យោហាន 21

ឞ្រាសយេឆូ ញហើឆាក់ពាង់នើមតានតុកងលៅកាលីលេ

1ឞើសកើយនៃឞ្រាសយេឆូ ញហើតៃឆាក់ពាង់នើមអ៝ន់មពោលអ៝សម៝នពាង់ឆៃជឹតតាមែងទាកងលៅក្វ៝ង់កាលីលេ #២១:១៖ មោលាស «ទាកងលៅតីបេរៀស »។ ពាង់ញហើកើតនអា៖ 2គែសឆីមោន អីឞូក្វាល់ពេត្រោស ដ៝ង់ ថោមាស អីឞូក្វាល់ដីដីម ដ៝ង់ នាថានែល តាៈឞើសប៝នកានា ឞ្រីកាលីលេ ក៝នឆេបេដេ ឞារហៃ នទ្រែលមាអ៝សម៝នឞ្រាសយេឆូ ឞារហៃអេងជឹតគុនទ្រែលតានៃ។#យហ ១:៤១-៤២; ២០:២៤; ១:៤៥-៤៩; មក ១:១៩-២០ 3ឆីមោន អីឞូក្វាល់ពេត្រោស ដ៝ង់លាសមាខាន់ពាង់៖ “គ៝ប់ហាន់ជ៝យកា”។ ខាន់ពាង់អើស៖ “ហេនហាន់ដ៝ង់”។ ជេសរីខាន់ពាង់ទ៝ក់ហាន់ ហាវញច៝តាកាលើទូក។ មាង់នៃខាន់ពាង់មោអោសគែសកា។ 4ត៝ត់លោសនារអាអោយ ឞ្រាសយេឆូ ទ៝ក់កេងមែងទាកនៃ យើនមាមពោលអ៝សម៝នមោអោសគឹតនាល់ពាង់។#យហ ២០:១៤ 5ឞ្រាសយេឆូ លាសមាខាន់ពាង់៖ “អើអ៝សម៝ន! ខាន់មៃគែសកាដ៝ង់ឞើស?” ខាន់ពាង់អើស៖ “មោគែសអោស”។ 6ឞ្រាសយេឆូ លាសមាខាន់ពាង់៖ “ខាន់មៃឆែងឞើសមាទូកនៃ គែសការ៝!” ជេសរីខាន់ពាង់ឆែង គែសកាទុតអ៝ក់ អូយ្សជាលមោទើយអោស។#លក ៥:៤-៧ 7គែសទូហ្វេអ៝សម៝នអីឞ្រាសយេឆូ ទែរ៝ង់នៃលាសមាពេត្រោស ៖ “អីនៃកោរាញឞ៝ន់!” ត៝ត់មាឆីមោន អីឞូក្វាល់ពេត្រោស ដ៝ង់តាង់លាសអីនៃកោរាញខាន់ពាង់ ពាង់ញឆ៝សឞ៝កអាវរ៝ យ៝រលាសពាង់នើសគុឆាក់កុស ជេសរីញឆាត់អាទាកឆូ។#យហ ១៣:២៣ 8យើនមាអ៝សម៝នអាបាៈនៃ ខាន់ពាង់វាសទូកហាន់ជឹតមែង អូយ្សកាអ៝ក់អីនៃ យ៝រលាសមោអីរងាយអោសមាមែង ក្លាប់លាស ២០០ ហាត់ទើម។ 9ត៝ត់មពោលអ៝សម៝នហាវអាកើសតី ខាន់ពាង់ឆៃអុញរាងា ឆៃកា នទ្រែលមាឆៃគែសនុមពាង់នអោងកាលើអុញរាងានៃដ៝ង់។ 10ឞ្រាសយេឆូ លាសមាខាន់ពាង់៖ “ញអោតលែវតាអ្យាបាៈកាខាន់ម្រែមហែគែសអីនៃ”។ 11ជេសរីឆីមោន អីឞូក្វាល់ពេត្រោស ដ៝ង់ហាន់អូយ្សជាលលែវអាកើសអ្យា គែសកាអ៝ក់ងាន់ កាក្វ៝ង់ៗគែស ១៥៣ មល៝ម់ ឞ៝លលាសគែសកាអ៝ក់កើតនៃកាដោយ ជាលខាន់ពាង់មោហេកដ៝ង់។ 12ឞ្រាសយេឆូ លាសមាខាន់ពាង់៖ “ហាន់តាអ្យាលែវឞាល់ឆោងហ៝ម់”។ ទឹងលែៈមពោលអ៝សម៝នអីនៃ មោគែសទូហ្វេឞាញ់អោបពាង់៖ “ឞូម៝សមៃ?” យើនមាទឹងលែៈខាន់ពាង់លែៈគឹតលាសពាង់អីកោរាញខាន់ពាង់។ 13ឞ្រាសយេឆូ ហាន់ទាច់កេងខាន់ពាង់ ជេសរីពាង់ឆ៝ៈនុមពាង់ នទ្រែលមាកាអ៝ន់មាខាន់ពាង់ឆា។#យហ ៦:១១; ការ ១០:៤១ 14នត៝បមានៃលែៈគែសពែតឹឞ្រាសយេឆូ ញហើឆាក់ពាង់នើមអ៝ន់មាមពោលអ៝សម៝នពាង់ឆៃ នតើមឞើសពាង់លែៈទ៝ក់រេស។#យហ ២០:១៩, ២៦

