Luk 11

Uvaʼs itxhusun quBʼaal Jesuus tiʼ kam laʼ ulbʼel inatxhax Tiuxh

Tio 6.9-15; 7.7-11

1Tuulbʼaletz val u qʼij uvaʼs iyaʼ vet Jesuus tiʼ inatxhax Tiuxh t-val u txʼavaʼ, tul ech tal vaʼl, uvaʼ nikich itxhus tibʼ kʼatz Jesuus, s-eche: —QuBʼaal, txhus oʼ tiʼ kam laʼ qulbʼe inatxhax Tiuxh, eche uvaʼ nikich itxhust Xhun inqʼa nikich itxhus tibʼ s-kʼatza tiʼ inatxhax Tiuxh, —xeʼt te Jesuus.

2Yaʼne ech tal Jesuus s-eche: —Ech laʼ etal s-eche uvaʼs laʼ enatxht Tiuxh:

«QuBʼaal Tiuxh, [axh, uvaʼ

at axh tu amlikaʼ,]

axh, uvaʼ laʼ oksal aqʼij,

tan taʼn kuxh axh u quTiuxh.

Ul bʼan vaqʼesalil s-quxoʼl.

Tul bʼan vavitzʼabʼal s-qiibʼa

[tzitza vatz u txʼavaʼ,

eche uvaʼ nik abʼant

vavitzʼabʼal tu amlikaʼ].

3Tul aqʼ qetxhbʼubʼal

s-txheelaʼ,

u tetz jun qʼij, uvaʼ nik isaʼon

s-qe.

4Tul kuy sotzsa inqʼa

qupaʼv,

eche uvaʼ nik qukuyt ipaʼv

inqʼa qumol,

inqʼa nik bʼanon u yeʼbʼaʼn

s-qe.

Tul yeʼ akuyeʼ uvaʼ laʼ kuʼ oʼ

t-paʼv,

kʼuxh laʼ etxhbʼul qukuʼ

t-paʼv.

[Pet kol oʼ vatz Satanaas,]»

chaq ex, —xeʼt Jesuus.

Uvaʼs talt quBʼaal Jesuus uvaʼ tetxhal laʼ taqʼ quBʼaal Tiuxh viTiuxhil t-taanima inqʼa xaol, jabʼil uvaʼ laʼ jaqon

5Atz echat vaʼt u yol tal Jesuus s-eche: —Eche uvaʼ: At koq invaʼq ex, laʼ bʼen ex xeʼ invaʼq etamiʼk s-txhaqʼaal aqʼbʼal. Tul ech laʼ bʼen etal s-te s-eche: «Txa vamiʼk, inchʼexu oxvoʼq inpaan see. 6Tan il val u vamiʼk yaʼnxh uy siinxeʼ. Tul een tzajnaʼq s-naatxh. Tul yeʼxhkam invaʼq etxhbʼubʼal siinxeʼ uvaʼ laʼ vaqʼ s-te,» oq chaq ex.

7Kʼuxhetz echxh laʼ tal vetamiʼk s-eche: «Yeʼ kuxh ul abʼey in, tan il vet votzotz katxʼumal. Tul il in, vaty vet in xoʼl inqʼa innitxaʼa. Echetz yeʼ laʼ utxhi laʼ lakp in tiʼ taqʼax kam uvaʼ najaqeʼ,» kʼuxh chaqxh eluʼl.

8Poro nal kuxh laʼ ilakp tiʼ taqʼax sete kam uvaʼ nik esaʼeʼ, tan etamiʼk etibʼ s-tuchʼ, atz tiʼ uvaʼ yeʼ nik eyaʼ tiʼ etxokʼon vatz vijubʼal. Tul tetxhal kuxh laʼ lakp tiʼ taqʼax kam uvaʼ laʼ ejaq s-te.

