Jɔn 1

Ŋkpa be kamalga na be asheŋ

1Pɔɛŋ nɛ durnya fara na nɛ esa nɛ baa tre Ebɔrɛ be Kamalga na wɔtɔ. Mo nɛ Ebɔrɛ e daa wɔtɔ nɛ mo nɛ Ebɔrɛ malɛ daa la kukoŋwule. 2Pɔɛŋ nɛ durnya fara na nɛ esa nɛ baa tre Kamalga ere nɛ Ebɔrɛ e wɔtɔ. 3Mo so nɛ Ebɔrɛ bɔla n to kusɔ kikɛ. Kusɔ toso kikɛ maŋ wɔtɔ nɛ Ebɔrɛ maŋ bɔla Kamalga na so n to. 4Kamalga na to nɛ ŋkpa kikɛ shi nɛ le be ŋkpa ere malɛ bar kefulto basa to. 5Kefulto na malɛ wɔtɔ nna a nyaŋɛ a fuli tentembiri to, ama tentembiri na malɛ maŋ naŋ pɔɔ kumo so. 6Kanyɛn ko malɛ daa wɔtɔ nɛ baa tre mo Jɔn, nɛ Ebɔrɛ daŋ shuŋi mo durnya to. 7E daŋ ba nna fanɛ shɛdajipo, kumo e la fanɛ e ba ji kefulto na be asheŋ be shɛda, saŋɛ na so, basa beeŋ bɔla mo so n yirda kumo. 8Mannɛ mo gbagba e daa la kefulto na, e daŋ ba nna nɛ e ba ji kefulto na be shɛda. 9Kashenteŋ be kefulto nɛ k bee nyaŋɛ a sa esa kama na e daa ba durnya ere to na. 10Durnya ere to nɛ e daa wɔ a la esa nɛ Ebɔrɛ bɔla mo so n to durnya, ama kumo alɛ daa maŋ pin mo. 11E daŋ ba mo gbagba be efuli so nna, ama mbe basa gbagba daa maŋ sɔ mo. 12Ama bekama nɛ b sɔ mo nseŋ yirda mbe ketre na, e sa bumo ekpa nna nɛ b ki Ebɔrɛ be mbia. 13Mannɛ durnya ere to be ekpa so ŋko dimɛdi be eyur be kayɛlga be ekpa so ŋko kusɔ nɛ esa yili na so nɛ b bɔla ŋ ki Ebɔrɛ be mbia. Ebɔrɛ gbagba be katinto be kesheŋ nna.

14Esa nɛ baa tre Kamalga na daŋ ki dimɛdi nna m ba kaa wɔ anyi to. An wu mbe kemaŋkura nɛ kuwɔr be kakɛ nɛ kashenteŋ bɔlɔ kemaŋkura na to. Le be kemaŋkura ere la mo peya nna ŋkpal e ka la Ebɔrɛ Pibinyɛn koŋwule na so. 15Mbe asheŋ nɛ Jɔn daŋ ji, saŋɛ nɛ e daŋ kaŋɛ le awɔrso na, e yɛ: “Ede be asheŋ nɛ n daa malga, saŋɛ nɛ n daŋ kaŋɛ fanɛ: ‘Esa ko wɔ ma kaman a ba, ama mo e chɔ ma, ŋkpal manɛ so, mo e daŋ ma kebaawɔtɔ ashi Ebɔrɛ be anishito.’ ” 16Mbe kuwɔr be kakɛ nɛ k bɔlɔ mo to felɛlɛ na to nɛ e nɛfa anyi nseŋ kraa wɔtɔ a nɛfa a nɛfa anyi. 17Ŋkpal manɛ so, anebi Mosis so nɛ Ebɔrɛ bɔla m bar mbra na, ama kuwɔr be kakɛ nɛ kashenteŋ bre shi Yesu Kristo so nna.

18Esa kama maŋ naŋ wu Ebɔrɛ kenishiso. Ebinyɛn koŋwule, nɛ e tase m mata Ebɔrɛ na, nawule e ŋini basa kananɛ Ebɔrɛ du.

