Utandiko 32
32
Yakobo waiteyanya ku komanya Esau
1Yakobo atwalilila nu ulendo wa kuya kumwao ku Kenani, nga angeli yakwe Leza yamukomanya. 2Lino Yakobo walola angeli apunda ati, “Pa, apa kamba ka vita vyakwe Leza.” Caleka atemela cifulo cici izina ati Maanaimu.#32:2 MAANAIMU Izina lii mu Ciyebulai likasenula ukuti “inkambi ziili zya vita.”
3Lyene Yakobo atuma inkombe pa nkolelo yakwe kuli silenzi Esau ku mpanga ya Sili uku Edomu. 4Azinena ati, “Mukanene Esau muti, ‘Anene Yakobo muomvi wako, nkukumanyisya vino naile naikala kwakwe Labani, nga nikalako amanda avule lelo ndakai nawela. 5Nalonka ing'ombe, yapunda, imfwele, imbuzi na azya. Acino musambazi natuma amazwi kunuli pakuti ungaswepa ku mwenzo ndi wandola.’ ”
6Lino inkombe zyawela kuli Yakobo zilanda ziti, “Twaile kuli Esau munyonko, nga ali umu nzila kwiza kukomanya. Ali na antu imyanda ini.”
7Yakobo auvwa intete nu kusakamala. Lyene apaatula antu yano wali nayo mu maumba yaili. Aankanya ku maumba yaa yaili imfwele, ing'ombe, imbuzi ni ngamila. 8Ala akwelenganya ati, “Ndi cakuti Esau wiza wazanza iumba lyankolelo, ilyuze lingaya na maka akuutuka.”
9Yakobo apepa ati, “Leza wakwe kuku Abulaamu na Leza wakwe tata Isaki! Owe Mwene! Wemuno wanenyile uti, ‘Pita swilila ku mpanga yakumwinu nu ku aluko lwako, nani ndalenga kuti vintu vyonsi vikuzipile.’ 10Luse lwako ni cumi cino walanga kunondi vitandinzile ne muzya wako. Pakwiza nalamvile Luzi lwa Yodani ni ntuwa itupu, lelo ndakai nawela na maumba yaili. 11Ntuule, napapata ukufuma ku maka ya mwinane Esau. Nuvwa intete zyakuti wiza tuzanza nu kutukoma swensi pyu, kumwi na anaci nu twana kwene. 12#Uta 22:17 Lelo wewe wandavile uti, ‘Cumi kwene ndalenga vintu vyonsi vikuzipile nupya ndasandulula amu mupanda wako yavule wa lusenga lwamu nkumba yakwe yemba, ulutangapendwa.’ ”
13Pacisila ca kulala uwanda onga kukwa kwene, Yakobo asolola inyama zimwi muli vino wakweti vyakupeela uwila kuli Esau mwina wakwe. 14Mbuzi misesi imyanda iili na yasawe amakumi yaili, imfwele misesi imyanda iili na yasuuku amakumi yaili. 15Ngamila zya ana nazyo amakumi yatatu pamwi nu twana twakwe zyelizyo. Yanyina ng'ombe amakumi yaili na yacipambasi ikumi lyonga, yapunda akaci amakumi yaili na yakalume ikumi lyonga. 16Atoola iviteekwa vyonsi vii aviika mu makasa ya aomvi yakwe, cila ufyo aupaatula ula ukwangalilwa nu muomvi wenga, nga anena aomvi yakwe ati, “Pitini inkolelo yane, pa kupita mwasyana akatalamukila.”
17Nga anena mwangalizi wankolelo ati, “Lino mwinane Esau wakukomanya ndi uzya wati, ‘Uzye umusambazi wako aweni? Na kuno ukuya aukwi? Uzye umweneco wa viteekwa vi vino ukolezizye aweni?’ 18Pakuzumila ukati, ‘Ivya muomvi wako Yakobo. Watuma ivyawila vi ku musambazi wakwe Esau. Na Yakobo umwisikulu ali cisila citu.’”
19Yakobo wapeezile ilamulo ilili limwi kwene na kuli wakwe ciili, na kuli wakwe citatu kwene, nga na kuli yonsi muno yalondekine ati, “Vii avino muli nu kulanda kuli Esau ndi mwamukomanya. 20Mulinzile mwati, ‘Ee, mukwai muomvi wako ali cisila citu akwiza.’ ” Yakobo ala akwelenganya ati, “Namamuswefya ku mwenzo ni vyamawila, nalino alankomanya alanzengela nu kungelela.” 21Ivya mawila vipita inkolelo, Yakobo asyala alala pa nsakwe.
Yakobo yazumbana nu mungeli wakwe Leza
22Usiku kwene ulya, Yakobo akatuka na aci yakwe yoili, na azya yakwe anaci yoili, nga na ana yakwe yonsi ikumi na wenga, aya alamba Luzi lwa Yaboki apilambwa. 23Pacilisa cakuyalamvya alamvya na vyonsi vino wakweti. 24#Ose 12:3, 4 Wasile wenga mbalama. Lyene umuntu umwi aiza ku kulwisyanya nawe usiku onsi mpaka kumacaca. 25Lino umuntu wilya walola ukuti atakumucimvya, auma Yakobo mu lutungu, lufyutuka. 26Muntu wilya ati, “Watiwaca, leka napita.”
Lelo Yakobo avwanga ati, “Ntakukuta, mpaka utale umpolelele.”
27Muntu wilya amuuzya ati, “Uzye izina lyako weweni?”
Nawe aasuka ati, “Nene Yakobo.”
28Lyene umuntu wilya ati, “Izina lyako litalaya nupya Yakobo, pano watulwisyanya na Leza na antu, nga watucimvya. Caleka izina lyako ndakai waya Izlaeli.#32:28 IZLAELI: Izina lii mu Ciyebulai likasenula ukuti walwisyanya na Leza.
29 #
Yaka 13:17, 18 Yakobo ati, “Nakupapata nena izina lyako, uzye weweni?”
Nawe auzya ati, “Uzye pacani cino wanguzizya izina?” Lyene papo kwene apolelela Yakobo.
30Yakobo avwanga ati, “Nalola Leza na manso ntontonto kwaula ukufwa.” Acino atemela cifulo cici izina ati Peniwele.#32:30 PENIWELE: Mu Ciyebulai izina lii likasenula ukuti Cinso cakwe Leza.
31Lino ilanzi lyatunka. Yakobo afuma pa Peniwele ala akusinta pamulandu wa lutungu lwafyutwike. 32Acino kufika nu wanda wilelo aina Izlaeli yasyalya inyama yapali namfyumfyu wa lutungu, pano apali pano yumile Yakobo.
Currently Selected:
Utandiko 32: MamL13
Highlight
Share
Copy
Want to have your highlights saved across all your devices? Sign up or sign in
Mambwe-Lungu Bible © The Bible Society of Zambia, 2013