9Echetz nik valte sete: Jaqvaq te quBʼaal Tiuxh, tul laʼ taqʼ quBʼaal Tiuxh sete. Atz txhokvaq, tul laʼ eleqa. Atz qʼiilavaq quBʼaal Tiuxh, tul laʼ itzaqʼbʼe ex. 10Tan toq taqʼ quBʼaal Tiuxh bʼaʼnla kam te u xaol, jatvaʼlxh u xaol uvaʼ laʼ jaqon. Atz jatvaʼlxh u xaol uvaʼ laʼ txhokon, tul tetxhal laʼ ileqa. Atz jatvaʼlxh u xaol uvaʼ laʼ qʼiilan quBʼaal Tiuxh, tul laʼ tzaqʼbʼeli. 11Tan oq laʼ ijaq invaʼq enitxaʼa paan sete, [tul bʼane sivan koq laʼ etaqʼ s-te]. Atz oq txay laʼ ijaq venitxaʼa sete, tul bʼane vaʼq koq kan saʼ etaqʼ s-te. 12Atz oq kʼolobʼ laʼ ijaq venitxaʼa, tul aʼetz koq txoo, vaʼq u bʼaq jej, laʼ etaqʼ s-te. 13Kʼuxhetz txhiʼtxholaxh xaol ex, poro etootzaqle jabʼiste u bʼaʼn laʼ etaqʼ te venitxaʼa, ¡aʼetz kol u quBʼaal Tiuxh uvaʼ tu amlikaʼ, yeʼ laʼ aqʼon viTiuxhil te jabʼil uvaʼ laʼ abʼin! —xeʼt Jesuus te inqʼa nikich itxhus tibʼ s-kʼatza.

Uvaʼs talax tiʼ quBʼaal Jesuus uvaʼ, aʼ Velsevuu, viqʼesal demoonio, nikich aqʼon tiqleʼm quBʼaal Jesuus

Tio 12.22-30; Kuxh 3.20-27

14Atichetz val u vinaq uvaʼ atich ok demoonio t-taanima. Tul tira yeʼ nikich iyolon vet u vinaq taʼn u demoonio. Yaʼne ituki el Jesuus u demoonio uvaʼ atich ok t-taanima u vinaq. Eletz vet el u demoonio, tul yekich xeʼt vet u vinaq yolon. Tul kaayichxh vet taanima inqʼa xaol.

15Atichetz jolol inqʼa xaol uvaʼ ech nikich tal s-eche: —Velsevuue, viqʼesal inqʼa demoonio, nik aqʼon tiqleʼm naq tiʼ itukil el inqʼa demoonio t-taanima inqʼa xaol, —chichichaq tiʼ Jesuus.

16Atz atich jolt inqʼa xaol uvaʼ aʼich kuxh isaʼ tiltaʼ tal laʼich isukivat tibʼ Jesuus tiʼ talax vaʼq yol. Tul motx tabʼi te Jesuus uvaʼ laʼich ikʼutxh Jesuus vaʼq etxhlal vatz amlikaʼ vatz inqʼa xaol inqʼae, kʼutxhbʼal tetz oq uvaʼ kʼatz quBʼaal Tiuxh tzajnaʼqich Jesuus.

17Nikichetz til Jesuus titzʼabʼal inqʼa xaol, tul ech tal Jesuus s-xoʼl s-eche: —¡Keʼch koq laʼ taqʼt demoonio viqleʼm, tan jit eela inyol s-tuchʼ! Tan jankʼal eche tatin invaʼq u mam tenam, tan yeʼl paqul laʼ elaʼpun tibʼaʼnil, oq uvaʼ jit eela iyol inqʼa iqʼesal s-vatzaqil. Atz kʼuxh tatin xaol t-totzotz, tan oq jit eela iyol, tul yeʼl paqul laʼ elaʼp tibʼaʼnil.

18Oqetz ant kuxh Satanaas laʼ tukin el imol s-demoonioil, aʼetze jit eela iyol, ¡keʼchetz laʼ telaʼp Satanaas tuchʼ u tatineʼ! Tan aʼ, nik etaleʼ uvaʼ, aʼ, Velsevuu, nik aqʼon viqleʼm tiʼ intukit el demoonio t-taanima inqʼa xaol. 19Pet oqetz tuchʼ ibʼij Velsevuu nik intukivat el inqʼa demoonio t-taanima inqʼa xaol nik etaleʼ, ¿maqetz antxh Velsevuu nik aqʼon tiqleʼm inqʼa txhusel etaʼn bʼa?, tiʼ itukil el inqʼa demoonio. Yeʼle. Echetz antxh inqʼa txhusel etaʼn laʼ alon uvaʼ sotznaʼql ekʼuul.

