Jɔn 8

Faŋ vɨ nə jwi nə wəzwi tɨ́ Yeso faŋ vɨ nə jia ghɔ wəndɔŋ

1[Yeso kɨ nii ndɔ̀ koꞌ gə̀ fuu baŋ vətɨ və məŋgwə. 2Fu lee, ŋkee taa nshia-ndoo-mbisɨ, Yeso baa ndɔ̀ gə̀ taa ŋii Nwi yikwalə, vɨɨ vənshə baa kɨ baytə yɨ ŋwə. Ŋwə duꞌnə nsi, kɨ deesə nu Nwi tɨ́ vəŋ. 3Vɨɨ mədeesə ŋwaꞌlə Nwi ghɔ vɨ vɨɨ Farisii jwi nə wəzwi mɔ́ꞌ faŋ vɨ jìa ŋwə ghɔ wəndɔŋ. Vəŋ jwì nə wəzwi ghɔ́, nùŋsə ŋwə nɨntəŋ ŋwaa vɨɨ, 4gì tɨ́ Yeso laa, «Tɨta, yia jìa wəzwi ŋwə̀ ghɔ wəndɔŋ mɔ́ꞌ. 5Maa ŋkə lùu taa ŋwaꞌlə ntɨsə Nwi faŋ Mose nə kɔ̀ tɨ́ nsiŋ nə, laa wə faŋ ŋwə yɨ nɨniŋ, vɨ tùmə ŋwə nə ŋoꞌsə ŋwə ku. #Levitikɔs 20.10. A gì ŋkɨɨ laa kə?» 6Vəŋ nə gì nɨniŋ maa məzɔ nu ŋkɨə faŋ ŋwə taa gì, tɨ́ kaꞌ vəŋ shɔ̀ɔ fɨ fuŋ, kəə ŋwə nə nsɔꞌ. Yeso bəəsə tɔ ki nsi, kɨ nyɔꞌ nsi nə wee-ghɔ wi. 7Faŋ vəŋ nəə baa kɨ bɨbitə, ŋwə bɨŋsə tɔ ki yizɔ, gì laa, «Wə lùu shɔ taa ŋwaa viŋ, faŋ ŋwə kee ta yɨ̀ nu bwə me, ŋwə fɔŋ tùŋ ŋoꞌ maa wəzwi ŋwə̀.» 8Ŋwə gi nɨniŋ, baa kɨ bə̀əsə tɔ ki nsi, baa nyɔ̀ꞌ nsi. 9Vɨɨ vɔ́ zɔ yigi yi yɔ́, waꞌkə wə nə muꞌ nə muꞌ, tèy fɨ maa vɨɨ taa. Fɨkɨꞌ goꞌ sheꞌ Yeso ghɔ wəzwi ghɔ́, faŋ ŋwə nə tɨtɨŋnə. 10Yeso neꞌtə ŋwaa wi, gì tɨ́ wəzwi ghɔ́ laa, «Yaa, vəŋ yigə vənshə mu? Wə kee lùu shɔ, mɔ̀ꞌ nsɔꞌ yə yimu?» 11Wəzwi ghɔ́ gi tɨ́ Yeso laa, «Tɨta, wə kee baa lùu shɔ me.» Yeso gi tɨ́ wəzwi ghɔ́ laa, «Faŋ ŋkə lùu nɨniŋ, nshɨ-tɔ ŋwaa nɨzi, mə kee taa mɔꞌ nsɔꞌ yɔ́ me. Gə, kɨ baa yɨ nu bwə me!»]

