Jɔn 5
5
Faŋ Yeso nə shùꞌ wə mbɨɨ yibɨɨ muu Betsata
1Yiŋkii kɨ shɔɔ, vəshi vəkwalə və vɨɨ Jus vəmɔ́ꞌ baa kuꞌ, Yeso baa koꞌ gə̀ ntɨꞌ Jerusalem. 2Wee-fɨ-yibɨɨ muu nə luu shɔ ntɨꞌ Jerusalem shuu jɨɨ njyə faŋ vɨ nəə tii nə shuu jɨɨ bisə-njɨɨ. Vɨ nəə tii yibɨɨ yɔ́ nə Betsata maa ghaŋ Hibru. Maa shəŋ kɔ́ vəshəŋ vəndɨŋ shɔ tee, shuu muu yɔ́. 3Maa vəshəŋ vɔ́, vɨɨ vəza vəyaŋ nəə nɔŋ shɔ, vɨɨ sɨ fɨsə nə vəndwey, nə vɨɨ faŋ yiway yiŋwaa vəŋ kùkə yimuꞌ yimuꞌ. [ 4Nshiiŋii Nwi yaa kɨ siꞌ jwi ghee ghee, jwi bwìilə muu mbɔ́. Nshiiŋii Nwi yɔ́ bwiilə muu mbɔ́, mfɔŋ wə faŋ ŋwə gə̀ ŋìi taa muu yɔ́, zatə ki kɨ nii yime. Kɔlə kɨ luu ŋkee ntɔ za yikə, ŋkə mè.] 5Wə mɔ́ꞌ nə luu shɔ, faŋ ŋwə nə zà ŋuꞌ njɔsə-yifɔŋ muu-ntia. 6Yeso jwi zìꞌ yifi, yè wə ghɔ́, baa zɔ laa ŋwə duꞌtə ŋwə tay taa za. Yeso gi tɨ́ ŋwə laa ŋwə kəə bwaŋnə fɨ maa za ki mu? 7Wuu za ghɔ́ bəŋsə tɨ́ ŋwə laa, «Tɨta, muu bwiilə, mə kee kìi wə faŋ kaꞌ ŋwə shàꞌ mə, sùꞌsə taa muu me. Mə yaa kɨ mɔŋ maa məsiꞌ tey yi, wə dɨday kɨ shɔ̀ɔ sìꞌ vɨsɨ.» 8Yeso gi tɨ́ ŋwə laa, «Ndɔ yizɔ, kèlə yighaŋ yə, kɨ toꞌ!» 9Sheꞌ yighee muꞌ zatə wə ghɔ́ mè, ŋwə ndi yighaŋ yi, kɨ toꞌ. Shi kɔ́ nə luu shi zwisə Nwi. 10Nɨniŋ, vɨɨ Jus gi tɨ́ wə ghɔ́ faŋ Yeso nə shùꞌ za ki nə laa, «Lùu shi zwisə Nwi. Luu nuŋsə laa kɨ vɨ shaꞌ yighaŋ maa shi zwisə Nwi me!» 11Wə ghɔ́ bəŋsə tɨ́ vəŋ laa, «Wə ntɨə faŋ ŋwə shùꞌ mə fɨ maa za kaŋ, ŋwə gì laa mə ndi yighaŋ nyaa, ndɔ̀ kɨ toꞌ.» 12Vəŋ bitə tɨ́ ŋwə laa, «Wə ntɨə faŋ ŋwə gì laa a shaꞌ yighaŋ yə, kɨ toꞌ, lùu ndə?» 13Wə ghɔ́ faŋ Yeso nə shùꞌ za ki nə, kee kɨɨ me, buꞌ laa Yeso nə duꞌtə ŋwə ndɔ gə̀, buꞌ vɨɨ vəyaŋ maa shəŋ kɔ́. 