Ion 5

Iesusa ndona aiŋa mori, na ma meikramtaɨrmo mbembendeina ra anikta raia minmo ririptia neaŋrina

(5—10)

Iesusa Betesdana rurena au pukca tɨkca ramoot ianmo moa laŋa moatna

1Na iŋmbaia Iudanaŋgepta mbembendeina ra aniac ianna laruatna, ri, Iesusa Ierusalemma taŋgatna.

2Na Ierusalem auŋ aniacna inikca rurena au puk ianna eacrenan, na ma wuocna tɨŋ ianna roumbca eacrenan. Na an wuocna tɨŋna ia Sipsiparta Tɨŋ. Na an rurena au pukna ia mina Iburuna kam mbuŋa gaind ŋgacrena Betesda. Na mana roumbmbaica wacraet parmbaiap eacrenan. 3-4Na an wacraet parmbaina, roumbbebta meikramtaɨr wɨtapa, lamnik ŋgorikcapa, or ŋgorikcapa, meikramtaɨra gagrira menacrinanna anna eacrenan.#5.3-4 Na landamŋina ramtaɨr ndeida gainda lamŋirena, kabena kam tɨp toco gan wesap eacrenan. Na an kamma gaind, “Mina an rurena au pukmo numaina ndabirena. Na anna gaind, Raraŋ Aetaniacna mbaiŋna aiŋa morena ŋeroŋ ianna an rurena au pukca irikca pukmo mo numairena. Na pukca numai mai te, titocna roumbbebta meikramtaɨra an rurena au pukmo out ŋgoinna iriki puk te, ma ndo laŋa monandet.”

5Na ramoot ianna roumbapnanna anna tɨmpaik up ian ndeacrena, na mana an roumbca iarir 38na mɨn, na ma anap eacrenan. 6Na Iesusa watrinanna, an ramootta meraca eacrenan, na ma lamŋirenan, ma an roumbapmo kɨdrɨk rocotap eacrenan. Ainda moca Iesusa manmo madigiat, “U toŋgorinanna una tikca laŋa mona ki?”

7Ri, an roumbbebta ramootta mana kambmo gainda rutirinan, “Kacoot, an mɨnna pukca numai te, auk aŋgɨca taŋca an rurena au puk inikca tɨkna ramtaɨr kocor. Na aku ndo anna irikna mo te, kabena ramootta aukmo kunda anna iriknandet.” 8#Mt 9.6Karica Iesusa manmo gaindopatna, “U ŋgepca wɨtɨkca ndona bar aŋgɨca taŋ.” 9Na tawi ŋgoinna an ramootna tikca laŋ mamoat. Ri, ma ŋgepca wɨtɨkca ndona bar aŋgɨca mataŋgat.

Na an reaca Wɨktɨtɨkna Ra mbuŋa larurinan, 10#NA 20.10, na Nei 13.19, na Ier 17.21, na Mt 12.2, na Mk 2.24, na Lk 13.14, na In 9.14ainda moca Iudanaŋgepca an ramootmo watca mina manmo gaindopatna, “Mandeaca anna Wɨktɨtɨkna Ra, na anna wandɨk, u ndona bara kai aŋgɨca taŋ teac.” 11Na ma mina kambmo nda rutica aindopatna, “An ramootta aukmo moa laŋa morinanna, ma aukmo aindoprina, ‘U ndona barmo aŋgɨca taŋ.’” 12Ri, mina manmo madigiat, “Titocna ramootta unmo mboprinan? Na u ndona bar aŋgɨca taŋrena?” 13Na an ramootta laŋa larurinanna, ma mba lamŋiri, mandai ŋgoinna manmo mboprina. Na mana mɨnɨŋa gaind, meikramtaɨr wɨt ŋgoinna an ndeacrinan, na Iesus toco ma mataŋgat.