20Pet tiʼetz uvaʼ tuchʼ u tiqleʼm quBʼaal Tiuxh nik intukivat el inqʼa demoonio t-taanima inqʼa xaol, tul aʼetz tetxhlale uvaʼ opoony vet u tiqleʼm vibʼant quBʼaal Tiuxh viqʼesalil t-taanima inqʼa xaol.

21Tan jankʼal eche uvaʼ, at koq invaʼq u vinaq uvaʼ sibʼ itial. Tul at itxhʼitxhʼ tiʼ ixeel inqʼa kam tetz tu totzotz. Tul tibʼaʼniletze atil jankʼal inqʼa kamaq tetz. 22Pet oqetz laʼ ul invaʼq elqʼom, uvaʼ palnaʼql iyakʼil viʼ u vinaq, tetxhal telqʼat bʼen inqʼa kamaq tetz. Tan laʼ oleʼv tiʼ imaax inqʼa itxhʼitxhʼ u vinaq uvaʼ kʼuqlel ikʼuul s-tiʼ. Atz laʼ oleʼv vet tiʼ telqʼal bʼen inqʼa kam tetz. Yaʼne laʼ ijatx vet inqʼa kam uvaʼ laʼ bʼen telqʼa. Tul laʼ kuxh kaj vet u vinaq s-eche. 23Echetz jaʼl inqʼa yeʼ nik ibʼen s-te uvaʼ, aʼ viTiuxhil Tiuxh nik lotxhon in tiʼ inqʼa nik inbʼaneʼ, tul aʼetz inqʼae, nik itxhiʼan s-viʼ. Tan jaʼl inqʼa yeʼ nik lotxhon in tiʼ imolox ok inqʼa xaol kʼatz quBʼaal Tiuxh tiʼ ibʼant iqʼesalil tu taanima, tul aʼetz inqʼae, aʼl nik itukit el inqʼa xaol kʼatz quBʼaal Tiuxh.

Uvaʼs talt quBʼaal Jesuus uvaʼ laʼ qʼaʼv u demoonio inpaqte

Tio 12.43-45

24Aʼetz koq nik ebʼan inlotxhoxeʼ, pet aʼl vaʼten nik etaltxha vet s-viʼ tiʼ veesat el inqʼa demoonio t-taanima inqʼa xaol. Tan oq nik tel vet el vaʼq demoonio t-taanima vaʼq u xaol, tul maʼt vet u demoonio txhokon tiʼ tilan tatin kʼatz vaʼt xaol uvaʼ amlel kuxh u taanima, atz yeʼxhabʼil vaʼq at tu taanima. Tul oqetz yeʼ nik ileq vet u tatibʼal, tul ech nik tal vet s-eche: «Antxh maʼtk in bʼa tu taanima u xaol uvaʼ elkeʼl in s-bʼaxa,» chich veteʼ.

25Qatetz qʼaʼv veteʼ, tul qat til veteʼ uvaʼ bʼaʼn vet atil u xaol, atz josqʼil vet tatineʼ, eche invaʼq otzotz uvaʼ bʼeenoxh vet ichʼisixeʼ, atz bʼeenoxh vet iviqixeʼ. 26Yaʼnetze aʼl laʼ bʼen tiqʼot vet juqvaʼt imol tiʼ tatin tu taanima u xaol inpaqte. Poro palnaʼq vet ibʼanon yeʼbʼaʼn juqvaʼt uvaʼ laʼ bʼen eloq, viʼ vaʼl uvaʼ atich t-taanima u xaol s-bʼaxa. Tul laʼ motx pal vet ok t-taanima u xaol. Tul aʼl pal vet iviʼ inqʼa kantxhaq laʼ ibʼan u xaol viʼ inqʼa kantxhaq uvaʼ nikich ibʼaneʼ, —xeʼt Jesuus.{*}#11.26 Aʼ nik tal quBʼaal Jesuus tu versiikulo uvaʼa, tiʼ tatin inqʼa tij imam Israeel vatz quBʼaal Tiuxh, atz maq tiʼ tatin inqʼa iqʼesal uqʼeʼybʼal. Tan tuulbʼal uvaʼs yeʼnaqich uloq quBʼaal Jesuus vatz u txʼavaʼ, tul at demoonio atich ok t-taanima inqʼa xaol. Uletz vet quBʼaal Jesuus, tul teesa vet el quBʼaal Jesuus inqʼa demoonio t-taanima. Aʼetz vet telaʼpun uvaʼ bʼaʼn vet inqʼa xaol vatz quBʼaal Tiuxh, atz qat tootzaqil vet u bʼey uvaʼ yekl kʼatz quBʼaal Tiuxh tu amlikaʼ. Pet oqetz laʼ qʼaʼv inqʼa xaol inpaqte tiʼ ibʼanax inqʼa yeʼbʼaʼn tuulbʼal uvaʼs maʼt ibʼen vet quBʼaal Jesuus t-amlikaʼ, tul aʼl tira laʼ yan vet tatin inqʼa xaol inpaqte. Aʼetz viqʼaʼve inqʼa demoonio kʼatz inqʼa xaol inpaqte. Tan aʼl pal iviʼ u yeʼbʼaʼn laʼ ibʼan vet inqʼa xaol vatz quBʼaal Tiuxh.

