Lúkà 15

Yèésù mú àgùɖã̀-kã̀ yèé yagbo#ɛ́, tsí ń kpòwe fú ɔ̀nyà ŋa

(Màtéwò 18:12-14)

1Agbalómbà ŋa kpó òŋu olòmírɛ̃̀ yèé ŋa kà nyɛ̀wɔ̀-Ɔ̀ɖáyé#ɛ́, à náa wà wá ńɖi-Yèésù, tsí wà rɛ̃tígbè-afɔ̀‐ɛ̀. 2Tsí ɔma-ɛgbɛ́-Fàrísì† ŋa òŋu akɔ́nɛ nɛ́kpa-Ɔ̀ɖáyé† ŋa náa wà kpɔ̀kɔ̃̀ɔ̃́rɔ̃̀ ní: Idza#á dzɛ́, tsí wà gba ɔ̀nyà-ìrɔ́ nyɛ̀ŋɛ̀ ŋa, tsí wà dzɛŋɛ́ bá ŋa gìɖì gbo náa!

3Tsí Yèésù wà kpòwe fú ŋa ní: 4Ká fɔ̀ ní ɔ̀nyà-kã̀ wà náàŋírĩ-ŋa, tsí nɛ́ àgùɖã̀ ɔgɔ́ɔrú, tsí ɔ̀kã̀ nɔ̀ ńnɛ̀ fúu. Ɛnɛ nyɛ̀ŋɛ̀ kàkó kɔ ɔ̀kã̀ ɖí nɔ́gɔ́ɔrú yèé bɔ̀#ɛ́ dzɔ̀ɔ́ si ńǹɖì-dzídzɛ-ŋa, tsí lɔ ńǹwálɛ̀-ɔ̀kã̀ yèé nɔ̀#ɛ́ títí fú ìwèrè yèé nákó káà ríi#ɛ́ɛ̀? Nákó wòó bɛ́ɛ̀ nɔ̀! 5Tsí bí ó ríi ńǹkɛ̀ɛ́#ɛ́, nákó ɖɔ̃̀ fúu, tsí nákó kɛ́ɛ si nɔ́ɔ̀gɔ̃̀rɔ̃̀, 6tsí nákó sɛ̃̀ bɔ̀ wá ńlé. Bí ó tó ńlé#ɛ́, nákó kpe ídza‐ɛ̀ ŋa òŋu enìkéèdzì‐ɛ̀ ŋa ní: Ká wáa táyè bá òŋu! Ó ɖi, àgùɖã̀-òŋu yèé nɔ̀#ɛ́, òŋu ríi.

7Tsí òŋu wà wí fú ŋa ní fee, bí adzàbi ɔ̀kã̀ntso nyíìlò kpaɖà#á, bɛ́ɛ̀ ké ní à nákó táyè ńɖi-Ɔ̀ɖáyé nɔ́ɔ̀rɔ̃ náàtsùgbée tɛ̀ɛ̀#ɛ́. À nákó táyè nára‐ɛ̀ láre ɔ̀nyà-kã̀ ɖí nɔ́gɔ́ɔrú yèé ŋa ní àŋa dzɛ́ atsòtítɔ́, tsí kò bèrè ní àŋa kó nyíìlò kpaɖà ró#ɛ́.

8Tsí ó wà wí fú ŋa ró ní: Ká fɔ̀ ní ɔnɔbɛ̃̀ɛ̃-kã̀ gbo wà, tsí owó-ɛyɔ maá wà nɔ́wɔ́‐ɛ̀, tsí ɔ̀kã̀ nɔ̀ ńnɛ̀ fúu. Òŋu gbo nákó ǹɖe, tsí kpée wíwò nɔ̀! Nákó tɔ́ kanɖé, tsí gbá ilé‐ɛ̀ kpó rere, tsí wòó nódzú-ìkpã́ títí ríi. 9Tsí bí ó ríi ńǹkɛ̀ɛ́#ɛ́, nákó kpe ɔ̀rɛ́‐ɛ̀ ŋa òŋu enìkéèdzì‐ɛ̀ ŋa, tsí nákó wí fú ŋa ní: Ká wáa táyè bá òŋu! Ó ɖi, owó-òŋu yèé nɔ̀#ɛ́, òŋu ríi.