Faŋ Yeso nə gì laa nshɨ-tɔ Nwi yiba jɨŋ yi

12Maa yighee yɔ́ Yeso baa gì tɨ́ vɨɨ laa, «Mə lùu kiꞌ taa mbi. Wə ntɨə faŋ ŋwə beꞌsə mə, kaꞌ ŋwə kee baa tòꞌ fɨ taa mfiŋsə me, ŋwə taa ye məley faŋ ŋwə kɔ məbwey vəlwaŋ.» 13Vɨɨ Farisii gi tɨ́ ŋwə laa, «A gisə sheꞌ nu ŋwaa kə, buu kaꞌ nu ŋkɨə faŋ a gisə, kee lùu nu yinsəŋ me.» 14Yeso bəŋsə tɨ́ vəŋ laa, «Nu ŋkɨə faŋ mə gisə, lùu nu yinsəŋ faŋ mə kɔlə gisə nu ŋwaa kaŋ, buꞌ laa mə kɔꞌ kɨɨ nə shəŋ ŋkɨə faŋ mə ndɔ̀ fɨ fuŋ, nə shəŋ ŋkɨə faŋ mə gə shɔ. Gə̀ fɨ maa viŋ, viŋ kee kɨ̀ɨ nə shəŋ ŋkɨə faŋ mə ndɔ̀ fɨ fuŋ me, kee kɨ̀ɨ nə shəŋ ŋkɨə faŋ mə gə shɔ me. 15Viŋ shia nsɔꞌ wə faŋ viŋ ye sheꞌ ŋkɨꞌnə yi nə sɨ. Gə̀ fɨ maa mə, mə kee shia nsɔꞌ wə tuu muꞌ me. 16Kɨ luu laa mə shia nsɔꞌ, mə shia yiloomə buꞌ laa mə kee lùu nɨnɔŋ me; mə lùu yia wə ntɨə faŋ ŋwə nə tɔ̀ŋ mə. 17Vɨ nə ŋwàꞌlə nuŋsə yiŋ laa nu faŋ vɨɨ vəbɔɔ yè gì, lùu yinsəŋ. #Diteronimi 17.6. 18Nɨniŋ, mə gisə nu ŋwaa kaŋ; Tii ŋwaa faŋ ŋwə nə tɔ̀ŋ mə nə, gisə sheꞌ nɨniŋ.» 19Vəŋ bitə tɨ́ ŋwə laa, «Tii wə bə?» Yeso bəŋsə tɨ́ vəŋ laa, «Viŋ kee kɨɨ nə mə me, kee kɨɨ nə Tii ŋwaa me. Viŋ toꞌ kɨɨ nə mə, buu viŋ kɨ̀ɨ nə Tii ŋwaa nɨzi.» 20Yeso nə gì yigi yɔ́ taa shəŋ məmɔꞌ ka, faŋ ŋwə nəə deesə nu Nwi taa ŋii Nwi yikwalə. Wə nə kee kɔ̀ŋ ghɔ maa ŋwə me, buꞌ laa yighee yi faŋ Nwi nə tə̀, nə kee ta yikuꞌnə me.

Wə faŋ ŋwə kee nuŋ fwi yi maa Yeso me, ndɔ ku nə nu bwə ki tɔ ŋwə

21Yeso baa kɨ gì tɨ́ vəŋ laa, «Mə gɨgə nə ŋwaa ŋwaa nə. Viŋ taa kəə mə dɨdu, kɨ kukə nə vənu vəbwəvə viŋ maa viŋ. Shəŋ ŋkɨə faŋ mə gə shɔ, kaꞌ viŋ kee kɨ̀ɨ nə jɨɨ jwì shɔ me.» 22Vɨɨ kwalə vɨɨ Jus gi laa, ŋwə sii bɨꞌtə kə faŋ ŋwə gì laa yi gə shəŋ faŋ kaꞌ nsiŋ kee gə̀ shɔ me? Ŋwə taa zwi ŋwaa wi mu? 23Yeso gi tɨ́ vəŋ laa, «Viŋ lùu vɨɨ shɨ nsi. Gə̀ fɨ maa mə, mə kee lùu wə fɨ shɨ nsi me, mə ndɔ̀ fɨ yizɔ. 24Lùu ŋiꞌ nu ŋkɨə faŋ mə gì tɨ́ viŋ laa, viŋ ndɔ kukə nə vənu vəbwəvə viŋ tɔ viŋ. Ŋkee yinsəŋ viŋ ndɔ kukə nə vənu vəbwəvə viŋ tɔ viŋ, buꞌ faŋ viŋ kee biŋ laa mə lùu wə ntɨə faŋ mə lùu me.» 25Vəŋ bitə tɨ́ ŋwə laa, «A lùu ndə laŋ?» Yeso gi tɨ́ vəŋ laa, «Mə lùu wə ntɨə faŋ mə nəə naysə tɨ́ viŋ ghee ghee. 26Vənu shɔ vəyaŋ maa məgi kɔ̀ŋ viŋ, nə maa məsɔꞌ nsɔꞌ tɔ viŋ. Luu nə, wə ntɨə faŋ ŋwə nə tɔ̀ŋ mə, lùu wuu yinsəŋ. Mə naysə vənu tɨ́ vɨɨ, luu mbə faŋ naysə ŋwə shee.» 27Vəŋ zɔ, kee kɨɨ laa ŋwə gisə tɨ́ vəŋ kɔ̀ŋ Nwi Tii wi me. 28Nɨniŋ, Yeso gi laa, «Viŋ ndɔ bɨŋsə Wuu yinsəŋ Nwi (fuu fəŋkɔꞌ fə ŋkɨꞌsə), buu kɨ̀ɨ nə wə ntɨə faŋ mə lùu, baa kɨɨ laa mə kee yɨ vənu sheꞌ maa yizii nyaa me, laa mə gisə vənu faŋ də Tii ŋwaa shee. 29Mə lùu yia wə ntɨə faŋ ŋwə nə tɔ̀ŋ mə. Ŋwə lùu yiba jɨŋ mə, kee meꞌtə mə nɨnɔŋ me, buꞌ laa mə yɨsə sheꞌ vənu mbɨə faŋ mbə bàw tɨ́ ŋwə ghee nshə.» 30Vɨɨ vəyaŋ faŋ vəŋ nə zɔ̀ yigisə Yeso yɔ́, nùŋ fwi vəŋ maa ŋwə.