14Fɨkɨꞌ wə ghɔ́ faŋ Yeso nii shùꞌ ŋwə nə, gə ŋìi taa ŋii Nwi yikwalə. Yeso ye ŋwə yifi, gì tɨ́ ŋwə laa, «Ye mɔɔ, a bwaŋnə̀. Kɨ ghɔ baa kɨ yɨsə vənu vəbwəvə me, laa kɨ nu faŋ ŋkə wèꞌ shɔ̀ɔ za kì, ndɔ jia ghɔ me.» 15Wə ghɔ́ gə, gə̀ nàysə tɨ́ vɨɨ Jus vɔ́ laa shùꞌ Yeso shùꞌ zatə ki. 16Nə luu nu ŋkɨə faŋ vɨɨ Jus nə tey kɨ kɔ ŋɨꞌ tɨ́ Yeso, buꞌ laa ŋwə nəə yɨ kəŋ vənu vɔ́ maa shi zwisə Nwi. 17Maa yighee yɔ́ Yeso gi tɨ́ vɨɨ Jus vɔ́ laa, «Tii ŋwaa faꞌ faꞌ ghee nshə. Nɨniŋ, mə faꞌ ghee nshə nɨzi.» 18Vɨɨ Jus vɔ́ zɔ nu kɔ́, baa mètə kɨ kəə jɨɨ maa məzwi ŋwə, buꞌ laa ŋwə bɨsə nuŋsə shi zwisə vəŋ, ndɔ baa tii Nwi nə tii wi, faŋ ŋkə də̀ laa ŋwə ndì tɔ ki, fɨ̀ꞌnə ghɔ Nwi.
Faŋ Yeso nə gi kɔ̀ŋ nshɨ-tɔ wi nə wutə ki
19Nə luu buꞌ nu kɔ́, Yeso gi tɨ́ vəŋ laa, «Viŋ zɔ! Mə gì tɨ́ viŋ yinsəŋ laa, kaꞌ Wee Nwi kee kɨ yɨ tuu nu maa wutə ki me. Ŋwə yɨ sheꞌ vənu mbɨə faŋ ŋwə ye laa Tii wi yɨsə, buꞌ laa nu ŋkɨə faŋ tɨta Nwi yɨ luu sheꞌ nu ŋkɨə faŋ ŋwiŋ wi yɨsə nɨzi. 20Lùu nɨniŋ, buꞌ laa tɨta Nwi kàw ŋwiŋ wi, baa dəsə vənu vənshə faŋ ŋwə yɨ tɨ́ ŋwiŋ wi. Nwi ndɔ baa də vənu vəkwalə vəmɔ́ꞌ tɨ́ ŋwə faŋ mbə kwàlə shɔ̀ɔ mbɨə faŋ viŋ duꞌtə viŋ ye. Shuu wiŋ taa yɔŋ. 21Sheꞌ faŋ tɨta Nwi yɨsə vɨɨ kukə baa ywey, ŋwiŋ wi ghɔ́ yweysə vɨɨ nɨzi, faŋ ŋwə kàw. 22Gə fɨ maa nsɔꞌ vɨɨ, tɨta Nwi kee bee sɔꞌ vɨɨ me, ŋwə kɔ̀ wutə məshia nsɔꞌsə vɨɨ vənshə tɨ́ ŋwiŋ wi. 23Nwi yɨ̀ nɨniŋ laa vɨɨ kɔ feenə tɨ́ ŋwiŋ wi, sheꞌ faŋ vəŋ fee tɨta Nwi nə. Nɨniŋ, wə ntɨə faŋ ŋwə kee fèe Wee Nwi ghɔ́ me, buu ŋwə nɨzi kee fee tɨta Nwi, faŋ ŋwə nə tɔ̀ŋ ŋwiŋ wi shɨ nsi nə me. 24Viŋ zɔ! Mə naysə tɨ́ viŋ yinsəŋ laa, wə ntɨə faŋ ŋwə zɔ̀ yigisə nyaa, bìŋ Nwi faŋ ŋwə nə tɔ̀ŋ mə nə, buu ŋwə fùu fɨ shuu yiku, ŋìi