Utandiko 22
22
Leza wapeela Abulaamu ilamulo kuti amupeele Isaki wa mpolelwa.
1 #
Aye 11:17-19
Insita imwi Leza wezizye Abulaamu avwanga kunoli, ati, “Abulaamu!” Nawe aasuka ati, “Mukwai, nkutezya!”
2 #
2Mil 3:1
Leza avwanga kunoli ati, “Tola umwana wako umonsi, umwana wako umonsi wenga sile Isaki wino watemwa, uye ku mpanga ya Moliya. Na kukwa akuno uye ukamumpeele impolelwa wa wila wakoca pa mwamba onga uno ndakulanga.”
3Uca katondo Abulaamu aputola inkwi zya kocela uwila nga azinyepa pali punda. Asenda Isaki na aomvi yaili nga iyatenuka iyaya ku cifulo cino Leza wamunenyile. 4Mu wanda uwalenga yatatu Abulaamu alola katalamukila cifulo cino yamulanzile. 5Anena aomvi yakwe ati, “Syalini pano na punda, Isaki nani twaya mu kupepa. Tumawela kunomuli.”
6Abulaamu atwika Isaki inkwi zya kocela uwila, nga umwisikulu asenda cisonsololwa ca moto nu mwele, yapita yoili. 7Isaki avwanga kuli Isi ati, “Tata.”
Isi nawe aasuka ati, “Anene mwanane?”
Isaki auzya ati, “Nalola kuti tukweti umoto ni nkwi. Uzye imfwele yene ilikwi iyakupeela uwila wakoca?” 8Abulaamu aasuka ati, “Leza umwisikulu amapeela umwana wa mfwele uwa kupeela wa wila wakoca.” Awe yatwalilila ukupita.
9 #
Yak 2:21
Lino yafika pa cifulo cino Mwene Leza wamunenyile, Abulaamu akuula kavuwa alonga ni nkwi papela. Anyepa Isaki umwana wakwe umonsi nga amulambalalika pa kavuwa, alino amwika papela pa nkwi. 10Atoola nu mwele azunzula ni kasa kuti amukome. 11Lelo mungeli wakwe Yawe alaizya ukufuma umwiyulu ati, “Abulaamu, Abulaamu!”
Nawe aasuka ati, “Anene mukwai.”
12Alino mungeli ati, “Utezya ukukoma mulumendo nanti ukucita icili consi kunoli. Lyene nimanya ukuti wemo ukacindika nu kuyela Leza, pano utanjimile umwana wako umonsi uwaya sile wenga.”
13Abulaamu alwenga nga alola suuku watalemya impembe mu cimpuza. Lyene aya amutola awino afyula, nga apeela wa wila wakoca mucifulo ca mwana wakwe. 14Abulaamu atemela cifulo cici izina ati, “Kapeela a Yawe.” Caleka kufika na pilelo kwene antu yakati, “Pa mwamba wakwe Yawe apano cilapelwa.”
15Mungeli wakwe Yawe aama Abulaamu iila lyakwe ciili ukufuma umwiyulu 16#Aye 6:13, 14 nga amunena ati, “Ivyalanda ne Yawe: Nalaya umwi zina lyane ukuti ndakupolelela cuze, pano wazumila ukupeela kunondi umwana wako umonsi ali sile wenga. 17#Aye 11:12 Nalaya ukuti ndakupeela ana avule cuze, nu kuvula kwao kulaya wa ntanda zya mwiyulu, nanti wa musensenga uwamu nkumba yakwe yemba. Ana yako yalacimvya anisi yao. 18#Mil 3:25 Na antu amu nko zyonsi zya muno nsi yalanguzya kuti nayo njapolelele wakwe vino natinkupolelela na ana yako pamulandu wa kunjela.” 19Abulaamu aswilila ku yaomvi yakwe lyene yonsi pamwi yaswilila ku Belisyeba kuno ikalanga.
Ana yakwe Nawoli
20Uwanda umwi Abulaamu auvwa ukuti Milika, mulamu wakwe, wavyalila Nawoli mwina wakwe Abulaamu ana. 21Iyeli lyakwe wali a Uzi, nga a Buzi na Kemueli isi wakwe Alamu, 22Kesedi, Hazo, Pilidasi, Yidilafi na Betuele 23(Betuele ali isi wakwe Labeka). Mika wavyalile Nawoli umwina wakwe Abulaamu ana yaa, cinani. 24Muci wakwe Nawoli namuze wali a Leuma, nawe waviile Teba, Gaamu, Taasyi na Maaka.
Currently Selected:
Utandiko 22: MamL13
Highlight
Share
Copy
Want to have your highlights saved across all your devices? Sign up or sign in
Mambwe-Lungu Bible © The Bible Society of Zambia, 2013
