Luk 8

Inqʼa ixoq uvaʼ nikich lotxhon quBʼaal Jesuus

1Paletz vet tuulbʼal inqʼa yol inqʼae, tul bʼen vet Jesuus tuchʼ kabʼlaval inqʼa nikich itxhus tibʼ s-kʼatza t-inqʼa tenam, atz t-inqʼa talaq tenam tiʼ ipaxsal inqʼa bʼaʼnla txhaq yol tiʼ ibʼant quBʼaal Tiuxh iqʼesalil kʼatz inqʼa xaol. 2Txhʼuyichetz jolt inqʼa ixoq tiʼ Jesuus, uvaʼ maʼtich ibʼanax bʼaʼn taʼn Jesuus. Tan maʼtich itukil el demoonio t-taanima taʼn Jesuus, atz inqʼa maʼtich ibʼant bʼaʼn t-inqʼa kamaq kuxh yaabʼilil. Antichetz Mal, uvaʼ Magdaala, chichich eʼli, uvaʼ maʼtich itukil el juqvaʼl demoonio t-taanima taʼn Jesuus. 3Antichetz Xhiv, u tixqel Chuusa, uvaʼ atich ok siqʼesal tiibʼa inqʼa kamaq tetz Eroodes Antiipas, atz tuchʼ Susaana, atz tuchʼich jolt mamala ixoq. Ayaʼletz inqʼa ixoqe motx lotxhon Jesuus tuchʼ inqʼa kamaq tetz, atz tuchʼ kabʼlavat inqʼa nikich itxhus tibʼ kʼatz Jesuus.

Uvaʼs txumbʼalimal itxhusun quBʼaal Jesuus, tul tiqʼo tzaan vaʼl avom tuulbʼal viyol

Tio 13.1-15, 18-23; Kuxh 4.1-20

4Tul mamala xaol motx imol tibʼ kʼatz Jesuus. Atz tal kuxh nikich motx tzajk xaol t-jolt inqʼa tenam. Tul txumbʼalimal itxhust Jesuus val u yol xoʼl inqʼa xaol. Tul ech tal Jesuus s-eche: 5—Bʼenetz val u vinaq ava itriigo, tul xeʼt vet tiʼ ixitul el inqʼa tiiya t-txʼavaʼ. Tanuletz inqʼa iiya een ex kuʼk t-bʼey, tul pal itzeqʼ vet inqʼa xaol. Aʼetz vet inqʼa tzʼichin, uvaʼ nik ixichʼan vatz amlikaʼ, motx iqʼon.

6Tant inqʼa iiya, aʼ ex kuʼk viʼ sivan. Itzʼetz veteʼ, tul motx kuxh tzaqi. Tan yeʼlich aʼ tal uvaʼ ex kuʼka.

7Tant inqʼa iiya, aʼ ex kuʼk xoʼl chʼiʼx. Chʼijetz vet u chʼiʼx, tul aʼ vet u chʼiʼx yeʼ kuyun ichʼij inqʼa talaq triigo.

8Tant inqʼa iiya, aʼ ex kuʼk tu bʼaʼnla txʼavaʼ. Itzʼetz u iiya, atz chʼij veteʼ. Tul bʼeenoxh ivatz taqʼa. Atetz vet iiya motx aqʼon oʼ txhaq kʼalal (100) ivatz, —xeʼt Jesuus.

Yaʼetz kuxh vet Jesuus tiʼ talax u yol, tul taqʼ jaʼ Jesuus tiʼ iqul. Tul ech tal Jesuus s-eche: —Jaʼletz ex, uvaʼ nik abʼin inqʼa yol uvaʼ nik valeʼ, tul bʼanvaq yaʼl tiʼ inimaleʼ, —xeʼt Jesuus.

9Yaʼne ech val u yol abʼil te Jesuus taʼn inqʼa nikich itxhus tibʼ s-kʼatza s-eche: —¿Kam talax inqʼa yol uvaʼ txumbʼalimal qat aaltaʼ? —xeʼtaq te Jesuus.