Faŋ Yeso nə gì tɨ́ vɨɨ Jus laa vəŋ lùu yaa vəbuꞌ tɨ́ nu bwə

31Yeso kɨ nii gì tɨ́ vɨɨ mbɨə faŋ vəŋ nə biŋ ŋwə nə laa, «Viŋ taa kɨ luu tweꞌ kɨ zɔ yigisə nyaa, buu viŋ lùu vɨɨ faŋ vəŋ beꞌsə mə yinsəŋ. 32Nɨniŋ, viŋ taa kɨɨ nə nu ŋkɨə faŋ ŋkə luu nu yinsəŋ. Nu yinsəŋ kɔ́ yɨ viŋ kee baa lùu vəbuꞌ me.» 33Vɨɨ mɔ́ꞌ gi tɨ́ ŋwə laa vəŋ lùu vɨɨ yikuu Abraham, laa vəŋ nə kee ta lùu buꞌ tɨ́ wə me. Sii yɨ kə ŋwə gi laa vəŋ taa nyɨŋ fɨ lùu vəbuꞌ? 34Yeso gi tɨ́ vəŋ laa, «Viŋ zɔ! Mə gì tɨ́ viŋ yinsəŋ laa, wə tɨ̀ me wə faŋ ŋwə yɨsə vənu vəbwəvə, ŋkə də̀ laa ŋwə lùu buꞌ tɨ́ nu bwə. 35Wə faŋ ŋwə lùu buꞌ kee yaa kɨ shi taa ŋii, goꞌsə shɔ me. Yaa kɨ luu sheꞌ wee wə bi, faŋ ŋwə yaa kɨ goꞌsə taa ŋii tii wi ghee nshə. 36Nɨniŋ, Wee Nwi kɨ luu kɨ yɨsə laa viŋ kee baa lùu vəbuꞌ me, buu viŋ taa nyɨŋ fɨ lùu vəbuꞌ yinsəŋ. 37Mə kɔꞌ kɨɨ laa viŋ lùu vɨɨ yikuu Abraham. Luu nə, viŋ mèꞌtə kɨ toꞌ kəə jɨɨ zwi mə, buꞌ laa viŋ kee bìŋ yigisə nyaa me. 38Mə gisə nu ŋkɨə faŋ mə yè fɨ ghɔ Tii ŋwaa. Viŋ nɨzi yɨsə vənu faŋ viŋ nə zɔ̀ fɨ ghɔ tii wiŋ.» 39Vəŋ bəŋsə tɨ́ ŋwə laa, tɨɨ vəŋ lùu Abraham. Yeso gi tɨ́ vəŋ laa, «Nii lùu laa viŋ lùu vaŋ Abraham, buu viŋ kɨ yɨ nu ŋkɨə faŋ Abraham nəə yɨ. 40Luu nə, viŋ kəə zwi mə, faŋ mə lùu wə faŋ mə gisə nu yinsəŋ tɨ́ viŋ, faŋ mə nə zɔ̀ fɨ ghɔ Nwi. Abraham nəə kee yɨsə kəŋ nu ghɔ́ me. 41Gə̀ fɨ maa viŋ, viŋ yɨ vənu və wə dɨday faŋ luu tii wiŋ fɨ maa nshinə yiŋ.» Vəŋ gi tɨ́ ŋwə laa, «Yia lùu vəbigɔ. Luu sheꞌ Nwi nɨnɔŋ lùu tii wia.» 42Yeso gi tɨ́ vəŋ laa, «Nii toꞌ lùu yinsəŋ laa Nwi lùu tii wiŋ, buu viŋ kɨ kaw mə, buꞌ laa mə ndɔ̀ fɨ yɨ Nwi, baa lùu ŋwiŋ wi. Mə kee jwì maa yizii nyaa me, nə tɔ̀ŋ Nwi tɔ̀ŋ mə. 43Sii yɨ̀ kə viŋ kee zɔ nu ŋkɨə faŋ mə gisə me? Ŋkə lùu sheꞌ laa viŋ kee kàw zɔ yigisə nyaa me. 44Tii wiŋ lùu Satan, tɨɨ vəzwitə vəbwəvə. Viŋ yɨsə sheꞌ vənu mbɨə faŋ tii wiŋ Satan kàw. Shù fɨ maa vənzi, Satan nə luu wuu məzwilə vɨɨ. Ŋwə kee kàw yinsəŋ me, nu yinsəŋ kee lùu taa fwi ŋwə tuu kəmuꞌ me. Ŋwə gisə sɨɨ sheꞌ ba, yuu nshinə yi dùꞌ, buꞌ laa ŋwə lùu wuu ba, baa lùu tɨɨ təba. 45Gə̀ fɨ maa mə, mə gisə vənu və yinsəŋ tɨ́ viŋ kɔ̀ŋ Nwi, viŋ kee biŋ mə me. 46Wə lùu taa ŋwaa viŋ faŋ kaꞌ ŋwə gì laa mə yɨ̀ nu bwə kəmuꞌ mu? Wə kee lùu shɔ tuu muꞌ me. Fɔnə mə gisə nu yinsəŋ, sii yɨ̀ kə viŋ kee bìŋ mə me? 47Wə kɨ luu, lùu wee Nwi, buu ŋwə taa kɨ zɔ yigisə Nwi biŋ. Nu ŋkɨə faŋ ŋkə yɨ̀ laa kɨ viŋ zɔ yigisə Nwi kee biŋ me, luu buꞌ laa viŋ kee lùu vaŋ Nwi me.»