məbwey vəlwaŋ, kee ndɔ baa ŋii taa nsɔꞌ Nwi me. 25Viŋ zɔ! Mə gì tɨ́ viŋ yinsəŋ laa, yighee kɨkuꞌ, kaꞌ mə gì laa nyə duꞌtə nyə kùꞌ, faŋ vəŋku-kɨ-duꞌ taa zɔ gɨ Wee Nwi. Nɨniŋ, vəŋku və vɨɨ mbɨə faŋ vəŋ zɔ̀ gɨ Wee Nwi yɔ́, taa ywey fɨ shɨ yiku. 26Sheꞌ faŋ Nwi kìi wutə maa məkɔ məbwey, ŋwə kɔ wutə kɔ́ tɨ́ ŋwiŋ wi nɨzi maa məkɔ məbwey tɨ́ vɨɨ. 27Nwi nə kɔ̀ wutə məshia nsɔꞌsə vɨɨ tɨ́ ŋwiŋ wi, buꞌ laa ŋwə lùu Wuu yinsəŋ Nwi. 28Kɨ shuu wiŋ yɔŋ maa vənu vɔ́ me. Yighee kɨkuꞌ faŋ vɨɨ vənshə faŋ vəŋ kukə̀ taa zɔ gɨ Wuu yinsəŋ Nwi ghɔ́. 29Vəŋ taa fuu fɨ taa təswi təvəŋ. Vɨɨ mbɨə faŋ vəŋ nə yɨ̀ jəə, fuu maa məzɨ məbwey vəlwaŋ. Vɨɨ mbɨə faŋ vəŋ nə yɨ̀ vənu vəbwəvə fuu maa məŋii taa nsɔꞌ Nwi.
30Nɨniŋ, kaꞌ mə kee yɨ tuu nu maa wutə kaŋ me. Mə shia nsɔꞌsə sheꞌ faŋ mə zɔ fɨ ghɔ Tii ŋwaa faŋ ŋwə kəə. Nɨniŋ, mə sɔꞌ nsɔꞌsə, nsə lùu səloomə, buꞌ laa mə kee yɨ nu ŋkɨə faŋ kàw mə me; mə yɨ nu ŋkɨə faŋ Nwi faŋ ŋwə nə tɔ̀ŋ mə nə, kàw. 31Mə kɨ luu gi nu kɔ̀ŋ nshɨ-tɔ ŋwaa, buu kaꞌ vɨɨ bìŋ kɨkə laa yigisə nyaa lùu yinsəŋ? 32Nɨniŋ, wə mɔ́ꞌ shɔ faŋ ŋwə gisə kɔ̀ŋ mə (laa mə lùu Wee Nwi yinsəŋ). Mə kɔꞌ kɨɨ laa ŋwə gisə yinsəŋ kɔ̀ŋ mə. 33Yizii wə ghɔ́ luu Jɔn. Viŋ nə tɔ̀ŋ ntɔŋsə maa Jɔn, tɔŋ bìtə tɨ́ ŋwə laa ŋwə naysə yinsəŋ yi kɔ̀ŋ yigi yɔ́. Viŋ nə zɔ̀ yigisə yinsəŋ fɨ ghɔ ŋwə kɔ̀ŋ mə. 34Luu nə, mə kee bə̀ə wə faŋ ŋwə gisə yigi yinsəŋ kɔ̀ŋ mə me. Mə lumə yigisə Jɔn yɔ́ tɨ́ viŋ, tɨ́ kaꞌ viŋ nyɨŋ fɨ taa nsɔꞌ Nwi. 35Yinsəŋ, Jɔn nə luu yaa kiꞌ faŋ ŋwə bee ŋkee ley. Luu nə, viŋ nə kàw dùꞌ taa məley wi ghɔ́ sheꞌ maa kuŋtə yighee, baa ndɔ̀. Viŋ nə bìŋ yigisə yi sheꞌ maa kuŋtə yighee baa mèꞌtə. 