Xhun 18

Uvaʼs ex ikʼutxhux quBʼaal Jesuus taʼn Juudas, tul txeyp vet quBʼaal Jesuus taʼn inqʼa itxhaq inqʼa iqʼesal uqʼeʼybʼal

Tio 26.47-56; Kuxh 14.43-50; Luk 22.47-53

1Yaʼetz vet Jesuus tiʼ inatxhax Tiuxh, tul el vet bʼen Jesuus tuchʼ inqʼa nikich itxhus tibʼ s-kʼatza. Tul yekichaq vet jala el val u toq aʼ Sedroon, tal uvaʼ atich val u xhoraal. Tul pal vet ok Jesuus tuul u xhoraal tuchʼ inqʼa nikich itxhus tibʼ s-kʼatza. 2Ootzaqimalichetz u xhoraal taʼn Juudas, uvaʼ oksan Jesuus tiqʼabʼ inqʼa iqʼesal uqʼeʼybʼal, tan nima paqul ex imol tibʼ Jesuus tzitzi tuchʼ inqʼa nikich itxhus tibʼ s-kʼatza.

3Yaʼne aʼ vet Juudas iqʼon ibʼey intanul sol tuchʼ jolt inqʼa pol, inqʼa txhaqax bʼen taʼn inqʼa iqʼesal oksan yol vatz Tiuxh, atz tuchʼ inqʼa fariseeo. Tul iqʼomalich txiqubʼal taʼn, tan qʼeqxeʼmich veteʼ. Atz iqʼomalich ixamal taʼn. Atz iqʼomalich itxhʼitxhʼ taʼn. Tul bʼenaq vet tu xhoraal.

4Poro tootzaqich vet Jesuus kame uvaʼ saʼich palka, echetz aʼ, Jesuus, bʼaxich kʼulun Juudas tuchʼ inqʼa txhʼuyich s-tiʼ. Tul ech tal Jesuus s-eche: —¿Jaʼl nik etxhokeʼ? —xeʼt Jesuus.

5Tul ech motx tal te Jesuus s-eche: —Jesuus, u aj Nasareet, nik qutxhokeʼ, —xeʼtaqe.

Yaʼne ech tal Jesuus s-eche: —Ine, —xeʼt Jesuus. Tul ant Juudas atich xoʼl inqʼa xaol, Juudas uvaʼ oksan Jesuus tiqʼabʼ inqʼa iqʼesal uqʼeʼybʼal.

6Taʼnetz kuxh tal Jesuus u yol uvaʼ: —Ine, —xeʼt Jesuus, tul bʼiqxh motx iqʼaʼv tiʼ iqul, atz motx pakʼel ibʼen t-txʼavaʼ.

7Yaʼne tabʼi Jesuus inpaqte. Tul ech tal Jesuus s-eche: —¿Jaʼl nik etxhokeʼ? —xeʼt Jesuus.

Tul echaq motx tal s-eche: —Jesuus, u aj Nasareet, nik qutxhokeʼ, —xeʼtaqe.

8Tul ech tal Jesuus s-eche: —Qat vall sete uvaʼ ine. Oqetz in nik etxhok in, tul kuyvaqetz ibʼen inqʼa txhʼuyel s-viʼ, —xeʼt Jesuus.

9Echetz telaʼpune val u yol uvaʼ maʼtich talt Jesuus uvaʼ ech nik tal s-eche: —Jankʼaletzxh inqʼa xaol, inqʼa ooksa t-inqʼabʼ, tan yeʼxhabʼil invaʼq qat tzʼeqxi, —chiche.#Xhun 6.39

10Iqʼomalichetz iespaada Simoon Luʼ taʼn, tul tiqʼo jaʼul viespaada t-totzotz. Tul itzokʼeʼl ixichin val u taqʼonvil u mam iqʼesal oksan yol vatz Tiuxh, val u aqʼonvil uvaʼ Maalkoich ibʼij. Tul aʼ vixichin, uvaʼ tisebʼal, tzokʼpeʼl.

