Yòhánà 11

Làsárò kú, tsí Yèésù dzíi ti náàŋírĩ-òkú ŋa wá náyé

1Náànyì-bɛ́ɛ̀#ɛ́, ɔ̀nyà-kã̀ wà, tsí à náa kpèé ní Làsárò, tsí ó wà tsàkɔ̃̀rɔ̃̀. Làsárò#ɛ́ wà ńǹlú-Bètàní. Tsí ìɖá‐ɛ̀ ŋa gbo wà ńǹlú#ɛ́ bɛ̀ ké. À náa kpe ɔ̀kã̀ ní Màrítà, tsí kpe enìkéèdzì‐ɛ̀ ní Màríyà†. 2Màríyà#á ní dzɛ́ ɔnɔbɛ̃̀ɛ̃ yèé mú àɖɛ̃́ rṹrũ̀, tsí ń kpã́ ɛsɛ̀ fú Ɔlá-wa, tsí mú irɔ̃-éwo‐ɛ̀, tsí ń nɔ̀ɔ́#ɛ́. Tsí ɔmàná‐ɛ̀ gbo ní dzɛ́ Làsárò yèé wà tsàkɔ̃̀rɔ̃̀#ɛ́. 3Ńbɛ̀ɛ́, ìɖá‐ɛ̀ méèdzì ŋa#á rã́ ɔ̀nyà-kã̀ ní kó lɔ káà dzɛ́ fú Yèésù ní: Ɔlá-wa, ídza‐ɛ̀ yèé fɛ́ fúu lárè#ɛ́ wà tsàkɔ̃̀rɔ̃̀.

4Kíbí Yèésù gbɔ́ ikɔ̀#ɛ́, ó ní: Àrɔ̃̀-Làsárò#ɛ́, kò tsi àrɔ̃̀-ikú ni. Ó wà tsàkɔ̃̀rɔ̃̀, tsí kó ń nyɛ Ɔ̀ɖáyé ni. Tsí gbà ńǹtá-àrɔ̃̀ tɛ̀ɛ̀ ní ɔ̀nyà ŋa nákó rí ikpá-Ɔma bíbí-Ɔ̀ɖáyé#ɛ́.

5Màrítà òŋu Màríyà má nára-Làsárò, ìnàbí mɛ́ɛta nyɛ̀ŋɛ̀ ŋa#á, Yèésù náa nɛ́ àmúɖɔ̃̀ fú ŋa tó bɛ́ɛ̀. 6Tsí kíbí ó gbɔ́ ní kò wà sã̀ fú Làsárò#ɛ́, ó tɔ́ tse ɔdzɔ́ méèdzì ró ńbí ó wà#á 7tã́ná kó wáa wí fú ɔmatsɛ́‐ɛ̀ ŋa ní: Àŋa kó sɛ̃̀ lɔ nérè-Yùɖéyà.

8Kíbí ó wí bɛ́ɛ̀#ɛ́, ɔmatsɛ́‐ɛ̀ ŋa wà bèrèé ní: Akɔ́nɛ, nára-ɔdzɔ́ ŋa ní onùgbó-ɔma-Ìyúɖà† ŋa wò ní àŋa kó taá nóòkúta kpa bɛ̀#ɛ́, tsí ó wà wo kó sɛ̃̀ lɔ bɛ̀ róò?

9Tsí Yèésù wà wí fú ŋa ní: Aŋgo máàméèdzì ní wà ńnɔ́-òsã́-kã̀#á nɔ̀! Bí ɔ̀nyà-kã̀ wà rɛ̃̀ nóòsã́#á, kàkó kɔ ɛsɛ̀, iŋɛ́ yèé tse#ɛ́, ɔdzɔ́ wà má, tsí ó wà rírã kérékéré. 10Ó ɖi, bí ɔ̀nyà-kã̀ wà rɛ̃̀ nóoru#ɛ́, nákó kɔ ɛsɛ̀, iŋɛ́ yèé tse#ɛ́, ɔdzɔ́ kò wà má, tsí kó rírã kérékéré.

