Xhun 10
10
Uvaʼs txumbʼalimal ibʼant quBʼaal Jesuus eela u xaol, tuchʼ tatin karneʼl tuul ipeʼ
1Tul echat tal Jesuus s-eche: —Pet tira toq val sete: Jaʼl uvaʼ jit aʼ laʼ palkoʼk t-vipalebʼal ok u tatibʼal inqʼa karneʼl, pet aʼl laʼ itxhok tok tinjalite, tul elqʼometze. Atz okebʼen karneʼl kuxhte. 2Pet u xeen karneʼl, tan aʼ laʼ palkoʼk t-vipalebʼal ok u tatibʼal inqʼa karneʼl. 3-4Tan aʼ u lotxhonal laʼ jaqon vet vipalebʼal ok inqʼa karneʼl, tul laʼ pal vet ok u xeen karneʼl. Tul tootzaq inqʼa karneʼl viqul u xeen tetz. Echetz s-tiʼile laʼ isikʼle vet eluʼl u xeen karneʼl inqʼa ikarneʼl tuchʼ ibʼij. Tul laʼ tiqʼo vet eluʼl inqʼa ikarneʼl.
5Tan jaʼl koq kuxh invaʼq s-tiʼ laʼ okk bʼen inqʼa karneʼl. Pet aʼl laʼ itzʼeqt tibʼ inqʼa karneʼl te uvaʼ yeʼ tootzaq. Tan yeʼ ootzaqimal viqul taʼn, —xeʼt Jesuus.
6Aʼetz inqʼa yole uvaʼ txumbʼalimal talt Jesuus te inqʼa xaol, poro yeʼ bʼen te inqʼa xaol kam talax inqʼa yol uvaʼ tal Jesuus.{*}#10.6 Aʼetz nik ex elkaʼp viyol quBʼaal Jesuus uvaʼ txumbʼalimal taltaʼ tiʼ inqʼa iqʼesal uqʼeʼybʼal xoʼl inqʼa tij imam Israeel. Tan aʼ inqʼa iqʼesal uqʼeʼybʼale inqʼa elqʼom tuchʼ inqʼa okebʼen karneʼl nik tal tu versiikulo vaʼl. Aʼ tal quBʼaal Jesuus uvaʼ jitxh tibʼaʼnil nikich ixeevat inqʼa iqʼesal uqʼeʼybʼal inqʼa tij imam Israeel, eche u yol uvaʼ txumbʼalimal talt quBʼaal Jesuus t-Tio 21.33-46.
Uvaʼs talt quBʼaal Jesuus uvaʼ eela Jesuus tuchʼ invaʼl bʼaʼnla xeen karneʼl
7Yaʼne ech vaʼt u yol tal Jesuus s-eche: —Tira toq val sete: Aʼetz ine, vipalebʼal ok inqʼa karneʼl. 8Tan jankʼalxh inqʼa iqʼesal uqʼeʼybʼal, inqʼa bʼaxich motx tul sinvatz, tan elqʼomaqiche, atz okebʼenaq xaol. Tul yeʼ motx nimal taʼn inqʼa xaol. 9Echetz aʼ ine, vipalebʼal ok inqʼa xaol vatz quBʼaal Tiuxh. Jaʼletz uvaʼ laʼ itxhok tok kʼatz quBʼaal Tiuxh, tul laʼ paloʼk, atz kolel veteʼ. Tan ech tatin laʼ ibʼan, eche invaʼq u karneʼl uvaʼ yeʼl ixoʼval tiʼ ipaloʼk, atz tiʼ teluʼl tiʼ ileqt bʼaʼnla kʼoatxh.
10Pet u elqʼom, tan ech koq kuxh laʼ tul s-eche. Tan elaqʼ, yatzʼoʼm, yansaʼm laʼ ul ibʼaneʼ. Pet koq in, tan aʼ ulk in tiʼ taqʼax qʼij isaq inqʼa xaol, atz tiʼ ikʼult nimal bʼaʼnil tu qʼij isaq vatz txʼavaʼ, atz uvaʼ yeʼl iyaʼebʼal imotxebʼal qʼij isaq kʼatz quBʼaal Tiuxh laʼ ibʼana. 11Echetz aʼ, ine u bʼaʼnla xeen karneʼl, tan toq vaqʼ vibʼ kamoq setiʼ, eche laʼ taqʼt tibʼ u bʼaʼnla xeen karneʼl kamoq tiʼ inqʼa ikarneʼl.
