Mark 1

Nu Jɔn, wuu məkɔ muu mə Nwi

(Matiu 3.1-12; Lukas 3.1-18; Jɔn 1.19-28)

1Lùu ntɔŋ yijəə buꞌ Yeso Kristo, Wee Nwi. 2Vənu vɔ́ nə tey sheꞌ faŋ nshiiŋii-sɔghɔ Aysaya nə ŋwàꞌlə. Ŋwə nə ŋwàꞌlə laa (Nwi nə gì tɨ́ ŋwiŋ wi laa),

«Mə taa tɔŋ wuu ntɔŋ ŋwaa vɨsɨ ghɔ

laa ŋwə lootə jɨɨ yə,» #Malaki 3.1.

3baa nə laa,

«Wə mɔ́ꞌ luꞌ fɨ tɔɔ waꞌsə laa,

viŋ lootə jɨɨ Tɨta ŋwaa-nsiŋ,

bɔ̀ŋsə fɔꞌ wi, ŋwə neꞌtə.» #Aysaya 40.3.

4Nɨniŋ, Jɔn fuu taa tɔɔ waꞌsə, fàynə yigisə Nwi yɔ́, ndɔ fɨꞌtə nu Nwi tɨ́ vɨɨ, gi laa vəŋ biŋ nu bwə vəŋ ntee, kwìinə fwisə vəŋ, buu fi muu mə Nwi fɨ ghɔ yi maa məsɔ yibɨsə vəŋ, buu Nwi ndenə yibɨsə vəŋ. 5Vɨɨ Jerusalem vənshə ghɔ vɨ vɨɨ vənshə fɨ taa ntɨꞌsə Judia səmɔ́ꞌsə ndɔ gə̀ ye ŋwə. Ŋwə kɔ muu mə Nwi tɨ́ vɨɨ mbɨə faŋ vəŋ bìŋ vənu vəbwəvə vəŋ taa muu mə Jordan. 6Jɔn nə mɔ̀ꞌ njwi faŋ vɨ nə bà nə nyuŋsə nyaa kamelə, shùŋ kɔtə gɔ ŋiꞌ ŋwə, kwə sheꞌ ŋweysə, ndɔ nda zɔsə. (Njwisə sɔ́ nə kee lùu njwisə vɨɨ ka me, nə luu njwisə faŋ nshiisə-ŋii sɔghɔ yaa kɨ mɔ̀ꞌ nə.) 7Ŋwə nəə fɨꞌtə nu Nwi, baa gisə laa, «Wə ntɨə faŋ ŋwə kwàlə shɔ̀ɔ mə jɨjwi fɨ yiba, faŋ mə kee yikuꞌnə maa məfaꞌ vəfaꞌ və vəbuꞌ tɨ́ ŋwə, yaa məkeꞌtə kuu gɔsə wi me. 8Mə kɔ muu mə Nwi tɨ́ viŋ; ŋwə ndɔ kɨ kwaŋ luu Zwitə Ley Nwi taa ŋwaa viŋ.»

Faŋ Yeso nə fì muu mə Nwi, tɨɨ vəzwitə vəbwəvə mɔŋ ŋwə

(Matiu 3.13–4.11; Lukas 3.21-22; 4.1-13; Jɔn 1.32-34)

9Nə luu maa yighee yɔ́, Yeso ndɔ fɨ ntɨꞌ Nazaret, shɨ Galilii, jwi yɨ Jɔn, fì muu mə Nwi taa muu mə Jordan. 10Ŋwə kɨ koꞌ fɨ taa muu, sheꞌ yighee yɔ́ ye shuu yizɔ ŋaꞌnə, Zwitə Ley Nwi siꞌ yaa bɔŋsə, tɨ̀ŋ tɔ ŋwə. 11Gɨ Nwi gi fɨ taa yizɔ laa, «A luu ŋkee ŋwiŋ ŋwaa faŋ mə kàw. A bàw shee.» 12Zwitə Ley Nwi kɔ́ kɨ nii sùŋ ŋwə, ŋwə gə tɔɔ waꞌsə, shì shɔ vəshi muu-yinshwe. Satan, tɨɨ vəzwitə vəbwəvə mɔŋ ŋwə. 13Faŋ ŋwə nə luu shɔ taa tɔɔ waꞌsə nə, nyaasə bwəsə nə luu shɔ nɨzi. Nshiisə-ŋiisə Nwi nəə faꞌ tɨ́ ŋwə.

