Luka 15
15
Mulumbe wa mfwele iponge
(Mat 18:12-14)
1 #
Luk 5:29
Lyene yakasonkesya na yakaifya iiza ku kuvwa kuli Yesu. 2Afaliseo na yakasambilizya ya Masunde yatandika kuilizyanya yati, “Umuntu wii akazengela yakaifya nu kulya nayo!” 3Caleka Yesu ayanena mulumbe uu ati,
4“Umwi uwa munomuli ndi wali ni mfwele mwanda, nga waponzya yonga uzye akacita uli? Akasya zyonsi makumi fundimbali na fundimbali, apita kukulonda yonga iyati ponga suka aiizane. 5Lino waizana, akaya ni nsansa cuze cakuti aitoola aika na pa ciye, 6nu kuisenda ku ng'anda ukwakwe. Lyene aama yacuza yakwe na ainipamba pali pamwi, ayanena ati, ‘Zangini pamwi nani, pano nati nzana mfwele yane iyaponzile.’ 7Mu musango uli onga, namunena vino, kulaya insansa zingi mwiyulu pali kaifya wenga uwazenzuka kuluta antu makumi fundimbali na fundimbali acindame yano yakaelenganya ukuti citakulondekwa kuti yazenzuke.
Mulumbe wa lupiya luponge
8“Nanti mwanaci umwi ndi wali ni mpiya ikumi lelo waponzya longa, uzye akacita uli? Uzye atangakozye lukozyo, apyele ng'anda yakwe, nu kulonda monsi kwene, suka aluzane? 9Lyene lino waluzana, aama ainipamba na yacuza yakwe pali pamwi, ayanena ati, ‘Zangini pamwi nani, pano nati nzana lupiya luno lwaponzile.’ 10Namunena vino mu musango uli onga, angeli yakwe Leza yakazanga pali kaifya wenga uwazenzuka.”
Mulumbe wa mwana muponge
11Nupya Yesu ayanena ati, “Kwali umuntu uwakweti ana aonsi yaili. 12Umuto anena isi ati, ‘Tata, ngankanye vya upyanyi vya pa vyuma vyako.’ Caleka umuntu aankanya vyuma vyakwe pakasi ka ana yonsi oili. 13Apacisila ca manda yanono, umuto wakazizye vyuma vyakwe, asenda impiya apita ku mpanga ya kutali, kuko kuno waile asumba vyuma vyakwe vyonsi mu uwelewele wakwe. 14Pacisila ca kusumba vyonsi vino wakweti, kwaponyile cipowe cikulu mu mpanga ilya. Nawe atakweti nanti cimwi. 15Caleka waile aingila incito ku mukama umwi uwamu mpanga ilya, nawe amutuma ku kucema yakapoli. 16Lyene akumbukila kulyako vinkapala vino yakapoli yakulya, pano patali nanti umwi uwa kumupeela cakulya. 17Lyene lino amano yamuzana aelenganya mu mano yakwe ati, ‘Aomvi yakwe tata yonsi yakalya yakwikuta na vimwi vikasyala, lelo nemo kuno namafwa kunzala! 18Namakatuka mpite kuli tata inkamunene inti, Tata, niifya kuli Leza uwa mwiyulu na kunuli. 19Ntaine ukwamwa umwana wako nupya, uncite wakwe wenga uwa pa yaomvi yako.’ 20Caleka akatuka aya kuli isi.
“Lelo lino acili kutali kufuma kumwao, isi amulola; aya na mizu mu mwenzo wakwe. Alino asimula amukukula nu kumutonsola. 21Umwana nawe amunena ati, ‘Tata, Niifya kuli Leza uwa mwiyulu na kunuli. Ntaine ukwamwa umwana wako nupya.’ 22Lelo isi aama aomvi yakwe ati, ‘Pitisyini, letini zuwa umwingila usuma kuluta pali yonsi mumuzwike. Mumuzwike ni mbalaminwe ku munwe ni ndyatu ku ngazo zyakwe. 23Lyene kaletini kacipambasi akiine mukakome, muleke tucite cimulo tuzange! 24Pano umwanane wii wafwile, lelo nupya ali nu umi. Waponzile, lelo ndakai watalondoka.’ Lyene yatandika kuzanga.
25“Silenzi wene wali ku vyalo. Lyene pa kuwela, lino wapalamila ku ng'anda, auvwa yakwimba nu kucina. 26Alino aama wenga uwamu yaomvi amuuzya ati, ‘Uzye icani cikucitika?’ 27Muomvi amunena ati, ‘Umunyonko watawela. Na so watamukomela kacipambasi akiine, pano watamupokelela ulumi, nupya ali ningo.’ 28Silenzi asoka cakuti akana nu kwingila mu ng'anda. Caleka isi afuma, amupapata kuti aingile. 29Lelo wene anena isi ati, ‘Lola! Myaka yonsi ii nkakuombela wa muzya, nupya ntatala nkana kuyela masunde yako. Lelo utatala wampeela nanti kambuzi ka maka kuti ncite cimulo, pakuti tuzange na yacuza yane. 30Lelo umwana wako wii wasumba vyuma vyako vyonsi muli yacizelele, na lino watawela pa mulyango, wemo wamukomela kacipambasi akiine!’ 31Isi nawe amunena ati, ‘Mwanane, Wemo waya nani manda pe, na vyonsi vino nkweti ivyakwako. 32Cati cizipa kuti tuzevye nu kuzanga, pano munyonko wafwile, lelo nupya ali nu umi. Waponzile, lelo ndakai watalondoka.’”
Currently Selected:
Luka 15: MamL13
Highlight
Share
Copy
Want to have your highlights saved across all your devices? Sign up or sign in
Mambwe-Lungu Bible © The Bible Society of Zambia, 2013
