Génesis 19

Tumpa opa umbái tëta wasu reta Sodoma jare Gomorra

1Kaaruete ma iko yawe, jokua mokui araɨwa reta yuraa uwäe tëta wasu Sodoma pe. Jare Lot uwapɨ oï yembatɨrenda pe tëta wasu ikësea jöke iyɨpɨ pe. Jare Lot uecha yawe, upüa oo owäiti jare uñeñono ɨwɨ re uipɨu rewe. Jukuärái umbɨsaluda. 2Jare jei chupe reta: “Chemburuwicha reta, ¿chepuere pa pomborɨ? Aeka pewe peyu waerä cherëta pe. Cherëta pe pepɨta. Joko pe pepuere piyoe pepɨ jare peputuu. Jare pɨarewe pe ndimboweasɨ peasa ye kuri,” jei chupe reta.

Erëi jae reta jei chupe: “Mbaetɨ. Ndupɨtañota kua plaza pe,” jei reta chupe.

3Erëi Lot umɨñera ye oo waerä upɨta reta jëta pe. Jayawe ramo jae reta yuraa Lot ndiwe jare uike reta jae jëta pe. Jare Lot omboyɨka mbɨyape levadura mbae wae jare uyapoka chupe reta tembiu jëe ngatu wae umɨngaru reta waerä. Jayawe ukaru reta.

4Erëi ndei jae reta yuraa oke mbowe, tëta wasu Sodoma pewa kuimbae reta yuweru yatɨ reta Lot jëta re. Yuweru tëta wasu pewa opaetei kuimbae reta, kunumi reta wiwe jare indechi wae retawe. 5Jare ueni reta Lot jare jei reta chupe: “¿Kiape pa ñonoï jokua kuimbae reta yuweru pɨare opou ndepɨ wae? ¡Enoe orewe oka pe ndoroke waerä!” jei reta.

6Jayawe Lot oë oka pe uyemɨngeta waerä jae reta ndiwe jare uyukenda ye jöke. 7Jare jei chupe reta: “Cherëtara reta, awɨye mii piyapo kua ikawi mbae wae. 8Mase, ime anoi mokui cherayɨ reta oroke’ä etei kuimbae wae. Anoeta pewe kua oka pe piyapo waerä jae reta ndiwe pipota wae rupi. Jaeño kua kuimbae reta pe awɨye mii mbae ikawi mbae wae piyapo. Chemboupa reta ko; jáeramo ayandarekota ko jese reta,” jei Lot chupe reta.

9Jayawe kuimbae tëta wasu pewa reta iñeeäta rewe jei Lot pe: “¡Esɨrɨ kua wi!” Jare jei wi iyupe reta: “Ñamaeño yaiko kua kuimbae re iko waerä yandepɨte pe, erëi añawe jae uipota tëi iko yanemburuwicharä. ¡Ndarau etei!” jei iyupe reta. Jáeramo jei reta Lot pe: “¡Añawe nduyapota ndekotɨ ikawi mbaete ye wae jokua ïru kuimbae reta wi!” jei reta chupe. Jayawe jae reta uepeña Lot, jare oya reta öke re uitɨ reta waerä tëi.

10Erëi jokua mokui araɨwa reta aramoiño uipea reta öke. Jare omoë reta ipo jare uipɨsɨ reta Lot, jare umɨinge ye o pe. Joko wi uyukenda ye woi öke. 11Jare jupiwoiño araɨwa reta umbɨyekuaa chupe reta pëti tembipe uwerasɨete wae. Jayawe opaete kuimbae reta oka pe ñonoï wae, kunumi reta wiwe jare indechi wae retawe, aramoiño jesa mbae echa ma upɨta reta. Jáeramo ipuere’ä ma uwäe reta chupe öke.

12Jare jokua araɨwa reta jei Lot pe: “Ime yawe nenoi kua tëta wasu pe ïru nerëtara reta, eraa jae reta nde ndiwe. Aramoi nderowaya jare nderaɨ reta, jare nderayɨ reta, jare ipotawe ïru nerëtara reta Sodoma pe ñonoï wae reta, eraa jae reta nde ndiwe jare peë woi kua wi. 13Echa’ä opata numbái noï kua tëta wasu. Tumpa uecha kua tëta wasu pewa reta jeko kachi tuichaete ma ko ukuakuaa wae. Jáeramo orembou numbái waerä kua tëta wasu,” jei reta Lot pe.

