យោហាន 12

មារី ត៝ៈទាកងីបោកាសតាជ៝ង់ឞ្រាសយេឆូ

(មថ ២៦:៦-១៣; មក ១៤:៣-៩)

1ហោមអែព្រាវនារមាត៝ត់ទីនារញេតបុននហ៝ត ឞ្រាសយេឆូ ហាន់ត៝ត់តាប៝នបេថានី នតុកប៝នលាឆារ គុ ឞូនុយ្សអីឞ្រាសយេឆូ ទែជានអ៝ន់ទ៝ក់រេសនើស។#យហ ១១:១, ៤៣-៤៤ 2តានតុកនៃឞូនទ្រាប់នទើឆោងឆាក្វ៝ង់អ៝ន់មាឞ្រាសយេឆូ ។ មាថា កើលអ៝ន់នទើឆោងឆាមាឞូ លាឆារ គុឆោងឆានទ្រែលឞ្រាសយេឆូ តាញឆឺងនៃ។ នោកនៃតឹងមានាវវៃនោកឆោងឆាក្វ៝ង់ ខាន់ពាង់ឆោងឆាគុឞិចងកេងជឹតច្យៅ អីជ៝ង់រ៝កជឹតកើយ។#លក ១០:៤០ 3ជេសរីមារី ឆ៝ៈទាកងីបោកាសអីខ្លៃងាន់នតីលទុតអ្វែសអីឞូក្វាល់លាសទាកងី«នារតូ »ងគូលលីត ត៝ៈតាជ៝ង់ឞ្រាសយេឆូ នៃ ជេសរីជូតជ៝ង់ឞ្រាសយេឆូ អីនៃមាឆ៝ក់ពាង់នើម នហោលបោកាសឞេងជៃនៃងាន់។#លក ៧:៣៧-៣៨ 4គែសទូហ្វេឞូនុយ្សតាមពោលអ៝សម៝នឞ្រាសយេឆូ រាញាយូដាស-អីឆាការីយោត ជឹតនាប់តៃពាង់អីនៃលែវឞូហាន់ញុបឞ្រាសយេឆូ ពាង់លាស៖#យហ ១៨:២-៣ 5“ម៝សកោៈមោតាច់ទាកងីបោកាសអីខ្លៃងាន់នៃ ៣០០ ព្រាក់កាក់#១២:៥៖ «៣០០ ព្រាក់កាក់» មោលាស «៣០០ ដេនារី »។ ទូកាក់ដេនារី តឹមឞានមាខ្លៃឞូងខោមជានការទូនារ។ ពាៈអ៝ន់មាឞូនុយ្សអ៝អាច?” 6យូដាស-អីឆាការីយោត ងើយកើតនៃពាង់មោអោសយោៈមាផូងអ៝អាចងាន់។ ពាង់ឞូនុយ្សនតុង ពាង់ឞូនុយ្សញអោតទុងព្រាក់មពោលអ៝សម៝ន នអ៝ប់មាពាង់នើសលែៈវៃតាៈឆ៝ៈព្រាក់អាបាៈឞើសទុងអីនៃទាសពាង់នើមអុចទ៝ង់។ 7យើនមាឞ្រាសយេឆូ លាស៖ “អ៝ន់ទាសមាជានព្រែហ៝ៈ ពាង់ត៝ៈទាកងីបោកាសអ្យា គៃមានទ្រាប់ឆាក់គ៝ប់មាត៝ប់។#យហ ១៩:៣៩-៤០ 8ខាន់អៃមៃហោមអែគែសឞូនុយ្សអ៝អាចគុនទ្រែលខាន់អៃមៃមរ៝ យើនមាគ៝ប់អ្យា គ៝ប់មោហោមអោសគុមរ៝នទ្រែលខាន់អៃមៃ”។#នវ ១៥:១១

ឞូអុចងខឹតលាឆារ

9អ៝ក់ងាន់ផូងអីឆ្រាអែល គឹតលាសឞ្រាសយេឆូ គុតានៃ ជេសរីខាន់ពាង់ហាន់តាពាង់ មោអោសទើនអុចឆៃឞ្រាសយេឆូ ទើម ខាន់ពាង់អុចឆៃលាឆារ អីលែៈឞ្រាសយេឆូ ជានអ៝ន់ទ៝ក់រេសឞើសផូងខឹតនៃដ៝ង់។#យហ ១១:៤៣-៤៥ 10នទ្រីទឹងមពោលកោរាញជានឞ្រាស ខាន់ពាង់តឹមញច្រាៈឞាល់អុចងខឹតលើយលាឆារ ដ៝ង់‌ 11អាចមាឞូលែៈគឹតលាឆារ លែៈទ៝ក់រេស ទឹងអ៝ក់ផូងអីឆ្រាអែល ទូលោសឞើសខាន់ពាង់ ជេសរីញឆីងមាឞ្រាសយេឆូ ។

