Luka 22
22
Yapangana kukoma Yesu
(Mat 26:1-5; Mk 14:1-2; Yoa 11:45-53)
1Lyene uwanda wa kuzevya Cimulo ca Mukate usi na Citutumusi, cino cikaamwa Cimulo ca Ucilo, wapalime. 2Yasimapepo akalamba na yakasambilizya ya Masunde yalondanga inzila yakuti yalemelemo Yesu nu kumukoma munkama pano yoopanga antu.
Yuda wazumila kukoopa Yesu
(Mat 26:14-16; Mk 14:10-11)
3Lyene Ciwa aingila muli Yuda, wino yamanga ukuti Iskalyoti, uwali uwamu alondezi ikumi na yaili. 4Lyene aya kuli yasimapepo akalamba na yamusika amu Ng'anda ikulu yakwe Leza, kuti auvwane nao inzila yakuti ayakoopele Yesu. 5Nao yazanga cuze nga yazumilizyanya kumupeela impiya. 6Caleka azumila, nga atandika ukulonda inzila iya kukoopelamo Yesu kunoyali mu nkama.
Yesu waiteyanya ukulya cimulo ca ucilo pamwi na alondezi Yakwe
(Mat 26:17-25; Mk 14:12-21; Yoa 13:21-30)
7Lyene uwanda wa kuzevya Cimulo ca Mukate usi na Citutumusi ufika, lilyo lino ana ya mfwele a Ucilo yakakomwa. 8Alino Yesu atuma Petulo na Yoane, ayanena ati, “Yangini mukatuteyanyizizye umwakulila Cimulo ca Ucilo.”
9Nao yamuzya yati, “Uzye aukwi kuno ukulonda kuti tukateyanye?”
10Nawe aasuka ati, “Lino mwingila mu musumba, mumakomanya umonsi asenzile nsembo ya manzi. Namwe mumulondele nu mu ng'anda kwene muno amaingila. Alino munene mwine wa ng'anda muti, 11‘Kasambilizya wati, Uzye muputule uwa enyi ulikwi kuno alondezi yane pamwi nani tumalila Cimulo ca Ucilo?’ 12Lyene amaya kamulange muputule ukulu cuze uwa ng'anda ya papela muno vyonsi vyati viteyanyiziwa ningo. Amuno mukateyanye vyonsi.”
13Lyene yapita yaya yazana vyonsi wakwe vino Yesu wayanenyile, alino nao yateyanya kuzevya kwa Cimulo ca Ucilo.
Cimulo ca Mwene
(Mat 26:26-30; Mk 14:22-26; 1Kol 11:23-25)
14Lyene lino kasita kafika Yesu aikala nu kulya Cimulo pa cipango pamwi na atumwa yakwe. 15Alino ayanena ati, “Nkulondesya ukulya Cimulo cii ca Ucilo pamwi namwe lino ntali ncule! 16Caleka namunena vino ntalalya Cimulo nacuze kufika lino cilacitwa nupya mu Wene wakwe Leza.”
[17Lyene Yesu atoola ulwako, ataizya Leza, avwanga ati, “Tolini lwako luu, nu kumwamo mwensi kwene.] 18Pano namunena vino kufuma ndakai ntalamwa nupya vifenwa vya vizao vya matingi, kufika lino Uwene wakwe Leza uliza.”
19Alino atoola umukate ataizya Leza, aumokoola, alino aupela kunoyali, avwanga ati, “Uu uli mwili wane, uwapeelwa pamulandu winu. Mwacita cii pa kunjiusya.” 20Mu musango uli onga kwene, lino yamala ukulya ayapeela lwako, avwanga ati, “Lwako luu ulwa upangano upya uno Leza watamapo insimbi nu wazi wane, uno wapongololwa pamulandu winu.”
21“Lelo lolini! Wino amankoopa wene tukulya nawe cimulo pa cipango pano kwene. 22Mwana wa Muntu alafwa wakwe vino Leza wapingula, lelo kalanda ku muntu wino amamukoopa!”
23Lyene yatandika ukuuzyanya aisikulu kuti, yamanye aweni uwa munoyali amacita cii.
