Utandiko 19
19
Inkota zya antu amu Sodoma
1Lino Angeli yaya yaili yafisile ku Sodoma manguzi, Loti watenzi pa mpongolo ya musumba. Zuwazuwa lino wayalola, akatuka aya ku kuyakomenkanya nga afukama pansi afupime, 2alino avwanga ati, “Yasambazi napapata izini ku ng'anda ya muomvi winu. Mukafulale ingazo nu kulala. Katondo ulaca mwapita kuno mukuya.”
Nayo yaasuka yati, “Awe twayalala mu musolo wa musumba.”
3Lelo Loti atwalilila ukupapata, nga yazumila yapita nawe ku ng'anda. Alino Loti apanga imikate iyaulamo icitutumusi, ayateyanyizizya cakulya cisuma, nga yalya.
4Lino aenyi yatali kuti yalale, aonsi amu musumba wa Sodoma, aikolo na alumendo, iyaya yazinguluka ing'anda. 5#Yaka 19:22-24 Yama Loti yamuzya yati, “Uzye aenyi aizile ku kulala kwako yalikwi? Yafumye panzi uleke tuulungane nayo.”
6Loti afuma panzi, ayalako cisasa, 7nga avwanga kunoyali ati, “Mwe yacuza, nkumulenga nkuti mutacita ukakasi wa musango ndi uu! 8Lolini, nkweti ana yakaci yaili atatala yamanya umonsi. Lekini ayano imuletele mucite cino mukulonda. Mutacita cimwi na antu yaa pano aenyi pa ng'anda yane, ndinzile njacingilile.”
9Lelo antu yalya yanena Loti yati, “Senka pano, mwinamasi we! Nga weweni wakutunena cakucita? Senka, ndasi vivyo wewe tumakuombela ukuluta pali yayo.” Alino yakanka Loti nga iyaya nu ku cisasa kuti yalepule. 10Lelo antu yalya yaili umukasi yatambika makasa, yalema Loti yamutintila mukasi mu ng'anda iyayala nu mulyango. 11#2Yam 6:18Lyene yapafuzya antu yonsi ali panzi kuti yatalola mulyango wa ng'anda.
Loti wafuma mu Sodoma
12Antu yalya yuzya Loti yati, “Ndi ukweti yamwi akazi mu musumba uu, ana yako aonsi nanti yakaci, yasovyala nanti yanyokovyala, upite ukayatole yafume mu musumba. 13Pano tulonona icifulo ci. Yawe uuvwa imilandu ya ukakasi wa antu yaa, nawe watatutuma kwiza onona Sodoma.”
14Lyene Loti aya kuli yasivyala ali nu kutwala ana yakwe ati, “Pitisini mufume muno musumba, pano Yawe akulonda konona cifulo ci.” Lelo yene yelenganya ukuti imyawe.
15Ku macaca angeli yacincizya Loti yati, “Kalaufya! Toola umuci wako na ana yako yakaci oili mufumemo, kuti mutalovya umi lino umusumba ukononwa.” 16#2Pet 2:7 Loti atala asitooka. Lelo Yawe wali na mizu kunoli. Icaleka angeli yalema Loti nalwikasa, umuci na ana yakwe, nga yayafumya kunzi ya musumba. 17Mungeli wenga ayanena ati, “Utukini mufyusye umi winu. Mutapepela icisila nupya mutimilila mu cifoloma. Lelo utukilini ku mwamba pano limwi mungaya nkupilwakumwi.”
18Loti akana ati, “Awe, napapata mukwai citaya vivyo. 19Mwemo mwatimutucitila uluse lukulu, nupya mwatimundanga uluse lukulu kunondi pa kufyusya umi wane. Lelo ku mwamba kwatalimpa cuze. Uwononyi unganzana imfwe lino ntali mfike ku mwamba. 20Uzye mwatimulola kamusumba kaka kanono? Pene paya apipi ningafika, lekini apano inje. Mutaweni akanono cuze, nupya nigafyusya umi wane.”
21Mungeli azumila ati, “Cico cuvwika, nsi nu konona kamusumba kaka. 22Ale kalauka simula, ntangacita cimwi mpaka wafika kuku. Pano kali akanono, acino yakinike izina yati Zoali.”
Kononwa kwakwe Sodoma na Gomola
23Lino ilanzi likutunka Loti ala wafika ku Zoali. 24#Mat 10:15; 11:23, 24; Luk 10:12; 17:29; 2Pet 2:6 Yawe aponya makala ya moto wakwe pali Sodoma na Gomola. 25Avino aonona cifoloma consi na antu yonsi mu misumba yoili pamwi ni vimelwa vyonsi. 26#Luk 17:32 Lelo umuci wakwe Loti wene apepela icisila, nga asanguka ikango lya musilya.
27Katondotondo wanda walondelela Abulaamu asimwilila ku cifulo cino wimililepo inkolelo yakwe Yawe. 28Nga asumba manso pali Sodoma na Gomola nu mu cifoloma nga alola icunsi kwati cikufuma umwi lungu. 29Lelo lino Leza wononyile imisumba ilya yamu cifoloma, wiwisye kupapata kwakwe Abulaamu kuti Loti apusuke.
Intulo ya amu mutundu wakwe Moabu na wakwe Amoni
30Pamulandu wakuti Loti oofile ukwikala mu Zoali, Loti pamwi na ana yakwe yakaci yoili yaile ku myamba akuno iyaya yikala umwi cele. 31Nyinalenzi anena umuto ati, “Tata akuya akukota, lyene kusi umonsi nanti wenga asile mu nsi angatutwala, pakuti tungavyala ana umu nzila isuma. 32Iza kuno, uleke tukolesye tata waini pakuti tungalala nawe tukwate ana kunoli.”
33Usiku ulya yapile isi waini akoleka, nga nyinalenzi alala ni isi pano wakolike atamanyile ni cacitike.
34Katondo nyinalenzi alandila umuto ati, “Nemo nalinalala na tata usiku. Nupya leka tumukolesye ni lelo kwene usiku kuti nawe kwene ucite wakwe vino nacisile. Lyene swensi tungavyala ana kunoli.” 35Caleka mu wanda kwene ulya yapeela isi waini akoleka, nu muto nawe alala ni isi. Nupya kwene isi atamanyile ni cacitike. 36Avino yakaci yonsi yoili yasenzile zyandilwa ukufuma kuli isi. 37Nyinalenzi waviile umwana umonsi wino watemile izina Moabu. Cili cikolwe ca ina Moabu kufika ni lelo. 38Nu muto nawe kwene waviile umwana umonsi, nga wamutemile izina Benami. Cili cikolwe ca mutundu wa ina Amoni kufika ni lelo.
Currently Selected:
Utandiko 19: MamL13
Highlight
Share
Copy
Want to have your highlights saved across all your devices? Sign up or sign in
Mambwe-Lungu Bible © The Bible Society of Zambia, 2013