ឞ្រាសយេឆូ លាប់តាប៝នក្វ៝ង់យេរូឆាលឹម

(មថ ២១:១-១១; មក ១១:១-១១; លក ១៩:២៨-៤០)

12ឞូនុយ្សអីហាន់តាប៝នក្វ៝ង់យេរូឆាលឹម ញេតបុននហ៝តអ៝ក់ងាន់។ ត៝ត់នារអោយតៃជេសនាវឆោងឆាក្វ៝ង់អីនៃ ខាន់ពាង់តាង់លាសឞ្រាសយេឆូ ឞ្រោៈលែៈឞើយមាត៝ត់តាប៝នយេរូឆាលឹម ។ 13ខាន់ពាង់លែវឞាល់ឆ្រែសនហាជោមលោសឞើសប៝នហាន់ច្វាៈឞ្រាសយេឆូ នអ៝ប់មានតែរលាស៖

“រានេមាកោរាញឞ្រាស!#១២:១៣៖ «រានេមាកោរាញឞ្រាស» មោលាស «ហោឆានា »។ «ហោឆានា »ជេងនាវងើយហេឞ្រើ គែសនាវខ្លៃលាស៖ «ទាន់មៃរាក្លាយ្ស» យើនមាតានោកឞ្រាសយេឆូ ឞូទ៝ង់ «ហោឆានា » ជេងនាវរានេ។

ទាន់កោរាញឞ្រាសអ៝ន់នាវគែសជេងមាពាង់អីកោរាញឞ្រាសទែដាៈវាច់‌

ពាង់កាដាច់ផូងអីឆ្រាអែល ”#នម ១១៨:២៥-២៦។

14 ឞ្រាសយេឆូ លែៈឆៃទូមល៝ម់ក៝នឆែសលៀ ពាង់ញច៝តាកាលើរី អីនៃជេងតឹមទីមានាវលែៈឞូញចីសលាស៖

15«អើផូងប៝នលានតាប៝នយេរូឆាលឹម អីឞូក្វាល់ក៝នឞូអូរឆីយោន ដ៝ង់ ខាន់អៃមៃលើយក្លាចអោស។

អ្វាញ់រី! កាដាច់ខាន់អៃមៃឞើយមាត៝ត់

ពាង់គុញច៝តាកាលើក៝នឆែសលៀ»#ឆាក ៩:៩។

16ឞើសនតើមនើស មពោលអ៝សម៝នឞ្រាសយេឆូ អេវ៝ត់អោសនាវអីនៃ។ ជេសឞ្រាសយេឆូ ទ៝ក់រេសលាប់តានាវច្រេកលើបពាង់នើម រីមើខាន់ពាង់កាសគឹតនាវឞូលែៈញចីសមាពាង់កាល់អែនើស ទឹងលែៈនាវអីនៃគែសមាពាង់ជេងតឹមទី។#យហ ២:២២; ១៤:២៦ 17ផូងប៝នលានអីគុនទ្រែលឞ្រាសយេឆូ នោកពាង់ក្វាល់លាឆារ លោសឞើសនតូមោច នអ៝ប់មាជានអ៝ន់ពាង់ទ៝ក់រេសនើស ខាន់ពាង់មឞើសងក៝ចនឹងទឹងលែៈនាវខ្លៃអីនៃអីឞ្រាសយេឆូ ទែជាន។ 18ផូងប៝នលានអ៝ក់ងាន់ហាន់រានច្វាៈតាពាង់ យ៝រលាសតាង់ឞូងក៝ចពាង់ជាននាវខ្លៃអ៝ន់លាឆារ ទ៝ក់រេសអីនៃ។ 19ផូងផារីឆី តឹមលាសនទ្រាង់ខាន់ពាង់៖ “ឆៃបាស! ឞ៝ន់មោអោសទើយឞ្វៃពាង់! ទឹងលែៈផូងប៝នលានលែៈតឹងពាង់ទាទេ!”