Faŋ Yeso nə shòꞌ mfɔŋsə vɨɨ məzwetə nu ki

(Matiu 4.12-22; Lukas 4.14-15; 5.1-11)

14Nə luu maa yighee njyə faŋ vɨ nə duꞌtə vɨ jia Jɔn, kwàŋ ŋwə mfiŋ, Yeso jwi shɨ Galilii, kɨ toꞌ fɨꞌtə ntɔŋ Nwi yijəə buꞌ nu yifwàŋ Nwi, gisə laa, 15«Yighee njyə faŋ Nwi ndɔ jwì sɔꞌ vɨɨ maa nshɨ-tɔ wi lùu nshənə. Nɨniŋ, viŋ kwiinə fwi siŋ, biŋ ntɔŋ yijəə yɔ́.»

16Ŋwə kɨ shɔɔ fɨ yɨ maghia Galilii, yè Saymon ghɔ Andru, weenshu wi, faŋ vəŋ nə mɔꞌ ghuu susə taa muu. Vəŋ nə luu vɨɨ məkoo susə. 17Yeso gi tɨ́ vəŋ laa, «Viŋ jwi, beꞌsə mə, mə taa yɨsə viŋ kɨ baytə vɨɨ tɨ́ Nwi, sheꞌ faŋ viŋ yaa kɨ baytə susə taa ghuu nə.» 18Vəŋ meꞌtə ghuu vəŋ ghɔ́ yighee muꞌ, bèꞌsə ŋwə. 19Yeso baa kɨ toꞌ filə gə vɨsɨ, yè Jeyms, wee Zebedii, nə Jɔn, weenshu wi, taa bay faŋ vəŋ nəə təənə ghuu susə vəŋ. 20Ŋwə tii vəŋ. Vəŋ meꞌtə tɨɨ vəŋ taa bay ghɔ vɨ vɨɨ faꞌ vi, bèꞌsə Yeso.

Faŋ Yeso nə fùusə zwitə bwə fɨ maa wə

(Lukas 4.31-37)

21Yeso ghɔ vɨ vɨɨ vi vɔ́ kɨ nii gə̀ zìꞌ ntɨꞌ Kapernaum. Shi zwisə Nwi kuꞌ, Yeso gə taa ŋii məshɔꞌtə Nwi, deesə nu Nwi shɔ. 22Yishuu vɨɨ yɔŋ maa mədeesə wi ghɔ́, buꞌ laa ŋwə nəə deesə yuu wə faŋ ŋwə kìi wutə məsɔꞌ vɨɨ, kee deesə yaa vɨɨ mədeesə ŋwaꞌlə Nwi (faŋ vəŋ yaa kɨ deesə sheꞌ maa yizii wə dɨday) me. 23Yeso nəə deesə nu Nwi nɨniŋ nə, wə mɔ́ꞌ nə luu shɔ taa ŋii Nwi faŋ zwitə bwə nə luu taa ŋwaa ŋwə. Ŋkə yumə laa, 24«A sii taa yɨ kə nə yia, Yeso, wuu Nazaret. A jwi zwilə yia mu? - Mə kɔꞌ kɨɨ nə wə ntɨə faŋ lùu ghɔ; a luu ŋkee Wee Nwi, wuu məbweysə mbi.» 25Yeso shə tɨ́ zwitə bwə kɔ́, gì laa, «Shia! Fuu fɨ maa ŋwə!» 26Zwitə bwə kɔ́ ghəəsə wə ghɔ́, yùmə, fùu fɨ maa ŋwə. 27Shuu vɨɨ vənshə yɔŋ. Vəŋ bitə sheꞌ vəŋ vəŋ laa, «Lùu kə nə? Lùu ntɔ mədeesə yifi yikə nee? - Ŋwə sɔ̀ꞌ ŋkee vəzwitə vəbwəvə nə wutə, mbə zɔnə ŋwə.» 28Sheꞌ yighee muꞌ sɔꞌkə ghɔ́ nə fì vədɨꞌ vənshə fɨ shɨ Galilii kənshə ŋkwəŋ.

Faŋ Yeso nə shùꞌ vəza fɨ maa vɨɨ vəyaŋ

(Matiu 8.14-17; Lukas 4.38-41)

29Sheꞌ fɨkɨꞌ nee, Yeso ghɔ vɨ vɨɨ vi fuu fɨ taa ŋii məshɔꞌtə Nwi, gə̀ taa ŋii Saymon ghɔ Andru. Jeyms nə Jɔn gə shɔ nɨzi. 30Maa yighee yɔ́, nshu zu Saymon nə nɔ̀ŋ taa ŋii ghɔ nshɨꞌ. Vəŋ naysə nu kɔ́ tɨ́ Yeso yighee muꞌ. 31Yeso gə yɨ ŋwə, jia ŋwə fɨ maa kwiŋ wi, bɨ̀ŋsə yizɔ. Nshɨꞌ kɔ́ me fɨ maa ŋwə yighee muꞌ. Wəzwi ghɔ́ zə vəŋ.

