GYƆNI 4

1Ka Farisidima maa daa ti wum, ni, Yisa la'amni la nyaandɔliba pam ka suuri ba Naawunni koom, halli nti gaari Gyɔni ŋɔn daa la'am seeba la. 2(Amaa pa Yisa mammaŋŋa n suuri ba, amaa u nyaandɔliba maa n daa suura.) 3Dizugu Yisa ŋɔn daa wum ban daa tɔ'asiri seem la, u daa yi Gyuudii tingbaŋŋu n‑labi n‑kyaŋŋi Galilii tingbaŋŋu ni. 4Ka u soori maa ni u daa kyaŋŋi n‑dɔli n‑yi la Samɛrii tingbaŋŋu ni. 5Ka ŋɔn daa bɛ Samɛrii tingbaŋŋu maa ni la, u daa kyaŋŋi nti paai tinseaa kan yuuri boonni Sikaari la. Bɛni maa daa bu wɔ'a ni paaluseaa ka Yaakubu daa pun zaŋŋi n‑ti u bii Yisifu sahanseaa sa la. 6Tɔ; ka Yaakubu buliga daa bɛ bɛni; ka Yisa ŋɔn daa kyaŋŋi u soori maa nti gyɛa, u daa kyaŋŋi nti zinni la buliga maa ziiya - agbaa saha n‑daa la.

7-8U nyaandɔliba maa daa gaari n‑kyaŋŋi timpuuni ni ba ti da bundirigu na. Ka Samɛrii pɔ'asɔ daa sigi buliga maa ni na ni u ti gbeaai koom, ka Yisa daa yɛli u, ni, u tim u koom ka u nyu. 9Ka pɔ'a maa daa labsi n‑yɛli u, “I nyɛ la Yɛhudiya nira ka man mun nyɛ Samɛrii pɔ'a, dizugu wula ka i nin toaai n‑susi koom man saani?” (Ya baŋŋma, ni, Yɛhudiya dima daa bu sakki ni ban ni Samɛrii dima la'amni taaba n‑dira, bee, n‑nyuura.) 10Ka Yisa yɛli u, ni, “I yi da baŋŋi la Naawunni ŋɔn tisiri seela, ka mi ŋɔni n tɔ'asiri n‑tiri i m‑boori koom wa, i da naa n‑yɛli u ka u ti i kɔsuŋŋu ni yɛlimaŋni.” 11Ka pɔ'a maa daa labsi n‑yɛli u, “M Bapira, i ka guuga ni i zaŋŋi n‑gbeaai koom, ka buliga wa mun zulim pam. Ka, i ya niŋi la wula n‑nya kɔsuŋŋu wa?” 12Ni, “Ti yaadoo Yaakubu daa ti ti buliga wa; ŋɔn ni u biisi ni ba bunkɔbri zaa daa nyuuri ka koom. Nyini n‑gaari Yaakubu, bee?” 13Ka Yisa daa labsi n‑yɛli u, ni, “Ninvugsɔ ŋɔn nyu koom wa, kɔnyuuri nin laa n‑gbaai u. 14Amaa ninvugsɔ ŋɔn nyu kɔseebu man yɛ n‑zaŋŋi n‑ti u maa muna - kɔnyuuri ku laa n‑gbaai di daama yaasa. Lala koom maa yɛ n‑leebi la din bunni u puuni, halli nti kyɛ ka u nya nyɔvurisuŋŋu din ka tariga.” 15Ka pɔ'a maa daa yɛli, “Tɔ, m Bapira, kur zaŋŋma lala koom n‑ti ma na, ka kɔnyuuri ku laa n‑gbaai ma yaasa halli ka n ku laa n‑sigri kpa na n‑gbeaari koom.”

16Ka Yisa yɛli u, “Tɔ; ka dinŋɔna kyɛma nti booli i sira maa na ka labi na.” 17Ka pɔ'a maa labsi n‑yɛli u, ni, “N ka sira.”, ka Yisa yɛli u, ni, “I yɛli la yɛlimaŋni, ni, i ka sira. 18I na mun kuli dɔppa anu, halli nyin ni dɔsɔ ŋɔn na bɛ ni maa gba pa la i sira: i yɛli ma la yɛlimaŋni.” 19Ka pɔ'a maa daa yɛli, “Mma, m Bapira! N baŋŋiya, ni, anabi n nyɛ i. 20Tɔ: kyɛ ka n boosi i bunseelli - ti Samɛrii yaadima daa gyeemni Naawunni zoori wa zugu, amaa ya Yɛhudiya dima maa yɛnni, ni, Gyɛrusalɛm tiŋŋa kɔkɔ n nyɛ Naawunni gyeeŋŋu ziiya ni yɛlimaŋni.” 21Ka Yisa daa labsi n‑yɛli u, “Pɔ'a, kur niŋni ma yɛdda; saha kyɛnni na ka ya yi ya gyeemni ti Ba Naawunni, di ku nyɛ la zoori wa zugu, bee, Gyɛrusalɛm timpuuni yɛttɔ'a. 22Yarima Samɛrii dima kur bu baