កោរាញអ៝សម៝ន 1
1
នាវត៝នឞ្រាសហ្វេងអ្វែស
1ទាន់កោសមឞាសលាសអ្វែសមាថេវផីល #១:១៖ «ថេវផីល »គែសនាវខ្លៃ«ឞូនុយ្សអីរ៝ង់មាកោរាញឞ្រាស» មោលាស «ឞូនុយ្សអីកោរាញឞ្រាសរ៝ង់»។អ៝ន់គឹត! តាឆ៝ម់បុតគ៝ប់ញចីសឞើសកើយនើស#១:១៖ ឆ៝ម់បុតអីនៃជេងនាវមហែមហានអ្វែសលូកា ញចីស។ងក៝ចទឹងលែៈនទើឞ្រាសយេឆូ ជាន នទ្រែលមាទឹងលែៈនាវពាង់នតុមនតី ឞើសពាង់នតើមនតុមនតីឞូនុយ្ស#លក ១:១-៤ 2នហ៝មាត៝ត់នារកោរាញឞ្រាសឆ៝ៈនហាវពាង់តាត្រោកតានតុកពាង់នើមតាកាលើ។ ជេសទ៝ក់រេសអេល៝រពាង់ហាវតានៃ ពាង់នតិញនាវមាមពោលកោរាញអ៝សម៝នអីពាង់នើមលែៈជេសកើយ្សនើស ពាង់នតិញខាន់ពាង់តឹងឞ្រាសហ្វេងអ្វែសអីក្ល៝សអ្វែសមឞើសមាពាង់។#លក ២៤:៣៦-៤៩; មថ ២៨:១៨-២០ 3លោចជេសពាង់ទើននាវជេរជ៝ត់នហ៝មាខឹតនៃ គែស ៤០ នាង់ ៤០ នារពាង់ញហើឆាក់ពាង់នើមអ៝ន់មាមពោលកោរាញអ៝សម៝នឆៃអ៝ក់ងាន់ គៃមាអ៝ន់ខាន់ពាង់គឹតនហេលលាសពាង់លែៈទ៝ក់រេសងាន់ ពាង់ជានអ៝ក់នតីលនទើដ៝ង់។ នោកនៃពាង់ងក្រែមាមឞើសងក៝ចនាវកោរាញឞ្រាសម៝ត់អ្វាញ់ដ៝ង់។ 4គែសទូតឹទោលឞ្រាសយេឆូ គុឆោងឆានទ្រែលមពោលកោរាញអ៝សម៝ន ពាង់លាស៖ “លើយហ៝ៈអោសទូលោសឞើសប៝នយេរូឆាលឹម ។ គ៝ប់លែៈជេសមឞើសមាខាន់មៃ ឞឹគ៝ប់លែៈត៝នញជុនឞ្រាសហ្វេងអ្វែសលាប់គុតាខាន់មៃ។ ក៝ប់តាអ្យាហ៝ៈ ត៝ត់នាវត៝នអីនៃត្រុយ្សងាន់។ 5យោហាន-បាប់តែម វៃជានបាប់តែមយុកឞូមាទាក យើនមាហោមដេៈនារជឹតនាប់តៃកោរាញឞ្រាសអុចអ៝ន់ឞ្រាសហ្វេងអ្វែសគុតាឆាក់ខាន់មៃ។ នទើអីនៃតឹមឞានមាខាន់មៃយុកមាឞ្រាសហ្វេងអ្វែសដ៝ង់”។#លក ៣:១៦; យហ ១៥:២៦
ឞ្រាសយេឆូ ហាវតាកាលើត្រោក
6ជេសរីមពោលកោរាញអ៝សម៝នតឹមរាបុនឞាល់តាយោកតើមអោលីវ ខាន់ពាង់អោបឞ្រាសយេឆូ ៖ “ហើយកោរាញ អាបៃអ្យាបាសមៃជេងកាដាច់ឞ្រីទាកអីឆ្រាអែល ?” 7ពាង់អើស៖ “តារានោកម៝ងនារនៃមោអោសអ៝ន់ខាន់មៃគឹត ឞឹគ៝ប់នើមទើមជាននទើអីនៃនោកពាង់នើមអុច។ 8យើនមាគែសទូនាវគ៝ប់អុចអ៝ន់ខាន់មៃគឹត៖ ត៝ត់ឞ្រាសហ្វេងអ្វែសអីក្ល៝សអ្វែសជុរគុតាឆាក់ខាន់មៃ ខាន់មៃគែសនាវឞ្រាស។ ជេសរីនាវខ្លៃអីខាន់មៃលែៈឆៃលែៈតាង់គ៝ប់នតុមនតីគ៝ប់ជាននើស ខាន់មៃជានតើមមឞើសងក៝ចតាប៝នយេរូឆាលឹម អ្យា តាប៝នអេងតាឞ្រីយូដា តាឞ្រីឆាមារី ជេសរីនហ៝មាលាមនែសនតូអ្យា”។#ការ ២:៣២; ៣:១៥; ៥:៣២; ១០:៣៩; ១៣:៣១; ២២:១៥; ២៣:១១; លក ២៤:៤៨ 9ជេសឞ្រាសយេឆូ ងើយនាវនៃ ទោលមពោលកោរាញអ៝សម៝នហោមអ្វាញ់ពាង់ កោរាញឞ្រាសឆ៝ៈនហាវពាង់តាកាលើត្រោក ជេសរីគែសតុកងកីងលើយពាង់ ឞូមោហោមអោសឆៃពាង់។#លក ២៤:៥០-៥១; មក ១៦:១៩; ១តម ៣:១៦ 10ទោលខាន់ពាង់ហោមអ្វាញ់ងគើររើកហើកឞ្រាសយេឆូ ហាវកាលើត្រោកនតុកកោរាញឞ្រាសនៃ ទោមាឆៃឞារហៃញឆ៝សខ៝អាវងលាងទ៝ក់នទ្រែលខាន់ពាង់តានៃ ឞារហៃខាន់ពាង់អីនៃតោងពារ់ 11ជេសរីខាន់ពាង់លាស៖ “ហើយមពោលឞ្រីកាលីលេ ! ម៝សនទើងគើរអ្វាញ់ខាន់មរែជឹតលើត្រោករី? កោរាញយេឆូ នៃលែៈកោរាញឞ្រាសឆ៝ៈឞើសខាន់មៃនហាវកាលើត្រោក ពាង់មោអោសព្លឹឆឹតតៃតាអ្យាអាបៃអ្យា យើនមាគែសទូនារពាង់មរាព្លឹតៃតឹមឞានមាខាន់មៃឆៃពាង់ហាវកាលើត្រោកនៃនើសដ៝ង់”។#លក ២១:២៧; មថ ២៦:៦៤
12ជេសរីមពោលកោរាញអ៝សម៝នព្លឹឆឹតឞើសយោកនៃ ឆឹតជឹតប៝នយេរូឆាលឹម ។ យោកអីនៃឞូរាញាលាសយោកតើមអោលីវ ងាយឞើសយោកនៃដាសយេរូឆាលឹម ក្លាប់លាសទូកីលោមែត#១:១២៖ តានាវងើយគ្រែក លាស៖ «ងាយហាន់ត្រ៝ងតានារឆាបាត់ » គែសនាវខ្លៃលាសជេងងាយត្រ៝ងនាវវៃផូងអីឆ្រាអែល អ៝ន់ឞូហាន់ទុតងាយតានារឆាបាត់ អីនាររាលូខាន់ពាង់។។#លក ២៤:៥២ 13ត៝ត់តាប៝ននៃ ខាន់ពាង់លាប់តាជៃខាន់ពាង់គុ ជេសរីហាវតាជ្រោកាលើរី។ តានៃគែសពេត្រោស គែសយោហាន គែសយាកើ គែសអ៝ន់ទ្រេ គែសផីលីប គែសថោមាស គែសបារថោលោមេ គែសមាថាយ គែសយាកើ អីក៝នអាល់ផាយ គែសឆីមោន អីឞូក្វាល់លាស«ឞូនុយ្សគើយ្ស » នទ្រែលមាយូដាស អីក៝នយាកោប អាអេងជឹត។#លក ៦:១៣-១៦; មថ ១០:២-៤ 14លែៈមពោលនៃតឹមទីទូនតោរនាវគៃមាគុមឞើសឆើមនទ្រែលនឹង។ តានៃគែសដ៝ង់មពោលឞូអូរអាបាៈអេងអីវៃតឹងឞ្រាសយេឆូ ជេសរីគែសមារី អីមេៈឞ្រាសយេឆូ នទ្រែលមាអីអ៝សៗឞូក្លោពាង់ដ៝ង់។#លក ៨:១-៣; ២៣:៤៩, ៥៥; មថ ១៣:៥៥; យហ ៧:៣-៥
មាត់ថេស ជេងកោរាញអ៝សម៝ននត្រ៝ៈយូដាស-អីឆាការីយោត
15នោកនារនៃគែសឞូនុយ្សអីញឆីងមាឞ្រាសយេឆូ គុរាបុនក្លាប់លាសគែស ១២០ នុយ្ស។ ជេសរីពេត្រោស ទ៝ក់តាងក្លាងងគូលខាន់ពាង់រី ពាង់លាសកើតនអា៖ 16-17“ហើយអ៝សនោ ឞ្រាសហ្វេងអ្វែសអីក្ល៝សអ្វែសលែៈមឞើសជេសមាកាដាច់ដាវីត កាល់អែនើស ពាង់ងក៝ចល៝រមាទូហ្វេឞូនុយ្ស ឞូនុយ្សអីនៃយូដាស