12Pet koq invaʼq u vinaq uvaʼ aʼl txhoel tiʼ ixeel inqʼa karneʼl, tan laʼ koq el taanima s-tiʼ. Tan jitxh tetz. Oqetz laʼ til u vinaq tul xoʼ, tul laʼ taqʼ ka inqʼa karneʼl. Tul laʼ itzʼeq tibʼ. Yaʼne laʼ pal vet ok xoʼ xoʼl inqʼa karneʼl, tul laʼ itxey vet inqʼa karneʼl. Tul talaq kuxh vet laʼ motx ikʼaq junun inqʼa karneʼl tiʼ itzʼeqt tibʼ.
13Echetz laʼ itzʼeqt tibʼe u vinaq uvaʼ txhoele, tan jit een taanima tiʼ inqʼa karneʼl. Pet aʼ kuxh een taanima tiʼ u txhojbʼal tetz.#Esekieel 34.11-12
14Pet aʼ ine, u bʼaʼnla xeen karneʼl, atz vootzaql inqʼa inkarneʼl. Tul tootzaqlat in. 15Echatetz vatine tuchʼ vinBʼaal, tan tootzaql in vinBʼaal. Tul vootzaqlat inpaqte. Tan toq vaqʼ u qʼij insaq tiʼ inqʼa niman vetz, inqʼa eche karneʼl.#Tio 11.27; Luk 10.22
16Poro at jolt xaol toq niman in, inqʼa yeʼx uloq sinkʼatza, eche inqʼa karneʼl uvaʼ yeʼxhkam atoʼk tu peʼ xoʼl inqʼa imol. Aʼetz inqʼae, tetxhal laʼ nal bʼen viqʼo tzaan, tan yek toq motx tabʼi vinqul tiʼ vinyoloneʼ. Echetz vaʼl kuxh vet laʼ atink vet inqʼa niman vetz s-kaqaayil. Tul taʼn kuxh vet in xeen tetz laʼ ibʼana.
17Echetz s-tiʼile nik isaʼ in vinBʼaal, tan toq vaqʼ u qʼij insaq tiʼ inqʼa niman vetz. Tan toq kamoq in, tul toq itzʼeʼvoq in inpaqte. 18Poro yeʼxhabʼil invaʼq laʼ oleʼv tiʼ teesal u qʼij insaq. Pet antxh in toq aqʼon u qʼij insaq. Tan at viqleʼm tiʼ vaqʼt vibʼ kamoq, tul at viqleʼm tiʼ vitzʼeʼv inpaqte. Tan ech uvaʼe alel s-ve taʼn vinBʼaal, —xeʼt Jesuus.
19Tabʼietz vet inqʼa fariseeo inqʼa yol uvaʼ tal Jesuus, tul motx iyojaq vet tibʼ s-vatzaq tuchʼ yol. 20Tul ech motx tal vet jolol inqʼa fariseeo s-eche: —Elnaʼql iviʼ naq uvaʼe t-bʼey, tan demoonioebʼ atoʼk t-taanima naq. Pet yeʼ eqejeʼ kam uvaʼ nik tal naq, —xeʼtaqe.
21Pet ech nikich tal jolt inqʼa fariseeo s-eche: —Poro yeʼxhabʼil invaʼq vinaq ech laʼ iyolon tuchʼ mam txumbʼal, eche naq uvaʼe, oq demoonio atoʼk t-taanima. Tan bʼane laʼ koq ilon invaʼq tzot taʼn demoonio, —xeʼtaqe.