Alondezi yapazyanya pamulandu nu ukulu
24 #
Mat 18:1; Mk 9:34 Lyene kupazyanya kuya pakasi ka alondezi, pamulandu wakwe wino alinzile ukuya mukulu kuluta yonsi panoyali. Luk 9:46 25#Mat 10:42; 20:25 Yesu nawe ayanena ati, “Yakateeka ya antu atataila Leza yakwata maka pa antu yao, nga ni ntunguluzi zyao nazyo zikayaama zisikulu ziti, ‘Intunguluzi zisi na lusoko.’ 26#Mat 10:42; 20:25; 23:11; Mk 9:35 Lelo cisi vivyo muli mwemwe. Mu cifulo cakwe cii, mukulu uwa muli mwemwe alinzile aye kwati munono na wino akuteeka nawe alinzile aye kwati muomvi. 27#Yoa 13:12 Uzye mukulu aweni? Uzye awiyo akaikala pansi, nu kulya nanti awiyo akamuombela? Uzye asi awiyo akaikala nu kulya? Lelo nemo indi pakasi kinu wa muomvi.
28“Mwemo mwati muposya pamwi nani mu macuzi yane onsi. 29Namupeela Uwene wakwe vino Tata wampile Uwene. 30#Mat 19:28 Mulalya nu kumwa pa cipango cane mu Wene wane, nga nu kwikala pa vilimba vya wene nu kupingula imitundu ikumi na iili ya ina Izlaeli.
Yesu wasowela vino Petulo amamukana
(Mat 26:31-35; Mk 14:27-31; Yoa 13:36-38)
31“Simoni, Simoni! Lola Ciwa watazumiliziwa na Leza kuti amweele mwensi, wakwe vino antu yakaela ingano. 32Lelo nati nkupepela Simoni kuti utailo wako utatovoka. Na lino ulazenzuka, uce ukomelezye anyonko onsi.” 33Lelo Petulo avwanga ati, “Mwene, indi umuiteyanye ukuya ku ng'anda yaminyololo nu kufwa pamwi nawe.”
34Yesu nawe amunena ati, “Nakunena, Petulo, ilelo kwene, lino mukolwe atacili alamule wemo umankana maila yatatu ale ukuvwanga vino utamanyile.”
Cikwama ca mpiya, mufuko wa kulengelamo nu lupanga
35 #
Mat 10:9; Mk 6:8; Luk 9:3; 10:4 Lyene Yesu ayauzya ati, “Lino namutumile kwaula kusenda cikwama, nanti mufuko wa kulengelamo vimwi, nanti ndyatu, uzye muulilwe cimwi?” Nao yaasuka yati, “Awe.”
36Yesu nawe ayanena ati, “Lyene ndakai, wino wensi akweti cikwama ca mpiya nanti mufuko wa kulengelamo alinzile asende. Na wino wensi atakwata lupanga alinzile akazye ikoti lyakwe alino akale lupanga. 37#Eza 53:12 Acino namunena vino icalembwa mu malembelo pamulandu wane, icikati, ‘Wapendilwe ukufwa pamwi na yakaifya,’ cili nu kufikiliziwa.”
38Alondezi nao yavwanga yati, “Lola! Mwene tukweti mpaanga ziili.”
Nawe ayanena ati, “Cati cilingana!”
Yesu wapepa pa Mwamba wa Olivi
(Mat 26:36-46; Mk 14:32-42)
39Yesu afuma mu musumba, aya ku Mwamba wa Olivi, ndi vino wacitanga pe. Wene wapisile pamwi na alondezi yakwe. 40Lino wafika ku cifulo cici, ayanena ati, “Pepini kuti mutaponela mu matunko.”
41Lyene atala ayasya, apita katalamukila, nga afukama apepa ati, 42“Tata, ndu kasi sisya lwako luu lwa ucuzi kunondi. Kusi kulonda kwane, lelo kulonda kwako kucitike.” [43Mungeli aloleka kunoli kufuma kwiyulu amukomelezya. 44Mu kunyunguluka kukulu cuze apepa ukuluta, ala ni yevu lyakwe likutonela pansi kwati amamata akulu a wazi.]
45Lino wata kupepa, akatuka awela ku alondezi azana yakaswile, ala yati yanyomelwa na malanda. 46Alino ayanena ati, “Pacani mukukasula? Katukini mupepe kuti mutaponela mu matunko.”
Kulemwa kwakwe Yesu
(Mat 26:47-56; Mk 14:43-50; Yoa 18:3-11)
47Walanga lino Yesu acili vwanga, iumba ilyatungulwilwe na Yuda, wenga uwamu alondezi ikumi na yaili, liifika. Lyene Yuda aya kuli Yesu kuti amutonsole. 48Lelo Yesu amuuzya ati, “Yuda, uzye mukutonsola kwako amuno ukukoopela Mwana wa Muntu?”