36Luu nə, vənu vəmɔ́ꞌ shɔ faŋ mbə shɔɔ yigisə Jɔn yɔ́, faŋ mbə də laa Tii ŋwaa nə tɔ̀ŋ mə yinsəŋ. Lùu vənu və shuu yɔŋvə faŋ mə yɨ nə, faŋ Tii ŋwaa kɔ̀ mə laa mə yɨ. Mbə də yinsəŋ laa tɔ̀ŋ Tii ŋwaa tɔ̀ŋ mə. 37Nɨniŋ, nshɨ-tɔ Tii ŋwaa faŋ ŋwə nə tɔ̀ŋ mə nə, bìŋ mə. Luu nə, viŋ nə kee ta zɔ̀ gɨ yi me, tɨꞌnə me yè ŋwə nə yisɨ me. 38Viŋ kee nùŋ yigisə Tii ŋwaa taa fwisə viŋ me, buꞌ laa viŋ kee bìŋ nu ŋwiŋ wi faŋ ŋwə nə tɔ̀ŋ ŋwə nə me. 39Viŋ tii ŋwaꞌlə Nwi, buꞌ laa viŋ bɨ̀ꞌtə laa viŋ taa kii məbwey vəlwaŋ faŋ ŋwə gòꞌsə yighee muꞌ taa tey yi. Yinsəŋ, ŋwaꞌlə ghɔ́ gisə nu kɔ̀ŋ mə nɨzi. 40Luu nə, viŋ kee kaw jwi yɨ mə me, tɨ́ kaꞌ viŋ kìi məbwey vəlwaŋ me. 41Mə kee kəə feenə fɨ ghɔ vɨɨ me. 42Mə kɔꞌ kɨɨ laa viŋ kee kàw Nwi taa fwisə viŋ me. 43Viŋ kee bìŋ mə faŋ mə jwi maa yizii Tii ŋwaa nə me. Kɨ luu wə mɔ́ꞌ jwi sheꞌ nə ŋkii nu, viŋ biŋ ŋwə. 44Sii kaꞌ viŋ bìŋ nu Nwi kɨkə, faŋ viŋ kəə sheꞌ laa vaŋ-nshwi viŋ kɨ kɔ məbəŋsə tɨ́ viŋ. Viŋ kee kəə məbəŋsə fɨ ghɔ Nwi me, faŋ Nwi lùu shɔ sheꞌ ŋwə muꞌ. Lùu ŋiꞌ nu ŋkɨə faŋ kaꞌ viŋ kee bìŋ mə me. 45Kɨ viŋ kɨ bɨꞌtə laa ndɔ kwaŋ mə kwàŋ nu kɔ́ tɔ viŋ vɨsɨ Nwi me. Lùu ntɨsə Nwi faŋ Mose nə nyɔ̀ꞌ nə, faŋ nsə ndɔ yɨsə vɨ kwaŋ nu kɔ́ tɔ viŋ. Vɨ ndɔ kwaŋ viŋ taa nsɔꞌ sheꞌ buꞌ ŋwaꞌlə Mose ghɔ́, faŋ viŋ tə̀ sɨ maa ŋwə, laa ŋwə ndɔ də nu yinsəŋ tɨ́ viŋ nə. 46Viŋ nə toꞌ biŋ Mose ghɔ́, buu viŋ bìŋ mə nɨzi, buꞌ laa ŋkee fɨshi Mose nə nyɔ̀ꞌ vənu kɔ̀ŋ mə. 47Viŋ kɨ luu kee bìŋ nu ŋkɨə faŋ Mose nə nyɔ̀ꞌ nə me, buu kaꞌ viŋ bìŋ yigisə nyaa kɨkə?»
Currently Selected:
Jɔn 5: bav
Highlight
Share
Copy
Want to have your highlights saved across all your devices? Sign up or sign in
© 1993, Wycliffe Bible Translators, Inc. All rights reserved.