Faŋ Yeso nə gì laa yi kwàlə shɔ̀ɔ Abraham

48Vɨɨ kwalə vɨɨ Jus vɔ́ bitə tɨ́ Yeso laa, «Maa yia gì nu bɔŋsə laa a lùu wuu Samaria, baa nə laa zwitə bwə lùu taa ŋwaa ghɔ.» 49Yeso bəŋsə tɨ́ vəŋ laa, «Zwitə bwə kee lùu taa ŋwaa mə me. Mə zɔnə lùu Tii ŋwaa, kɔ̀ feenə tɨ́ ŋwə. Gə fɨ maa viŋ, viŋ ndasə mə. 50Kee kəə mə laa vɨɨ kɨ kɔ feenə shee me. Wə mɔ́ꞌ lùu shɔ faŋ ŋwə kəə kɔ feenə shee. Ŋwə ndɔ sɔꞌ nu kɔ́ nɨzi. 51Viŋ zɔ! Mə naysə tɨ́ viŋ yinsəŋ laa, kɨ luu wə biŋ, nùŋsə yigisə nyaa, buu ŋwə ndɔ goꞌsə yighee muꞌ, kee ku me.» 52Vɨɨ Jus vɔ́ gi tɨ́ ŋwə laa, «Buꞌ yigisə yə, yia yè yinsəŋ laa zwitə bwə lùu taa ŋwaa ghɔ. Ŋkee fɨshi Abraham nə ku, nshiisə-ŋii sɔghɔ nə kùkə nɨzi. Sii yɨ̀ kə buu a gi laa wə kɨ luu biŋ yigisə yə, buu ŋwə kee ndɔ ku me? 53Tii wia Abraham nə kù, a kwàlə shɔ̀ɔ ŋwə mu? Nshiisə-ŋii sɔghɔ nə kukə̀. A sii bɨꞌtə laa a lùu ndə?» 54Yeso bəŋsə tɨ́ vəŋ laa, «Mə nii toꞌ kɨ koꞌsə ŋwaa ŋwaa, laa vɨ kɨ fee mə, buu lùu nu day day. Luu nə, kɔ sheꞌ Tii ŋwaa kɔ feenə shee. Tii ŋwaa faŋ viŋ gì laa luu Nwi wiŋ, 55faŋ viŋ kee bee kɨɨ nə ŋwə me. Kɨɨ sheꞌ mə nə ŋwə. Mə nii toꞌ gì laa mə kee kɨɨ nə ŋwə me, buu mə sɨ̀ɨ ba, buu mə luu sheꞌ yaa viŋ vɨɨ təba. Luu nə, mə naysə tɨ́ viŋ laa mə kɨɨ nə ŋwə. Mə baa zɔnə ŋwə, nuŋsə yigisə yi. 56Tii wiŋ Abraham nə kɨ̀ꞌ maa məye shi məbi kaŋ nə məŋaytə. Ŋwə nə ye, ŋàytə ŋkee dɨdɨꞌ.» 57Vɨɨ Jus vɔ́ gi laa, «Aŋ ghɔ, a kee ta lùu ŋuꞌ muu-ntee me, kɨ kəə gì laa a nə yè Abraham lee?» 58Yeso gi tɨ́ vəŋ laa, «Viŋ zɔ! Mə gì tɨ́ viŋ yinsəŋ laa, mə nə luu shɔ, buu vɨ ndɔ kɨ dùꞌ bì Abraham.» 59Yeso nə gi nɨniŋ, vəŋ bwilə ŋoꞌsə fɨ nsi maa mətumə ŋwə shɔ laa ŋwə ku. Luu nə, Yeso buꞌsə fɨ yɨ vəŋ, fùu fɨ taa ŋii Nwi.

Currently Selected:

Jɔn 8: bav

Highlight

Copy