27Sebʼtichetz talt Jesuus inqʼa yol inqʼae, tul sichʼin val u ixoq xoʼl inqʼa xaol. Tul ech tal s-eche: —¡At vibʼaʼnil quBʼaal Tiuxh tiibʼa u ixoq uvaʼ alan axh vatz txʼavaʼ, atz uvaʼ qat aqʼon atxhʼuʼ! —xeʼt te Jesuus.

28Tul ech tal Jesuus s-eche: —Ape. Aʼl sibʼ vibʼaʼnil quBʼaal Tiuxh at tiibʼa inqʼa xaol, inqʼa nik abʼin viyolbʼal quBʼaal Tiuxh, tul nik inima, —xeʼt Jesuus.

Uvaʼs talt quBʼaal Jesuus yol tiʼ inqʼa xaol uvaʼ nikich abʼin tetxhlal u tiqleʼm quBʼaal Jesuus

Tio 12.38-42

29Tul aalemalxh nikich imolt tibʼ mamala xaol kʼatz Jesuus. Tul ech tal Jesuus xoʼl inqʼa xaol s-eche: —At ex nik jaqon inbʼant invaʼq etxhlal sevatz tiʼ kam uvaʼ nik inbʼaneʼ, ex inqʼa palsan yol, ex inqʼa itzʼlel ex s-txheel, atz inqʼa bʼanolaq tetz yeʼbʼaʼn. Tan aʼ kuxh nik esaʼ etiltaʼ oq uvaʼ eenxh tzajnaʼql in kʼatz quBʼaal Tiuxh. Poro yeʼxhkam invaʼq laʼ inbʼana. Pet taʼn kuxh etxhlal toq etileʼ, eche uvaʼ palk Jonaas taʼn quBʼaal Tiuxh. 30Tan oxvaʼl qʼij ibʼan Jonaas tuul u txay. Tul ibʼan quBʼaal Tiuxh val u kaebʼal aanima te Jonaas. Tan itzʼeʼv Jonaas inpaqte. Aʼetz u kaebʼal aanimae uvaʼ ex tal Jonaas te inqʼa xaol tu mam tenam Niinive. Echatetz kuxh u kaebʼal aanimae laʼ ibʼan quBʼaal Tiuxh s-viʼ, in, u Kʼaola uvaʼ qat bʼen s-alam aanima. Tan aʼetz u etxhlale uvaʼ laʼ ikʼutxh quBʼaal Tiuxh sete, ex, uvaʼ yeʼ nik kʼulviin vinyol, atz ex, inqʼa itzʼlel ex s-txheel.

31Tul antetz u ixoq, uvaʼ atich ok s-mam iqʼesal s-naʼya tuulbʼal Savaa, uvaʼ aʼl ikuʼeʼ, laʼ itxakbʼa tibʼ tiʼ exotxhoxeʼ tu qʼij uvaʼs laʼ taqʼt kuʼ quBʼaal Tiuxh inqʼa yol tinuqul, ex, inqʼa yeʼ nik kʼulviin vinyol, atz ex inqʼa itzʼlel ex s-txheel. Tul laʼ ixotxh ex u ixoq tiʼ ijaʼp inqʼa paʼv setiibʼa. Tan sibʼxh tzajnaʼqich ixoq tiʼ ul tabʼit inqʼa txumbʼal uvaʼ atich s-kʼuul Salomoon. Pet iletz in, at in sexoʼl, in, uvaʼ palnaʼq viqleʼm viʼ Salomoon, tul aʼl yeʼ nik enimat in.