10Tul ech tal Jesuus s-eche: —QuBʼaal Tiuxh nik aqʼon etootzaqi kam nik tulbʼe quBʼaal Tiuxh ibʼant iqʼesalil t-taanima inqʼa xaol. Pet koq inqʼa xaol, tan txumbʼalimal kuxh nik intxhust inqʼa yol s-te. Tan eyaʼp vet u yol uvaʼ tal val u qʼexsanich tetz viyol quBʼaal Tiuxh s-naʼya uvaʼ ech tal s-eche:

«Kʼuxh nik motx til

kam uvaʼ nik inbʼaneʼ,

poro yeʼaq nik motx

ibʼen s-te

kam talax uvaʼ nik tileʼ.

Atz kʼuxh nik motx tabʼi

kam inqʼa yol nik valeʼ,

tul yeʼat nik motx tel s-tuul

kam uvaʼ nik valeʼ.»#Isaiias 6.9-10

11Echetz nik elkaʼp u yol uvaʼ txumbʼalimal qat valt xoʼl inqʼa xaol s-eche: Inqʼa iiya, tan aʼ nik elkaʼpun inqʼa iyolbʼal quBʼaal Tiuxh. 12U txʼavaʼ, tan aʼ nik elkaʼpun u taanima inqʼa xaol. Eche inqʼa iiya uvaʼ, aʼ ex kuʼk t-bʼey, tan aʼ nik elkaʼpun tiʼ inqʼa xaol uvaʼ nik abʼin viyolbʼal quBʼaal Tiuxh. Maʼtetz tabʼit vet viyolbʼal quBʼaal Tiuxh, tul aʼ diaavlo nik pal eesan el t-taanima. Tul qat isotzsa vet viyolbʼal quBʼaal Tiuxh s-kʼuul. Atz yeʼ qat iqej veteʼ. Tul yeʼ nik ichitp vet t-inqʼa paʼv.

13Atz echat inqʼa iiyae uvaʼ, aʼ ex kuʼk xoʼl sivan, tan aʼ nik elkaʼpun tiʼ inqʼa xaol uvaʼ oqxh ichiibʼ tiʼ tabʼil viyolbʼal quBʼaal Tiuxh. Pet oq nik til vet invaʼq vitzaʼlal tiʼ inimal viyolbʼal quBʼaal Tiuxh, tul nal kuxh nik tel vet ka tiʼ iqeexeʼ. Tan ech kuxh tatin inqʼa xaol, eche u iiya uvaʼ bʼiil kuxh at bʼen taqʼil t-txʼavaʼ.

14Atz echate inqʼa iiya uvaʼ, aʼ ex kuʼk xoʼl chʼiʼx, tan aʼ nik elkaʼpun tiʼ inqʼa xaol uvaʼ nik abʼin viyolbʼal quBʼaal Tiuxh. Poro aʼe tan, aʼ kuxh nik titzʼa u txʼijbʼal qʼiil tiʼ kam laʼ elkaʼp inqʼa kam tetz tuulbʼal u qʼij isaq tzitza vatz u txʼavaʼ. Tul aʼetz inqʼae, laʼ sotzsan el viyolbʼal quBʼaal Tiuxh t-taanima. Echetz laʼ ibʼan, eche inqʼa iiya uvaʼ yeʼ ikuy inqʼa chʼiʼx ichʼijeʼ, tul yeʼ taqʼ ivatz.