ផូងគ្រែក អុចម៝ប់ឞ្រាសយេឆូ

20តាងក្លាងផូងឞូនុយ្សហាន់តាប៝នយេរូឆាលឹម យើកមឞាសមាកោរាញឞ្រាសតានារញេតបុននហ៝តនៃ តានៃគែសផូងគ្រែក អាបាៈដ៝ង់អីមោទីផូងអីឆ្រាអែល ហាន់លាប់នទ្រែល។ 21ខាន់ពាង់ហាន់តាផីលីប ទូហ្វេមពោលកោរាញអ៝សម៝នឞូនុយ្សតាៈឞើសប៝នបេតឆៃដា ឞ្រីកាលីលេ ខាន់ពាង់លាស៖ “អើកោរាញ ហេនអុចម៝ប់កោរាញយេឆូ ”។#លក ១៩:៣; ២៣:៨ 22ផីលីប ហាន់ម៝ប់មឞើសមាអ៝ន់ទ្រេ ជេសរីអ៝ន់ទ្រេ នទ្រែលមាផីលីប ហាន់អោបឞ្រាសយេឆូ ។ 23ឞ្រាសយេឆូ លាសមាខាន់ពាង់៖ “នារគ៝ប់អីក៝នឞូនុយ្សតាៈឞើសកោរាញឞ្រាសទែញជ្វាល់លាប់តានាវច្រេកលើបគ៝ប់នើមលែៈត៝ត់ជេស។#យហ ២:៤; ៧:៦, ៣០; ៨:២០; ១៣:១ 24គ៝ប់លាសនហេលនានេៈងាន់មាខាន់មៃ លាសទូគារ់ឞាលាសឞាអីនៃឞូមោតូចតានែស ឞាអីនៃហោមទូគារ់នឹងទើម យើនមាលាសតូចតានែសពាង់មោអោសហោមកើតអើម#១២:២៤៖ តានាវងើយគ្រែក លាស៖ «ពាង់ខឹត»។ លោសជេងតើមឞាអីលែៈហ៝ន ជេសរីគែសព្លៃអ៝ក់ងាន់។ កើតនទ្រីដ៝ង់យ៝រមាគ៝ប់ខឹតទឹងគែសអ៝ក់ឞូនុយ្សឆ៝ៈទើននាវរេសមហែ។ 25ឞូម៝សអុចងាន់ពើសមានាវរេសពាង់នើមទើមតានែសនតូអ្យា ពាង់អីនៃមោអោសគែសនាវរេសនហ៝រ៝ យើនមាឞូម៝សមោអោសកើបខ្លៃមានាវរេសពាង់នើមតានែសនតូអ្យា ពាង់អីនៃហោមគែសនាវរេសនហ៝រ៝ងាន់មាពាង់នើម។#មថ ១៦:២៥ 26ឞូម៝សឆើមកើលជានការមាគ៝ប់ អ្យាត់មាពាង់តឹងគ៝ប់ ជេសរីអាសនតុកគ៝ប់គុ ពាង់គុតានតុកនៃដ៝ង់។ ឞូម៝សឆើមកើលជានការមាគ៝ប់ ឞឹគ៝ប់រានេដ៝ង់មាពាង់”។#យហ ១៤:៣; ១៧:២៤