32Kɨ lùu laynəfu faŋ shɨshwi fìŋ, vɨ jwi nə vɨɨ vəza tɨ́ ŋwə vənshə, nə vɨɨ mɔ́ꞌ faŋ zwitə bwə nə lùu taa ŋwaa vəŋ. 33Ntɨꞌ yɔ́ yinshə baytə shuu ŋii yɔ́. 34Yeso shuꞌ vəza vəyaŋ, baa fùusə vəzwitə vəbwəvə fɨ taa yiŋwaa vɨɨ vəyaŋ. Faŋ ŋwə nə fuusə vəzwitə vəbwəvə fɨ taa yiŋwaa vɨɨ nɨniŋ nə, kee biŋ laa mbə gi nu kɔ̀ŋ yi me, buꞌ laa mbə nə kɔꞌ kɨɨ nə ŋwə.

Faŋ Yeso nə fɨ̀ꞌtə nu Nwi shɨ Galilii

(Lukas 4.42-44)

35Fu lee, ŋkee ntaw ŋkɨꞌ faŋ fu nəə kɨ bii nə mfiŋsə, Yeso ndɔ̀ fɨ mbweysə, fùu gə̀ maa shəŋ nɔŋ-nɔŋ, gə̀ shɔ̀ꞌtə Nwi shɔ. 36Fɨkɨꞌ Saymon ghɔ vəliŋ vi beꞌsə ŋwə. 37Vəŋ gə kəə ŋwə, yè ŋwə, gì tɨ́ ŋwə laa, «Vɨɨ vənshə kəə ghɔ.» 38Ŋwə gi tɨ́ vəŋ laa, «Nsiŋ ndɔ fɨ feenə, gə̀ maa ntɨꞌsə sədaysə faŋ nsə lùu nshənə, tɨ́ kɨ kaꞌ mə gə fɨ̀ꞌtə nu Nwi shɔ nɨzi. Lùu ŋiꞌ nu ŋkɨə faŋ mə nə fuu ŋkə fu.» 39Vəŋ kɨ nii yigə. Yeso fɨꞌtə nu Nwi taa ntɨꞌsə Galilii sənshə taa ndɔꞌ Nwi vəŋ, ndɔ̀ fùusə vəzwitə vəbwəvə fɨ maa vɨɨ nɨzi.

Faŋ Yeso nə shòꞌsə gəə, kɔ̀ŋ wuu zatə bwə, shùꞌ zatə bwə ki

(Matiu 8.1-4; Lukas 5.12-16)

40Nə luu maa yighee yɔ́, wuu zatə bwə mɔ́ꞌ jwi yɨ Yeso, bùꞌ ghɔ tɨ́ ŋwə, jə̀ vətɔ vəyəə vi nsi, gì laa, «A kəə gàŋtə mə, a kìi wutə maa məyɨ laa zatə bwə kaŋ me.» 41Yeso kee gəŋsə wə ghɔ́, nèsə ghɔ ki, kɔ̀ŋ ŋwə, gì tɨ́ ŋwə laa, «Mə kəə nɨniŋ; ŋkə me fɨ maa ghɔ!» 42Sheꞌ yighee muꞌ zatə bwə kɔ́ me fɨ maa wə ghɔ́; ŋwaa wi ley. 43Yeso twey tɨ́ wə ghɔ́ nə wutə laa kɨ ŋwə naysə nu kɔ́ tɨ́ wə me, buu tɔŋ ŋwə laa ŋwə yasə ndɔ. 44Yeso gi tɨ́ ŋwə laa, «Kɨ ghɔ naysə nu kɔ́ tɨ́ wə me! Ndɔ gə̀ də̀ ŋwaa wə tɨ́ wuu məfeꞌ Nwi, kɔ Nwi nə vətɔ mbɨə faŋ Mose nə nùŋsə taa ŋwaꞌlə Nwi laa vɨ kɨ kɔ Nwi shɔ, tɨ́ kɨ kaꞌ wuu məfeꞌ Nwi ghɔ́ sɔꞌ tɨ́ vɨɨ laa ŋwaa wə lèy.» 45Luu nə, wə ghɔ́ fuu kɨ toꞌ, naysə tɨ́ vɨɨ vəyaŋ. Nu kɔ́ saynə, fi vəshəŋ vənshə. Vɨɨ tey kɨ baytə yɨ Yeso ŋkee dɨdɨꞌ, tɨ́ kɨ kaꞌ ŋwə kee baa kɨɨ fuu baa ŋii taa ntɨꞌ yimɔ́ꞌ ntee me, kɨ nii dùꞌ sheꞌ yiba shɨ. Vɨɨ kɨ jɨjwi yɨ ŋwə fɨ maa vəshəŋ vənshə.

Currently Selected:

Mark 1: bav

Highlight

Copy