14 # In 8.11 Karica iŋmbaia Iesusa Raraŋ Aetaniacna Kacna wuocna inikca mbukca an ramootmo watrinanna ma eacrena. Ri, ma an ramootmo aindopatna, “U warac. Mandeaca u laŋ mamori. Na u tɨp ŋgoreacna makukca kai mac mo teac, moca makuk aniac ianna unmo laruca u ŋgocrainandet.” 15Karica an ramootta taŋga Iudanaŋgepmo gaindopatna, “An ramootta aukmo, mo laŋa morinanna, anna Iesus niŋgik.”

16 # Mt 12.14 Ainda moca Iudanaŋgepca Iesusmo tɨp kirar ŋgoreaca morenan, na anna mɨnɨŋa gaind, ma an reikmo Wɨktɨtɨkna Ra mbuŋa morena. 17#In 9.4, na 14.10Na Iesusa mina kambmo gainda rutirinan, “Aukna Aetta ma memetmbaca aiŋa moa kɨp, kɨpca mandeacna mɨn. Na auk toco aku aiŋa morenan.” 18#Mt 26.4, na In 7.1, na 7.19, na 7.30, na 10.30, na 10.33, na Pil 2.6Na Iudanaŋgepca an kamma waraca mina Iesusa mo menacna toŋtoŋgar anikap. Na anna mɨnɨŋa gaind, ma Wɨktɨtɨkna Ra niŋgikna tɨpmo mba kundrenan. Wanaiŋ. Ma aindoprenan, Raraŋ Aetaniaca mana Aet ŋgoin. Na an kam mbuŋa ma ndomo moca Raraŋ Aetaniacna kirara larurinan.

Raraŋ Aetaniacna Nuoca ma aiŋa mona i aniacap

19 # In 5.30, na 8.28-29, na 12.49, na 14.10 Ainda moca Iesusa Iudanaŋgepta kambmo gainda rutirinan, “Aku nemo gidik, gidik ŋgoinna aindopnande, Nuoca ma ndona iro mbuŋa reac ianna mba moitndai, wanaiŋ. Ma ndona Aetta morina reik tiŋgikca watca ma morenan. Na reik muruŋa Aetta morenan, Nuoc toco anna morena. 20#Mt 3.17, na In 3.35, na 2 Pi 1.17Na Aetta ma Nuocmo matŋirenan tik, ma ndo morena reik muruŋmo manmo wandacrenan. Te, nenmo moca ne ŋgep ŋgoreac naŋgepnande. Na Aetta ma Nuocmo kabena aiŋir anik toco waracnandet, an aiŋira ma outta morinanmo kunnandet. 21#TW 32.39, na 1 Sml 2.6, na 2 GRP 5.7, na Lk 7.14, na 8.54, na In 11.25, na 11.43, na Ro 4.17, na Epe 2.5Na Aetta menacrina meikramtaɨrmo, moca mac nda ŋgeprinan, na minmo eteacna watta neaŋrena. Ainda moca Nuoc toco, ma meikramtaɨrmo ndona toŋtoŋ mbuŋa minmo eteacna watta neaŋrena. 22#Mt 11.27, na In 3.17, na 5.27, na 9.39, na Up 10.42, na 17.31, na 1 Pi 4.5Na Aetta ma ramoot ianmo ritri waparaca mba morena. An ritri waparacna aiŋir muruŋa ma ndona Nuocna para tɨkrina. 23#Pil 2.10-11, na 1 Io 2.23Ainda moca meikramtaɨr muruŋcamiŋa Nuocna imo aŋgɨ ŋgepnandet. Na an tɨpna kirara mina Aetna i aŋgɨ ŋgeprena. Na meacramoota Nuocna imo aŋgɨ ŋgep ŋgocor, ma an Aetta an Nuocmo mandaca kɨprina imo mba aŋgɨ ŋgeprinan.

24 # In 3.15-18, na 6.40, na 8.51, na 1 Io 3.14 “Na aku nemo gidik, gidik ŋgoinna aindopnande, ramootta aukna kambca waracrenan, na Aetta aukmo mbagɨrica kɨprinanmo rɨpac te, ma iarwarna eteacna watapmo memetmbaca eacraŋnandet. Na ma ritri waparac ŋgocor, na ma memenacmo tɨkcarica ma eteacna watap eacrenan.

