Utandiko 11
11
Lupungu lwa Babeli
1Mpiti antu amu nsi yavwanganga ululimi luli longa nu kuomvya amazwi ali yamwi.
2Mu kululumba kwao antu yasuka yafika ku manyika aku ufumondaka mu mpanga ya Syinala akuno yikala.
3Nga yavwanzyanya yati, “Izini tutame injelwa toce zikome.” Caleka yakweti injelwa zyaku kuulila, na manenekela aku kuulila, yataomvizye amawe nanti ndaka. 4Lyene yati, “Twikuulile umusumba nga nu lupungu lwakufika kwiyulu. Ndi twacita vii, tulalumbuka nupya tutalasalangana monsi mu nsi.”
5Lyene Yawe aika ukufuma kwiyulu kwizalola umusumba nu lupungu luno yakukuula, 6nga ati, “Antu yaa ali yamwi, nu lulimi luno yakuvwanga ululi longa, na uu uli utandiko wa vintu vino yali nu kucita. Citakusumba insita ala antu iyacita consi cino yangatemwa ukucita. 7Leka tuye pansi tukavulunganye ululimi lwao kuti yatauvwana.”
8Caleka Yawe ayasalanganya mu nsi yonsi, yata kukuula umusumba. 9Acino umusumba ulya yautemile izina yati a Babeli, pano amuno Yawe wavulunginye ululimi lwa antu yonsi mu nsi. Ukufuma papo kwene antu yasalanga mu nsi yonsi.
Amu mupanda wakwe Syemu
(1Mil 1:24-27)
10Yaa ali amu mupanda wakwe Syemu. Pacisila cakwe mulamba papisile imyaka iili, nga lino Syemu waya ni myaka 100, umuci amuvyalila umwana umonsi, izina lyakwe a Alipakisadi. 11Pacisila cakuvyalwa kwakwe Alipakisadi, Syemu aikala imyaka nayuze 500. Wakweti ana nayauze aonsi na anaci.
12Lino Alipakisadi waya ni myaka 35, umuci amuvyalila umwana umonsi, izina lyakwe a Syela. 13Pacisila cakuvyalwa kwakwe Syela, Alipakisadi aikala imyaka nayuze 403. Wakweti ana nayauze aonsi na anaci.
14Lino Syela waya ni myaka 30, umuci amuvyalila umwana umonsi, izina lyakwe a Ebeli. 15Pacisila cakuvyalwa kwakwe Ebeli, Syela aikala imyaka nayuze 403. Wakweti ana nayauze aonsi na anaci.
16Lino Ebeli waya ni myaka 34, umuci amuvyalila umwana umonsi, izina lyakwe a Pelegi. 17Pacisila cakuvyalwa kwakwe Pelegi, Ebeli aikala imyaka nayuze 430. Wakweti ana nayauze aonsi na anaci.
18Lino Pelegi waya ni myaka 30, umuci amuvyalila umwana umonsi, izina lyakwe a Lewu. 19Pacisila cakuvyalwa kwakwe Lewu, Pelegi aikala imyaka nayuze 209. Wakweti ana nayauze aonsi na anaci.
20Lino Lewu waya ni myaka 32, umuci amuvyalila umwana umonsi, izina lyakwe a Selugi. 21Pacisila cakuvyalwa kwakwe Selugi, Lewu aikala imyaka nayuze 207. Wakweti ana nayauze aonsi na anaci.
22Lino Selugi waya ni myaka 30, umuci amuvyalila umwana umonsi, izina lyakwe a Nawoli. 23Pacisila cakuvyalwa kwakwe Nawoli, Selugi aikala imyaka nayuze 200. Wakweti ana nayauze aonsi na anaci.
24Lino Nawoli waya ni myaka 29, umuci amuvyalila umwana umonsi, izina lyakwe a Tela. 25Pacisila cakuvyalwa kwakwe Tela, Nawoli aikala imyaka nayuze 119. Wakweti ana nayauze aonsi na anaci.
26Lino Tela waya ni myaka 70, umuci amuvyalila ana aonsi, amazina yao a Abulamu, Nawoli na Halani.
Amu mupanda wakwe Tela
27Yaa ali amu mupanda wakwe Tela. Tela wali a isi wakwe Abulamu, Nawoli na Halani. Halani wali a isi wakwe Loti. 28Halani wafwilile mu Uli, umusumba wakumwao muno yatenzi, mu mpanga ya Kalideya, ala isi acili umumi. 29Abulamu watwite Salai, nga Nawoli nawe watwite Milika umwana wakwe Halani, nga na Isika kwene wali umwana wakwe Halani. 30Lelo Salai wali ng'umba, atakweti nanti umwana.
31Lyene Tela asenda Abulamu umwana wakwe umonsi na Loti umwizikulu wakwe nupya umwana wakwe Halani, na Salai umuci wakwe Abulamu, uwali a nyinavyala nga iyatenuka mu musumba wa Uli mu mpanga ya Kalideya, yapita ukuya ku mpanga ya Kenani. Lelo lino yafika ku Halani, akuno yikala. 32Tela wafwilile ku Halani lino waya ni myaka imyanda iili na isano.
Currently Selected:
Utandiko 11: MamL13
Highlight
Share
Copy
Want to have your highlights saved across all your devices? Sign up or sign in
Mambwe-Lungu Bible © The Bible Society of Zambia, 2013