Jɔn kabɔrɛbɛrpo be kubɔya be asheŋ

(Matiu 3:1-12; Maak 1:1-8; Luuk 3:1-18)

19Kachako Jerusalɛm to be Juwebi be benimuana shuŋi bɔrɛmatapoana nɛ Livaiebi ko Jɔn kutɔ fanɛ b ba bishi mo le: “Nuso be esa e la fo?” 20Ndoŋ nna nɛ Jɔn bugi to nɛnɛ ŋ kaŋɛ bumo, e yɛ: “Mannɛ ma e la Mesaya na.” 21Ndoŋ nna nɛ b naŋ bishi mo: “To, nɛ nuso be esa e la fo? Anebi Elaija e la fo a?” Nɛ Jɔn kaŋɛ: “Ayai, mannɛ anebi Elaija e la ma.” Nɛ b naŋ bishi mo le: “Anebi nɛ e bee ba na e la fo a?” Nɛ Jɔn yɛ: “Ayai.” 22Ndoŋ nna nɛ b kaŋɛ mo: “Jande, kaŋɛ anyi esa nɛ e la fo, ŋkpal manɛ so, a daga fanɛ an nya kusɔ ko n ya kaŋɛ bumo nɛ b shuŋi anyi na. Manɛ nɛ fo kɔ nɛ fo kaŋɛ anyi fo asheŋ?” 23Nɛ Jɔn ta anebi Aizaaya be mmalga ŋ kaŋɛ bumo le: “Ma e la esa nɛ mbe ebɔl bee ponte ashi kiyi to a kaŋɛ fanɛ: ‘Men lɔŋɛ Enyɛnpe be ekpa niŋiso n sa mo nɛ e bɔla so na.’ ”

24Ndoŋ nna nɛ mbɔ nɛ Efarisiana na daŋ shuŋi na malɛ bishi Jɔn: 25“Fo yɛ fo maŋ la Mesaya na ŋko anebi Elaija ŋko anebi nɛ e bee ba na. To, nɛ manɛ e ba nɛ fee bɛr basa kabɔrɛbɛr?” 26Nɛ Jɔn kaŋɛ bumo: “Nchu nɛ ŋ kɔ a bɛr basa kabɔrɛbɛr, ama esa ko yil menyi to nfe nɛ men maŋ nyi mo. 27Mo e la esa nɛ e wɔ ma kaman a ba na, esa nɛ m maŋ fo mbe aya to be shishɛr gba so na.”

28Bɛtani nɛ asheŋ ere kikɛ wora ashi Jɔɔdan be lɔr be kaba ndoŋ, kakpa nɛ Jɔn daa bɛr basa kabɔrɛbɛr na.

Ebɔrɛ be Kpakpafɔlbi be asheŋ

29Asheŋ ere ka wora ŋ klade nɛ Jɔn wu Yesu ka bee ba mo kutɔ nɛ e kaŋɛ basa le: “Men keni, Ebɔrɛ be Kpakpafɔlbi nɛ k bee lara durnyaebi be alubi ashi bumo to a lɛ na. 30Mo nɛ n daa de saŋɛ nɛ n daŋ kaŋɛ le na fanɛ: ‘Kanyɛn ko wɔ ma kaman a ba na, ŋkpal manɛ so, e daŋ ma kebaawɔtɔ ashi Ebɔrɛ be anishito.’ 31Ma ere gbagba daa maŋ nyi mo, ama kusɔ nɛ k ba nɛ m ba kaa ta nchu a bɛr basa kabɔrɛbɛr na e la fanɛ Israɛlebi e wu mo nseŋ pin mo.”

32Kede be kaman nɛ Jɔn ji le be shɛda ŋ kaŋɛ: “N wu Kiyoyu na ka shi ebɔrɛso ŋ gbelge m ba fanɛ lepɔ m ba shir a wɔ mo so. 33Nɛ fanɛ esa nɛ e shuŋi ma fanɛ m ba ta nchu m bɛr basa kabɔrɛbɛr na daa maŋ ŋini ma mo, ma alɛ gba daa maaŋ pin mo. Le nɛ e daŋ kaŋɛ ma: ‘Esa nɛ feeŋ wu Kiyoyu Cheeŋ na ka beeŋ ba gbelge mo so n shir a wɔ mo to na e la esa nɛ e beeŋ shin nɛ Kiyoyu Cheeŋ na e gbelge basa so.’ 34Ma alɛ wu nsaa ji shɛda fanɛ mo e la Ebɔrɛ Pibinyɛn na.”