10Tsí Yèésù wà wí fú ŋa ní: Òŋu wà wí fú ŋa ní fee, bí adzàbi ɔ̀kã̀ntso nyíìlò kpaɖà#á, bɛ́ɛ̀ ké ní ayè náa tɛ́ adzítsɛ́-ɔ̀rɔ̃† ŋa nɔ́ɔ̀rɔ̃ nára-ɛnɛ nyɛ̀ŋɛ̀#ɛ́ ńnɛ̀ɛ́.

Ɔma-kã̀ sɛ̃̀ bɔ̀ wá, tsí boba‐ɛ̀ gbàá òŋu ayè títɛ́

11Tsí ó wà kpòwe-kã̀ fú ŋa ró ní: Ɔ̀nyà-kã̀ wà, tsí ó bíma ɔnɔkɛ̃̀ɛ̃ méèdzì. 12Tsí àbíkã́ã̀nyì‐ɛ̀ ǹɖe, tsí wà wí fúu ní: Boba, kpɛ̃́ ogú-wa fú wa, tsí o kɛ́ akpálà tèmi fú mi gbòkã́!

Tsí ó dzɛ́, tsí kpɛ̃́ iŋɛ́ ŋa#á ńǹɖì-méèdzì, tsí kɛ́ akpálà tɛ̀ɛ̀ fúu. 13Títí kó tse ɔdzɔ́ oɖé#ɛ́, àbíkã́ã̀nyì#ɛ́ wáa ǹɖe, tsí ta iŋɛ́ ŋa#á kpó, tsí kpaɖí owó‐ɛ̀ kpó, tsí lɔ ńǹlú dzídzɛ̃̀-kã̀. Kíbí ó tó ńbɛ̀#ɛ́, ó káà ná owó‐ɛ̀#ɛ́ nyafãrĩ́ nyafãrĩ́ náàrìmáa tsèsérè nára‐ɛ̀ gìɖì. Tsí iŋɛ́ yèé ɖé fúu gé#ɛ́ ní náa wà tse#ɛ́. 14Tsí kíbí ó ná owó‐ɛ̀#ɛ́ tã́ kpó bɛ́ɛ̀#ɛ́, ebi lákṹ-kã̀ wáa kpé dzídzà ńǹlú#ɛ́, tsí iŋɛ́ ŋa kpée híhã́.

15Tsí ó wáa ǹɖe, tsí lɔ káà bá ɔ̀nyà-ìlú#ɛ́-kã̀, tsí ɛnɛ nyɛ̀ŋɛ̀ gbàá si ní kó wà ɖe ɔ̀hà ŋa ńǹtá-oko-kã̀ fú òŋu. 16Kíbí ó wà ɖe ɔ̀hà ŋa#á, ebi náa wà kpaá títí náa wò ní òŋu má dzɛ dzídzɛ-ɔ̀hà ŋa#á gìɖì. Ó ɖi, ɔ̀nyà-kã̀ kpókpó kà fúu ńnɛ̀.

17Kíbí iŋɛ́ ŋa#á wà lɔ bɛ́ɛ̀#ɛ́, ó lɔ ńǹsérè-ara‐ɛ̀, tsí ó rí ní àtsìtsɛ́-boba-òŋu ŋa, à náa dzɛŋɛ́ títí dzɛ bɔ̀, tã́ná òŋu wà bí si, tsí ebi-inɔ́ wà kpa òŋu tó bɛ́ɛ̀? 18Tsí ó wà fɔ̀ ńnɔ́-ara‐ɛ̀ ní: Òŋu kó tédzú ǹɖe lɔ ńɖi-boba-òŋu, tsí òŋu kó lɔ káà wí fúu ní: Boba, ǹ dzàbi-Ɔ̀ɖáyé, tsí tse kò sã̀ nára-ìwɔ gbo. 19Ǹ kò dzɔ o kpè mí ní ɔma‐ɛ̀ɛ ró. Nà gbà mí si náàŋírĩ-àtsìtsɛ́-ɛ̀ɛ ŋa gé!

20Tsí ó ǹɖe, tsí dzì nɔ́ɔ̀nà-ìɖì-boba‐ɛ̀. Kíbí ó làkóò#ɛ́, boba‐ɛ̀ ti ríi nóòtèrè, tsí inɔ́‐ɛ̀ nyɔ́ɔ, tsí ó ǹɖe kpàtàkpàtà gé, tsí yáré lɔ káà kpàɖé‐ɛ̀, tsí fɔ̃́ɔ̃ gbàrà. 21Tsí ó tsí arũ, tsí wà wí fú boba‐ɛ̀ ní: Boba, ǹ dzàbi-Ɔ̀ɖáyé, tsí tse kò sã̀ nára-ìwɔ gbo, tsí ǹ kò dzɔ o kpè mí ní ɔma-ɛ̀ɛ gbo ró.