11Kíbí ó wí bɛ́ɛ̀ tã́#á, ó sɛ̃̀, tsí wà wí fú ŋa ní: Ídza-àŋa, Làsárò sɔ̃rũ lɔ si, òŋu nákó lɔ káà dzíi.

12Tsí ɔmatsɛ́‐ɛ̀ ŋa wà wí fúu ní: Ɔlá-wa, bí ó dzɛ́ ní orũ ní ó sũ̀#ɛ́, ni àrɔ̃̀#ɛ́ nákó tã́ fúu ńnɛ̀ɛ́ nɔ̀!

13Yèésù wà dzíkɔ̀-ikú-Làsárò fú ŋa ńnɛ̀ɛ́. Tsí àŋa òŋu, à kò gbɔ́ òkpì‐ɛ̀ bɛ́ɛ̀, tsí à ɖédzú kíbí à náa sɔ̃rũ lɔ bɛ́#ɛ́ gé ni. 14Ńbɛ̀ɛ́, Yèésù yaá fú ŋa gãgã ńǹkɛ̀ɛ́ ní: Làsárò kú. 15Ó ɖi, àtóorí-ŋa#á, ó ɖɔ̃̀ fú òŋu ní òŋu kò wà bɛ̀ tã́ná ó kú. Ikú‐ɛ̀#ɛ́ nákó tse tsí àŋa yèé dzɛ́ ɔmatsɛ́-òŋu ŋa#á, à nákó nɛ́ àkaralé si ńǹtá-òŋu rere ńǹkɛ̀ɛ́. Báàyí#ɛ́, àŋa kó ǹɖe, tsí àŋa kó lɔ ńɖɔ̀‐ɛ̀.

16Ɔmatsɛ́‐ɛ̀-kã̀ wà, tsí à náa kpèé ní Tòmá. Èdzìrɛ́ ní ó dzɛ́#ɛ́. Kíbí ó wí bɛ́ɛ̀#ɛ́, Tòmá#á wí fú enìkéèdzì‐ɛ̀ ŋa ní: Àŋa gbo, àŋa kó lɔ káà kú bá akɔ́nɛ-àŋa.

17Ńbɛ̀ɛ́, à ǹɖe, tsí dzì nɔ́ɔ̀nà-ìlú-Làsárò. Kíbí Yèésù tó#ɛ́, ó gbɔ́ ní à ri Làsárò, ó tó ɔdzɔ́ mɛ́ɛrɛ̃ ná. 18Ìlú-Bètàní#ɛ́, dzídzɛ̃̀‐ɛ̀ kò láre ìtsɛ́kòlò mɛ́ɛta fú ìlú-Yèrúsàlɛ́mì, 19tsí ɔma-Ìyúɖà ŋa kpíkpɔ̀ wá, tsí ká wáa rɛ Màrítà òŋu Màríyà kíbí ɔmànà-ŋa kú#ɛ́.

20Kíbí Màrítà gbɔ́ ní Yèésù bàa#á, ó ǹɖe, tsí fùɖá lɔ káà kpàɖé‐ɛ̀. Tsí Màríyà òŋu dzokó si ńnɔlé si. 21Tsí Màrítà tó ńɖi-Yèésù, tsí kpèé ní: Ɔlá-wa, ó ɖi, ó má tsi ó wà bí#ɛ́, ɔmànà-òŋu kàá kú. 22Òŋu mà ní báàyí#ɛ́, ìwèrè kò lɔ wòná. Bí ó bere Ɔ̀ɖáyé ńŋɛ́ ɔ̀kã̀lɔ́ɔ̀kã̀ kpó, nákó fúu ńnɛ̀.

23Tsí Yèésù wí fúu ní: Ɔmàná‐ɛ̀ nákó sɛ̃̀ dzí ti náàŋírĩ-òkú ŋa wá náyé.

24Tsí Màrítà gbo wí fúu ní: Òŋu mà ní nɔ́dzɔ́-ìtã̀ntã́#á, nɔ́dzɔ́ yèé òkú ŋa kpó nákó sɛ̃̀ dzí wá náyé#ɛ́, òŋu gbo nákó dzí wá.

