Itsɛ́ 1
1
Yèésù tàlé-Mímí-Ɔ̀ɖáyé fú adzítsɛ́‐ɛ̀ ŋa
1Tèyòfílì, ǹ wà kíɛ. Ńnɔ́-ìwé-mi àtsɛ̃̀tsɛ̃̀#ɛ́, ǹ kɔ ɛ̀rɔ́ ti nára-iŋɛ́ ɔ̀kã̀lɔ́ɔ̀kã̀ yèé Yèésù† tse ŋa#á kpó òŋu ɛ̀kɔ́ yèé ŋa ó tse gbo kpó#ɛ́, ti ńǹkpìnkpìlɛ̀ 2títí wá fú nɔ́dzɔ́ yèé ó ǹɖe ńǹtalɛ̀, tsí lɔ nɔ́ɔ̀rɔ̃#ɛ́. Ó ti tsã ɔ̀nyà kã̀ŋa si, tsí kpè ŋá ní adzítsɛ́-òŋu ŋa. Tã́ná kó lɔ nɔ́ɔ̀rɔ̃#ɛ́, gbà ńǹtá-ikpá-Mímí-Ɔ̀ɖáyé†#ɛ́, ó ɖíre iŋɛ́ yèé à nákó tse ŋa#á fú ŋa kpó. 3Kíbí ó réré, tsí kú tã́#á, ó mú ara‐ɛ̀ ŋà ŋá nɔ́ɔ̀nà kpíkpɔ̀, tsí tse tsí àŋa kpó, à mà ìɖéǹɖè ní ó wà náàyɛ̀ si. Ó mú ara‐ɛ̀ ŋà ŋá títí fú ɔdzɔ́ ogóòdzì, tsí náa wà wíìnyɛ̀ fú ŋa ti nára-kíbí Ɔ̀ɖáyé bòkó wáa dzoyè gbà#á.
4Tsí ó ɖi nɔ́dzɔ́-kã̀, tsí Yèésù wà ńɖi-ŋa si, tsí à dzɔ wà dzɛŋɛ́. Tsí ó wà wí fú ŋa ní: Ká máa ǹɖe ńǹlú-Yèrúsàlɛ́mì. Ó ɖi, ká wà bɛ̀ si, tsí àlé yèé Ɔ̀ɖáyé Boba-òŋu ta si fú ŋa, tsí òŋu ti fɔ̀ fú ŋa wáa lɔ#ɛ́, kó sã àlé#ɛ́ fú ŋa. 5Yòhánà† wɛ̀† fú ɔ̀nyà ŋa nómi. Ó ɖi, kàkó dzɛ̃̀, tã́ná Mímí-Ɔ̀ɖáyé nákó tì wɔ̀ ńǹtá-ŋa, tsí gbé bá ŋa.
Yèésù lɔ nɔ́ɔ̀rɔ̃
6Ńbɛ̀ɛ́, adzítsɛ́-Yèésù† ŋa kpérí si ńɖɔ̀‐ɛ̀, tsí à wà bèrèé ní: Ɔlá-wa! Ńǹwèrè nyɛ̀ŋɛ̀ ní ó bòkó sɛ̃̀ mú ɔma-Ìsàràyɛ́lì† ŋa dzoyè#ɛ́ɛ̀?
7Tsí Yèésù dzɔ́ŋù fú ŋa ní: Kò bèrè ní ká ma ìwèrè yèé iŋɛ́ nyɛ̀ŋɛ̀ ŋa nákó wáa tse#ɛ́. Boba-òŋu òŋu níìkã̀ntso ní nɛ́kpá, tsí ɖá ìwèrè#ɛ́ òŋu ɔdzɔ́ nyɛ̀ŋɛ̀ ŋa#á. 8Ó ɖi, Mímí-Ɔ̀ɖáyé† nákó tì wɔ̀ ńǹtá-ŋa, tsí nákó fú ŋa ńkpá. Ńbɛ̀ɛ́, à nákó wà nya àyídzá-òŋu ńǹlú-Yèrúsàlɛ́mì, nérè-Yùɖéyà gbo òŋu nérè-Sàmàríyà† títí lɔ ńǹlú ŋa náyé gbaŋgba#á kpó.
9Kíbí Yèésù wíìnyɛ̀ nyɛ̀ŋɛ̀ tã́#á, ó ǹɖe, tsí làkóò nɔ́ɔ̀rɔ̃. Tsí adzítsɛ́‐ɛ̀ ŋa wà wòó kíbí ó làkóò#ɛ́ títítí irì káà bòó, tsí à kò ríi ró.