ឞ្រាសយេឆូ នតិញមាពេត្រោស

15ត៝ត់លែៈជេសខាន់ពាង់ឆោងឆានៃ ឞ្រាសយេឆូ លាសមាឆីមោន អីឞូក្វាល់ពេត្រោស ដ៝ង់៖ “អើឆីមោន ក៝នយោហាន #២១:១៥, ១៧៖ ឆ៝ម់បុតអើមអីញចីសមាតីអាបាៈគែសញចីសលាស៖ «ក៝នយោនាយ្ស »។ អាសមៃរ៝ង់មាគ៝ប់រាលាវខាន់ពាង់អ្យាដ៝ង់ឞើស?” ពាង់អើស៖ “អើកោរាញ មៃលែៈគឹតជេសនាវគ៝ប់រ៝ង់មាមៃ”។ ឞ្រាសយេឆូ លាសមាពាង់៖ “អ៝ន់មៃអ្វាញ់ផូងអីញឆីងមាគ៝ប់តឹមឞានមានើមច្យាប់អ្វាញ់ផូងក៝នឞែឞ្យាប់ពាង់នើមអ៝ន់គែសមពាឆា”។#ការ ២០:២៨; ១ពេ ៥:២-៤ 16ឞ្រាសយេឆូ អោបតៃពាង់ទូតឹជឹត៖ “អើឆីមោន ក៝នយោហាន ! អាសមៃរ៝ង់ដ៝ង់មាគ៝ប់ឞើស?” ពេត្រោស អើស៖ “អើកោរាញ មៃលែៈគឹតជេសនាវគ៝ប់រ៝ង់មាមៃ”។ ឞ្រាសយេឆូ លាសមាពាង់៖ “អ៝ន់មៃអ្វាញ់ផូងអីញឆីងមាគ៝ប់តឹមឞានមានើមច្យាប់អ្វាញ់ផូងឞែឞ្យាប់ពាង់នើម”។ 17ឞ្រាសយេឆូ អោបតៃពាង់លោចពែតឹ៖ “អើឆីមោន ក៝នយោហាន ! អាសមៃរ៝ង់ដ៝ង់មាគ៝ប់ឞើស?” ពេត្រោស គែសនាវរាង៝តងាន់ យ៝រលាសឞ្រាសយេឆូ អោបពាង់លែៈគែសពែតឹ៖ “អាសមៃរ៝ង់ដ៝ង់មាគ៝ប់ឞើស?” ពេត្រោស អើសមាឞ្រាសយេឆូ ៖ “អើកោរាញ មៃលែៈគឹតទឹងលែៈរាងោចនទើ មៃលែៈគឹតជេសនាវគ៝ប់រ៝ង់មាមៃ”។ ឞ្រាសយេឆូ លាសមាពាង់៖ “អ៝ន់មៃអ្វាញ់ផូងអីញឆីងមាគ៝ប់តឹមឞានមានើមច្យាប់អ្វាញ់ផូងឞែឞ្យាប់ពាង់នើមអ៝ន់គែសមពាឆា។#យហ ១៣:៣៨ 18គ៝ប់លាសនហេលនានេៈងាន់មាមៃ នោកមៃហោមនទាម់ មៃញឆ៝សអេងខ៝អាវ#២១:១៨៖ មោលាស «មៃក៝ត់អេងរាឆែឞុតមៃ»។ ជេសរីមៃហាន់អាសនតុកមៃអុចហាន់។ យើនមាត៝ត់មៃលែៈរាញ មៃយើរតី ជេសរីគែសទូហ្វេឞូនុយ្សក៝ត់តីមៃ នទ្រែលមាលែវមៃហាន់តានតុកមៃមោអុចអោសហាន់”។#យហ ១៣:៣៦; ២ពេ ១:១៤ 19ឞ្រាសយេឆូ ងើយកើតនៃ ពាង់អុចមឞើសអាមើមខឹតពេត្រោស គៃមាអ៝ន់កោរាញឞ្រាសគែសនាវច្រេកលើប#២១:១៩៖ គែសញចីសតាឆ៝ម់បុតអាបាៈអេងឞើសរានោកកាល់អែ ក្លាប់លាស ៣០ នាម់ជេសឞ្រាសយេឆូ ខឹតទ៝ក់រេស ឞូងខឹតពេត្រោស យ៝រមាពាង់មឞើសងក៝ចឞ្រាសយេឆូ ។។ ជេសឞ្រាសយេឆូ លាសងើយកើតនៃ ពាង់លាសមាពេត្រោស ៖ “ហោៈតឹងគ្រ៝យគ៝ប់ឞើសកើយ!”