11Yaʼne ech tal Jesuus te Luʼ s-eche: —¡Aqʼ kuʼ vaespaada t-totzotz, tan tetxhal kuxh toq paloq in tu mam kʼaxkʼo uvaʼ alel tzaan s-viʼ taʼn vinBʼaal! —xeʼt Jesuus.#Tio 26.39; Kuxh 14.36; Luk 22.42

Uvaʼs tiqʼol vet quBʼaal Jesuus vatz u mam iqʼesal oksan yol vatz Tiuxh

Tio 26.57-58; Kuxh 14.53-54; Luk 22.54

12Yaʼne txeyp vet Jesuus. Tul qitzix vet Jesuus taʼn intanul inqʼa sol, atz taʼn iqʼesal sol, atz taʼn inqʼa pol, inqʼa itxhaq bʼen inqʼa iqʼesal tij imam Israeel. 13Tul aʼ bʼaxa ex aqʼlik ok Jesuus vatz Anaas. Tul ijiʼich Kaifaas Anaas. Tul aʼ Kaifaas atich ok s-mam iqʼesal inqʼa oksan yol vatz Tiuxh tuulbʼal u yaʼbʼ uvaʼe.{*}#18.13 Iqʼesal oksan yolich Anaas vatz Tiuxh xoʼl jolt inqʼa oksan yol, ech nik tale tu Xhun 11.49. 14Antetzxh Kaifaase uvaʼ ech alon te inqʼa iqʼesal inqʼa tij imam Israeel s-eche: —Aʼl bʼaʼn s-qe uvaʼ vaʼl kuxh vinaq laʼ yatzʼax el, tul jit jankʼal oʼ tuchʼ u qutenam laʼ sotzeʼl, —xeʼt Kaifaas.#Xhun 11.49-50

Uvaʼs itzʼeqt Luʼ tzij tiʼ taltaʼ uvaʼ yeʼ tootzaqlich Luʼ quBʼaal Jesuus

Tio 26.69-70; Kuxh 14.66-68; Luk 22.55-57

15Txhʼuyichetz bʼen Simoon Luʼ tiʼ Jesuus, tul inmolich vibʼ tuchʼ Luʼ, in vaʼt, uvaʼ nikich intxhus vibʼ kʼatz Jesuus. Ootzaqimichetz in taʼn viqʼesal oksan yol vatz Tiuxh, echetz inpaloʼke tiʼ Jesuus t-viqʼanalil u totzotz viqʼesal oksan yol. 16Pet Luʼ, tan kajka Luʼ tziʼ jubʼal. Yaʼne qʼaʼv vet eluʼl in, in, uvaʼ nikich intxhus vibʼ kʼatz Jesuus, in, uvaʼ ootzaqimich in taʼn viqʼesal oksan yol vatz Tiuxh. Tul val vet te u ixoq, u xeen tetz tziʼ jubʼal, tiʼ ipaloʼk Luʼ. Echetz ipal vet ok Luʼe.

17Yaʼne ech tal ixoq, u aqʼonvil, uvaʼ nikich xeen tziʼ jubʼal, te Luʼ s-eche: —¿Eche ant axh vaʼq inqʼa nik itxhus tibʼ kʼatz u vinaq uvaʼe, nik vileʼ? —xeʼte.

Tul ech tal Luʼ s-eche: —Yeʼle. Yeʼl in ant in, —xeʼt Luʼ. 18Tul txaklich ok inqʼa aqʼonvil tuchʼ inqʼa pol vatz u xamal, uvaʼ maʼtich toksataq tiʼ ilejtaq tibʼ. Tan oqxhich txheʼve. Tul antich Luʼ txaklich ok s-xoʼl tiʼ ilejt tibʼ vatz u xamal.

Uvaʼs ijotxhʼil itziʼ quBʼaal Jesuus taʼn Anaas, viqʼesal oksan yol vatz Tiuxh xoʼl jolt inqʼa oksan yol

Tio 26.59-66; Kuxh 14.55-64; Luk 22.66-71

19Yaʼne jotxhʼil vet itziʼ Jesuus taʼn Anaas, u paxhaato iqʼesal oksan yol vatz Tiuxh. Tul aʼ ijotxhʼi tiʼ inqʼa yol uvaʼ nikich itxhus Jesuus, atz tiʼ inqʼa xaol, inqʼa nikich itxhus Jesuus.