Jɔn 5
5
Faŋ Yeso nə shùꞌ wə mbɨɨ yibɨɨ muu Betsata
1Yiŋkii kɨ shɔɔ, vəshi vəkwalə və vɨɨ Jus vəmɔ́ꞌ baa kuꞌ, Yeso baa koꞌ gə̀ ntɨꞌ Jerusalem. 2Wee-fɨ-yibɨɨ muu nə luu shɔ ntɨꞌ Jerusalem shuu jɨɨ njyə faŋ vɨ nəə tii nə shuu jɨɨ bisə-njɨɨ. Vɨ nəə tii yibɨɨ yɔ́ nə Betsata maa ghaŋ Hibru. Maa shəŋ kɔ́ vəshəŋ vəndɨŋ shɔ tee, shuu muu yɔ́. 3Maa vəshəŋ vɔ́, vɨɨ vəza vəyaŋ nəə nɔŋ shɔ, vɨɨ sɨ fɨsə nə vəndwey, nə vɨɨ faŋ yiway yiŋwaa vəŋ kùkə yimuꞌ yimuꞌ. [ 4Nshiiŋii Nwi yaa kɨ siꞌ jwi ghee ghee, jwi bwìilə muu mbɔ́. Nshiiŋii Nwi yɔ́ bwiilə muu mbɔ́, mfɔŋ wə faŋ ŋwə gə̀ ŋìi taa muu yɔ́, zatə ki kɨ nii yime. Kɔlə kɨ luu ŋkee ntɔ za yikə, ŋkə mè.] 5Wə mɔ́ꞌ nə luu shɔ, faŋ ŋwə nə zà ŋuꞌ njɔsə-yifɔŋ muu-ntia. 6Yeso jwi zìꞌ yifi, yè wə ghɔ́, baa zɔ laa ŋwə duꞌtə ŋwə tay taa za. Yeso gi tɨ́ ŋwə laa ŋwə kəə bwaŋnə fɨ maa za ki mu? 7Wuu za ghɔ́ bəŋsə tɨ́ ŋwə laa, «Tɨta, muu bwiilə, mə kee kìi wə faŋ kaꞌ ŋwə shàꞌ mə, sùꞌsə taa muu me. Mə yaa kɨ mɔŋ maa məsiꞌ tey yi, wə dɨday kɨ shɔ̀ɔ sìꞌ vɨsɨ.» 8Yeso gi tɨ́ ŋwə laa, «Ndɔ yizɔ, kèlə yighaŋ yə, kɨ toꞌ!» 9Sheꞌ yighee muꞌ zatə wə ghɔ́ mè, ŋwə ndi yighaŋ yi, kɨ toꞌ. Shi kɔ́ nə luu shi zwisə Nwi. 10Nɨniŋ, vɨɨ Jus gi tɨ́ wə ghɔ́ faŋ Yeso nə shùꞌ za ki nə laa, «Lùu shi zwisə Nwi. Luu nuŋsə laa kɨ vɨ shaꞌ yighaŋ maa shi zwisə Nwi me!» 11Wə ghɔ́ bəŋsə tɨ́ vəŋ laa, «Wə ntɨə faŋ ŋwə shùꞌ mə fɨ maa za kaŋ, ŋwə gì laa mə ndi yighaŋ nyaa, ndɔ̀ kɨ toꞌ.» 12Vəŋ bitə tɨ́ ŋwə laa, «Wə ntɨə faŋ ŋwə gì laa a shaꞌ yighaŋ yə, kɨ toꞌ, lùu ndə?» 13Wə ghɔ́ faŋ Yeso nə shùꞌ za ki nə, kee kɨɨ me, buꞌ laa Yeso nə duꞌtə ŋwə ndɔ gə̀, buꞌ vɨɨ vəyaŋ maa shəŋ kɔ́. 