25 # In 5.28, na Epe 2.1, na 2.5-6, na Kol 2.13 “Na aku nemo gidik, gidik ŋgoinna aindopnande, kɨdrɨkca kɨpca laruna mamoek, na mandeaca ma kɨpca larurina, te, an menacrina meikramtaɨra Raraŋ Aetaniacna Nuocna upna kambmo waracnandet. Na meikramtaɨra anna waracrenan, mina eteacna watta aŋgɨnande. 26Na Aetta ma ndo ŋgoinna ma eteacna watap. Na ma Nuocmo gargara neaŋrinan, na Nuoc toco ma ndo ŋgoinna eteacna watap. 27#Dan 7.13-14, na 7.22, na In 5.22, na Up 10.42, na 17.31Na ma Ramootna Nuoc, ainda moca Aetta manmo i aniaca neaŋrinan, te, ma meikramtaɨrmo ritri waparaca mo te, mina tɨpemb kirarirmo ma ritrina. 28Na ne aukna an kambta moca kai tamtamca lamŋi teac. Na an kɨdrɨkca laruna mamoek, na mukca eacrena meikramtaɨr muruŋa mina Nuocna upna kambmo waracnandet, 29#Ais 26.19, na Dan 12.2, na Mt 16.27, na In 6.40, na Up 24.15, na 1 Ko 15.52, na 1 Te 4.16te, mina mukmo tɨkcarica ŋgepca larunandet. Na meikramtaɨra tɨpemb kirarir laiŋga morenan, mina mac nda ŋgepca eacnandet. Na meikramtaɨra tɨpemb ŋgorikca morenan, mitoco mac nda ŋgepca ritri waparac taŋnandet. Te, ritri waparaca aindopnandet, mina ŋgocrainandet.”

Kabena wiwit toco aindoprena Iesusa ma mandai

30 # Mt 26.39, na In 4.34, na 5.19, na 6.38 Karica Iesusa gaind mac mbopatna, “Aku ndona nikinik iro mbuŋa reac ianna mona towanaiŋ. Aku Aet ndambuŋna kambca aŋgɨrenan, na anna raŋgairenan, na meikramtaɨrta tɨpemb kirarirmo ritrirena. Na aukna ritri waparac, ma wandoŋ niŋgik. Na anna mɨnɨŋa gaind, aku ndo ndona nikinikna iro mbuŋa mba raŋgairenan. Wanaiŋ. Aku Aetna toŋtoŋ niŋgikca raŋgairena, na ma ndo aukmo mbagɨrica aku kɨprina.

31 # In 8.13-14, na KIEK 3.14 “Na aku ndo kabea ndona aiŋapa ndona tɨpna kirara mbop te, meikramtaɨra aukna wiwitirina kambmo mba rɨpacitndai. 32#Mt 3.17, na In 5.36-37, na 8.18, na 1 Io 5.6-9Na kabena ramoot ian toco ma eacrenan, na ma toco aukna aiŋna kambapa aukna tɨp kirarmo wiwitirena. Na aku lamŋirenan, an kambca ma wiwitirenanna anna gidik.#5.32 Na kabena ramoot ian toco ma eacrenan, na ma toco aukna aiŋna kambapa aukna tɨp kirarmo wiwitirena. Na an ramootta Iesusa mboprenan, anna Raraŋ Aetaniac niŋgik.

33-34 # In 1.19-34, na 3.27-30, na Epe 2.8, na Ta 3.5 “Na aku ndo lamŋirena, ramoot ianna aukna kambca moi gagrana mɨnna wanaiŋ. Na aku lamŋirena, ŋgaua ne meikramtaɨrmo mbagɨrica mina Ion ndambuŋna kamb aŋgɨna taŋrina. Na aku toŋgorinanna, Raraŋ Aetaniaca nenmo mac nda aŋgɨna, aintik aku toŋgorenanna, ne Ionna aukna aiŋapa tɨpemb kirarirta kambmo mboprinanna, ne anna lamŋiraŋ. Na Ionna ma kamb gidkarmo wiwitirina. 35#Mt 13.20-21, na Mk 6.20, na 2 Pi 1.19Na Ion tikca ma tacna wɨwɨr toca wɨra eacrina kirara meikramtaɨrmo memetaca neaŋgatna. Na kɨdrɨk teker motem mbuŋa nena iroar inkara mana memetacna moca toŋtoŋgar koind.