49Lino alondezi yalola icali nu kucitika, yamuzya yati, “Mwene, uzye tuomvye mpaanga zitu?” 50Wenga uwa munoyali asempa ikutwi lilunji lya muzya wakwe Simapepo Mukulu.
51Lelo Yesu avwanga ati, “Casila, tini cii!” Lyene alimba ikutwi lya muntu, amupozya.
52Lyene Yesu anena yasimapepo akalamba na yamusika amu Ng'anda ikulu yakwe Leza, nga na aikolo amu Ayuda aizile ku kumulema ati, “Uzye mwizile kuli nene ni mpaanga ni zya ntuwa, ungati nene cipondo? 53#Luk 19:47; 21:37 Nali namwe manda aingi mu Ng'anda ikulu yakwe Leza, nga namwe mutandemile. Lelo ii ili nsita inu, lino maka ya mfinzi yakuteeka.”
Petulo wakana Yesu
(Mat 26:57-58, 69-75; Mk 14:53-54, 66-72; Yoa 18:12-18, 25-27)
54Lyene lino yalema Yesu, yamutwala ku ng'anda yakwe Simapepo Mukulu. Lelo Petulo wene amulondela katalamukila. 55Lyene lino yapemba umoto pakasi ka musolo wa nsaka ya milandu nu kwikala pansi, Petulo nawe waile aikala pansi pali pamwi nao. 56Lyene umukazyana wenga uwamu yaomvi amulola pano watenzi mu luswepo lwa moto. Umukazyana amulolekesya alino avwanga ati, “Muntu wii, nawe kwene wali pamwi na Yesu.”
57Lelo Petulo akana ati, “Mwanaci we, nemo ntamanyile umuntu wiyo.”
58Lino papita kasita kanono umuntu namuze anena Petulo ati, “Nawe kwene wewe uwa munoyali.”
Lelo Petulo avwanga ati, “We muntu we, ala asi nene.”
59Lino papita manye aawa yonga umuntu namuze kwene avwanga nu kusininkizya ati, “Cumi, umuntu wii nawe kwene wali pamwi na Yesu, pano wene uwaku Galile!”
60Lelo Petulo amunena ati, “We muntu we, nemo ntamanyile cino ukuvwanga.”
Lilyo kwene lino acili akuvwanga, mukolwe alamula. 61Alino Umwene aseleuka alolekesya Petulo, lyene Petulo aiusya mazwi yano Umwene wamunenyile ati, “Lino mukolwe atacili alamule ilelo, wemo umankana maila yatatu ale ukuvwanga vino utamanyile.” 62Alino Petulo afumila panzi, nga alila minsozi nu ulanda ukulu cuze.
Yasaalula Yesu nu Kumuma
63Antu alindanga Yesu yamusaalula nu kumuma. 64Alino yamuvimba pa manso, yamuzya yati, “Ale tunganya! Uzye aweni uwakuma?” 65Alino yalanda na mazwi aingi a misuli kunoli, ala yakumutuka.
Yesu mwi Tengo lya Ayuda
(Mat 26:59-66; Mk 14:55-64; Yoa 18:19-24)
66Lyene lino waca, aikolo, yasimapepo akalamba, na yakasambilizya ya Masunde yakongana pali pamwi, yaleta Yesu mwi Tengo lyao. 67Lyene yamunena yati, “Tunene, uzye wewe uli Katuula uwalavilwe?” Lelo nawe aasuka ati, “Ndi namunena musikuntaila, 68nupya ndi namuzya iuzyo, musikwasuka. 69Lelo kufuma ndakai Mwana wa Muntu amaikala kwi kasa lilunji lyakwe Leza wa maka onsi.”
70Alino yonsi yamuzya yati, “Uzye lyene wewe uli Mwana wakwe Leza?” Nawe aasuka ati, “Mwavwanga ukuti anene kwene.”
71Alino yavwanga yati, “Tusikulonda umboni nauze! Sweisikulu twati tuyuvwila pa mulomo wakwe.”
