Utandiko 30
30
1Lelo lino Lakeli walola ukuti atakuvyalila Yakobo ana, aya nu uzuwa pali nyinalenzi, nga anena Yakobo ati, “Mpela ana, nanti mfwe!”
2Yakobo asokela Lakeli nga amunena ati, “Ntangentole cifulo cakwe Leza uwakulenga ukuya ng'umba.”
3Lyene Lakeli aasuka Yakobo ati, “Tola Bilaa, mukazyana wane muzya, umutwale kuti akuvyalile ana nalela. Nani ningaya nyina mwana kupitila munoli.” 4Caleka apeela Bilaa muzya wakwe kuli Yakobo, nga nawe amutwala. 5Bilaa asenda indilwa, nga avyalila Yakobo umwana umonsi. 6Lakeli avwanga ati, “Leza waputwila umulandu ku lusansa lwane. Watauvwa ipepo lyane nu kumpela umwana umonsi.” Caleka amutemela izina ati a Dani. 7Bilaa muzya wakwe Lakeli nupya asenda indilwa, avyalila Yakobo umwana umonsi wakwe ciili. 8Lakeli avwanga ati, “Nacimvya ulwi wane wa maka wapali nene na mangulenzi.” Caleka amutemela izina ati Nafutali.
9Lino Leya walola ukuti ikwata lyasila, apeela Zilipa muzya wakwe kuli Yakobo kuti aye umuci wakwe. 10Lyene Zilipa avyalila Yakobo umwana umonsi. 11Leya avwanga ati, “Nakwata ulongo.” Caleka amutemela izina ati a Gadi.
12Zilipa muzya wakwe Leya avyalila Yakobo umwana wakwe ciili umonsi. 13Nga Leya avwanga ati, “Endi, vino nazanga! Na anaci yanji yamangama yati luzango.” Caleka amutemela izina ati a Asyeli.
14Mu nsita yakuzombola ingano Lubeni waile ku vyalo, nga azana mandaleki, #30:14 MANDALEKI: Mandaleki ivimelwa vino antu yataile ukuti umulembo wa uvyazi ni citemwiko. aletela Leya. Lakeli anena Leya ati, “Napapata mpeko mulembo wa uvyazi ni citemwiko uno umwana wako wataleta.”
15Leya aasuka ati, “Umalapila! Uzye utampoka wane? Lyene ukulonda kuti umpoke na mandaleki wino Lubeni umwana wane umonsi wandondela.”
Lakeli nawe avwanga ati, “Ndi wampeela mulembo uno umwana wako wataleta, ale lyene Yakobo wiza lala nawe ilelo usiku.”
16Walanga lino Yakobo akufuma ku vyalo manguzi, Leya amukomanya nga amunena ati, “Ilelo ulinzile ukulala nani, pamulandu wakuti natindipila pakupeela umuci unji mandaleki wino umwana wane umonsi wandondela.” Caleka Yakobo waile alala na Leya usiku ulya.
17Leza nawe aasuka ipepo lyakwe Leya, nga nawe asenda indilwa avyala umwana umonsi. 18Leya avwanga ati, “Leza watampela cilambu pa kupeela muzya ku wane.” Caleka atemela umwana izina ati a Isakali.
19Leya nupya asenda indilwa, nga avyalila Yakobo umwana umonsi wakwe mutanda. 20Lyene Leya avwanga ati, “Leza watampela uwila usuma, lyene uwane alantemwisya pano natimuvyalila ana aonsi mutanda.” Caleka amutemela izina ati a Zebuluni. 21Pacisila nupya avyala umwana umwanaci, nga amutemela izina ati a Dina.
22Lyene Leza atilile Lakeli, acino azumila ipepo lyakwe, aleka kuti lyene angavyala ana. 23Lakeli asenda indilwa avyala umwana umonsi. Avwanga ati, “Leza watamfumya mu kuzewana kwa kuntavyala.” 24Nga amutemela izina ati a Yosefu, nga avwanga ati, “Yawe, si ungampeela umwana namuze umonsi.”