15Pet eche inqʼa iiya uvaʼ, aʼ ex kuʼk tu bʼaʼnla txʼavaʼ, tan aʼ nik elkaʼpun tiʼ inqʼa xaol uvaʼ nik abʼin viyolbʼal quBʼaal Tiuxh. Aʼetz vet inqʼa xaole uvaʼ ayaʼlxh ikʼuul, atz ayaʼlxh taanima nik inima viyolbʼal quBʼaal Tiuxh. Tul aʼ nik ibʼan vet u bʼaʼn. Tul jikxh vet nik ibʼantaʼ.{*}#8.15 Nik ibʼan quBʼaal Jesuus eela vichʼij viyolbʼal quBʼaal Tiuxh t-taanima inqʼa xaol tuchʼ vichʼij u triigo. Atz kam uvaʼ nik taqʼt u triigo ivatz, tul echatetz kuxh nik ibʼane inqʼa niman tetz Jesuus tiʼ vikʼutxht inqʼa bʼaʼnla txumbʼal tuchʼ inqʼa ibʼaʼnla bʼanoʼm. Tan aʼ vichʼij viyolbʼal quBʼaal Tiuxh tu taanima inqʼa xaol nik bʼanon uvaʼ laʼ ikʼutxh vet u bʼaʼnil.

Uvaʼs txumbʼalimal itxhusun quBʼaal Jesuus, tul tiqʼo tzaan u qʼij saq, atz tuchʼ itxiqun u txiqubʼal tuulbʼal viyol

Kuxh 4.21-25

16Yeʼxhabʼil invaʼq laʼ matxon invaʼq txiqubʼal, tul laʼ imuq ka inpaqte jaqʼ vaʼq almul. Atz jitoq laʼ toksa jaqʼ invaʼq txʼatxh. Pet een laʼ taqʼvat jaʼ tu tatibʼal uvaʼ niim at jaʼ. Echetz jaʼl inqʼa laʼ paloʼk tuul u otzotz, tul laʼ motx txiqul vet taʼn u txiqubʼal. Echatetz uvaʼe, laʼ ebʼan tiʼ ikʼutxhux viyolbʼal quBʼaal Tiuxh xoʼl inqʼa xaol. Tul laʼ tootzaqi vet inqʼa xaol uvaʼ laʼ ikuy sotzsa quBʼaal Tiuxh inqʼa ipaʼv. 17Echatetze viyolbʼal quBʼaal Tiuxh, tan yeʼl viyolbʼal quBʼaal Tiuxh laʼ kuxh kaj ka s-eche, uvaʼ ile nik taqʼ quBʼaal Tiuxh ootzaqiloq s-txheel te inqʼa tij imam Israeel, pet tetxhal laʼ alax el. Tan yeʼ laʼ utxhi uvaʼ laʼ kuxh kolox ka s-eche. 18Bʼanvaqetzxh yaʼl tiʼ ibʼix vinyol teviʼ. Tan jaʼl uvaʼ laʼ qeon vinyol, tul aʼetz uvaʼe, laʼ lotxhox taʼn quBʼaal Tiuxh tiʼ tootzaqil tel inuqul viyolbʼal quBʼaal Tiuxh. Pet koq inqʼa yeʼ nik ibʼan yaʼl tiʼ ibʼix vinyol tiviʼ, tan aʼl laʼ isotzsat el quBʼaal Tiuxh s-kʼuul jankʼal vatziʼ tootzaql veteʼ nik taleʼ, —xeʼt Jesuus.

Uvaʼs itxhokox quBʼaal Jesuus taʼn itxutx, atz taʼn inqʼa titzʼin

Tio 12.46-50; Kuxh 3.31-35

19Yaʼne aqʼbʼ vitxutx Jesuus tuchʼ inqʼa titzʼin Jesuus tal uvaʼ atich Jesuus. Tul yeʼ nikich motx tutxh ipaloʼk kʼatz Jesuus taʼn mamala xaol. 20Tul ech ex alaxoq te Jesuus s-eche: —Jesuus, il atxutx at tiʼ otzotz tuchʼ inqʼa eetzʼin. Tul il axh nik motx itxhok axh, —xeʼt eʼl Jesuus.