32Tul ant inqʼa aj Niinive laʼ motx itxakbʼa tibʼ tiʼ exotxhox inpaqte, tu qʼij uvaʼs laʼ taqʼt kuʼ quBʼaal Tiuxh inqʼa yol tinuqul, ex, inqʼa yeʼ nik kʼulviin vinyol, atz ex, inqʼa itzʼlel ex s-txheel. Tan aʼl bʼaʼn inqʼa aj Niinive, tan motx titzʼa tibʼ t-inqʼa ipaʼv uvaʼs ex talt Jonaas viyol quBʼaal Tiuxh s-xoʼl. Pet iletz in at in sexoʼl, in, uvaʼ palnaʼql viqleʼm viʼ Jonaas, tul aʼl yeʼ nik etitzʼat etibʼ t-inqʼa epaʼv.

Uvaʼs talt quBʼaal Jesuus uvaʼ: Oq yannaʼq titzʼabʼal inqʼa xaol, tul aʼetz koq u bʼaʼn laʼ itxhabʼa tilixeʼ

Tio 6.22-23

33Tan yeʼxhabʼil invaʼq xaol laʼ matxon invaʼq txiqubʼal, tul laʼ kuxh imuqa. Atz jitoq laʼ imuqoʼk jaqʼ invaʼq almul. Pet aʼl een toq taqʼvat jaʼ tu tatibʼal uvaʼ niim at jaʼ. Jaʼletz inqʼa laʼ okaʼp tu otzotz, tul laʼ motx til vet inuqul kam at tu otzotz. 34Tan ech tatin u bʼaqʼ evatz, eche invaʼq u txiqubʼal. Tan oq tira bʼaʼn u bʼaqʼ evatz, tul tiraetz toq etxhabʼa tilixeʼe inqʼa kam s-tuchʼ tibʼaʼnil, eche nik tilix invaʼq u kam t-otzotz taʼn u txiqubʼal. Tul echatetz kuxh inqʼa intxhusbʼale. Tan oq laʼ eqej kam uvaʼ nik val sete, tul toqetz bʼenoqe sete kam uvaʼ nik isaʼ quBʼaal Tiuxh. Pet oq yeʼbʼaʼn u bʼaqʼ evatz, tul aʼetz koq txhan u bʼaʼn laʼ etxhabʼa tilix s-tuchʼ. Echetze vetatineʼ, tan jitoq nik ibʼen sete kam uvaʼ nik isaʼ quBʼaal Tiuxh sete. Tan ech etatin, eche invaʼq u otzotz uvaʼ tokto kuxh atila.

35Pet antetz kuxh ex, etitzʼa etibʼ tiʼ kam nik ebʼan tiʼ itxhabʼal tilix inqʼa kam inqʼa nik inkʼutxh sevatz. Tan avoqe uvaʼ vaʼten vet laʼ etal tiʼ kam uvaʼ nik etil inbʼantaʼ. Oqetz uvaʼ vaʼten vet laʼ etal s-viʼ, tul tira laʼ tzʼeqx ex vatz u quBʼaal Tiuxh, eche ikaj invaʼq xaol tu tokto. Pet aʼl bʼaʼn uvaʼ bʼaxa laʼ etila oq nik etxhabʼa ibʼanax vinuqul, echetz laʼ etatine tu txiqubʼal. 36Tan oq tiraxh nik esaʼ vinuqul uvaʼ nik tal quBʼaal Tiuxh sete, tul toqetz inkʼutxh sete. Echetz laʼ itxhej etxumbʼale tiʼ vinuqul, tul eelaetze s-tuchʼ uvaʼ at txiqubʼal tetaanima laʼ ibʼana. Tul laʼ itxiqu kaqaayil vinuqul. Tul yeʼletz vet laʼ atin bʼitoʼq toktoe sekʼatza, —xeʼt Jesuus xoʼl inqʼa xaol.{*}#11.36 Aʼ nik elkaʼp u yol tal quBʼaal Jesuus uvaʼ, aʼ u titzʼabʼal u xaol nik kʼutxhun u tatin vatz quBʼaal Tiuxh. Eche inqʼa fariseeo, tan aʼ nikich motx titzʼa uvaʼ Satanaas nikich aqʼon tiqleʼm quBʼaal Jesuus. Echetz tzitzi nikich motx ikʼutxhvat uvaʼ tira yannaʼqlich inqʼa titzʼabʼal taʼn inqʼa kantxhaq. Aʼetz u titzʼabʼal nik ibʼan eela tuchʼ u txiqubʼal tal quBʼaal Jesuus tu versiikulo vinaq kajlaval, tan aʼ kuxh u yeʼbʼaʼn nikich motx tal tiʼ kam uvaʼ nikich motx tileʼ. Xaʼtetze vaʼlen nikich motx tal tiʼ quBʼaal Jesuus. Echetze uvaʼ bʼaʼnich koq inqʼa nikich motx ibʼaneʼ, tul laʼichetz motx chiibʼe tiʼ quBʼaal Jesuus, eche uvaʼ nikich ibʼan inqʼa xaol. Tan oqxhich ichiibʼ inqʼa xaol tiʼ inqʼa mam bʼaʼnil uvaʼ nikich ibʼan quBʼaal Jesuus. Pet aalxh nikich motx itxhiʼan tiʼ quBʼaal Jesuus, tan aʼ inqʼa yeʼbʼaʼn nikich motx ibʼaneʼ.

