Mateus 20
20
La parábola de ls oubreiros de la binha
1«Assi, l Reino de ls Cielos ye acumparado a un home pai de família, que saliu pula manhana cedo a chamar oubreiros pa la sue binha; 2i apuis de fazer l cumben culs oubreiros de le pagar a un denheiro a cada die, mandou-los pa la sue binha. 3Arrimado a las nuobe de la manhana, saliu de casa i biu outros que stában na praça sien fazer nada 4i dixo-le: “Ide tamien bós pa la mie binha i pagarei-bos l que fur justo.” 5Eilhes, anton, fúrun. Saliu outra beç arrimado a meidie i a las trés de la tarde i fizo la mesma cousa. 6Saliu inda acerca de las cinco de la tarde i achou alhá outros parados i dixo-le: “Porque stais assi to l die sien fazer nada?” 7Eilhes respónden-le: “Porque naide mos chamou.” El dixo-le: “Ide tamien bós pa la binha.”
8Anton quando s’ampeçou a fazer de nuite, l duonho de la binha diç-le al sou alcabuete: “Chama ls oubreiros i dá-le la paga, ampeçando puls redadeiros até als purmeiros.” 9I habendo chegado ls de las cinco de la tarde, recebiu un denheiro cada un. 10Anton, quando chegórun ls purmeiros eilhes cuidórun que íban a recebir mais, mas recebírun tamien eilhes un denheiro. 11I al recebir falában contra l duonho, 12dezindo: “Estes últimos fazírun solo ũa hora i eigualeste-los a nós que aguantemos la fuorça i la calor de l die.” 13Mas el, respundendo-le a un deilhes, dixo-le: “Amigo, nun te fago qualquiera oufénsia; nun ye berdade que faziste cumigo l cumben de un denheiro? 14Agarra l que ye tou i bai-te ambora. You tamien le quiero dar a este último tanto cumo a ti. 15Ou será que nun tengo l dreito de fazer l que me dá la gana culas mies cousas? Acauso l tou uolho ye malo porque you sou buono?” 16Assi, ls redadeiros seran purmeiros i ls purmeiros seran redadeiros, porque muitos son ls chamados, mas poucos ls scolhidos.»
Treceiro anúncio de la Paixon i de la Rucerreiçon
(Marcos 10,32–34; Lucas 18,31–34)
17Quando iba a chubir para Jarusalen, Jasus agarrou ls doze deciplos daparte i dixo-le pul camino: 18«Mirai que bamos a chubir para Jarusalen i l Filho de l Home bai a ser antregue puls xefes de ls saçardotes i ls scribas, ban-lo a cundanar a la muorte 19i ban-lo a antregar als gentius para que fágan caçuada del, lo ínchan de baradas i lo curcefíquen, mas al treceiro die rucecitará.»
Ser amo i ser criado
(Marcos 10,35–45)
20Anton, bieno a tener cun el la mai de ls filhos de Zebedeu, cun ls filhos deilha, i botou-se por tierra pa le pedir algo. 21Al que el le dixo: «L que quieres?» Eilha dixo-le: «Arranja modo de, ne l tou reino, estes mius dous filhos se sentáren un a la tue mano dreita i outro a la tue mano squierda.» 22Jasus respundiu-le, dezindo-le: «Nun sabeis l que stais a pedir; podeis buer l cálece que you tengo de buer?» Eilhes respónden-le: «Podemos.» 23El dixo-le a eilhes: «L miu cálece si bubereis, mas nun stá na mie mano que bos séntedes a la mie mano dreita i a la mie mano squierda, puis esse campo ye para quien stá purparado por miu Pai.» 24Ls outros dieç, quando oubírun, quedórun anrabiados culs dous armanos. 25Anton, Jasus chamou-los para an pie del i dixo-le: «Sabeis que ls xefes de las naciones mándan neilhas i ls que ténen muito poder fáien sentir esse poder subre eilhas. 26Nun ha de ser assi antre bós, mas aquel de bós que quejir fazé-se grande, ha de ser buosso criado, 27i aquel que quejir ser l purmeiro antre bós, será buosso scrabo. 28De l mesmo modo, l Filho de l Home nun bieno para ser serbido, mas para serbir i dar la sue bida pa la salbaçon de muitos.»
Sana dous ciegos acerca de Jericó
(Marcos 10,46–52; Lucas 18,35–43)
29I quando se fúrun para Jericó, iba atrás del un grande juntouro de pessonas. 30Anton, dous ciegos que stában sentados a la borda de l camino oubírun que Jasus staba a passar i boziórun dezindo: «Senhor, ten pena de nós, filho de Dabide.» 31La giente renhie cun eilhes para que se calháran, mas eilhes inda boziában mais, dezindo: «Senhor, ten pena de nós, filho de Dabide!» 32Jasus parou, chamou-los i dixo-le: «Quei quereis que bos faga?» 33Eilhes respónden-le: «Senhor, que s’ábran ls nuossos uolhos.» 34Cheno de pena deilhes, Jasus topou ne ls uolhos deilhes i lhougo quedórun a ber i fúrun-se atrás del.
Currently Selected:
Mateus 20: EM14
Highlight
Share
Copy
Want to have your highlights saved across all your devices? Sign up or sign in
Evangelhos em Mirandês © Sociedade Bíblica, 2014.