Currently Selected:
Luka 22: MamL13
Highlight
Share
Copy
Want to have your highlights saved across all your devices? Sign up or sign in
Mambwe-Lungu Bible © The Bible Society of Zambia, 2013
Luka 22
22
Yapangana kukoma Yesu
(Mat 26:1-5; Mk 14:1-2; Yoa 11:45-53)
1Lyene uwanda wa kuzevya Cimulo ca Mukate usi na Citutumusi, cino cikaamwa Cimulo ca Ucilo, wapalime. 2Yasimapepo akalamba na yakasambilizya ya Masunde yalondanga inzila yakuti yalemelemo Yesu nu kumukoma munkama pano yoopanga antu.
Yuda wazumila kukoopa Yesu
(Mat 26:14-16; Mk 14:10-11)
3Lyene Ciwa aingila muli Yuda, wino yamanga ukuti Iskalyoti, uwali uwamu alondezi ikumi na yaili. 4Lyene aya kuli yasimapepo akalamba na yamusika amu Ng'anda ikulu yakwe Leza, kuti auvwane nao inzila yakuti ayakoopele Yesu. 5Nao yazanga cuze nga yazumilizyanya kumupeela impiya. 6Caleka azumila, nga atandika ukulonda inzila iya kukoopelamo Yesu kunoyali mu nkama.
Yesu waiteyanya ukulya cimulo ca ucilo pamwi na alondezi Yakwe
(Mat 26:17-25; Mk 14:12-21; Yoa 13:21-30)
7Lyene uwanda wa kuzevya Cimulo ca Mukate usi na Citutumusi ufika, lilyo lino ana ya mfwele a Ucilo yakakomwa. 8Alino Yesu atuma Petulo na Yoane, ayanena ati, “Yangini mukatuteyanyizizye umwakulila Cimulo ca Ucilo.”
9Nao yamuzya yati, “Uzye aukwi kuno ukulonda kuti tukateyanye?”
10Nawe aasuka ati, “Lino mwingila mu musumba, mumakomanya umonsi asenzile nsembo ya manzi. Namwe mumulondele nu mu ng'anda kwene muno amaingila. Alino munene mwine wa ng'anda muti, 11‘Kasambilizya wati, Uzye muputule uwa enyi ulikwi kuno alondezi yane pamwi nani tumalila Cimulo ca Ucilo?’ 12Lyene amaya kamulange muputule ukulu cuze uwa ng'anda ya papela muno vyonsi vyati viteyanyiziwa ningo. Amuno mukateyanye vyonsi.”
13Lyene yapita yaya yazana vyonsi wakwe vino Yesu wayanenyile, alino nao yateyanya kuzevya kwa Cimulo ca Ucilo.
Cimulo ca Mwene
(Mat 26:26-30; Mk 14:22-26; 1Kol 11:23-25)
14Lyene lino kasita kafika Yesu aikala nu kulya Cimulo pa cipango pamwi na atumwa yakwe. 15Alino ayanena ati, “Nkulondesya ukulya Cimulo cii ca Ucilo pamwi namwe lino ntali ncule! 16Caleka namunena vino ntalalya Cimulo nacuze kufika lino cilacitwa nupya mu Wene wakwe Leza.”
[17Lyene Yesu atoola ulwako, ataizya Leza, avwanga ati, “Tolini lwako luu, nu kumwamo mwensi kwene.] 18Pano namunena vino kufuma ndakai ntalamwa nupya vifenwa vya vizao vya matingi, kufika lino Uwene wakwe Leza uliza.”
19Alino atoola umukate ataizya Leza, aumokoola, alino aupela kunoyali, avwanga ati, “Uu uli mwili wane, uwapeelwa pamulandu winu. Mwacita cii pa kunjiusya.” 20Mu musango uli onga kwene, lino yamala ukulya ayapeela lwako, avwanga ati, “Lwako luu ulwa upangano upya uno Leza watamapo insimbi nu wazi wane, uno wapongololwa pamulandu winu.”
21“Lelo lolini! Wino amankoopa wene tukulya nawe cimulo pa cipango pano kwene. 22Mwana wa Muntu alafwa wakwe vino Leza wapingula, lelo kalanda ku muntu wino amamukoopa!”
23Lyene yatandika ukuuzyanya aisikulu kuti, yamanye aweni uwa munoyali amacita cii.