25Tsí Yèésù sɛ̃̀ wà wí fúu ní: Òŋu ní náa fúnɛ náàyɛ̀#ɛ́. Òŋu ké ní náa dzí òkú ŋa gbo wá náyé#ɛ́. Ó ɖi, bí ɔ̀nyà-kã̀ gba òŋu gbɔ́, bí ɛnɛ nyɛ̀ŋɛ̀ kú gìɖì gbo, nákó sɛ̃̀ dzí ti náàŋírĩ-òkú ŋa wá náyé. 26Tsí ɔ̀nyà ɔ̀kã̀lɔ́ɔ̀kã̀ kpó yèé wà náàyɛ̀ si báàyí#ɛ́, bí ɔ̀nyà-kã̀ gba òŋu gbɔ́, ɛnɛ nyɛ̀ŋɛ̀ kàkó kú láyé. Ó gbàá gbɔ́ bɛ́ɛ̀ɛ̀?

27Tsí Màrítà ní: Ɛ̃ɛ̃! Ó ɖi, òŋu gbàá gbɔ́ ní òŋu ní dzɛ́ Kírísítò, Ɔma bíbí-Ɔ̀ɖáyé#ɛ́. Òŋu ní dzɛ́ Ɛnɛ yèé Ɔ̀ɖáyé tsã̀ ní òŋu kó bɛ̀ wá ńǹtalɛ̀ bí#ɛ́.

28Kíbí ó wí bɛ́ɛ̀ tã́#á, ó lɔ ńlé ńɖi-ɔmàná‐ɛ̀, Màríyà, tsí káà ɖìkpá fúu ní: Akɔ́nɛ wá, tsí wà kpèé ní kó wá.

29Kíbí Màríyà gbɔ́ bɛ́ɛ̀#ɛ́, ó ǹɖe gbàrà, tsí dzì nɔ́ɔ̀nà-ìɖì-Yèésù. 30Ńǹwèrè nyɛ̀ŋɛ̀#ɛ́, Yèésù kò wɔ̀ ńnɔ́-ìlú#ɛ́ wòná. Ó wà ńbí ó wà si, tsí Màrítà káà kpàɖé‐ɛ̀#ɛ́ ni. 31Kíbí Màríyà ǹɖe gbàrà bɛ́ɛ̀#ɛ́, ɔma-Ìyúɖà yèé wà ńnɔlé ńɖɔ̀‐ɛ̀, tsí wà rɛ̀ɛ́ ŋa#á, à ɖédzú ó làkóò néèkpò#ɛ́, tsí kó káà sɔkṹ ni, tsí à tɛ̀ náànyì‐ɛ̀.

32Ńbɛ̀ɛ́, Màríyà káà tó ńbí Yèésù wà#á. Kíbí ó rí Yèésù#ɛ́, ó káà kálɛ̀ nábɛ́‐ɛ̀, tsí wà wí fúu ní: Ɔlá-wa, ó má tsi ó wà bí#ɛ́, ɔmànà-òŋu kàá kú.

33Kíbí Yèésù rí ní ó wà sɔkṹ, tsí ɔma-Ìyúɖà yèé tɛ̀ náànyì‐ɛ̀ ŋa gbo wà sɔkṹ báa#á, inɔ́ wóo tsùtsùtsù, 34tsí ó wà bèrè ŋá ní: Ńbisí à rìí si?

Tsí à wí fúu ní: Ɔlá-wa, ó ɖi, kó wá, tsí kó wáa rí.

35Tsí Yèésù dzì nɔ́kṹ. 36Kíbí ɔma-Ìyúɖà ŋa#á ríi, tsí ó wà sɔkṹ#ɛ́, à ní: È rí gé! Ó nɛ́ àmúɖɔ̃̀ fúu ìɖéǹɖè.

37Tsí ɔ̀nyà kã̀ŋa náàŋírĩ-ŋa wà fɔ̀ ní: Ó tsí odzú fú afɔ́dzú nɔ̀! Tsí kò nyáa tse tsí Làsárò kó máa kúù?