Uvaʼs yeʼ iqeex quBʼaal Jesuus taʼn inqʼa iqʼesal uqʼeʼybʼal
22Tuulbʼaletz viqʼiil u txun txheʼv uvaʼs nikich inimat inqʼa tij imam Israeel u nimla qʼij Tetz Itxʼajpebʼal U Tostiuxh Inpaqte uvaʼ tu tenam Jerusaleen. Tan jun yaʼbʼ nikich motx inimataʼ.{*}#10.22 Aʼ nik inimat inqʼa tij imam Israeel u nimla qʼij uvaʼe tinikʼa u ichʼ disieemvre. Txhokvaq u yol ‹Albʼal Inuqul Inqʼa Nimla Qʼij Tetz Inqʼa Tij Imam Israeel.› 23Tul nikich ixaon Jesuus t-vitiʼ otzotzil u txala tuul u nimla atibʼal tuulbʼal u tostiuxh uvaʼ Salomoonich ibʼij. 24Yaʼne imoloʼk tibʼ inqʼa iqʼesal inqʼa tij imam Israeel tiʼ Jesuus. Tul echaq motx tal s-eche: —¿Jatuetz laʼ aaqʼ qootzaqi, oq aʼ, axhe u Kriisto? Tan nik qusaʼeʼ uvaʼ tira laʼ aal inuqul s-qe, —xeʼtaqe.
25Yaʼne ech tal Jesuus s-eche: —Qat vall inuqul sete uvaʼ, aʼ ine, u Kriisto. Tul tira yeʼ nik eqejeʼ. Tan aʼ inqʼa kaebʼal aanima nik inbʼaneʼ nik kʼutxhun u viqleʼm. 26Tul yeʼ nik motx eqejeʼ, tan jit ex niman vetz. Atz jit ex inkarneʼl, eche inqʼa qat vala. 27Jatvaʼletz inqʼa niman vetz, inqʼa ech tatin, eche karneʼl, tan ilaqe nik tabʼi in. Tan vootzaqlaqe. Tul txhʼuyel s-viʼ. 28Tul laʼ vaqʼ qʼij isaq uvaʼ yeʼl iyaʼebʼal imotxebʼal. Tul yeʼl inpaqul laʼ tzʼeqx ka. Atz yeʼxhabʼil invaʼq laʼ oleʼv tiʼ teesal el t-inqʼabʼ. 29Tan aʼ vinBʼaal qat oksan t-inqʼabʼ. Tan yeʼxhabʼil invaʼq uvaʼ palnaʼql koq tiqleʼm viʼ vinBʼaal. Atz yeʼxhabʼil invaʼq laʼ oleʼv tiʼ teesal el inqʼa niman vetz tiqʼabʼ vinBʼaal. 30Tan vaʼl kuxh in tuchʼ vinBʼaal, —xeʼt Jesuus.
31Tabʼietz vet inqʼa iqʼesal tuqʼeʼybʼal inqʼa tij imam Israeel u yol uvaʼ tal Jesuus, tul motx isikʼ vet sivan inpaqte tiʼ ikʼonil Jesuus.
32Yaʼne ech tal Jesuus s-eche: —Sibʼax inqʼa bʼaʼnla txhaq kaebʼal aanima inbʼan sevatz. Pet ¿jabʼisteetz inqʼa bʼaʼnla txhaq kam toq ekʼoni in s-sivan s-tiʼ? —xeʼt Jesuus.