20Tul ech tal Jesuus s-eche: —Ech ivatz jankʼal inqʼa xaol txhusun in. Tul nikich intxhus inqʼa xaol t-inqʼa kʼulbʼal ibʼ bʼenamen, atz tu nimla atibʼal tuulbʼal u tostiuxh tal uvaʼ nik qukʼulvat qibʼ, oʼ, inqʼa tij imam Israeel. Tul yeʼl invaʼq yol injutxi talaxeʼ. 21¿Kametz s-tiʼil najutxi aabʼit inqʼa yol s-ve? Pet aʼ aabʼivat te inqʼa xaol, inqʼa motx abʼin inqʼa yol uvaʼ motx vala. Aʼetz vet inqʼa xaol toq alon inuqul kam uvaʼ alel vaʼn, —xeʼt Jesuus.

22Yaʼetz kuxh iyolon Jesuus, tul el iqʼabʼ val u pol tivatz Jesuus. Tul ech tal te Jesuus s-eche: —¡Echetz kol itzaqʼbʼel invaʼq iqʼesale, eche uvaʼ qat atzaqʼbʼeʼ! —xeʼte.

23Tul ech tal Jesuus s-eche: —Oqetz kantxhaq inqʼa yol, inqʼa qat vala, tul aletz inuqul bʼa s-ve tal qat yank in. Pet oq bʼaʼn uvaʼ nik valeʼ, tul ¡kametz s-tiʼil nik aqʼos in! —xeʼt Jesuus te u pol.

24Yaʼne ibʼekʼ vet Anaas ibʼen Jesuus vatz Kaifaas, viqʼesal oksan yol vatz Tiuxh. Tul qitzich vet ibʼen Jesuus.

Uvaʼs itzʼeqt Luʼ tzij tiʼ taltaʼ uvaʼ yeʼ tootzaqlich Luʼ quBʼaal Jesuus

Tio 26.71-75; Kuxh 14.69-72; Luk 22.58-62

25Antetzxh txaklich Luʼ xoʼl inqʼa nikich ilej tibʼ vatz u xamal, tul echaq tal te Luʼ s-eche: —¿Ech ant axh kola vaʼl inqʼa nik itxhus tibʼ kʼatz naq uvaʼe? —xeʼt eʼl Luʼ.

Tul itzʼeq Luʼ tzij. Tan ech tal Luʼ s-eche: —Yeʼle. Yeʼl in ant in, —xeʼt Luʼ.

26Atichetz val u taqʼonvil u mam iqʼesal oksan yol vatz Tiuxh, uvaʼ tatinich tibʼ tuchʼ u vinaq uvaʼ itzokʼeʼl Luʼ paqʼil ixichin. Tul ech tal te Luʼ s-eche: —Ant axh qʼaoq, ¿yetz qat vil axh kʼatz naq tu xhoraal abʼa? —xeʼt te Luʼ.

27Yaʼne itzʼeq Luʼ tzij inpaqte. Tul oqʼ vet val u mam kaxhan.

Uvaʼs tiqʼol vet quBʼaal Jesuus vatz Pilaato tiʼ taqʼax kuʼ yol tinuqul tiʼ viyatzʼax el quBʼaal Jesuus

Tio 27.1-2, 11-31; Kuxh 15.1-20; Luk 23.1-5, 13-25

28Yeʼnaqichetzxh saqbʼoq s-qʼalaʼm, tul iqʼol vet tzaan Jesuus tu totzotz Kaifaas taʼn inqʼa sol. Tul yekichaq vet tuchʼ Jesuus tu tatibʼal Pilaato, u nimla iqʼesal. Tul yeʼ motx paloʼk inqʼa iqʼesal tijaq imam Israeel tu tatibʼal u nimla iqʼesal, tan aʼaqich isaʼ yeʼ itzʼilutaq tibʼ vatz quBʼaal Tiuxh s-vatz. Echetz laʼich tutxh tetxhbʼute u txʼix uvaʼ nikich inima inqʼa tij imam Israeel tiʼ u nimla qʼij Ipal Aanxel.

29Yaʼne eluʼl Pilaato s-vatz. Tul ech tal Pilaato s-eche: —¿Kametz ipaʼv naq u vinaq uvaʼe, tul qat etiqʼo tzaan naq sinvatz? —xeʼt Pilaato.

30Tul ech tal inqʼa iqʼesal s-eche: —Yeʼl koq ipaʼv naq, tul yeʼletz naqe laʼ qiqʼo tzaan savatz, —xeʼtaqe.

31Yaʼne ech tal Pilaato s-eche: —Antxh ex iqʼon bʼen naq. Tul aqʼvaq kuʼ yol tinuqul tiʼ naq. Tul antxh ebʼanbʼe tiʼ naq kam uvaʼ nik tal inqʼa ebʼekʼbʼal, —xeʼt Pilaato.