ឞ្រាសយេឆូ នទ្រែលមាអ៝សម៝នពាង់រ៝ង់

20 ពេត្រោស ងគឹលជឹតកើយ ឆៃទូហ្វេអ៝សម៝នឞ្រាសយេឆូ ទែរ៝ង់អីនៃតឹងគ្រ៝យខាន់ពាង់ឞើសកើយ។ អ៝សម៝នអីនៃគុងគឹលមាត់ជឹតឞ្រាសយេឆូ ទោលមាង់ខាន់ពាង់គុញេតឆោង នអ៝ប់មាអោបឞ្រាសយេឆូ នើស៖ “អើកោរាញ ឞូម៝សលែវឞូហាន់ញុបមៃ?”#យហ ១៣:២៣ 21ត៝ត់ពេត្រោស ឆៃពាង់ ពេត្រោស អោបឞ្រាសយេឆូ ៖ “អើកោរាញ លាសនទ្រីឞូនុយ្សអីនៃ ម៝សបាៈនាវគែសមាពាង់?” 22ឞ្រាសយេឆូ អើស៖ “លាសគ៝ប់អុចរ៝ងពាង់ហោមរេសត៝ត់នារគ៝ប់ព្លឹវាច់ ក៝ៈមោគែសនាវខ្លៃមាមៃដ៝ង់ ហោៈមៃតឹងគ្រ៝យគ៝ប់ហ៝ម់!” 23ជេសរីនតើមឞើសនោកនៃ ឞូតាង់ងក៝ចដើនតាផូងញឆីងមាឞ្រាសយេឆូ លាសអ៝សម៝នអីនៃមោគែសខឹតអោស។ យើនមាឞ្រាសយេឆូ មោគែសអោសលាសមាពេត្រោស អ៝សម៝នអីនៃមោខឹត ពាង់លាស៖ “លាសគ៝ប់អុចរ៝ងពាង់ហោមរេសត៝ត់នារគ៝ប់ព្លឹវាច់ ក៝ៈមោគែសនាវខ្លៃមាមៃដ៝ង់”។

24អ៝សម៝នអីឞ្រាសយេឆូ ទែរ៝ង់នៃ មឞើសងក៝ចទឹងលែៈនាវខ្លៃអីអ្យាជេងនាវងាន់ នទ្រែលមាញចីសនាវអីនៃដ៝ង់។ ឞ៝ន់គឹត នាវពាង់មឞើសងក៝ចអីនៃជេងនាវងាន់។#យហ ១៩:៣៥ 25ហោមអែគែសអ៝ក់ជឹតនាវឞ្រាសយេឆូ លែៈគែសជាន យើនមាលាសឞូញចីសទឹងលែៈនាវពាង់លែៈជានអីនៃ តានែសនតូអ្យាយ៝ង់មាគែសនតុកមាទើឆ៝ម់បុតឞូញចីស៕#យហ ២០:៣០៚

Currently Selected:

យោហាន 21: cmoK

Highlight

Copy