38Tsí inɔ́ tɔ́ wó Yèésù ró tsúù, tsí ó káà tó néèkpò#ɛ́. À ɖɛ̃ inɔ́-òkúta, tsí ri Làsárò ńnɛ̀ ni. Tsí à mú òkúta lákṹ tsítsédzú-kã̀, tsí ń ɖí arũ‐ɛ̀. 39Ńbɛ̀ɛ́, Yèésù wí fú ŋa ní ká rí òkúta#á ǹɖe nárũ-ifò#ɛ́.

Tsí Màrítà, ìɖá-òkú#ɛ́ wà wí fúu ní: Ɔlá-mi, nákó ti wà rũ̀ ná. Ó ɖi, ɔdzɔ́ mɛ́ɛrɛ̃ báàyí ní à ti rìí#ɛ́.

40Tsí Yèésù wà wí fúu ní: Òŋu kò ti wí fúu ní fee, bí ó gba òŋu gbɔ́, nákó rí lílákṹ-Ɔ̀ɖáyéè?

41Ńbɛ̀ɛ́, à rí òkúta#á ǹɖe. Tsí Yèésù kɛ́ odzú lɔ ńǹgbèrí, tsí ní: Ɔ̀ɖáyé Boba, ǹ wà kíɛ ní ò gbɔ́ ìre wúwú-mi. 42Ǹ mà ní nà rɛ̃tígbè-ìre wúwú-mi ńǹwèrè ɔ̀kã̀lɔ́ɔ̀kã̀ kpó. Ó ɖi, ǹ wà fɔ̀ɔ́, àtsùgbée ɛnɛ yèé wà ńɖɔ̀-mi bí ŋa#á ká nɛ́ àkaralé ní ìwɔ ní bɛ̀ mí wá#á.

43Kíbí ó wúùre bɛ́ɛ̀ tã́#á, ó ɖúgbe kũkũ ní: Làsárò, fùɖá!

44Tsí òkú#ɛ́ fùɖá kíbí à tseé gbà tã́ná rìí#ɛ́. À mú atsɔ lákṹ-kã̀ bò fúu kútúkútú, tsí mú ɔ̀dzá ŋa, tsí ń ɖi akpá‐ɛ̀ òŋu ɛsɛ̀-ŋa. Tsí à mú ɔ̀dzá-kã̀ gbo, tsí ń ɖi ɛ̀ŋgbã̀ fúu. Ńbɛ̀ɛ́, Yèésù wí fú ɛnɛ yèé wà bɛ̀ ŋa#á ní: Ká tú iŋɛ́ ŋa#á nára‐ɛ̀, tsí ká kɔ̀ɔ́ dzɔ̀ɔ́, tsí kó lɔ.

À mú arũ ɖé si ńǹtá-Yèésù

(Màtéwò 26:1-5; Mákò 14:1-2; Lúkà 22:1-2)

45Ńbɛ̀ɛ́, ɔma-Ìyúɖà† kpíkpɔ̀ ro Màríyà† lɔ nérì#ɛ́, tsí rí iŋɛ́ yèé Yèésù tse nyɛ̀ŋɛ̀#ɛ́. Tsí náàŋírĩ-ŋa#á, ɔ̀nyà kpíkpɔ̀ gbàá gbɔ́. 46Tsí ɔ̀nyà kã̀ŋa gbo ǹɖe lɔ káà rí ɔma-ɛgbɛ́-Fàrísì† ŋa, tsí wí iŋɛ́ yèé Yèésù tse#ɛ́ fú ŋa.

47Ńbɛ̀ɛ́, onùgbó-atsɛbɔ-Ɔ̀ɖáyé† ŋa òŋu ɔma-ɛgbɛ́-Fàrísì ŋa, à kpe ɛgbɛ́-àkpɛ̀dzɔ́-ɔma-Ìyúɖà ŋa† dzokó, tsí wà wí fú ŋa ní: Idza#á wà tse iŋɛ́-àwùsì ŋa kpíkpɔ̀. Kí wà ní àŋa kó tse báàyí? 48Bí àŋa kɔ̀ɔ́ dzɔ̀ɔ́, tsí ó wà ńnɛ̀ si làkóò#ɛ́, ɔ̀nyà kpó nákó gbàá gbɔ́. Tsí ɛnɛ-Rómà† ŋa nákó wáa fɔ́ ilé-Ɔ̀ɖáyé†-àŋa, tsí fɔ́ ìlú-àŋa gbo.