21Yaʼne ech tal Jesuus s-eche: —Ape. ¡Jabʼiletze vintxutx, atz inqʼa vitzʼin! Aʼe jatvaʼl inqʼa nik abʼin viyolbʼal quBʼaal Tiuxh, tul nik inima. Aʼetz uvaʼe, nik insaʼe, eche vintxutx tuchʼ vitzʼin, —xeʼt Jesuus.

Uvaʼs iyaʼsat quBʼaal Jesuus u mam kaqiqʼ jabʼal viʼ u mam aʼ

Tio 8.23-27; Kuxh 4.35-41

22Ibʼanetz vet vaʼt u qʼij, tul ok bʼen Jesuus tuul vaarko tuchʼ inqʼa nikich itxhus tibʼ s-kʼatza. Tul ech tal Jesuus s-eche: —Koʼvaq el tinjalit itziʼ u mam aʼ, —xeʼt Jesuus. Tul bʼenaq veteʼ. 23Tuulbʼaletz uvaʼ sebʼtich ixaon ok u vaarko viʼ u mam aʼ, tul bʼen Jesuus t-vataʼm. Tul aqʼbʼil kuxh ul val u mam kaqiqʼ jabʼal viʼ okaʼp u mam aʼ. Tul oqxhich vet ipal kuʼ aʼ tuul u vaarko. Atz tetxhichxh vet isotz kuʼ u vaarko jaqʼ u aʼ taʼn u kaqiqʼ jabʼal.

24Yaʼne ex bʼeyexoq vet Jesuus taʼn inqʼa nikich itxhus tibʼ s-kʼatza. Tul echaq tal te Jesuus s-eche: —¡Txhusul qetz! ¡Il vet oʼ toq kamoq oʼ taʼn u aʼ! —xeʼtaq te Jesuus.

Uletz vet ivatz Jesuus, tul ibʼekʼ vet Jesuus iyaʼ u kaqiqʼ jabʼal tuchʼ iyaʼ teyut tibʼ u mam aʼ. Tul yekich yaʼ veteʼ. Atz yekich tzʼinun vet iviʼ u mam aʼ.

25Yaʼne ech tal Jesuus s-eche: —¿Maqetz tira yeʼ kʼuqlel ekʼuul s-viʼ uvaʼ laʼ inlotxh ex? —xeʼt Jesuus.

Tul kaayaqichxh vet taanima inqʼa nikich itxhus tibʼ kʼatz Jesuus taʼn xoʼval. Tul ech nikich talaq vet s-vatzaq s-eche: —¿Kam talax naq u vinaq uvaʼe? Tan ¡tetxhal qat qeex naq taʼn u kaqiqʼ jabʼal, atz taʼn u mam aʼ! —xeʼtaq veteʼ.

Uvaʼs itukit el quBʼaal Jesuus demoonio t-taanima val u aj Gadaara

Tio 8.28-34; Kuxh 5.1-20

26Yaʼne aqʼbʼ vet Jesuus tuchʼ inqʼa nikich itxhus tibʼ s-kʼatza tinjalit el itziʼ u mam aʼ t-vitxʼavaʼ inqʼa aj Gadaara uvaʼ at vatzeʼl Galileea tu bʼenabʼ qʼij. 27Aqʼbʼetz vet Jesuus t-Gadaara, tul aqʼbʼ val u vinaq vatz Jesuus, antxh aj Gadaara. Tul naʼynaqich tok demoonio t-taanima. Tul tira yeʼl toksaʼm atich ok. Atz tira yeʼ nikich tatin t-totzotz. Pet aʼ kuxh atilich vet viʼ kampusaanto, tal uvaʼ nikich muqtxʼik inqʼa kamnaʼq.

28-29Poro tira txeyich vet u vinaq taʼn demoonio. Echetz kʼuxh nikich iqitzix vet u vinaq s-kadeena, atz kʼuxh nikich toksal txhʼitxhʼ tiqʼabʼ, poro tetxhal kuxh nikich irineʼ. Tul nikich tiqʼol vet bʼen u vinaq taʼn inqʼa demoonio t-inqʼa atibʼal uvaʼ yeʼl xaol jeqlel s-tuul.

Iletz kuxh Jesuus nikich teluʼl tu vaarko, tul ilix vet Jesuus taʼn u vinaq. Atz qʼex taqʼbʼeʼ, tul ijoqbʼa tibʼ vatz Jesuus. Tul xeʼt sichʼin. Tul ech tal te Jesuus s-eche: —¡Kam asaʼ s-ve, Jesuus, axh viKʼaol u Nimla Tiuxh! —xeʼte.

Yaʼne ibʼekʼ Jesuus u demoonio. Tul ech tal Jesuus s-te s-eche: —Elen el kʼatz u vinaqe, —xeʼt Jesuus.

Aloq jit yekich koq eleʼl inqʼa demoonio. Pet aʼl iqʼeqʼun u vinaq taʼn. Tul ech tal s-eche: —¡Yeʼ akʼaxbʼisa in! —xeʼt te Jesuus.

30Yaʼne ech tal Jesuus te u demoonio s-eche: —¿Kam abʼij? —xeʼt Jesuus.

Tul ech tal u demoonio s-eche: —Yeʼl atxhbʼe inbʼij, —xeʼte. Tan mamala demoonio atich ok t-taanima u vinaq.

31Yaʼne ijaq vet inqʼa demoonio bʼaʼnil te Jesuus, tiʼ uvaʼ yeʼlich laʼ taqʼ bʼen Jesuus tuul u jul tal uvaʼ atil mam kʼaxbʼichil tetz inqʼa demoonio. 32Mamalaetz kutxh nikich ikʼoatxhin tu vitz tal uvaʼ atich Jesuus, tul ijaq inqʼa demoonio bʼaʼnil te Jesuus, tiʼ uvaʼ aʼich laʼ itxhaqvat bʼen Jesuus inqʼa demoonio kʼatz inqʼa kutxh. Tul ikuy vet Jesuus ibʼenqe. 33Eletz vet el inqʼa demoonio t-taanima u vinaq, tul yekichaq vet ok kʼatz inqʼa kutxh. Tul yeʼxh taqla, ok vet inqʼa mamala kutxh t-ojqeʼl taʼn inqʼa demoonio. Tul motxaq itʼebʼlu vet bʼen tibʼ inqʼa kutxh xeʼ u mam aʼ. Tul yekich motx jiqʼbʼaq veteʼ.

34Tilaqetz vet inqʼa xeen kutxh kam uvaʼ utxhi, tul yekich motx itzʼeqaq vet tibʼ. Tul exaq tal vet itziulal inqʼa yol te inqʼa xaol tu tenam. Atz ex tal vet te inqʼa xaol, inqʼa een t-vitz.

35Yaʼne tzaj vet inqʼa xaol tiʼ tilix kam uvaʼ motx utxhi. Aqʼbʼetz vet inqʼa xaol tal uvaʼ atich Jesuus, tul tilaq veteʼ uvaʼ kʼuqlich vet u vinaq txala toq Jesuus. Tan yeʼlich vet inqʼa demoonio atich ok t-taanima u vinaq. Tul atich vet ok toksaʼm. Atz jikichxh vet titzʼabʼal. Tul mam xoʼval tzaj vet tiʼ inqʼa xaol uvaʼs tiltaʼ. 36Aʼetz vet inqʼa xaol uvaʼ ilon ibʼant u vinaq bʼaʼn, motx alon inuqul te inqʼa xaol, inqʼa motx aqʼbʼ tiʼ tilixeʼ kam uvaʼ ibʼan Jesuus tiʼ ichitp u vinaq tiqʼabʼ inqʼa demoonio.

37Yaʼne jankʼalxh vet inqʼa xaol, inqʼa motx tzaj t-inqʼa vitz tuulbʼal Gadaara, motx xeʼt tiʼ ijaqax bʼaʼnil te Jesuus, tiʼ uvaʼ laʼich eleʼl Jesuus tuulbʼal Gadaara. Tan mam xoʼval nikich motx itzajaq vet s-tiʼ.

Yaʼne pal vet jaʼ Jesuus tuul u vaarko inpaqte tuchʼ inqʼa nikich itxhus tibʼ s-kʼatza tiʼ iqʼaʼv Jesuus t-Galileea. 38Poro ijaq vet u vinaq bʼaʼnil te Jesuus, tiʼ uvaʼ laʼich bʼen tiʼ Jesuus, u vinaq uvaʼ maʼtich teleʼl demoonio t-taanima. Poro yeʼ ikuy Jesuus ibʼen u vinaq s-tiʼ. Pet ech tal Jesuus s-te s-eche: 39—Quxh vet tavotzotz. Tul bʼen aal te inqʼa eetzʼin aatzik u nimla bʼaʼnil uvaʼ qat ibʼan quBʼaal Tiuxh see, —xeʼt Jesuus.

Bʼenetz vet u vinaq, tul ex tal vet el tuulbʼal u tenam kam u mam bʼaʼnil uvaʼ ibʼan Jesuus s-te.

Uvaʼs tulsat quBʼaal Jesuus taanima vimeʼal Jaairo inpaqte, atz uvaʼs ibʼant quBʼaal Jesuus bʼaʼn vaʼt u ixoq uvaʼ kanon u toksaʼm quBʼaal Jesuus

Tio 9.18-26; Kuxh 5.21-43

40Aqʼbʼetz vet Jesuus inpaqte tu tenam Kapernauum tuulbʼal Galileea, tul mam tenam nikich ichiibʼ tiʼ taqʼbʼ Jesuus. Tan txʼebʼoʼmyaqich kuxh vet tiʼ taqʼbʼ Jesuus. 41Aqʼbʼetz vet val u vinaq vatz Jesuus uvaʼ Jaairoich ibʼij, iqʼonich iviʼ tu kʼulbʼal tibʼ inqʼa tij imam Israeel. Tul ijoqbʼa tibʼ vatz Jesuus. Tul ijaq bʼaʼnil te Jesuus uvaʼ laʼich bʼen Jesuus s-tiʼ t-totzotz tiʼ ibʼanax bʼaʼn vimeʼal. 42Tan atich vaʼl vatz imeʼal Jaairo uvaʼ taʼnichxhte. Poro bʼiitich kuxh vet ikameʼ. Tul kamal kabʼlavalich vet iyaʼbʼ.

Bʼenetz vet Jesuus tiʼ Jaairo, tul mam tenam ok bʼen tiʼ Jesuus. Tul oqxhich ipotxhʼox Jesuus taʼn u tenam.

43Atichetz val u ixoq xoʼl inqʼa xaol, val u ixoq uvaʼ bʼeeno kuxh nikich ikʼaxbʼ t-yaabʼil, tan tira yeʼ nikich iyaʼ vitxaqʼo u ixoq. Tul kabʼlavalich vet yaʼbʼ tok u yaabʼil s-tiʼ. [Kʼuxhetz maʼtich itxʼakt u ixoq ipuaq te aj tzʼak tiʼ viyaabʼil,] poro mij invaʼq aj tzʼak nikich toleʼv tiʼ ibʼant u ixoq bʼaʼn.

44Yaʼne ech itzaj u ixoq tiʼ iqul Jesuus. Tul ex ikan vitziʼ viqinkin txhas oksaʼm Jesuus tiʼ ibʼant bʼaʼn tu yaabʼil. Iletz kuxh vitziʼ viqinkin txhas toksaʼm Jesuus nikich ikan u ixoq, tul yekich yaʼ vet itxhaqp vitxaqʼo u ixoq.

45Yaʼne ech tal Jesuus s-eche: —¿Jaʼletze uvaʼ qat kanon in? —xeʼt Jesuus.

Tul yeʼxhabʼil invaʼq tal tibʼ. Pet ech tal vet Luʼ tuchʼ jolt inqʼa imol s-eche: —Txhusul qetz, aʼ inqʼa tename nik potxhʼon axh. Tul: «¿Jaʼletze uvaʼ qat kanon in?» chich axh, —xeʼt Luʼ.

46Tul ech tal Jesuus s-eche: —Atxh invaʼl qat kanon in, tan qat vabʼi teleʼl u tiqleʼm quBʼaal Tiuxh sinkʼatza, —xeʼt Jesuus.

47Tiletz vet u ixoq uvaʼ yeʼlich laʼ utxh imuqux vet u yol vatz Jesuus, tul xeʼt vet u ixoq tʼuntʼutxhoq t-xoʼval. Tul ijoqbʼa vet kuʼ tibʼ vatz Jesuus. Tul ech vet ivatz inqʼa xaol tal u ixoq inuqul u yol, tiʼ uvaʼ kam s-tiʼil ikan u ixoq vitziʼ viqinkin txhas toksaʼm Jesuus. Atz tal u ixoq uvaʼ yekich ibʼan bʼaʼn taʼn Jesuus.

48Yaʼne ech tal Jesuus s-eche: —Ixoq, tiʼ uvaʼ qat akʼuqbʼa akʼuul s-viʼ, tul qat inbʼanl vet axh bʼaʼn. Pet quxh vet tibʼaʼnil, —xeʼt Jesuus te u ixoq.

49Sebʼtichetz iyolon Jesuus te u ixoq, tul ul val u bʼanol txhaq uvaʼ tzajnaʼqich t-totzotz Jaairo, viqʼesal inqʼa xaol tu kʼulbʼal ibʼ. Tul ech tal s-eche: —Qat kamy vet vameʼal; yeʼ kuxh vet aal te naq u Txhusul qetz, —xeʼt te Jaairo.

50Tabʼietz vet Jesuus u yol uvaʼ nikich talax te Jaairo, tul ech tal Jesuus te Jaairo s-eche: —Yeʼ kuxh txumun axh. Pet kʼuqbʼa akʼuul s-viʼ. Tan toq itzʼeʼvoq vameʼal inpaqte, —xeʼt Jesuus.

51Aqʼbʼetz vet Jesuus totzotz Jaairo, tul yeʼxh jankʼal xaol ikʼuloʼk Jesuus s-tiʼ, pet taʼnxh Luʼ tuchʼ Jakoovo tuchʼ Xhun tuchʼ Jaairo, vibʼaal u ixvaak, atz tuchʼ vitxutx u ixvaak. 52Tul aalatxh motx itxumun inqʼa xaol tiʼ u ixvaak. Atz nikich motx toqʼ vet s-tiʼ. Tul ech tal Jesuus s-eche: —Yeʼ kuxh oqʼ ex, tan yeʼl u ixvaak kamnaʼqle. Pet aʼ kuxhte vatya, —xeʼt Jesuus te inqʼa xaol.

53Tul aʼl kuxh itzeʼlel Jesuus taʼn inqʼa xaol, tan tootzaqichaq veteʼ uvaʼ maʼtich ikam vet u ixvaak.

54Yaʼne itxey Jesuus iqʼabʼ u ixvaak. Tul ech tal Jesuus s-te s-eche: —¡Ixvaak, lakpen! —xeʼt Jesuus.

55Tul ¡ul vet taanima u ixvaak inpaqte! Atz yekich lakp veteʼ. Tul ibʼekʼ vet Jesuus taqʼax itxʼix u ixvaak. 56Tul kaayichxh vet taanima itxutx ibʼaal u ixvaak. Yaʼne itiila bʼekʼu ka Jesuus uvaʼ yeʼxh tal laʼich motx talvat u yol uvaʼ tila.

Currently Selected:

Luk 8: ixlC

Highlight

Copy