Màtéwò 16

Ɔma-ɛgbɛ́-Fàrísì ŋa òŋu ɔma-ɛgbɛ́-Sàɖùké ŋa bere Yèésù ní kó tse iŋɛ́-àwùsì-kã̀ fú àŋa

(Mákò 8:11-13; Lúkà 12:54-56)

1Ɔma-ɛgbɛ́-Fàrísì† ŋa òŋu ɔma-ɛgbɛ́-Sàɖùké† ŋa wà wo ká sɔ ɔ̀kpákù fú Yèésù, tsí à sɔ́ tìmá‐ɛ̀, tsí bèrèé ní: Kó tse iŋɛ́-àwùsì-kã̀ fú àŋa, tsí kó ń nyà ɖíre ní Ɔ̀ɖáyé ní bɛ̀ɛ́ wá#á.

2Tsí Yèésù wà dzɔ́ŋù fú ŋa ní: Náalɛ́-kã̀, bí ìgbèrí kpã́ si hòò, à náa fɔ̀ ní odzúùrɔ̃̀ nákó rã̀ rere nɔ́ɔla, 3tsí bí náàwúrɔ̀-kã̀ ìgbèrí kpã́ si tsɔ̀ɔ̀, à náa fɔ̀ ní òdzò nákó rɔ̀ nɔ́mbɛ́. À náa rí ìwànwà-ìgbèrí mà bɛ́ɛ̀, tsí à kò nyáa wà gbɔ́ òkpì-iŋɛ́ yèé ŋa wà tse báàyí#ɛ́. 4Ɔma-ìsɛ̃̀ɛ̃́ ŋa yàábàɖí, tsí à kò wà tɛ̀ náànyì-Ɔ̀ɖáyé gbo òŋu òtítɔ́, tsí à wà bèrè ní ká tse iŋɛ́-àwùsì-kã̀ fú àŋa. Ó ɖi, à kàkó tse iŋɛ́-àwùsì-kã̀ kpókpó fú ŋa náànyì yèé Yónà agbáfɔ̀-Ɔ̀ɖáyé fɔ̀† tse fú ŋa#á.

Ńbɛ̀ɛ́, Yèésù ǹɖe kɔ̀ ŋá dzɔ̀ɔ́, tsí lɔ.

Yèésù wà wíìnyɛ̀ ti nára-ɔ̀tsɛ̃̀-ɔma-ɛgbɛ́-Fàrísì ŋa òŋu ti ɔma-ɛgbɛ́-Sàɖùké ŋa

(Mákò 8:14-21)

5Ɔmatsɛ́-Yèésù† ŋa kadzá lɔ náàtàkè-èkéèdzì-oɖò#ɛ́. Ó ɖi, à gbàgbé, tsí à kò banɛ́ kpɔ̃́nɔ́. 6Tsí Yèésù fɔ̀ fú ŋa ní: Ká wà tsɔ́ éwo-ara-ŋa rere ti nára-ɔ̀tsɛ̃̀-ɔma-ɛgbɛ́-Fàrísì† ŋa òŋu ti ɔma-ɛgbɛ́-Sàɖùké† ŋa. 7Tsí ɔmatsɛ́ ŋa#á wà fɔ̀ náàŋírĩ-ara-ŋa ní: Ó fɔ̀ bɛ́ɛ̀, iŋɛ́ yèé tse#ɛ́, àŋa kò banɛ́ kpɔ̃́nɔ́. 8Ó ɖi, Yèésù ma ìsérè-ŋa, tsí ó wà bèrè ŋá ní: Àkaralé-ŋa kò wɔlɛ̀ niì? Kí tse tsí à wà fɔ̀ náàŋírĩ-ara-ŋa ní àŋa kò banɛ́ kpɔ̃́nɔ́ ná? 9Kò wà yé ŋa wòná niì? À gbàgbé kpɔ̃́nɔ́ mɛ́ɛrú yèé à kpɛ̃́ fú ɔ̀nyà ɛgbɛ̀rú lé nɛ́gbàá ɛgbàá ɔ̀nà méèdzì (5.000) ɛ́ɛ̀? Òŋu agbã̀ mɛ́ɛló yèé àbùbɔ̀-kpɔ̃́nɔ́ ŋa#á kɔ̃́, tsí à kɛ́ lɔ#ɛ́ɛ̀? 10Tsí à gbàgbé kpɔ̃́nɔ́ méedze yèé gbo à kpɛ̃́ fú ɔ̀nyà ɛgbàá ɛgbàá ɔ̀nà méèdzì (4.000), tsí à dzɛ#ɛ́ɛ̀? Tsí agbã̀ mɛ́ɛló yèé àbùbɔ̀-kpɔ̃́nɔ́ ŋa#á kɔ̃́, tsí à kɛ́ lɔ gbo#ɛ́ fe, à gbàgbéè? 11Tsí kíbí òŋu wà fɔ̀ ní: Ká tsɔ́ éwo-ara-ŋa rere ti nára-ɔ̀tsɛ̃̀-ɔma-ɛgbɛ́-Fàrísì ŋa òŋu ti ɔma-ɛgbɛ́-Sàɖùké ŋa#á fe, à kò gbɔ́ òkpì‐ɛ̀ ní òŋu kò wà fɔ afɔ̀-kpɔ̃́nɔ́ɔ̀?

