຣະເຢຊູເຈົ້າປາກົດແກ່ພວກສາວົກສິບເອັດຄົນ
(ມທ 28:16-20; ລກ 24:36-49; ຢຮ 20:19-23; ກຈກ 1:6-8)
14ພາຍຫລັງນັ້ນ ພຣະເຢຊູເຈົ້າກໍໄດ້ປາກົດແກ່ສາວົກສິບເອັດຄົນ ໃນຂະນະທີ່ພວກເພິ່ນກຳລັງກິນເຂົ້າຢູ່ ພຣະອົງໄດ້ຕຳໜິຕິຕຽນພວກເພິ່ນທີ່ສົງໄສ ແລະດື້ດ້ານທັງບໍ່ເຊື່ອພວກຄົນທີ່ໄດ້ເຫັນພຣະອົງມີຊີວິດຢູ່. 15ແລ້ວພຣະອົງກໍໄດ້ສັ່ງພວກເພິ່ນວ່າ, “ເຈົ້າທັງຫລາຍຈົ່ງອອກໄປທົ່ວໂລກ ປະກາດຂ່າວປະເສີດແກ່ມະນຸດສະໂລກທັງໝົດ. 16ຜູ້ທີ່ເຊື່ອ ແລະຮັບບັບຕິສະມາຈະໄດ້ພົ້ນ ຜູ້ທີ່ບໍ່ເຊື່ອຈະຖືກໂທດ. 17ແລະໝາຍສຳຄັນເຫຼົ່ານີ້ຈະຕິດຕາມຄົນທີ່ເຊື່ອດັ່ງນີ້ຄື: ພວກເຂົາຈະຂັບໄລ່ຜີມານຮ້າຍອອກໄດ້ໃນນາມຂອງເຮົາ ພວກເຂົາຈະເວົ້າພາສາແປກໆໄດ້, 18ພວກເຂົາຈະຈັບງູ ຫລືດື່ມຂອງມີພິດຢ່າງໜຶ່ງຢ່າງໃດ ສິ່ງເຫຼົ່ານີ້ຈະບໍ່ເປັນອັນຕະລາຍແກ່ພວກເຂົາ ເມື່ອພວກເຂົາວາງມືໃສ່ຄົນປ່ວຍ ແລະຄົນປ່ວຍນັ້ນກໍຈະຫາຍດີ.”
ພຣະເຢຊູເຈົ້າຄືນສູ່ສະຫວັນ
(ລກ 24:50-53; ກຈກ 1:9-11)
19ເມື່ອອົງພຣະເຢຊູເຈົ້າໄດ້ກ່າວແກ່ພວກເຂົາແລ້ວ ພຣະອົງກໍຖືກຮັບຂຶ້ນສູ່ສະຫວັນ ນັ່ງທີ່ເບື້ອງຂວາພຣະຫັດຂອງພຣະເຈົ້າ. 20ແລ້ວພວກສາວົກເຫຼົ່ານັ້ນ ກໍອອກໄປປະກາດຂ່າວປະເສີດທົ່ວທຸກທີ່ທຸກບ່ອນ ແລະອົງພຣະຜູ້ເປັນເຈົ້າໄດ້ຮ່ວມງານກັບພວກເພິ່ນ ແລະພຣະອົງໄດ້ຢັ້ງຢືນໃຫ້ເຫັນວ່າ ການປະກາດຂ່າວປະເສີດຂອງພວກເພິ່ນ ເປັນຄວາມຈິງແທ້ ດ້ວຍໝາຍສຳຄັນ ແລະການອັດສະຈັນຕ່າງໆທີ່ເກີດຂຶ້ນນັ້ນ.]
Currently Selected:
ມາຣະໂກ 16: ພຄພ
Highlight
Share
Copy
Want to have your highlights saved across all your devices? Sign up or sign in
@ 2012 United Bible Societies. All Rights Reserved.