14Fɨkɨꞌ wə ghɔ́ faŋ Yeso nii shùꞌ ŋwə nə, gə ŋìi taa ŋii Nwi yikwalə. Yeso ye ŋwə yifi, gì tɨ́ ŋwə laa, «Ye mɔɔ, a bwaŋnə̀. Kɨ ghɔ baa kɨ yɨsə vənu vəbwəvə me, laa kɨ nu faŋ ŋkə wèꞌ shɔ̀ɔ za kì, ndɔ jia ghɔ me.» 15Wə ghɔ́ gə, gə̀ nàysə tɨ́ vɨɨ Jus vɔ́ laa shùꞌ Yeso shùꞌ zatə ki. 16Nə luu nu ŋkɨə faŋ vɨɨ Jus nə tey kɨ kɔ ŋɨꞌ tɨ́ Yeso, buꞌ laa ŋwə nəə yɨ kəŋ vənu vɔ́ maa shi zwisə Nwi. 17Maa yighee yɔ́ Yeso gi tɨ́ vɨɨ Jus vɔ́ laa, «Tii ŋwaa faꞌ faꞌ ghee nshə. Nɨniŋ, mə faꞌ ghee nshə nɨzi.» 18Vɨɨ Jus vɔ́ zɔ nu kɔ́, baa mètə kɨ kəə jɨɨ maa məzwi ŋwə, buꞌ laa ŋwə bɨsə nuŋsə shi zwisə vəŋ, ndɔ baa tii Nwi nə tii wi, faŋ ŋkə də̀ laa ŋwə ndì tɔ ki, fɨ̀ꞌnə ghɔ Nwi.
Faŋ Yeso nə gi kɔ̀ŋ nshɨ-tɔ wi nə wutə ki
19Nə luu buꞌ nu kɔ́, Yeso gi tɨ́ vəŋ laa, «Viŋ zɔ! Mə gì tɨ́ viŋ yinsəŋ laa, kaꞌ Wee Nwi kee kɨ yɨ tuu nu maa wutə ki me. Ŋwə yɨ sheꞌ vənu mbɨə faŋ ŋwə ye laa Tii wi yɨsə, buꞌ laa nu ŋkɨə faŋ tɨta Nwi yɨ luu sheꞌ nu ŋkɨə faŋ ŋwiŋ wi yɨsə nɨzi. 20Lùu nɨniŋ, buꞌ laa tɨta Nwi kàw ŋwiŋ wi, baa dəsə vənu vənshə faŋ ŋwə yɨ tɨ́ ŋwiŋ wi. Nwi ndɔ baa də vənu vəkwalə vəmɔ́ꞌ tɨ́ ŋwə faŋ mbə kwàlə shɔ̀ɔ mbɨə faŋ viŋ duꞌtə viŋ ye. Shuu wiŋ taa yɔŋ. 21Sheꞌ faŋ tɨta Nwi yɨsə vɨɨ kukə baa ywey, ŋwiŋ wi ghɔ́ yweysə vɨɨ nɨzi, faŋ ŋwə kàw. 22Gə fɨ maa nsɔꞌ vɨɨ, tɨta Nwi kee bee sɔꞌ vɨɨ me, ŋwə kɔ̀ wutə məshia nsɔꞌsə vɨɨ vənshə tɨ́ ŋwiŋ wi. 23Nwi yɨ̀ nɨniŋ laa vɨɨ kɔ feenə tɨ́ ŋwiŋ wi, sheꞌ faŋ vəŋ fee tɨta Nwi nə. Nɨniŋ, wə ntɨə faŋ ŋwə kee fèe Wee Nwi ghɔ́ me, buu ŋwə nɨzi kee fee tɨta Nwi, faŋ ŋwə nə tɔ̀ŋ ŋwiŋ wi shɨ nsi nə me. 24Viŋ zɔ! Mə naysə tɨ́ viŋ yinsəŋ laa, wə ntɨə faŋ ŋwə zɔ̀ yigisə nyaa, bìŋ Nwi faŋ ŋwə nə tɔ̀ŋ mə nə, buu ŋwə fùu fɨ shuu