Utandiko 35
35
Leza wapolelela Yakobo ku Betele
1 #
Uta 28:11-17
Leza anena Yakobo ati, “Katuka wapita ku Betele akuno ukaikala. Kakuulile Leza kavuwa wino walolike kunuli lino wemo utwike munyonko Esau.”
2Caleka Yakobo anena amu ng'anda yakwe na yonsi ali nawe ati, “Sumbini tuleza twa inamasi tuno muli nato, muisangulule muzwale ivizwalo visuma. 3Tukufuma kuno ukuya ku Betele, kuno ndaya nkakuulile Leza kavuwa, Leza wino wangazwilizye lino nali mu nsita zya macuzi, nupya uwaya nani lyonsi na konsi kuno nkaya.” 4Caleka yatoola tuleza twa inamasi tonsi tuno yakweti pamwi na mantenga yano yazwite ku matwi nga yapeela Yakobo. Alino Yakobo aya azika mwisika ya cimuti cino yakati muoko pipi nu ku Syekemu. 5Lino Yakobo na ana yakwe yatenuka, antu ali mu misumba yazingulwike yakanka sile ku ntete, nupya patali uwaposizye ukuya yazanza.
6Yakobo na ana yakwe iyafika ku Luzi (kuli kuti Betele), mu mpanga ya Kenani. 7Akuula kavuwa kuku, nga atemela cifulo cici izina ati Eli Betele, pamulandu wakuti apali pano Leza walolike kunoli lino wali pa ulendo, kuutuka silenzi. 8Lyene Debola, uwali mulezi wakwe Labeka ukufuma ku unya wakwe Labeka, afwa nga yamuzika mwisika ya muti uno yakati muoko uwali ku kaeya kakwe Betele. Acino yautemile izina yati Alooni Bakuti.#35:8 ALONI BAKUTI: Mu Ciyebulai izina lii likasenula ukuti Pa muti wakulosezya.
9Lino Yakobo waweluluka ukufuma ku Mesopotamya, “Leza aloleka kunoli nupya amupolelela.” 10#Uta 32:28 Leza amunena ati, “Izina lyako wewe Yakobo, lelo ukufuma ilelo limaya Izlaeli.” Acino Leza amutemela izina Izlaeli. 11#Uta 17:4-8 Nupya Leza ati, “Nene Leza Wamaka yonsi. Mulinzile kuvyalana muvule. Inko izingi zilafuma munuli, nga ulaya cikolwe ca ene. 12Ndakupeela impanga ino napiile Abulaamu na Isaki. Ndaipela nu ku amu mupanda wako icisila cako.” 13Lyene Leza amusya pa cifulo cino wavwangilepo kunoli aswilila kwi yulu.
14 #
Uta 28:18, 19 Yakobo aimikapo iwe lya ciusizyo ca cifulo cici. Aitilapo uwila wa vyakumwa na mafuta. 15Acino atemela cifulo cici izina ati Betele.
Imfwa yakwe Lakeli
16Yafuma ku Betele na lino yacili akatalamukila kufika ku Efulata, insita ifika yakwe Lakeli kuti avyale, lelo wakweti intazi ikulu ya kuvyala. 17Lino wacula vii pa kupapa, icaleka nakambuza amunena ati, “Posya sile nupya walela umwana umonsi namuze.” 18Lelo Lakeli ala akufwa, nga umwi zwi lyakusyalikizya atemela umwana izina Beni Oni,#35:18 BENI ONI: Izina lii mu Ciyebulai likasenula ukuti umwana umonsi uwa ulanda wane. lelo isi amutemela izina ati Benjamini.#35:18 BENJAMINI: Izina lii mu Ciyebulai likasenula ukuti “mwana wino alaya musyuke.”
19Lyene Lakeli afwa, nga yamuzika mumbali ya museo uwaku Efulata (kuli kuti, Betelemu). 20Yakobo aimikapo iwe lya ciusizyo pi lindi. Na ndakai iwe lya ciusizyo lili likalanga ilindi lyakwe Lakeli. 21Izlaeli aya nkolelo aya aimika itaalu lyakwe pambali ya lupungu lwa Migidala Edeli.
Ana aonsi yakwe Yakobo
(1Mil 2:1-2)
22 #
Uta 49:4
Lino Izlaeli acili akwikala mu mpanga ilya, Lubeni acita ulenzyo na Bilaa, wenga uwamu aci nayauze yakwe Isi. Izlaeli auvwa mulandu uu, akalipa cuze.
Yakobo wakweti ana aonsi ikumi na yaili. 23Ana yakwe Leya aonsi yali a Lubeni (iyeli lyakwe Yakobo), Simeoni, Levi, Yuda, Isakali na Zebuluni. 24Ana aonsi yakwe Lakeli yali a Yosefu na Benjamini. 25Ana aonsi yakwe Bilaa muzya wakwe Lakeli yali a Dani na Nafutali. 26Ana aonsi yakwe Zilipa, muzya wakwe Leya yali a Gadi na Asyeli. Yaa ali yano Yakobo yamuvyalile lino wali ku Mesopotamya.
Imfwa yakwe Isaki
27 #
Uta 13:18
Yakobo wawezile kuli isi ku Mamule, pipi nu ku Kilyati Aliba (kuli kuti, Hebuloni), kuno Abulaamu na Isaki yatenzi ku mpiti. 28Isaki wali ni myaka umwanda na makumi cinani. 29Lyene afwa ala umukombe uwa myaka ivule, nga yamuzika ukwaizi ivikolwe vyakwe. Ana yakwe aonsi, Esau na Yakobo amuzisile.
Currently Selected:
Utandiko 35: MamL13
Highlight
Share
Copy
Want to have your highlights saved across all your devices? Sign up or sign in
Mambwe-Lungu Bible © The Bible Society of Zambia, 2013