Uvaʼs iyajt quBʼaal Jesuus inqʼa fariseeo, atz inqʼa nikich txhusun ibʼekʼbʼal inqʼa tij imam Israeel

Tio 23.1-36; Kuxh 12.38-40; Luk 20.45-47

37Yaʼetz kuxh vet iyolon Jesuus, tul tal val u fariseeo ibʼen Jesuus txʼaʼon s-tiʼ. Paletz vet ok Jesuus t-totzotz u fariseeo, tul yekich vet ok Jesuus viʼ meexha. 38Tul yeʼl iqʼabʼ Jesuus itxʼaja. Tul tira yan vet vatz u fariseeo, tan yeʼ inima Jesuus inqʼa jeqich tzaan taʼn inqʼa kʼuy mam tiʼ u txʼao qʼabʼ vatz Tiuxh.

39Yaʼne ech tal quBʼaal Jesuus te u fariseeo s-eche: —Eche ex inqʼa fariseeo, tan aʼ kuxh nik etitzʼa vitxʼaax u tiʼ inqʼa kam vatz quBʼaal Tiuxh, eche vetxʼajt veqʼabʼ, atz vetxʼajt u tiʼ inqʼa vaaso tuchʼ inqʼa laq. Pet jit aʼ nik etil inqʼa tzʼil uvaʼ at tuul okaʼp vetaanima, eche ijiqʼbʼal inqʼa kam tuchʼ u yaabʼla txumbʼal. 40¡Palsanaq yol! Jit kuxh taʼn nik til quBʼaal Tiuxh kam nik isaʼ inqʼa xaol tiʼ vitxhiʼoʼl, pet aʼat nik til quBʼaal Tiuxh kam uvaʼ at tu taanima inqʼa xaol.#Romaanos 14.6 41Pet lotxhvaq inqʼa meebʼaʼ tuchʼ inqʼa kam, inqʼa at sexeʼ. Echetz laʼ ekʼutxhte uvaʼ bʼaʼn ex vatz quBʼaal Tiuxh, tan jit tiʼ uvaʼ laʼ etxʼaj eqʼabʼ, atz maq yeʼle.

42¡Txumlebʼalxh evatz, ex inqʼa fariseeo, tan tulxh u kʼaxkʼo setiibʼa! Tan nik etoya juunil te txhaq laalavil inqʼa txhiko, u meenta, u txʼumbʼisabʼ tetz etxhbʼubʼal, tuchʼ u ruuta, atz tuchʼ jankʼal inqʼa etxhiko. Poro aʼ yeʼ nik ebʼan inqʼa kam uvaʼ ibʼoʼqʼolxhtuʼ; aʼe u jik uvaʼ laʼ ebʼan te inqʼa xaol. Tul jitoq at etaanima tiʼ isaʼax u quBʼaal Tiuxh. Pet bʼanvaq u jik te inqʼa xaol. Tul atoqxh etaanima tiʼ quBʼaal Tiuxh. Tul jitoq laʼ etanbʼa taqʼax txhaq juunil te txhaq laalavil uvaʼ nik etaqʼ s-txheel.

43¡Txumlebʼalxh evatz, ex inqʼa fariseeo, tan tulxh u kʼaxkʼo setiibʼa! Tan chiibʼiyxh ex, uvaʼ, aʼ nik kʼuqeʼvk ex t-inqʼa bʼaxa xhiila tiʼ toksal eqʼij tuulbʼal inqʼa kʼulbʼal ibʼ. Tul chiibʼiyaqxh ex, tiʼ uvaʼ nik taqʼax bʼaʼnil ekʼuul taʼn inqʼa xaol t-kʼayibʼal tiʼ toksal eqʼij.

44¡Txumlebʼalxh evatz, ex, inqʼa nik txhusun ibʼekʼbʼal inqʼa qumol s-tijaq imam Israeel, tuchʼ ex, inqʼa fariseeo, tan tulxh u kʼaxkʼo setiibʼa! Tan ¡tira kaʼvatz kuxh ex! Bʼantan bʼaʼn etilon qʼaoq, poro aʼe tan, ech bʼanel etaʼn, eche ijulil invaʼq kamnaʼq uvaʼ yeʼ naʼl tatin inqʼa kantxhaq s-tuul. Tan kam koq inatxhbʼe invaʼq xaol u kantxhaq uvaʼ at tuul u jul, jankʼal eche ex. Tan yeʼ nik ibʼen sete uvaʼ il inqʼa kantxhaq at tetaanima, —xeʼt Jesuus.

45Yaʼne tzaqʼbʼ invaʼl uvaʼ nikich txhusun ibʼekʼbʼal inqʼa tij imam Israeel. Tul ech tal s-eche: —Txhusul qetz, ant vet oʼ nik akʼaxbʼisa oʼ tuchʼ u yol uvaʼ nik aaleʼ, —xeʼt te Jesuus.

46Tul ech tal Jesuus s-eche: —¡Echatetz kuxh exe inqʼa nik txhusun ibʼekʼbʼal inqʼa qumol s-tijaq imam Israeel! Tan ¡txumlebʼalxh evatz, tan tulxh u kʼaxkʼo setiibʼa! Tan mamala kuxh bʼekʼbʼal jeqel tzaan taʼn inqʼa kʼuy qumam nik etal inimat inqʼa xaol, kʼuxh tzaʼlxh inimaleʼ. Tul jitoq nik toleʼv inqʼa xaol tiʼ inimaleʼ. Atz jitoqxh inbʼeeq ex nik lotxhon tiʼ inimataʼ. Pet aʼl ech nik ebʼan, eche vaʼq bʼaal aqʼon uvaʼ tira nik ipalsa iviʼ tiqatz taqʼonvil.

47¡Txumlebʼal kuxh evatz, ex, inqʼa nik txhusun ibʼekʼbʼal inqʼa tij imam Israeel, tan tulxh u kʼaxkʼo setiibʼa! Tan yeʼ nik enima kam uvaʼ qat tal inqʼa qʼexsanich tetz viyol quBʼaal Tiuxh. Tan antxh iqʼomal vitxumbʼal inqʼa kʼuy emam etaʼn, inqʼa motx yatzʼon el inqʼa qʼexsanich tetz viyol quBʼaal Tiuxh. Echetz bʼanvatz kuxh nik motx ebʼaneʼ uvaʼs nik eviqt tiibʼa tal uvaʼ muqelaqe. 48Echetz tiʼ kam inqʼa nik motx ebʼaneʼ, tul nik ekʼutxhvat uvaʼ bʼaʼn kuxh sevatz kam uvaʼ ibʼan inqʼa kʼuy emam tiʼ iyatzʼax el inqʼa qʼexsanich tetz viyol quBʼaal Tiuxh. Tan aʼ, inqʼa kʼuy emam, motx yatzʼon el inqʼa qʼexsanich tetz viyol quBʼaal Tiuxh. Tul antetzxh txhan vet ex, yeʼ nik niman inqʼa yol uvaʼ motx tal ka inqʼa qʼexsanich tetz viyol quBʼaal Tiuxh. Echetz bʼan vatz kuxh nik ebʼan tiʼ ibʼitix tiibʼa tal uvaʼ muqtxʼik inqʼa qʼexsan tetz viyol quBʼaal Tiuxh.