yiku, ŋìi məbwey vəlwaŋ, kee ndɔ baa ŋii taa nsɔꞌ Nwi me. 25Viŋ zɔ! Mə gì tɨ́ viŋ yinsəŋ laa, yighee kɨkuꞌ, kaꞌ mə gì laa nyə duꞌtə nyə kùꞌ, faŋ vəŋku-kɨ-duꞌ taa zɔ gɨ Wee Nwi. Nɨniŋ, vəŋku və vɨɨ mbɨə faŋ vəŋ zɔ̀ gɨ Wee Nwi yɔ́, taa ywey fɨ shɨ yiku. 26Sheꞌ faŋ Nwi kìi wutə maa məkɔ məbwey, ŋwə kɔ wutə kɔ́ tɨ́ ŋwiŋ wi nɨzi maa məkɔ məbwey tɨ́ vɨɨ. 27Nwi nə kɔ̀ wutə məshia nsɔꞌsə vɨɨ tɨ́ ŋwiŋ wi, buꞌ laa ŋwə lùu Wuu yinsəŋ Nwi. 28Kɨ shuu wiŋ yɔŋ maa vənu vɔ́ me. Yighee kɨkuꞌ faŋ vɨɨ vənshə faŋ vəŋ kukə̀ taa zɔ gɨ Wuu yinsəŋ Nwi ghɔ́. 29Vəŋ taa fuu fɨ taa təswi təvəŋ. Vɨɨ mbɨə faŋ vəŋ nə yɨ̀ jəə, fuu maa məzɨ məbwey vəlwaŋ. Vɨɨ mbɨə faŋ vəŋ nə yɨ̀ vənu vəbwəvə fuu maa məŋii taa nsɔꞌ Nwi.
30Nɨniŋ, kaꞌ mə kee yɨ tuu nu maa wutə kaŋ me. Mə shia nsɔꞌsə sheꞌ faŋ mə zɔ fɨ ghɔ Tii ŋwaa faŋ ŋwə kəə. Nɨniŋ, mə sɔꞌ nsɔꞌsə, nsə lùu səloomə, buꞌ laa mə kee yɨ nu ŋkɨə faŋ kàw mə me; mə yɨ nu ŋkɨə faŋ Nwi faŋ ŋwə nə tɔ̀ŋ mə nə, kàw. 31Mə kɨ luu gi nu kɔ̀ŋ nshɨ-tɔ ŋwaa, buu kaꞌ vɨɨ bìŋ kɨkə laa yigisə nyaa lùu yinsəŋ? 32Nɨniŋ, wə mɔ́ꞌ shɔ faŋ ŋwə gisə kɔ̀ŋ mə (laa mə lùu Wee Nwi yinsəŋ). Mə kɔꞌ kɨɨ laa ŋwə gisə yinsəŋ kɔ̀ŋ mə. 33Yizii wə ghɔ́ luu Jɔn. Viŋ nə tɔ̀ŋ ntɔŋsə maa Jɔn, tɔŋ bìtə tɨ́ ŋwə laa ŋwə naysə yinsəŋ yi kɔ̀ŋ yigi yɔ́. Viŋ nə zɔ̀ yigisə yinsəŋ fɨ ghɔ ŋwə kɔ̀ŋ mə. 34Luu nə, mə kee bə̀ə wə faŋ ŋwə gisə yigi yinsəŋ kɔ̀ŋ mə me. Mə lumə yigisə Jɔn yɔ́ tɨ́ viŋ, tɨ́ kaꞌ viŋ nyɨŋ fɨ taa nsɔꞌ Nwi. 35Yinsəŋ, Jɔn nə luu yaa kiꞌ faŋ ŋwə bee ŋkee ley. Luu nə, viŋ nə kàw dùꞌ taa məley wi ghɔ́ sheꞌ maa kuŋtə yighee, baa ndɔ̀. Viŋ nə bìŋ yigisə yi sheꞌ maa kuŋtə yighee baa mèꞌtə. 