នាវឞ្រាសយេឆូ ងើយមាឆាក់ពាង់នើមខឹត

27“អាបៃអ្យានូយ្សនហ៝ម់គ៝ប់គែសនាវរុងរាង់ងាន់។ អាមើមគ៝ប់ងើយអាបៃអ្យា? ងើយ៖ «អើឞឹ ទាន់មៃរាក្លាយ្សគ៝ប់ឞើសនាវជេរអីអ្យា» ឞើស? មោអោស។ យ៝រមានាវអីអ្យារ៝ទឹងគ៝ប់វាច់តានែសនតូអ្យា។#មថ ២៦:៣៨-៣៩ 28អើឞឹ ដាៈមៃជានអ៝ន់មៃនើមគែសនាវច្រេកលើប”។ នោកនៃគែសតាង់នតែសឞ៝រ់តាៈឞើសកាលើត្រោកតី៖ “គ៝ប់លែៈជានអ៝ន់គ៝ប់នើមគែសនាវច្រេកលើប ជេសរីគ៝ប់មរាជានទូតឹដ៝ង់ជឹត”។ 29ផូងប៝នលានគុតានៃតាង់នតែស ខាន់ពាង់តឹមលាស៖ “គឹតនតែសនត៝រ់ងលាយ្ស?” អាបាៈជឹតលាស៖ “គឹតគែសតោងពារ់ងើយមាពាង់?” 30ឞ្រាសយេឆូ លាស៖ “នតែសអីនៃគៃមាគែសនាវខ្លៃមាខាន់អៃមៃ មោទីអោសគៃមាគែសនាវខ្លៃមាគ៝ប់។ 31អាបៃអ្យានារផាតទោយ្សទឹងលែៈឞូនុយ្សតានែសនតូអ្យាលែៈត៝ត់ជេស អាបៃអ្យាលែៈត៝ត់ដ៝ង់នារមព្រើសលើយឆាតាង់ អីកោរាញមពោលឞ្រាសអ្យើសអីនើមកោរាញមានែសនតូអ្យា។#យហ ១៤:៣០; ១៦:១១ 32យើនមាគ៝ប់ ត៝ត់ឞូនហាវគ៝ប់ឞើសនែសអ្យា#១២:៣២៖ «នហាវគ៝ប់ឞើសនែសអ្យា» ឞ្រាសយេឆូ ងើយមាឞូងខឹតពាង់តាឆីតឹមរាកាង់ មោលាស ងើយមានហាវពាង់តាកាលើត្រោកនតុកកោរាញឞ្រាសនើម។ គ៝ប់លែវទឹងលែៈឞូនុយ្សហាន់តាគ៝ប់ទាទេ”។#យហ ៣:១៤; ១៨:៣២ 33ឞ្រាសយេឆូ ងើយកើតនៃ អុចអ៝ន់ឞូគឹតមើមនាវពាង់ខឹត យ៝រលាសតាឆីតឹមរាកាង់ឞូនហាវពាង់ឞើសនែស។ 34ផូងប៝នលានអោបឞ្រាសយេឆូ ៖ “ហេនលែៈតាង់តានាវវៃផូងឞ៝ន់លាស៖ «ឞ្រាសក្រីស ហោមគុនហ៝រ៝»។ លាសនទ្រីមើមទឹងមៃលាសក៝នឞូនុយ្សអីតាៈឞើសកោរាញឞ្រាសទែញជ្វាល់ឞូទែងខឹតនហាវពាង់ឞើសនែសនតូអ្យា? លាសនទ្រីឞូម៝សក៝នឞូនុយ្សអីនៃ?”#នម ១១០:៤; អេឆា ៩:៦-៧; ដាន ៧:១៣-១៤ 35ឞ្រាសយេឆូ លាសមាខាន់ពាង់៖ “នាវអាងហោមគុនទ្រែលខាន់អៃមៃទូប្ល៝ត់ទើម។ អ៝ន់ខាន់អៃមៃហាន់ហ៝ម់ទោលនាវអាងហោមអែគុនទ្រែលខាន់អៃមៃ គៃមានាវង៝មោទើយដាសខាន់អៃមៃ។ លាសឞូម៝សហាន់តានាវង៝ ពាង់មោគឹតអោសអាសនតុកពាង់ហាន់។#យហ ៨:១២ 36ទោលហោមគែសនាវអាងអ្យា អ៝ន់ខាន់អៃមៃញឆីងហ៝ម់មានាវអាងអីនៃ គៃមាខាន់អៃមៃជេងក៝ននាវអាង”។ ជេសឞ្រាសយេឆូ ងើយកើតនៃ ជេសរីពាង់ទូក្រាប ឞូមោហោមអោសឆៃពាង់។#អេផ ៥:៨; ១តេ ៥:៥

ផូងប៝នលានមោអោសញឆីងមាឞ្រាសយេឆូ

37ឞ៝លលាសផូងប៝នលានលែៈឆៃឞ្រាសយេឆូ ជានអ៝ក់នាវខ្លៃកាដោយ ហោមអែគែសអ៝ក់ឞូនុយ្សមោញឆីងមាពាង់ដ៝ង់។ 38នាវនៃជេងតឹមទីដាសនាវអេឆាយ អីឞូនុយ្សនតើយ្សនាវងើយកោរាញឞ្រាសកាល់អែនើសលែៈញចីស៖

«អើកោរាញឞ្រាស ឞូម៝សមាអ្យាត់នាវហេនលែៈមឞើសងក៝ច?