49Ɔ̀nyà-kã̀ wà náàŋírĩ-ŋa, tsí à náa kpèé ní Kàyáfà. Òŋu ní dzɛ́ ɔ̀gã́-atsɛbɔ-Ɔ̀ɖáyé ŋa† nɔ́ɖɔ̃́ nyɛ̀ŋɛ̀#ɛ́. Tsí ó ǹɖe, tsí wà wí fú ŋa ní: À kò wà gbɔ́ òkpì-iŋɛ́-kã̀ kpókpó ni. 50Ó ɖi, kò yé ŋa ní ɔ̀nyà ɔ̀kã̀ntso kó kú fú ɔ̀nyà kpó, tsí ìlú-ɔma-Ìyúɖà ŋa kpó kó máa ra#á, sã̀ lárèè?

51Afɔ̀ nyɛ̀ŋɛ̀#ɛ́, kò ti ńǹsérè tòŋu ká‐ɛ̀. Kíbí ó dzɛ́ ɔ̀gã́-atsɛbɔ-Ɔ̀ɖáyé ŋa nɔ́ɖɔ̃́ nyɛ̀ŋɛ̀#ɛ́ ní tse tsí ó wà gba afɔ̀-Ɔ̀ɖáyé fɔ̀ fú ŋa#á. Tsí ó ní: “Ó wà ní Yèésù kó kú fú ɔma-Ìyúɖà ŋa”. 52Tsí kò tsi ɔma-Ìyúɖà ŋa sɔ̃́ŋú ní ó wà ní Yèésù kó kú fú#ɛ́. Ó wà ní kó kú, tsí Ɔ̀ɖáyé kó kpérí ɔma‐ɛ̀ ŋa yèé túùnkã́ wérí#ɛ́, tsí ń tse ɔ̀kã̀ntso.

53Ti nɔ́dzɔ́ yèé Kàyáfà wí afɔ̀ nyɛ̀ŋɛ̀ fú ŋa#á, ó tã́ ńnɔ́-onùgbó-ɔma-Ìyúɖà ŋa ní àŋa kó kpa Yèésù gé ni. 54Ti nára-bɛ́ɛ̀#ɛ́, Yèésù gbo kò tɔ́ wà mú ara‐ɛ̀ si ńgbaŋgba nódzú-onùgbó-ɔma-Ìyúɖà ŋa ró. Tsí ó ǹɖe lɔ ńǹlú-kã̀. À náa kpe ìlú#ɛ́ ní Èfìrámì, tsí ó wà nérè-kã̀ sɔ́má-ɔ̀ɖã̀. Tsí òŋu ɔmatsɛ́‐ɛ̀ ŋa gbé bɛ̀ si.

55Ńbɛ̀ɛ́, ìwèrè sɔ́má, tsí ɔma-Ìyúɖà ŋa kó dzɛ́ ɔɖɔ̃́-Àɖádzɔ̀ɔ́† ró. Tsí ɔ̀nyà kpíkpɔ̀ wà ǹɖe ńǹlú‐ɛ̀, tsí wà lɔ ńYèrúsàlɛ́mì, tsí kó káà gba àfárá tã́ná ɔɖɔ̃́#ɛ́ kó tó. 56Báàyí#ɛ́, à wà wo Yèésù. Tsí kíbí à wà nɔ́gbà-ilé-Ɔ̀ɖáyé si#ɛ́, à wà bere ara-ŋa ní: Ìsérè mɛ̀ɛ́ àŋa wà tse báàyí? Nákó wá nɔ́ɖɔ̃́#ɛ́ nàmí kàkó wá? 57Onùgbó-atsɛbɔ-Ɔ̀ɖáyé ŋa òŋu ɔma-ɛgbɛ́-Fàrísì ŋa ti wí fú ɔ̀nyà ŋa ní: Bí ɔ̀nyà-kã̀ ma ńbí Yèésù wà#á ní kó wáa wí fú àŋa, tsí ká káà múu.

Currently Selected:

Yòhánà 11: ngl

Highlight

Copy