Yakobo yalayana na Labani
25Pacisila ca kuvyalwa kwakwe Yosefu, Yakobo anena Labani ati, “Leka mpite nswilile kumwitu. 26Mpeko aci yane na ana yano nalonka pa kukuombela, nga nani namapita. Wacimanya cuze vino nakuombela.”
27Labani amwaasuka ati, “Leka ndandepo izwi. Ndi wantemwa utapita pano napendola nu kuzana vino Mwene Leza wampolelela mulandu uno twaya nawe pamwi. 28Caleka ungalanda malipilo yako, nga nani namalipila.”
29Yakobo amunena ati, “Wamanya ningo insita ino natinkuombela na vino iviteekwa vyako vyativisanda pamulandu wa usunzi wane. 30Pa vinono vino wakweti lino ntali nize vyativivulilako cuze, na Yawe watakupolelela pamulandu wa usunzi wane. Lyene insita yatifika yakuti nani nkailolela nemwisikulu.”
31Labani auzya Yakobo ati, “Uzye icani cino namakulipila?”
Yakobo aasuka ati, “Ntakulonda malipilo yamwi. Lelo namatwalilila ku kucemela iviteekwa ndi wacita cino namakunena: 32Ilelo leka mpituluke mu viteekwa vyako vyonsi, kupaatula imfwele zyonsi zitifi ni zya maalamaala, nanti imbuzi izili na matonitoni nanti maalamaala. Yaa, ali malipilo yano nkulonda. 33Manda akwiza ulazana ndi nene wacumi. Lino uli nu kwiza nengula pa malipilo yane, ndu ulazana nkweti imbuzi itakweti matonitoni nanti maalamaala, nanti imfwele yonga isi itifi, ulamanya ukuti iiye.”
34Labani azumila ati, “Cisuma tulacita cino walanda.” 35Lelo uwanda kwene ulya Labani wene aya afumya yasawe yonsi a mingololozi na matonitoni nga afumya na yanyinambuzi yonsi a maalamaala. Afumya ni mfwele zyonsi zitifi apeela ana yakwe aonsi kuti yazisunga. 36Lyene apita ukufuma kuli Yakobo asenda iviteekwa vivyo ukuya kutali kwa lwendo lwa manda yatatu. Yakobo asyala ni viteekwa vino nyinalume wasile.
37Alino Yakobo aya atema misambo iyisi ya miti iyakolana ni mifungo, na makole na yanamunsi nga aiza afopola kuti yaloleka iya mingololozi itiswe. 38Nga atoola imiti ino wafopwile aisansanta kuzingulusya imilangu ino iviteekwa vyamwelanga mwenemo amanzi pa cifula. Cino wacitile vivyo pano lino iviteekwa viizanga ku kumwa amanzi alino vyakwelananga. 39Iviteekwa vyakwelananga ala vikulolekesya ku mingololozi ya miti ifopole, nga pali pa kuvyala twana utwa mingololozi, nu twa maalamaala, nu twa matonitoni.
40Avino Yakobo wapaatulanga ana ya mfwele na ambuzi iyaya yonga, lelo zyasyala aya azyuminkanya na zyakwe Labani zya maalamaala ni zitifi. Mu musango uu amuno wene wasandulwile ufyo wakwe nu kuupaatula ku ufyo wakwe Labani.
41Lyonsi lino iviteekwa iviine vyakalume ndi vimalonda vyakaci, Yakobo waviiletanga pipi ni miti ifopole. 42Lelo atikanga misambo ku nkolelo lino iviteekwa vyonde vikulondelwa. Caleka iviteekwa vyonde vyonsi vizile viya vyakwe Labani nga iviine vyonsi viya vyakwe Yakobo. 43Mu musango kwene uu amuno Yakobo wizile aya umukama wakwe cimwi, akwata iviteekwa vivule cuze, na aomvi anaci na aonsi, ni ngamila na yapunda.
Currently Selected:
Utandiko 30: MamL13
Highlight
Share
Copy
Want to have your highlights saved across all your devices? Sign up or sign in
Mambwe-Lungu Bible © The Bible Society of Zambia, 2013