12Ńbɛ̀ɛ́, ɔmatsɛ́-Yèésù ŋa gbɔ́ òkpì‐ɛ̀ ńǹkɛ̀ɛ́ ní kò tsi àŋa kó tsɔ́ éwo-ara-àŋa rere ti nára-ɔ̀tsɛ̃̀-kpɔ̃́nɔ́ ni. Ó ɖi, ká tsɔ́ éwo-ara-ŋa rere ti nára-ɛ̀kɔ́-ɔma-ɛgbɛ́-Fàrísì ŋa òŋu ti ɔma-ɛgbɛ́-Sàɖùké ŋa ni.

Òkúta fɔ ɛnɛ yèé Yèésù dzɛ́#ɛ́ nódzú-ɔ̀nyà kpó

(Mákò 8:27-30; Lúkà 9:18-21)

13Yèésù káà tó nérè-Kèsàré ti Fìlíkpò, tsí ó wà bere ɔmatsɛ́‐ɛ̀ ŋa ní: Afɔ̀ mɛ̀ɛ́ ɔ̀nyà ŋa wà wí ti nára-òŋu, Ɛnɛ yèé ɔ̀nyà bí#ɛ́† ná?

14Tsí à dzɔ́ŋù fúu ní: Ɔ̀nyà kã̀ŋa ní ó dzɛ́ Yòhánà† Awɛ̀fúnɛ. Ɔ̀nyà kã̀ŋa gbo ní ó dzɛ́ Èlíyà†, agbáfɔ̀-Ɔ̀ɖáyé fɔ̀† yèé gbé wáa lɔ dzɔ̀ɔ́ dzɔ̀ɔ́#ɛ́. Tsí ɔ̀nyà kùbɔ̀ ŋa gbo wà fɔ̀ ró ní ó dzɛ́ Yèrèmíyà† nàmí agbáfɔ̀-Ɔ̀ɖáyé fɔ̀ ti dzɔ̀ɔ́ dzɔ̀ɔ́ òmírɛ̃̀-kã̀.

15Tsí Yèésù ní: Tsí nódzú tàŋa òŋu fe, nɛ̀ɛ́ òŋu dzɛ́?

16Tsí Sìmɔ́nì Òkúta tsí arũ, tsí dzɔ́ŋù fúu ní: Òŋu ní dzɛ́ Kírísítò Agbanɛlà yèé Ɔ̀ɖáyé tsã̀, tsí bɛ̀ wá#á. Tsí ó dzɛ́ Ɔma bíbí-Ɔ̀ɖáyé Oláàyɛ̀ gbo.

17Tsí Yèésù tsí arũ ńǹkɛ̀ɛ́, tsí wà fɔ̀ fúu ní: Sìmɔ́nì ɔma-Yónà, ò wɛ éwo-ire. Iŋɛ́ yèé tse#ɛ́, kò tsi ɔ̀nyà ní ń si ńǹsérè fɛ́ɛ#ɛ́, Ɔ̀ɖáyé Boba-òŋu nɔ́ɔ̀rɔ̃ ni. 18Ó ɖi, òŋu wà wí fúu ní fee: Ó dzɛ́ Òkúta, tsí ńǹtá-òkúta#á ní òŋu nákó tsí ɛgbɛ́-òŋu si#ɛ́. Tsí ikú kàkó nɛ́kpá si ńǹtá‐ɛ̀. 19Tsí òŋu nákó mú ikpá bɔwɔ́‐ɛ̀, tsí kó ń gbɛ̃́ ɛnɛ yèé Ɔ̀ɖáyé wà dzoyè si ńǹtá-ŋa#á. Tsí iŋɛ́ yèé nákó kɔ̀ ńǹtalɛ̀ bí#ɛ́, à nákó kɔ̀ɔ́ nɔ́ɔ̀rɔ̃ gbo. Tsí iŋɛ́ yèé nákó gbà si ńǹtá‐ɛ̀ ńǹtalɛ̀ bí#ɛ́, à nákó gbà si ńǹtá‐ɛ̀ nɔ́ɔ̀rɔ̃ gbo. 20Tsí ó fɔ̀, tsí le oŋù si ńǹtá‐ɛ̀ fú ɔmatsɛ́‐ɛ̀ ŋa ní ká máa fɔ̀ fú ɔ̀nyà-kã̀ ní òŋu ní dzɛ́ Kírísítò#ɛ́ oo.