36 # In 3.2, na 10.25, na 10.38, na 14.11, na 1 Io 5.9 “Na reaca Ionmo kunda tamuŋmbai, ma mandeaca aukmo wiwitirenan. Na anna aiŋira Aetta aukmo neaŋga aku muruŋa kocnai monandet. Na an aiŋa aku morenanna, anna meikramtaɨrmo mataua wiwitica mbopnandet, Aetta aukmo mbagɨrica aku kɨprinan. 37#Mt 3.17, na 17.5, na Mk 1.11, na Lk 3.22, na In 5.32, na 6.27, na 8.18, na 1 Ti 1.17, na 1 Io 4.12Na Aetta ndo aukmo mandaca aku kɨprinan, na ma ndo aukmo wiwitirena. Na ne mana kam upa mba waracrenan. Wanaiŋ ŋgoin. Na ne mana inpaŋanna mba watrenan. 38Na mana kamb toco, nenap mba eacrenan, na ramootta Aetta mandaca kɨprinanna, ne mana kambca mba rɨpacrena.#5.38 Na ramootta Aetta mandaca kɨprinanna, anna Iesus.

39 # TW 18.15-18, na Lk 16.29, na 24.27, na 24.44, na In 5.46, na Up 13.27, na 17.11, na 2 Ti 3.15, na 1 Pi 1.10-11 “Na ne gaind ndamŋirena, kambca Raraŋ Aetaniacna Timbigta Kapca eacrenanna, ma nenmo iarwarna eteacna wat laŋa neaŋrena. Ainda moca ne Raraŋ Aetaniacna Timbigta Kapna kambmo muruŋcamiŋa watreke, na ritrirena. Na Raraŋ Aetaniacna Timbigta Kap toco aukna moca wiwitirena, 40#In 1.11, na 3.19na ne auk ndambuŋ nakɨpca eteacna wat aŋgɨna karirenan.

41 # In 5.34, na 1 Te 2.6 “Na aku gainda mba lamŋireke, aku i aniac aŋgɨna moca aku meikramtaɨrmo an kambca mboprenan. 42Na aku nenmo lamŋirenan. Nena iroar inkara ne Raraŋ Aetaniacmo mba matŋirena. 43#Mt 24.5, na 24.24Na aku ndona Aetna i mbuŋa kɨprinan, na ne aukna kambmo mba aŋgɨatke. Na ramoot ianna ndona i mbuŋa kɨp te, ne tawi ŋgoinna mana kambmo aŋgɨnandet. 44#In 12.43, na Ro 2.29Na ne ndorita wiwitnanmo i aniaca aŋgɨrenan. Na an i aniaca Raraŋ Aetaniaca ndo niŋgikca neaŋrenan, na ne anmo aŋgɨna karirenan. Na ne ainta tɨpembta kirarira mo te, ne toca titoca tɨkca rɨpacit?

45 # TW 31.26-27, na Ro 2.12 “Na ne gainda kai lamŋi teac, aku nenmo Aetna lamnɨac ŋgoutta tɨkca ritri waparaca monanna. Wanaiŋ. Na ramootta nenmo ritri waparaca monanna, anna Mosesa ndo ŋgoin, na anna an ramootta ne gainda lamŋirenan, ma nenmo otacnandet. 46#RL 3.15, na TW 18.15-18, na In 1.45, na Up 3.22, na 26.22Na ne Mosesna kambmo rɨpac te, ne aukna kamb motocmo rɨpacnandet. Na anna mɨnɨŋa gaind, an kambca ma tirrinan, anna aukmo wiwitirena. 47#Lk 16.31Na ne an mana tirrina kambmo rɨpac ŋgocor te, ne titoca tɨkca aukna kambmo rɨpacit?”

Currently Selected:

Ion 5: MbKamNT

Highlight

Copy