10Ńbɛ̀ɛ́, à tadzú má ìgbèrí si, tsí wà wo ìyàɖì-ńbí ó lɔ#ɛ́ kokoko. Gbòkã́ gé#ɛ́, à rí ɔ̀nyà méèdzì-kã̀, tsí à wáa ɖóro gbè ŋá. Ɛnɛ nyɛ̀ŋɛ̀ ŋa#á wɔ ìwɔ̀ra fũfũ pílípílí si. 11Tsí à wà wí fú adzítsɛ́-Yèésù ŋa#á ní: Ɔma-Gàlìlé ŋa! Kí tse tsí à ɖóro si, tsí wà wo ìgbèrí bɛ́ɛ̀? Yèésù yèé à rí, tsí ó lɔ nɔ́ɔ̀rɔ̃#ɛ́, ńǹrɔ́-kíbí à ríi, tsí ó lɔ nɔ́ɔ̀rɔ̃ gbà#á, nákó sɛ̃̀ wá bɛ́ɛ̀ ké tútútú.
À tsã ɔ̀nyà-kã̀ ní kó gba ìɖì-Yúɖà
12Ńǹwèrè nyɛ̀ŋɛ̀#ɛ́, adzítsɛ́-Yèésù† ŋa wà ńǹtá-òkè-kã̀ si ni. À náa kpe òkè#ɛ́ ní òkè-Òlífì†. Ńbɛ̀ɛ́, à ǹɖe bɛ̀, tsí bɔ̀ wáa lɔ ńYèrúsàlɛ́mì. (Ìlú-Yèrúsàlɛ́mì#ɛ́ kò dzɛ̃̀ òŋu òkè#ɛ́ méèdzì. Ó wà kíbí ìtsɛ́kòlò-kã̀ bɛ́ gé ni.) 13Kíbí à káà tó ńnɔ́-ìlú#ɛ́, à wɔ̀ ńlé-ìsã́ŋú-kã̀, ńbí à náa ti gbé#ɛ́. Ɛ́kɔ-ɛnɛ yèé ŋa wà ńnɔlé#ɛ́ nɔ́dzɔ́ nyɛ̀ŋɛ̀#ɛ́ ní: Òkúta fòò, Yòhánà† gbo, Yàkúbù gbo, Ànɖérè gbo, Fìlíkpò gbo, Tòmá gbo, Bàtòlòméwò gbo, Màtéwò gbo, Yàkúbù ɔma-Àfáyò gbo, Sìmɔ́nì ɔma-ɛgbɛ́-Sèlɔ́tì ŋa#1:13 Bí à wà kpe ɔ̀nyà-kã̀ ní Sèlɔ́tì#ɛ́, òkpì‐ɛ̀ ní dzɛ́ ní ɛnɛ-nyɛ̀ŋɛ̀ wà nágbaɖa-ɛnɛ yèé ŋa náa wà wo ká kɔ̀ ní ɛnɛ-Rómà ŋa ká máa dzoyè si ńǹtá-ɔma-Ìyúɖà ŋa ró#ɛ́. má nára-Yúɖà ɔma-Yàkúbù. 14Àŋa kpó, à náa wà kpérí má náàdzɔ́, tsí wà wúùre kũkũkũ nɔ́dzɔ́ kɔ́dzɔ́. Màríyà† ìnà-Yèésù gbo, ìnàbí-Yèésù ŋa òŋu ɔnɔbɛ̃̀ɛ̃ kã̀ŋa gbo wà náàŋírĩ-ŋa.
15Ó ɖi nɔ́dzɔ́-kã̀, tsí ìnàbí ŋa kpérí si. Àŋa yèé kpérí si bɛ̀ kpó ŋa#á lɔ kíbí ɔgɔ́ɔfà bɛ́ɛ̀. Ńbɛ̀ɛ́, Òkúta ǹɖe ɖóro náàŋírĩ-ŋa, tsí ní: 16Ìnàbí-mi ŋa, ó wà ní afɔ̀ yèé Mímí-Ɔ̀ɖáyé† ti fɔ̀ si ńǸwé-Ɔ̀ɖáyé†#ɛ́ kó tsɛ. Dzɔ̀ɔ́ dzɔ̀ɔ́#ɛ́, Mímí-Ɔ̀ɖáyé ti wíìnyɛ̀ ti nára-Yúɖà gbà ńǹtá-ólú Ɖàfíɖì†. Yúɖà#á ní gbɛ̃́ ɔ̀nyà ŋa, tsí ɖíre ɔ̀nà fú ŋa títí à mú Yèésù#ɛ́. 17Tsí ó sì gbé náàŋírĩ-àŋa, tsí Yèésù tsã̀ òŋu gbo ní kó tsitsɛ́-Ɔ̀ɖáyé bá àŋa.