ឞូម៝សមាឆៃនាវទើយមៃលែៈញហើ?»#អេឆា ៥៣:១

39អាចមាកើតនអាទឹងឞូមោញឆីង កើតអេឆាយ ញចីសតៃជឹត៖

40«កោរាញឞ្រាសជានអ៝ន់ត្រោមមាត់ខាន់ពាង់ចែស‌

នូយ្សនហ៝ម់ខាន់ពាង់ទាង់ក៝‌

គៃមាត្រោមមាត់ខាន់ពាង់មោឆៃងាន់‌

នអ៝ប់មានូយ្សនហ៝ម់ខាន់ពាង់មោគឹតវ៝ត់‌

នទ្រីខាន់ពាង់មោព្លឹឆឹតមាកោរាញឞ្រាស‌

ជេសរីកោរាញឞ្រាសមោអោសជានឞាសខាន់ពាង់»#អេឆា ៦:១០។

41 អេឆាយ ងើយកើតនៃ យ៝រលាសកាល់អែនើសពាង់លែៈឆៃនាវច្រេកលើបឞ្រាសយេឆូ ជេសរីពាង់មឞើសងក៝ចល៝រមាឞ្រាសយេឆូ ។ 42យើនមាហោមគែសអ៝ក់ឞូនុយ្សញឆីងមាឞ្រាសយេឆូ គែសមពោលកោរាញតាផូងអីឆ្រាអែល ញឆីងមាពាង់ដ៝ង់។ យើនមាខាន់ពាង់មោឞាញ់មឞើសងក៝ចនាវញឆីងអីនៃមាឞូ យ៝រមាខាន់ពាង់ក្លាចផូងផារីឆី មព្រើសខាន់ពាង់ទូឞើសញីសរាបុនផូងខាន់ពាង់នើម។#យហ ៩:២២ 43ខាន់ពាង់ជានកើតនៃ យ៝រមាខាន់ពាង់អុចឞូនុយ្សរានេរាលាវមាកោរាញឞ្រាសរានេ។

44ជេសរីឞ្រាសយេឆូ ងើយទុតនតែស៖ “ឞូម៝សញឆីងមាគ៝ប់ មោអោសទើនញឆីងមាគ៝ប់ទើម ពាង់ញឆីងដ៝ង់មាកោរាញឞ្រាសនើមតើមញជ្វាល់គ៝ប់។ 45ឞូម៝សឆៃគ៝ប់ ពាង់ឆៃដ៝ង់អីនើមតើមញជ្វាល់គ៝ប់។#យហ ១៤:៧-៩ 46គ៝ប់វាច់តានែសនតូអ្យាតឹមឞានមានាវអាង គៃមាឞូម៝សញឆីងមាគ៝ប់ ពាង់មោអោសហោមតឹមឞានមាឞូនុយ្សគុតានាវង៝។#យហ ៨:១២ 47លាសឞូម៝សតាង់ឞ៝រ់គ៝ប់ងើយ តីសមាមោអុចអ្យាត់នាវគ៝ប់នតី គ៝ប់មោអោសផាតទោយ្សអាបៃអ្យា យ៝រលាសគ៝ប់វាច់មោអោសគៃមាផាតទោយ្សឞូនុយ្សតានែសនតូអ្យា គ៝ប់វាច់គៃមារាក្លាយ្សឞូនុយ្សតានែសនតូអ្យា។#យហ ៣:១៧-១៨ 48យើនមាឞូម៝សរាលាច់មោអោសអ្យាត់នាវគ៝ប់ មោអោសឆ៝ៈទើននាវគ៝ប់នតីលាស ពាង់អីនៃលែៈគែសកោរាញផាតទោយ្សពាង់។ នាវគ៝ប់លែៈនតីលាសអីនៃមរាផាតទោយ្សពាង់តានារងគ្លែៈទុតតៃ‌ 49យ៝រលាសនាវគ៝ប់នតីលាសអីនៃ មោគែសអោសលោសតាៈឞើសឆាក់គ៝ប់នើមអុច យើនមាឞឹគ៝ប់នើមតើមញជ្វាល់គ៝ប់ដាៈមាគ៝ប់ ម៝សនាវគ៝ប់នតី ម៝សនាវគ៝ប់លាស។#យហ ៧:១៦-១៧ 50ជេសរីគ៝ប់លែៈគឹត នាវកោរាញឞ្រាសដាៈអ៝ន់គែសនាវរេសនហ៝រ៝។ លាសនទ្រីទឹងលែៈនាវគ៝ប់លាស គ៝ប់លាសកើតនាវឞឹគ៝ប់លែៈដាៈ”។

Currently Selected:

យោហាន 12: cmoK

Highlight

Copy