Yesu be beshuŋipo juŋkparsoana be asheŋ

35Kumo be ŋklade Jɔn nɛ mbe bebɛsopo anyɔ ko naa yil kakpa koŋwule na. 36Nɛ e wu Yesu ka bee choŋ nɛ e kaŋɛ: “Men keni Ebɔrɛ be Kpakpafɔlbi na.” 37Bebɛsopo anyɔ na ka nu kusɔ nɛ e kaŋɛ na nɛ b ta m bɛ Yesu so. 38Ndoŋ nna nɛ Yesu gbɛ ŋ keni nɛ b bɛ mo so nɛ e bishi bumo: “Manɛ nɛ menyee fin?” Nɛ b bishi mo: “Rabai, nnɛ nɛ fo wɔ?” Rabai be kifito e la eŋinipo. 39Nɛ Yesu kaŋɛ bumo: “Men ba keni.” Ndoŋ nna nɛ b ya wu kakpa nɛ e wɔ nseŋ shir mo kutɔ ndoŋ hale nɛ epeŋi ya tɔr, ŋkpal manɛ so, k daa la fanɛ kaaseso kerfi ana be saŋɛ nna. 40Basa anyɔ nɛ b daŋ nu kusɔ nɛ Jɔn daŋ kaŋɛ nseŋ bɛ Yesu so na be eko e daa la Andru, Saimɔn Pita mo sipo na. 41Kusɔ nɛ Andru daŋ baŋ fara n wora e la fanɛ e daŋ fin mo da Saimɔn nna ŋ kaŋɛ mo le: “An wu Mesaya na.” Kumo e la fanɛ Kristo na. 42Kumo be kaman nɛ e bar Saimɔn Yesu kutɔ nɛ mo alɛ keni Saimɔn nseŋ kaŋɛ le: “Fo e la Saimɔn nɛ fo tuto bee ji Jɔn na ŋko? Naniere baaŋ baa tre fo Sifas.” Kumo be kifito e la kefalta nɛ kumo koŋwule na la Pita.

Yesu ka tre Filip nɛ Nataniɛl be asheŋ

43Kesheŋ ere ka wora ŋklade nɛ Yesu yili kumo fanɛ e bee yɔ Galili be kasawule so. Kumo be kamɔnchɛ na nɛ e tu Filip nseŋ kaŋɛ mo: “Bɛ ma so.” 44Filip daŋ shi Bɛtsaida be kade to nna, kakpa koŋwule nɛ Andru nɛ Pita gba shi na. 45Kumo be kaman nɛ Filip malɛ wu Nataniɛl nseŋ kaŋɛ mo le: “An wu esa nɛ anebi Mosis sibɛ mbe asheŋ ashi mbra be kawɔl na to na. Mo koŋwule na be asheŋ nɛ anebiana na kikɛ sibɛ na. Mo e la Nazarɛt be Yesu, Josɛf pibi na.” 46Ndoŋ nna nɛ Nataniɛl bishi mo: “Fo kaŋɛ Nazarɛt? Kusɔ lela mo malɛ e naaŋ shi Nazarɛt be kade to?” Ndoŋ nna nɛ Filip kaŋɛ: “Ba keni.” 47Yesu ka wu Nataniɛl ka bee ba mo kutɔ nɛ e kaŋɛ mo le: “Kashenteŋto, Israɛl be esa gbagba nde nɛ efɛsheŋ kikɛ maŋ wɔ mo to.” 48Nɛ Nataniɛl bishi mo: “Nnɛ nɛ fo nyi ma?” Nɛ Yesu kaŋɛ mo: “Fo ka daa wɔ figi be kedibi na be kifi to pɔɛŋ nɛ Filip tre fo na kikɛ nɛ n wu fo.” 49Nɛ Nataniɛl kaŋɛ mo le: “Rabai, kashenteŋto, fo e la Ebɔrɛ Pibinyɛn na. Fo e la Israɛl be efuli so be Ewura na.” 50Nɛ Yesu kaŋɛ mo: “Ŋ ka kaŋɛ fo fanɛ n wu fo figi be kedibi na be kifi to na so so nɛ fo yirda ere a? Fo kraa beeŋ wu asheŋ nɛ a chɔ kede ere gba.” 51Kumo be kaman nɛ e kaŋɛ bumo kikɛ: “Kashenteŋ nɛ mee kaŋɛ menyi na fanɛ menyeeŋ wu ebɔrɛso ka bugi nɛ Ebɔrɛ be emalaika bee dii a gbelge a ba ma, Nyiŋgbasa Pibinyɛn so.”

Currently Selected:

Jɔn 1: GJNb

Highlight

Copy