18(Owó yèé à sã fúu ti nára-íbàɖí yèé ó tse nyɛ̀ŋɛ̀#ɛ́, ó kɛ́ɛ káà ń ra ilɛ̀-kã̀. Ńǹɖì-bɛ̀#ɛ́, ó tsubú kpòrò, tsí inɔ́‐ɛ̀ ɖá náàŋírĩ, tsí èfũ‐ɛ̀ ŋa bɔ́ ɖá ńlɛ̀ kpó. 19Ńbɛ̀ɛ́, ɛnɛ-Yèrúsàlɛ́mì ŋa kpó, à gbɔ́ iŋɛ́ yèé tse Yúɖà#á. Àtóoríi bɛ́ɛ̀ ní à sɔ ɛ́kɔ fú ilɛ̀#ɛ́ ńǹlú-ŋa ní Hàkɛ́lɛ́ɖàmá#á. Òkpì‐ɛ̀ ní dzɛ́ ilɛ̀-àmbara#á.)
20Tsí Òkúta tɔ́ wà wí fú ŋa ró ní: À kɔ si ńǸwé-Orĩ ŋa ní:
“Ilé‐ɛ̀ kó ɖi ìkpofò.
Ɔ̀nyà-kã̀ kpókpó kó máa gbé ńnɛ̀ ró.”
Tsí à tɔ́ kɔ si ró ní:
“Olòmírɛ̃̀ kó gba ìɖì-itsɛ́‐ɛ̀.”#1:20 Ìwé-Orĩ ŋa 69:26, 109:8 (Psaumes 69:26, 109:8)
21Ó wà ní àŋa kó tsã ɔ̀nyà-kã̀, tsí kó gba ìɖì-Yúɖà. Ɛnɛ nyɛ̀ŋɛ̀ kó dzɛ́ ɛnɛ yèé wà bá àŋa si ńǹwèrè kpó yèé Ɔlá-àŋa Yèésù wà rɛ̃̀ ńǹlú ŋa wérí#ɛ́. 22Títí kíbí Yòhánà wɛ̀† fúu#ɛ́, títí wáa fú ìwèrè yèé ó ǹɖe náàŋírĩ-àŋa, tsí lɔ nɔ́ɔ̀rɔ̃#ɛ́, ó wà ní ɛnɛ nyɛ̀ŋɛ̀ kó ti wà náàŋírĩ-àŋa si. Àŋa kó tsã̀ã́, tsí kó wà nya àyídzá bá àŋa ní Yèésù dzí ti náàŋírĩ-òkú ŋa wá náyé.
23Ńbɛ̀ɛ́, à ɖíre ɔ̀nyà méèdzì ní ká tsã ɔ̀nyà-kã̀ náàŋírĩ-ŋa. À náa kpe ɔ̀nyà-kã̀ ní Yòsɛ́fù†, tsí kpèé gbo ní Bàràsábà, tsí à náa ɖáakì gbo ró ní Yúsítù. Enìkéèdzì‐ɛ̀ òŋu dzɛ́ Màtíyà. 24Tsí ɛnɛ yèé wà bɛ̀ kpó ŋa#á wúùre, tsí wà fɔ̀ ní: Ɔlá-wa! Ìwɔ ní ma inɔ́-ɔ̀nyà ɔ̀kã̀lɔ́ɔ̀kã̀ kpó#ɛ́. Náàŋírĩ-ɔ̀nyà méèdzì ŋa#á, nà ɖíre ɛnɛ yèé ò tsã̀#á fú wa, 25tsí kó ɖi adzítsɛ́-ɛ̀ɛ, tsí kó gba ìɖì-itsɛ́-Yúɖà#á, itsɛ́ yèé ó kɔ̀ dzɔ̀ɔ́, tsí lɔ ńǹɖìgbé‐ɛ̀#ɛ́.
26Ńbɛ̀ɛ́, à ɖìbò, tsí ká ma ɛnɛ yèé Ɔ̀ɖáyé tsã̀ náàŋírĩ-àŋa méèdzì#ɛ́. Tsí ìbò#ɛ́ mú Màtíyà, tsí à múu má adzítsɛ́-Yèésù máàwɔɔ̀kã̀ ŋa#á.
Currently Selected:
Itsɛ́ 1: ngl
Highlight
Share
Copy
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.