Alondezi yapazyanya pamulandu nu ukulu
24 #
Mat 18:1; Mk 9:34 Lyene kupazyanya kuya pakasi ka alondezi, pamulandu wakwe wino alinzile ukuya mukulu kuluta yonsi panoyali. Luk 9:46 25#Mat 10:42; 20:25 Yesu nawe ayanena ati, “Yakateeka ya antu atataila Leza yakwata maka pa antu yao, nga ni ntunguluzi zyao nazyo zikayaama zisikulu ziti, ‘Intunguluzi zisi na lusoko.’ 26#Mat 10:42; 20:25; 23:11; Mk 9:35 Lelo cisi vivyo muli mwemwe. Mu cifulo cakwe cii, mukulu uwa muli mwemwe alinzile aye kwati munono na wino akuteeka nawe alinzile aye kwati muomvi. 27#Yoa 13:12 Uzye mukulu aweni? Uzye awiyo akaikala pansi, nu kulya nanti awiyo akamuombela? Uzye asi awiyo akaikala nu kulya? Lelo nemo indi pakasi kinu wa muomvi.
28“Mwemo mwati muposya pamwi nani mu macuzi yane onsi. 29Namupeela Uwene wakwe vino Tata wampile Uwene. 30#Mat 19:28 Mulalya nu kumwa pa cipango cane mu Wene wane, nga nu kwikala pa vilimba vya wene nu kupingula imitundu ikumi na iili ya ina Izlaeli.
Yesu wasowela vino Petulo amamukana
(Mat 26:31-35; Mk 14:27-31; Yoa 13:36-38)
31“Simoni, Simoni! Lola Ciwa watazumiliziwa na Leza kuti amweele mwensi, wakwe vino antu yakaela ingano. 32Lelo nati nkupepela Simoni kuti utailo wako utatovoka. Na lino ulazenzuka, uce ukomelezye anyonko onsi.” 33Lelo Petulo avwanga ati, “Mwene, indi umuiteyanye ukuya ku ng'anda yaminyololo nu kufwa pamwi nawe.”
34Yesu nawe amunena ati, “Nakunena, Petulo, ilelo kwene, lino mukolwe atacili alamule wemo umankana maila yatatu ale ukuvwanga vino utamanyile.”
Cikwama ca mpiya, mufuko wa kulengelamo nu lupanga
35 #
Mat 10:9; Mk 6:8; Luk 9:3; 10:4 Lyene Yesu ayauzya ati, “Lino namutumile kwaula kusenda cikwama, nanti mufuko wa kulengelamo vimwi, nanti ndyatu, uzye muulilwe cimwi?” Nao yaasuka yati, “Awe.”
36Yesu nawe ayanena ati, “Lyene ndakai, wino wensi akweti cikwama ca mpiya nanti mufuko wa kulengelamo alinzile asende. Na wino wensi atakwata lupanga alinzile akazye ikoti lyakwe alino akale lupanga. 37#Eza 53:12 Acino namunena vino icalembwa mu malembelo pamulandu wane, icikati, ‘Wapendilwe ukufwa pamwi na yakaifya,’ cili nu kufikiliziwa.”
38Alondezi nao yavwanga yati, “Lola! Mwene tukweti mpaanga ziili.”
Nawe ayanena ati, “Cati cilingana!”
Yesu wapepa pa Mwamba wa Olivi
(Mat 26:36-46; Mk 14:32-42)
39Yesu afuma mu musumba, aya ku Mwamba wa Olivi, ndi vino wacitanga pe. Wene wapisile pamwi na alondezi yakwe. 40Lino wafika ku cifulo cici, ayanena ati, “Pepini kuti mutaponela mu matunko.”
41Lyene atala ayasya, apita katalamukila, nga afukama apepa ati, 42“Tata, ndu kasi sisya lwako luu lwa ucuzi kunondi. Kusi kulonda kwane, lelo kulonda kwako kucitike.” [43Mungeli aloleka kunoli kufuma kwiyulu amukomelezya. 44Mu kunyunguluka kukulu cuze apepa ukuluta, ala ni yevu lyakwe likutonela pansi kwati amamata akulu a wazi.]
45Lino wata kupepa, akatuka awela ku alondezi azana yakaswile, ala yati yanyomelwa na malanda. 46Alino ayanena ati, “Pacani mukukasula? Katukini mupepe kuti mutaponela mu matunko.”
Kulemwa kwakwe Yesu
(Mat 26:47-56; Mk 14:43-50; Yoa 18:3-11)
47Walanga lino Yesu acili vwanga, iumba ilyatungulwilwe na Yuda, wenga uwamu alondezi ikumi na yaili, liifika. Lyene Yuda aya kuli Yesu kuti amutonsole. 48Lelo Yesu amuuzya ati, “Yuda, uzye mukutonsola kwako amuno ukukoopela Mwana wa Muntu?”