ជេងទូហ្វេតាមពោលឞ៝ន់ ជេងឞូនុយ្សជានការនទ្រែលឞ៝ន់ដ៝ង់ តីសមាយូដាស នៃលែវឞូហាន់ញុបឞ្រាសយេឆូ ច្រាវ។ លែៈនាវអ្យាជេងទីងាន់ដាសនាវដាវីត លែៈគែសញចីសតាឆ៝ម់បុតនាវកោរាញឞ្រាសងើយ។#នម ៤១:៩; យហ ១៣:១៨-១៩ 18ខាន់មៃលែៈគឹតជេសនទើអ្យា ព្រាក់អីយូដាស គែសតាៈឞើសងខោមជាននទើអ្យើសនៃនើស ឞូឆ៝ៈព្រាក់អីនៃរាវាត់ទូលោកនែសមីរ ជេសរីពាង់ចោតងកុប នហ៝មាព្រីសនទុលលោសព្រ៝ចរាឞ៝ម់។#លក ២២:៣-៦; មថ ២៦:១៤-១៦; ២៧:៣-១០ 19នាវអ្យាលែៈឞូនុយ្សតាប៝នយេរូឆាលឹម តាង់លឺទាទេ នហ៝មាឞូក្វាល់នតុកនៃតឹងនាវងើយខាន់ពាង់នើមលាស៖ «ហាខែលដាមាស » រាឞ្លាងនាវអីនៃលាស៖ «មីរមហាម»។ 20តាឆ៝ម់បុតនាវកោរាញឞ្រាសងើយតានាវមព្រើអើមលែៈញចីសលាស៖
«អ៝ន់នតុកពាង់គុនៃជេងនតុករាង៝តញជាប់
មោអោសគែសឞូនុយ្សគុ»#នម ៦៩:២៥។
ជេសរីគែសញចីសដ៝ង់
«អ៝ន់គែសទូហ្វេឞូនុយ្សនត្រ៝ៈនាវជានការពាង់»#នម ១០៩:៨។
21កើតនទ្រីអ៝ន់ឞ៝ន់ឆ៝ៈទូហ្វេឞូនុយ្សមានត្រ៝ៈពាង់។ អ្យាត់មាឞូនុយ្សអីនៃអីលែៈគុនទ្រែលឞ៝ន់បាបើ ទោលកោរាញយេឆូ លែវត្រ៝ងមាឞ៝ន់#ការ ១០:៣៧-៤៣; យហ ១៥:២៧ 22នតើមឞើសយោហាន-បាប់តែម ជានបាប់តែមយុកពាង់មាទាក នហ៝មាត៝ត់កោរាញឞ្រាសឆ៝ៈពាង់លោសឞើសឞ៝ន់គុនតុកកោរាញឞ្រាសនើម។ នទ្រីអ៝ន់ឞ៝ន់កើយ្សទូហ្វេឞូនុយ្សគៃមាជានតើមងក៝ចនទ្រែលឞ៝ន់មានាវខ្លៃកោរាញយេឆូ ទ៝ក់រេស”។ 23ជេសរីខាន់ពាង់អុចឆ៝ៈឞារហៃអ៝សម៝ន ទូហ្វេរីរាញាយោឆែប ឞូវៃក្វាល់ពាង់បារឆាបាស មោលាសក្វាល់យុសតុស ដ៝ង់ អីទូហ្វេជឹតរាញាមាត់ថេស ។ 24ជេសរីខាន់ពាង់លែវឞាល់មឞើសឆើមកើតនអា៖ “ហើយកោរាញ! មៃគឹតនូយ្សនហ៝ម់ទឹងលែៈឞូនុយ្ស លាសនទ្រីទាន់មៃមឞើសមាហេន អាសតាៈមៃអុចកើយ្សតាឞារហៃខាន់ពាង់អ្យា 25គៃមាជានការជេងកោរាញអ៝សម៝ននត្រ៝ៈយូដាស យ៝រលាសយូដាស លែៈនត្លើយនាវការអ្យាលែៈខឹតហាន់គុអានតុកពាង់នើមរី”។ 26ជេសរីខាន់ពាង់ញុបនទើញច្រ៝សនៃទីតាព្លាង់មាត់ថេស ឆ៝ៈពាង់គុនទ្រែល ១១ កោរាញអ៝សម៝ននៃ។
Currently Selected:
កោរាញអ៝សម៝ន 1: cmoK
Highlight
Share
Copy
Want to have your highlights saved across all your devices? Sign up or sign in
© (Active) Wycliffe Bible Translators, Inc. All rights reserved.