36Luu nə, vənu vəmɔ́ꞌ shɔ faŋ mbə shɔɔ yigisə Jɔn yɔ́, faŋ mbə də laa Tii ŋwaa nə tɔ̀ŋ mə yinsəŋ. Lùu vənu və shuu yɔŋvə faŋ mə yɨ nə, faŋ Tii ŋwaa kɔ̀ mə laa mə yɨ. Mbə də yinsəŋ laa tɔ̀ŋ Tii ŋwaa tɔ̀ŋ mə. 37Nɨniŋ, nshɨ-tɔ Tii ŋwaa faŋ ŋwə nə tɔ̀ŋ mə nə, bìŋ mə. Luu nə, viŋ nə kee ta zɔ̀ gɨ yi me, tɨꞌnə me yè ŋwə nə yisɨ me. 38Viŋ kee nùŋ yigisə Tii ŋwaa taa fwisə viŋ me, buꞌ laa viŋ kee bìŋ nu ŋwiŋ wi faŋ ŋwə nə tɔ̀ŋ ŋwə nə me. 39Viŋ tii ŋwaꞌlə Nwi, buꞌ laa viŋ bɨ̀ꞌtə laa viŋ taa kii məbwey vəlwaŋ faŋ ŋwə gòꞌsə yighee muꞌ taa tey yi. Yinsəŋ, ŋwaꞌlə ghɔ́ gisə nu kɔ̀ŋ mə nɨzi. 40Luu nə, viŋ kee kaw jwi yɨ mə me, tɨ́ kaꞌ viŋ kìi məbwey vəlwaŋ me. 41Mə kee kəə feenə fɨ ghɔ vɨɨ me. 42Mə kɔꞌ kɨɨ laa viŋ kee kàw Nwi taa fwisə viŋ me. 43Viŋ kee bìŋ mə faŋ mə jwi maa yizii Tii ŋwaa nə me. Kɨ luu wə mɔ́ꞌ jwi sheꞌ nə ŋkii nu, viŋ biŋ ŋwə. 44Sii kaꞌ viŋ bìŋ nu Nwi kɨkə, faŋ viŋ kəə sheꞌ laa vaŋ-nshwi viŋ kɨ kɔ məbəŋsə tɨ́ viŋ. Viŋ kee kəə məbəŋsə fɨ ghɔ Nwi me, faŋ Nwi lùu shɔ sheꞌ ŋwə muꞌ. Lùu ŋiꞌ nu ŋkɨə faŋ kaꞌ viŋ kee bìŋ mə me. 45Kɨ viŋ kɨ bɨꞌtə laa ndɔ kwaŋ mə kwàŋ nu kɔ́ tɔ viŋ vɨsɨ Nwi me. Lùu ntɨsə Nwi faŋ Mose nə nyɔ̀ꞌ nə, faŋ nsə ndɔ yɨsə vɨ kwaŋ nu kɔ́ tɔ viŋ. Vɨ ndɔ kwaŋ viŋ taa nsɔꞌ sheꞌ buꞌ ŋwaꞌlə Mose ghɔ́, faŋ viŋ tə̀ sɨ maa ŋwə, laa ŋwə ndɔ də nu yinsəŋ tɨ́ viŋ nə. 46Viŋ nə toꞌ biŋ Mose ghɔ́, buu viŋ bìŋ mə nɨzi, buꞌ laa ŋkee fɨshi Mose nə nyɔ̀ꞌ vənu kɔ̀ŋ mə. 47Viŋ kɨ luu kee bìŋ nu ŋkɨə faŋ Mose nə nyɔ̀ꞌ nə me, buu kaꞌ viŋ bìŋ yigisə nyaa kɨkə?»
Currently Selected:
:
Highlight
Share
Copy
Want to have your highlights saved across all your devices? Sign up or sign in
© 1993, Wycliffe Bible Translators, Inc. All rights reserved.