49Tan tootzaqich quBʼaal Tiuxh kam inqʼa yaabʼla txhaq txumbʼal iqʼomich taʼn inqʼa xaol. Echetz s-tiʼile ech val u yol tal quBʼaal Tiuxh s-eche: «Laʼ intxhaq bʼen inqʼa qʼexsan tetz vinyol sexoʼl, ex vintenam. Atz laʼ intxhaq bʼen paxsan tetz vinyol sexoʼl. Poro at jolol uvaʼ yatzʼel laʼ motx telaʼ. Atz at jolt uvaʼ laʼ kʼaxbʼisali.

50Echetz aʼ toq ulk vet u kʼaxkʼo setiibʼa, ex inqʼa xaol, inqʼa itzʼlel ex s-txheel, ex inqʼa nik ilon inqʼa kaebʼal aanima uvaʼ nik ibʼan u Kriisto. Tul aʼ bʼen jaʼpik vet setiibʼa viyatzʼax el jatvaʼl inqʼa qʼexsan tetz vinyol, tetxhal sixeʼt tzaan u qʼij saq. 51Tan aʼ xeʼtinaʼq tzaan uvaʼs iyatzʼax el Aveel taʼn Kaiin, tetxhal tul kʼatz inqʼa yatzʼon el Sakariias, u qʼexsanich tetz vinyol, vikʼaol Verekiias; Sakariias uvaʼ, aʼ yatzʼaxik el vatz viqʼanalil u tostiuxh, vatz okaʼp u natxhkʼuulabʼal, tal uvaʼ nik tzʼeʼk inqʼa oya,» xeʼt quBʼaal Tiuxh.

Echetz toq val sete: Aʼ toq jaʼpik vet setiibʼa viyatzʼax el inqʼa qʼexsanich tetz viyol quBʼaal Tiuxh, ex inqʼa itzʼlel ex s-txheel, ex inqʼa nik abʼin vinyol, tul yeʼ nik eqejeʼ.

52¡Txumlebʼalxh evatz, ex inqʼa nik txhusun ibʼekʼbʼal inqʼa qumol s-tijaq imam Israeel, tan tulxh u kʼaxkʼo setiibʼa! Tan yeʼ nik eqejeʼ kam uvaʼ nik taqʼ quBʼaal Tiuxh ootzaqiloq. Tul nik emaq tabʼit inqʼa xaol kame vinuqul uvaʼ nik isaʼ quBʼaal Tiuxh tootzaqileʼ. Tan ech ex, eche vaʼq xaol uvaʼ at ilaave tiqʼabʼ tiʼ ipaloʼk t-invaʼq otzotz. Poro yeʼ nik ibʼanbʼe vilaave tiʼ ipaloʼk. Atz jitoq nik ilotxh inqʼa xaol tiʼ ipaloʼk tuul u otzotz, inqʼa nik saʼon ipaloʼk, —xeʼt Jesuus te inqʼa fariseeo, atz te inqʼa nikich txhusun ibʼekʼbʼal inqʼa tij imam Israeel.

53Yaʼetz kuxh vet Jesuus tiʼ talax inqʼa yol inqʼae, tul tira lakp vet iviʼ inqʼa fariseeo tuchʼ inqʼa nikich txhusun ibʼekʼbʼal inqʼa tij imam Israeel. Tul aalxh motx itxhokt tabʼil jolt tzaʼlla txhaq yol te Jesuus. Tul kam kuxh vet yolil nikich motx tabʼi te Jesuus. 54Tan aʼichaq titzʼabʼal uvaʼ yeʼich laʼ itxhabʼa Jesuus tel tuul inqʼa yol uvaʼ laʼich motx tabʼi. Tiʼetz vet invaʼq u yol uvaʼ yeʼich laʼ itxhabʼa Jesuus talaxeʼ tiʼ tel iqʼij inqʼa bʼekʼbʼal, tul tzitzi laʼich motx txhejk vet iyol tiʼ ixotxhox Jesuus.

Currently Selected:

Luk 11: ixlC

Highlight

Copy