14Jáeramo Lot oë oo umɨmbeu waerä jowayarä wae reta pe, tayɨ reta ndiwe umendata tëi iko wae, jare jei chupe reta: “¡Peë wɨrae kua wi! ¡Echa’ä Tumpa opata umbái oï kua tëta wasu!” jei chupe reta. Erëi jowayarä wae reta uyapɨsaka’ä jae jei chupe reta wae re, echa’ä wɨrowia tëi reta Lot imachiño oï wae.

15Jayawe köe ma oo iko yawe, jokua mokui araɨwa reta jei Lot pe: “¡Eë wɨrae! Eraa kua wi nembireko jare mokui nderayɨ reta, awɨye waerä pemano tëta wasu pewa reta ndiwe Tumpa uiporaraka chupe reta yawe,” jei reta chupe.

16Erëi Lot ñatëɨ oë. Jáeramo jokua araɨwa reta uipɨsɨ Lot ipo pe jare jembireko jare tayɨ reta wi, jare uipoko onoe reta tëta wasu oka pe. Jukuärái Tumpa uiparareko Lot jare jëtara reta. 17Jare onoe reta ma yawe tëta wasu oka pe, pëti araɨwa jei chupe reta: “¡Pekua wɨrae kua wi, jare awɨye pemae peraɨkue kotɨ! ¡Awɨye etei pepɨta kua ɨwɨ ipe tuicha wae rupi! ¡Pekua pea ɨwɨtu wasu kotɨ awɨye waerä pemano!” jei chupe reta.

18Erëi Lot jei chupe: “¡Awɨye mii, cheya!” jei. “Ndarau orepuere ndoo nuwäe joko pe. 19Ndepɨakawi ma orewe jare orerepɨ ma mano wi. Erëi jokua ɨwɨtu wasu mbɨrɨete oï. Numanota ko ndei joko pe ndoo nuwäe mbowe,” jei. 20“Mase, ko tëta wasu raɨ koiño oï wae. Emaeño mii oreré ndoo waerä jokua tëta wasu raɨ pe. Yepe tëi michi raɨ ko, erëi joko pe orepuereta ndoyepe mano wi,” jei Lot chupe.

21Jayawe jokua araɨwa jei Lot pe: “Jaekawi jayawe, pepuere peo joko pe. Ambaita’ä jokua tëta wasu raɨ. 22Erëitu pekua woi joko pe, echa’ä chepuere’ä ayapo mbae awe pewäe joko pe rewa,” jei chupe. Jáeramo jokua ora wiwe, jokua tëta wasu raɨ jee Soar.#19.22 Tee Soar uipota jei “michi raɨ” hebreo ñee pe.

23Warasɨ oë ma iko yawe, Lot jare jembireko jare tayɨ reta yuraa uwäe tëta wasu raɨ Soar pe. 24Jayawe aramoiño Tumpa ombou ara wi tata jare azufre#19.24 Azufre ko ita echa rami, erëi jendɨ wae. jendɨ wae tëta wasu reta Sodoma jare Gomorra re. 25Jukuärái Tumpa opa umbái jokua ɨwɨ ipe tuicha wae. Opa okai opaete tëta wasu pewa reta, jare opaete temitɨ reta jare ñana reta wi jokua ɨwɨ ipe tuicha wae pewa. 26Erëi Lot jembireko oo jupie jare uyerowa umae jaɨkue kotɨ. Jayawe uyeyapo woi yukɨrä.

27Jokua ndimbowe woi Abraham jawoi pewa oë oo ye jokua ɨwɨtu wasu ɨwate wae pe, kiape Tumpa ndiwe uyemɨngeta iko wae pe. 28Jare Abraham umae tëta wasu reta Sodoma jare Gomorra kotɨ jare opaete ɨwɨ ipe tuicha wae kotɨ. Jare uecha tatäti upüa oï opaete jokua ɨwɨ wi, tatäti tata tuichaete wae wi upüa wae echa rami.

29Jukuärái Tumpa opa umbái tëta wasu reta jokua ɨwɨ ipe tuicha wae rupiwa. Erëitu Tumpa iñakañɨ'ä jae jei Abraham pe wae wi, jare omoë Lot joko wi ndei umbái mbowe.

Currently Selected:

Génesis 19: gnwPB

Highlight

Copy