Yèésù ní òŋu nákó kú, tsí sɛ̃̀ dzí ti náàŋírĩ-òkú ŋa wá náyé

(Mákò 8:31–9:1; Lúkà 9:22)

21Ti ńǹwèrè nyɛ̀ŋɛ̀#ɛ́, Yèésù wà fɔ̀ fú ɔmatsɛ́‐ɛ̀ ŋa gãgã ní: Ó wà ní òŋu kó lɔ ńYèrúsàlɛ́mì, tsí òŋu kó réré kpíkpɔ̀ nɔ́wɔ́-onùgbó-ìlú#ɛ́ ŋa òŋu onùgbó-atsɛbɔ-Ɔ̀ɖáyé† ŋa má nára-akɔ́nɛ nɛ́kpa-Ɔ̀ɖáyé† ŋa, tsí ká sɔ́ òŋu fú ikú, tsí ká kpa òŋu, tsí nɔ́dzɔ́-ɛ̀kɛ́ɛta‐ɛ̀, òŋu nákó sɛ̃̀ dzí ti náàŋírĩ-òkú ŋa wá náyé.

22Tsí Òkúta kpèé si nákpálà-kã̀, tsí wà báa fɔ̀, tsí ní: Ɔ̀gá! Ɔ̀ɖáyé kó máa dzɛ́, tsí iŋɛ́-ìrɔ́ nyɛ̀ŋɛ̀ kó báɛ.

23Tsí Yèésù nyí, tsí fɔ̀ fú Òkúta ní: Kó sɔ́ ǹɖe nódzú fú òŋu! Ètsù† olí-Ètsù! Ó ɖi, ó dzɛ́ Ètsù náànyì-òŋu. Ìsérè yèé wà fúu#ɛ́, kò tsi ìsérè ti Ɔ̀ɖáyé ni, ìsérè ti ɔ̀nyà ni.

24Ńbɛ̀ɛ́, Yèésù fɔ̀ fú ɔmatsɛ́‐ɛ̀ ŋa ní: Bí ɔ̀nyà-kã̀ wà wo kó tɛ̀ náànyì-òŋu, ɛnɛ nyɛ̀ŋɛ̀ kó máa nyíwo ara‐ɛ̀. Kó kɛ́ egi-ìɖáàgàlàdzà†‐ɛ̀ rù, tsí kó tɛ̀ náànyì-òŋu. 25Ó ɖi fee, ɛnɛ yèé wà wò ní òŋu kó gba ara-òŋu là, ɛnɛ nyɛ̀ŋɛ̀ nákó tsɛ̀rá. Tsí ɛnɛ yèé mú ikú‐ɛ̀ tà náàtsùgbé-òŋu#ɛ́, àyɛ̀ nákó sɛ̃̀ tɛ ɔwɔ́-ɛ̀. 26Bí ɔ̀nyà-kã̀ ɖìgírí títí iŋɛ́-ayé gbaŋgba ŋa#á kpó dzɛ́ tɛ̀ɛ̀, tsí òŋu ká‐ɛ̀ mú éwo sã fe, èrè mɛ̀ɛ́ wà ńnɛ̀ fúu? Nàmí kí ɔ̀nyà nákó nyáa kɛ́, tsí ń kparɔ àyɛ̀‐ɛ̀? 27Ó ɖi, nɔ́dzɔ́ yèé òŋu, Ɛnɛ yèé ɔ̀nyà bí#ɛ́, òŋu nákó ti nɔ́ɔ̀rɔ̃ wá bá adzítsɛ́-ɔ̀rɔ̃†-òŋu ŋa òŋu iyì-Ɔ̀ɖáyé Boba-òŋu#ɛ́, ɛŋɛ̀ yèé òŋu nákó sã fú kṹnukṹ#ɛ́ nákó ɖé bá ìtsèntse‐ɛ̀ ŋa. 28Òŋu wà wí fú ŋa ní fee, ɔ̀nyà kã̀ŋa wà náàŋírĩ-ŋa bí#ɛ́, à kàkó kú tã́ná à nákó rí kíbí òŋu, Ɛnɛ yèé ɔ̀nyà bí#ɛ́, òŋu nákó wáa dzoyè gbà#á.

Currently Selected:

Màtéwò 16: ngl

Highlight

Copy