Utandiko 28
28
1Acino Isaki aama Yakobo nga amupolelela, alino amunena ati, “Utange utwale umwanaci mwina Kenani. 2Katuka upite kwakwe sokulu Betuele, ku Mesopotamya, akuno ukatwale umwanaci uwamu avyala yako, ana yakwe Labani nyokolume. 3Si Mwene Leza Wamaka yonsi akupolelele akupeele nu uvyazi uce usanduluke uye imitundu ingi! 4#Uta 17:4-8 Nupya akapolelele na ana yako kwene vino wapolelile sokulu Abulaamu. Ace alenge kuti ukapyane impanga ii ino nkaikalamo wa mwinamasi, impanga ino Leza wapile kuli Abulaamu.” 5Pacisila ca mazwi yaa, Isaki atuma Yakobo ku Mesopotamya kuli Labani, umwana umonsi wakwe Betuele umwina Alamu, kalume wakwe Labeka, nyina wakwe Yakobo na Esau.
Esau watwala umwanaci Namuze
6Esau auvwa ukuti Isaki watapolelela Yakobo nu kumutuma ku Mesopotamya akuno akalonde umuci wakutwala. Esau nupya amanya ukuti Isaki apakupolelela Yakobo wamupeezile ilamulo kuti atezya kutwala umwanaci mwina Kenani, 7amanya navino Yakobo watayela isi na nyina nu kuti wataya ku Mesopotamya. 8Lyene Esau asininkizya ukuti isi Isaki asilonda anaci amu Kenani. 9Caleka Esau aya kuli Isumeli nga atwala Maalati umwana umwanaci wakwe Isumeli, nupya umwizikulu wakwe Abulaamu. Kalume wakwe Maalati wali a Nebayoti.
Ciloto cakwe Yakobo pa Betele
10Yakobo afuma ku Belisyeba, nga atenuka aya ku Halani. 11Lino ilanzi lyawa afika pa ncende imwi yamuzilo, akuula insakwe apano alala, atoola iwe acita musamilo nga akasula. 12#Yoa 1:51 Alota akulola mutanto, ala cisinte cakweo cimikwe pansi nu lutwe lwauko lusintilile umwiyulu, nga na angeli yakwe Leza yamwi yakwika na yamwi yakukwela penepo. 13#Uta 13:14, 15 Mwene aimilila pipi nawe avwanga ati, “Nene Yawe, Leza wakwe Abulaamu na Isaki. Ndapeela impanga muno uizi kunuli nu ku amu mupanda wako. 14#Uta 12:3; 22:18 Ndalenga kuti ana yako yavule wa musensenga uwamu nkumba yakwe Yemba. Ana amu mupanda wako yalasalangana ukuya mu ntunga zyonsi izya nsi. Kupitila munuli nu mu amu mupanda wako indapolelela antu amu nko zyonsi. 15Ndakucingilila konsi kuno ulaya, nupya ndakuwezya ku mpanga kwene ii. Intalakusya mpaka nkafikilizye vyonsi vino nakulaya.”
16Lino Yakobo wazyuka avwanga ati, “Mucumi Yawe ali pa cifulo ci, nani ntacimanyile!” 17Auvwa intete nga avwanga ati, “Owe cifulo ci icakoopa! Cilinzile ukuya ing'anda yakwe Leza ni mpongolo ya kuila kwiyulu.”
18Yakobo akatuka katondotondo. Atoola iwe lino wasamile, alimika nu kulicita ciusizyo. Lyene aitilapo na mafuta, alipaatula kuti liye lyamuzilo. 19Atemela cifulo cici izina ati Betele.#28:19 BETELE: Izina lii mu Ciyebulai likasenula ukuti “ng'anda yakwe Leza” (Lelo umusumba ulya mpiti wamwangwa ukuti Luzi.)
20Lyene Yakobo alaya nu mulapo kuli Yawe ati, “Ndi ulaya nani nu kuncingilila mu ulendo wane uno nkweti, nu kumpela ivyakulya ni vyakuzwala, 21nupya ndi naca nawela ulumi kuli tata, lyene ulaya Leza wane. 22Iwe lii lya ciusizyo lino nimika paa, lilaya cifulo ca kukupepela penepo, nga ndakupeela icikumi muli vyonsi vino ulampa.”
Currently Selected:
Utandiko 28: MamL13
Highlight
Share
Copy
Want to have your highlights saved across all your devices? Sign up or sign in
Mambwe-Lungu Bible © The Bible Society of Zambia, 2013