Tul ech tal vet inqʼa iqʼesal inqʼa tij imam Israeel s-eche: —Poro yeʼ laʼ utxhi, uvaʼ, aʼ, oʼ laʼ yatzʼon invaʼq xaol. Tan jit ech uvaʼe nik ikuy inqʼa ebʼekʼbʼal, ex inqʼa aj Rooma, —xeʼtaqe. 32Echetz laʼich telaʼpe u yol uvaʼ maʼtich talt Jesuus, tiʼ uvaʼ kam kamchilil laʼich ulbʼel Jesuus taʼn inqʼa aj Rooma.#Xhun 3.14; 12.32

33Yaʼne qʼaʼvoʼk Pilaato tu tatibʼal inpaqte. Tul saʼax tzaan Jesuus taʼn Pilaato. Tul ech tal Pilaato te Jesuus s-eche: —¿Aʼetz kol axhe u mam iqʼesal inqʼa tij imam Israeel? —xeʼt Pilaato.

34Tul ech tal Jesuus te Pilaato s-eche: —¿Sakʼuulxh nik tzajk inqʼa yol uvaʼ nik aabʼi s-ve? Pet ¿maq jaʼl invaʼq qat alon u yol see s-viʼ? —xeʼt Jesuus.

35Yaʼne ech tal Pilaato s-eche: —¡Inetz kol tij imam Israeel nik eeleʼ! Pet atz antxh vatenam tuchʼ inqʼa iqʼesal oksan yol vatz vaTiuxh qat iqʼon tzaan axh sinvatz. Tul ¿kametz apaʼv bʼa s-vatz? —xeʼt Pilaato.

36Tul ech tal Jesuus s-eche: —Jit aʼ inqʼa xaol vatz txʼavaʼ qat aqʼon viqleʼm tiʼ ibʼanax iqʼesalil s-tiibʼa. Pet aʼ koq inqʼa xaol qat aqʼon u viqleʼm tiʼ ibʼanax iqʼesalil s-tiibʼa, tul laʼetz koq ikuye inqʼa lotxhol vetz vok tiqʼabʼ inqʼa iqʼesal tijaq imam Israeel. Echetz nik valte sete uvaʼ jit vaʼq xaol tzitza vatz txʼavaʼ nik aqʼon viqleʼm tiʼ ibʼanax iqʼesalil, —xeʼt Jesuus.

37Yaʼne ech tal Pilaato s-eche: —¿Axhetzebʼxh mam iqʼesal? —xeʼt Pilaato.

Tul ech tal Jesuus s-eche: —Echxhte uvaʼ nik aaleʼ uvaʼ, in, mam iqʼesal. Tan echetz s-tiʼile qat alal in. Tul qat ul in vatz u txʼavaʼ tiʼ talax inuqul inqʼa yol tiʼ quBʼaal Tiuxh, tan aʼe vinuqul. Jankʼaletzxh u xaol uvaʼ nik qeon vinuqul, tul aʼetz inqʼae nik niman kam uvaʼ nik valeʼ, —xeʼt Jesuus.

38Yaʼne ech tal Pilaato s-eche: —¿Jabʼisteetzebʼ vet vinuqul s-te? —xeʼt Pilaato.

Taletz kuxh vet Pilaato u yol uvaʼe, tul el vet ul Pilaato yolon vatz inqʼa iqʼesal tijaq imam Israeel. Tul ech tal Pilaato s-eche: —Yeʼl invaʼq ipaʼv naq nik itxhej sinvatz. 39Pet etootzaql veteʼ uvaʼ nik intxhaqpu el juunil pereexho tuulbʼal u nimla qʼij Ipal Aanxel. Pet ¿laʼ kol esaʼa uvaʼ, aʼ naq toq intxhaqpu el u mam eqʼesal, ex inqʼa tij imam Israeel? —xeʼt Pilaato.

40Yaʼne aalatxh inqʼa xaol sichʼini. Tul echaq motx tal s-eche: —¡Yeʼle! ¡Yeʼl naq uvaʼe laʼ atxhaqpu el! Pet ¡aʼ naq u varAvaas atxhaqpu el! —xeʼtaqe. Tul elqʼomich varAvaas.

Currently Selected:

Xhun 18: ixlC

Highlight

Copy