33Yaʼne ech tal inqʼa iqʼesal uqʼeʼybʼal s-eche: —Jitetz tiʼ inqʼa bʼaʼnla txhaq kaebʼal aanima toq qukʼonivat axh s-sivan, pet, tiʼ uvaʼ nik eesa iqʼij quBʼaal Tiuxh tuchʼ u yol uvaʼ nik aaleʼ. Tan nik aal eebʼ s-Tiuxh. Tul axh kuxh invaʼl alam aanima, eche oʼ, —xeʼtaqe.#Leviitiko 24.16
34Yaʼne ech tal Jesuus s-eche: —¿Yeʼetz kol etootzaql inqʼa yol uvaʼ tzʼibʼamal ka t-inqʼa bʼekʼbʼal? Tan ech nik tal quBʼaal Tiuxh s-eche: «Qat vall sete uvaʼ, ech ex, eche tiuxh,» chich u yol.{*}#10.34 Aʼ yolonk quBʼaal Jesuus tiʼ inqʼa aqʼol kuʼ yol tinuqul, inqʼa tal quBʼaal Tiuxh tok xoʼl inqʼa tij imam Israeel s-naʼya. Saalmo 82.6; Eeksodo 22.28; Deuteronoomio 1.17; 16.18 2 Kroonikas 19.6. Tan jikxh nikich motx taqʼt kuʼ yol tinuqul. Tan aʼxh nikich motx ibʼan kam uvaʼ nikich isaʼ quBʼaal Tiuxh tiʼ ibʼekʼex inqʼa xaol. Oqetz tal quBʼaal Tiuxh inqʼa aqʼol kuʼ yol tinuqul s-tiuxh, inqʼa quBʼaal Tiuxh saʼon toksal xoʼl inqʼa tij imam Israeel s-naʼya, ¡aʼetz kol quBʼaal Jesuus jit Tiuxh, u kʼutxhul tetz inqʼa mam kaebʼal aanima xoʼl inqʼa xaol! Echetz jit quBʼaal Jesuus nikich eesan iqʼij quBʼaal Tiuxh tuchʼ uvaʼ tal tibʼ s-Tiuxh, tan Tiuxhichetzxh quBʼaal Jesuus. Tan tira nikich ikʼutxh quBʼaal Jesuus inqʼa mam kaebʼal aanima tetz quBʼaal Tiuxh. 35Echetz tal quBʼaal Tiuxh te inqʼa iqʼesal, inqʼa toksa xoʼl inqʼa kʼuy qumam s-naʼya, s-eche: «Ex tiuxh,» xeʼt quBʼaal Tiuxh s-te, tiʼ uvaʼ tan, taqʼ quBʼaal Tiuxh tiqleʼm. Tul yeʼletz viyolbʼal quBʼaal Tiuxh laʼ qeesa iqʼij. 36Oqetz ech tal quBʼaal Tiuxhe tiʼ inqʼa iqʼesal s-naʼya, ¡aʼetz kol yeʼ laʼ talvat s-viʼ, in viTxajoʼm quBʼaal Tiuxh uvaʼ qat itxhaq tzaan in tiʼ ikʼutxhux u tiqleʼm vatz txʼavaʼ! Echetz nik valte sete, ¡kametz s-tiʼil nik etal s-ve uvaʼ nik veesa iqʼij quBʼaal Tiuxh tuchʼ inqʼa yol uvaʼ nik valeʼ! Tan quBʼaal Tiuxh aqʼon viqleʼm. Tul itxhaq tzaan in xoʼl u tenam. Echetz nik valte uvaʼ, in iKʼaol quBʼaal Tiuxh. 37Oqetz jit tetz vinBʼaal inqʼa kaebʼal aanima uvaʼ nik inbʼaneʼ, tul yeʼetz eqej in bʼa. 38Pet oqetz tetz vinBʼaal kam uvaʼ nik inbʼaneʼ, tul kʼuxhetz yeʼ laʼ eqej in, pet qejvaq uvaʼ tetz vinBʼaal kam uvaʼ nik inbʼaneʼ. Echetz laʼ ibʼene sete, atz echetz laʼ eqejte uvaʼ vaʼl iyol vinBʼaal s-vuchʼ, atz vaʼl inyol tuchʼ vinBʼaal, —xeʼt Jesuus.
39Yaʼne kolxh txeyex Jesuus inpaqte taʼn inqʼa iqʼesal, poro tuulxh teleʼl Jesuus. 40Tul yekich vet Jesuus inpaqte jala el u xaomla aʼ Jordaan, tal uvaʼ nikich taqʼvat kuʼ Xhun inqʼa xaol xeʼ u aʼ s-bʼaxa. Tul atin vet Jesuus tzitzi.#Xhun 1.28 41Tul mamala xaol nikich tul kʼatz Jesuus. Tul ech nikich motx tal s-eche: —Nuqxh inqʼa yol uvaʼ ul tal Xhun tiʼ naq u Vinaq uvaʼe. Tan mam kaebʼal aanima nik ibʼan naq. Ape. Kʼuxh yeʼl invaʼq kaebʼal aanima ul ibʼan Xhun, pet nuqxh inqʼa yol ul tal Xhun, —chichich inqʼa xaol. 42Tul tzitzi iqejvat vet mamala xaol uvaʼ, aʼ, Jesuuse, u Kriisto.
Currently Selected:
Xhun 10: ixlC
Highlight
Share
Copy
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.