49Lino alondezi yalola icali nu kucitika, yamuzya yati, “Mwene, uzye tuomvye mpaanga zitu?” 50Wenga uwa munoyali asempa ikutwi lilunji lya muzya wakwe Simapepo Mukulu.
51Lelo Yesu avwanga ati, “Casila, tini cii!” Lyene alimba ikutwi lya muntu, amupozya.
52Lyene Yesu anena yasimapepo akalamba na yamusika amu Ng'anda ikulu yakwe Leza, nga na aikolo amu Ayuda aizile ku kumulema ati, “Uzye mwizile kuli nene ni mpaanga ni zya ntuwa, ungati nene cipondo? 53#Luk 19:47; 21:37 Nali namwe manda aingi mu Ng'anda ikulu yakwe Leza, nga namwe mutandemile. Lelo ii ili nsita inu, lino maka ya mfinzi yakuteeka.”
Petulo wakana Yesu
(Mat 26:57-58, 69-75; Mk 14:53-54, 66-72; Yoa 18:12-18, 25-27)
54Lyene lino yalema Yesu, yamutwala ku ng'anda yakwe Simapepo Mukulu. Lelo Petulo wene amulondela katalamukila. 55Lyene lino yapemba umoto pakasi ka musolo wa nsaka ya milandu nu kwikala pansi, Petulo nawe waile aikala pansi pali pamwi nao. 56Lyene umukazyana wenga uwamu yaomvi amulola pano watenzi mu luswepo lwa moto. Umukazyana amulolekesya alino avwanga ati, “Muntu wii, nawe kwene wali pamwi na Yesu.”
57Lelo Petulo akana ati, “Mwanaci we, nemo ntamanyile umuntu wiyo.”
58Lino papita kasita kanono umuntu namuze anena Petulo ati, “Nawe kwene wewe uwa munoyali.”
Lelo Petulo avwanga ati, “We muntu we, ala asi nene.”
59Lino papita manye aawa yonga umuntu namuze kwene avwanga nu kusininkizya ati, “Cumi, umuntu wii nawe kwene wali pamwi na Yesu, pano wene uwaku Galile!”
60Lelo Petulo amunena ati, “We muntu we, nemo ntamanyile cino ukuvwanga.”
Lilyo kwene lino acili akuvwanga, mukolwe alamula. 61Alino Umwene aseleuka alolekesya Petulo, lyene Petulo aiusya mazwi yano Umwene wamunenyile ati, “Lino mukolwe atacili alamule ilelo, wemo umankana maila yatatu ale ukuvwanga vino utamanyile.” 62Alino Petulo afumila panzi, nga alila minsozi nu ulanda ukulu cuze.
Yasaalula Yesu nu Kumuma
63Antu alindanga Yesu yamusaalula nu kumuma. 64Alino yamuvimba pa manso, yamuzya yati, “Ale tunganya! Uzye aweni uwakuma?” 65Alino yalanda na mazwi aingi a misuli kunoli, ala yakumutuka.
Yesu mwi Tengo lya Ayuda
(Mat 26:59-66; Mk 14:55-64; Yoa 18:19-24)
66Lyene lino waca, aikolo, yasimapepo akalamba, na yakasambilizya ya Masunde yakongana pali pamwi, yaleta Yesu mwi Tengo lyao. 67Lyene yamunena yati, “Tunene, uzye wewe uli Katuula uwalavilwe?” Lelo nawe aasuka ati, “Ndi namunena musikuntaila, 68nupya ndi namuzya iuzyo, musikwasuka. 69Lelo kufuma ndakai Mwana wa Muntu amaikala kwi kasa lilunji lyakwe Leza wa maka onsi.”
70Alino yonsi yamuzya yati, “Uzye lyene wewe uli Mwana wakwe Leza?” Nawe aasuka ati, “Mwavwanga ukuti anene kwene.”
71Alino yavwanga yati, “Tusikulonda umboni nauze! Sweisikulu twati tuyuvwila pa mulomo wakwe.”
Currently Selected:
:
Highlight
Share
Copy
Want to have your highlights saved across all your devices? Sign up or sign in
Mambwe-Lungu Bible © The Bible Society of Zambia, 2013