Utandiko 37
37
Yosefu na ina yakwe
1Yakobo wene watwalilile ukwikala mu mpanga ya Kenani muno isi wikalanga. 2Yaa ali amu mupanda wakwe Yakobo na amu ng'anda yakwe.
Yosefu mulumendo sile wa myaka ikumi na cinimbali, wacemanga imfwele ni mbuzi pamwi na yasilenzi, ana aonsi yakwe Bilaa na Zilipa, aci nayauze yakwe isi. Wanenanga isi vyonsi iviipe vino aina yacitanga.
3Izlaeli watemilwe Yosefu ukuluta ana yakwe onsi, pamulandu wakuti yamuvyalile Yosefu mu ukote. Wamusumile nu mwingila usuma wa makasa atali. 4Lino aina yalola ukuti isi watemwa Yosefu ukuyaluta, yene pasipakumupata, iyata nu kuvwanga ningo nawe.
5Lyene lino Yosefu walotwela aina yakwe ciloto, yamupata nu kuluta. 6Yosefu avwanga ati, “Uvwini ciloto cino ndosile. 7Twali tuli ku vyalo swensi tukunyepa myanzi ya ngano, lyene umwanzi wane iwimilila, wololoka ni myanzi inu nayo iimilila izingulwike umwanzi wane nu kuufukamila.”
8Lyene aina yamukanya yati, “Ele yasole! Uzye welenganya ukuti wewe ulatuteeka? Uzye wewe ungaya umwene witu?” Nga yamupata ukuluta pamulandu wa viloto ni milandile yakwe.
9Nupya Yosefu alota ciloto nacuze, nga anena aina yakwe ati, “Inalota nkulola ilanzi, umwezi, nga ni ntanda ikumi na longa vikumfukamila.”
10Yosefu aya alondolwela ni isi kwene iciloto cici. Lelo isi amukalipila ati, “Ala! Wee! Uzye cico cili ciloto cino ungatunena? Uzye ukwelenganya ukuti nyoko, na anyonko, nga nani tulakufukamila?” 11#Mil 7:9 Aina yakwe Yosefu yaya nu uzuwa panoli, lelo isi wene acisunga mu mwenzo.
Yakazya Yosefu ku ina Eguputo
12Uwanda umwi aina yakwe Yosefu yatwala iviteekwa vyakwe isi ukuya cemelanga pipi nu ku Syekemu. 13Izlaeli anena Yosefu ati, “Anyonko yakucemela iviteekwa ku Syekemu. Iteyanye nkulonda nkutume kweneko.”
Yosefu avwanga ati, “Tata njiteinye, ntumini.”
14Izlaeli amunena ati, “Pita kapempule anyonko ukayuzye mutende wao nu wa viteekwa, nga wize unene.” Caleka Izlaeli atuma Yosefu umwana wakwe ukufuma mu cifoloma ca Hebuloni.
Yosefu afika ku Syekemu, 15nga umuntu umwi amukomenkanya ala akululuta mu mpanga, alino amuuzya ati, “Uzye icani cino ukulonda?”
16Nawe aasuka ati, “Nkulonda ainane. Uzye utange unene kuno yakucemela iviteekwa?”
17Muntu wilya amwaasuka ati, “Kuno, yafumako mpiti, nuvwile yakuti tuli nu kuya ku Dotani.” Acino Yosefu alondelela aina aya ayazana ku Dotani!
18Lelo aina yamulola katalamukila, nga lino atali kuti afike pano yali, yapangana kuti yamukome. 19Yala yakuti, “Akako ka kalota kiza. 20Izini kuno, tumukome tumusumbile nu mu cifula conga musi amanzi nga tuce tulande tuti cilyanyi ca mpanga camukoma. Lyene tukamulozye pa viloto vyakwe.”
21Lelo Lubeni auvwa mapange yao, nga aezya ukutuula Yosefu, avwanga ati, “Lekini tutamukoma.” 22“Musumbilini sile mu cifula cii muno kwene mu lwanga. Lelo mutamucisa.” Lubeni avwanga vi pano kuteyanya kwakwe ukwakuti angamutuula ku ina, amuwezezye kuli isi. 23Walanga Yosefu wafika ku ina yakwe, yamuvuta, yalepola nu mwingila wakwe kwene usuma uno wazwite, 24nga yamusenda yaya yamusumbila mu cifula muno mutali amanzi.
25Lino yatenzi yakulya, iukila mulongo wa alendo aina Isumeli yakupita ukufuma ku Gileadi, yakuya ku Eguputo. Ngamila zyao zyasenzile iviya vivule nupya ivyamutengo, ivinyamuti vinunkile na mafuta yakupangila milembo, na mafuta yakulesya ukuola, ala yakuvitwala ku Eguputo. 26Lyene Yuda auzya aina ati, “Uzye icani cino tumalonka ndi twapeela pakukoma sile umwina witu nu kufisa imfwa yakwe? 27Lekini tumukazye ku ina Isumeli. Wi umwina witu nupya uwazi witu. Acino tutamukoma.” Aina yakwe yazumila.
28 #
Mil 7:9
Lino aculuzi aina Midyani iza, aina yakwe yafumya Yosefu mu cifula umutali amanzi nga yamukazya ku ina Isumeli pa mpiya zyakwe siluva ukulingana amakumi yaili, nga nayo yamusenda ku Eguputo.
29Lino Lubeni waswilile ku cifula ku kulengula, azana Yosefu asimo, nga alepola vizwalo vyakwe, kulanga ulanda. 30Aswilila ku ina yakwe ati, “Mulumendo asimo mu cifula, ndimwandi nga namacita uli?”
31Lyene yakoma imbuzi, yatumpika mwingila wakwe Yosefu mu wazi wa mbuzi. 32Lyene yatwala mwingila kuli isi, nga yavwanga yati, “Twatituzana mwingila uu, uzye ungaya umwingila wa mwana wako umonsi?”
33Isi atoola mwingila auceceta nga avwanga ati, “Naumanya, cumi ulio kwene, kalanda wee! Yosefu watalika ni cilyanyi caticimusantola.” 34Lyene Yakobo alepula mwingila wakwe, azwala visamu mu musana ukulanga ulanda. Nga alosya umwana wakwe umonsi pa manda aingi. 35Ana yakwe aonsi na anaci yonsi yiiza ku kumutekezya, lelo akana ukutekeziwa avwanga ati, “Awe indi nu kulosya suka imfwe, ndondele umwanane.” Acino atwalilila ukulosya Yosefu umwana wakwe.
36Insita iyo, mu Eguputo aina Midyani yalanga yakazya Yosefu kuli Potifa, wenga wamuli yacilolo yakwe Falao. Potifa wali intunguluzi yakwe yakalolela ya kwisano kwakwe Falao.
Currently Selected:
Utandiko 37: MamL13
Highlight
Share
Copy
Want to have your highlights saved across all your devices? Sign up or sign in
Mambwe-Lungu Bible © The Bible Society of Zambia, 2013