22Tsí boba‐ɛ̀ wí fú àtsìtsɛ́‐ɛ̀ ŋa ní: Kóyá fú ŋa! Ká lɔ káà kɛ́ ìwɔ̀ra yèé tsàfɛ́ŋú lárè#ɛ́, tsí ká wáa ń wɔ̀ fúu, tsí ká mú kabɔ́rɔ́ bɔ̀ nɔ́wɔ́‐ɛ̀, tsí ká mú kpákò gbo bɔ̀ fúu! 23Tsí ká kɛ́ lalá yèé ara‐ɛ̀ kɔ̃́ ɖíɖíɖí si#ɛ́, tsí ká kpaá, tsí àŋa kó ń táyè fúu! 24Ó ɖi, ɔma-òŋu yèé à wà rí bí#ɛ́, ó wà kíbí ó kú lɔ, tsí sɛ̃̀ dzí wá náyé#ɛ́ bɛ́ ni. Ó nɔ̀ lɔ, tsí òŋu tàrèé ni.

Tsí à kpé ayè títɛ́#ɛ́ si ńnɛ̀.

25Náàsòkò nyɛ̀ŋɛ̀#ɛ́, àtsɛ̀rɛ̀bí‐ɛ̀ òŋu wà nóko si, tsí kíbí ó bɔ̀ bàa, tsí sɔ́má-ilé#ɛ́, ó wà gbɔ́ kíbí ɔ̀nyà ŋa wà kɔ̃rĩ, tsí wà dzó#ɛ́. 26Tsí ó kpe àtsìtsɛ́-boba‐ɛ̀ ŋa-kã̀, tsí wà bèrèé ní: Kí tse tsí à wà dzó bɛ́ɛ̀ ná?

27Tsí àtsìtsɛ́#ɛ́ wà wí fúu ní: Ɔmàná‐ɛ̀ ní sɛ̃̀ bɔ̀ wá#á, tsí kíbí boba‐ɛ̀ ríi nára líle#ɛ́, ó kɛ́ lalá yèé ara‐ɛ̀ kɔ̃́ ɖíɖíɖí si#ɛ́, tsí ń kpa fúu.

28Kíbí ó gbɔ́ bɛ́ɛ̀#ɛ́, inɔ́ bíi títí ó kɔ̀ ní òŋu kàkó wɔ̀ ńkpàtá#á. Tsí boba‐ɛ̀ gbɔ́, tsí fùɖá wá ńɖɔ̀‐ɛ̀, tsí wáa tsìkálɛ̀ fúu ní kó wá ńlé. 29Tsí ó wà wí fú boba‐ɛ̀ ní: Kó rí! Òŋu wà tsitsɛ́ fúu báàyí ɔɖɔ̃́‐ɛ̀ ti kpɔ̀, tsí òŋu kò kɔ itsɛ́ gbo fúu wòrí. Tsí kò sì fú òŋu nɔ́ma-abó-kã̀ gìɖì gbo wòrí ní òŋu kó ń táyè bá ídza-òŋu ŋa. 30Ó ɖi, yèé ɔma‐ɛ̀ òŋu wá#á, ɔma‐ɛ̀ yèé kɛ́ iŋɛ́‐ɛ̀ ŋa, tsí káà ń kpɛ̃́ fú àlòwá ŋa#á, òŋu ní ó nyáa kpa lalá yèé ara‐ɛ̀ kɔ̃́ ɖíɖíɖí si#ɛ́ fú#ɛ́.

31Tsí boba‐ɛ̀ ní: Ɔma-mi, ò wà ńɖɔ̀-mi si ńǹwèrè ɔ̀kã̀lɔ́ɔ̀kã̀ kpó, tsí iŋɛ́ yèé ŋa kpó wà fú mi#ɛ́ dzɛ́ tɛ̀ɛ ni nɔ̀! 32Báàyí#ɛ́, ó wà ní ayè kó tɛ́ wa, tsí àa kó dzɛ ɔɖɔ̃́, iŋɛ́ yèé tse#ɛ́, ɔmànà-ɛ̀ɛ yèé bɛ́#ɛ́, ó wà kíbí ó kú lɔ, tsí sɛ̃̀ dzí wá bɛ́. Ó nɔ̀, tsí ǹ sɛ̃̀ tàrèé ni.

Currently Selected:

Lúkà 15: ngl

Highlight

Copy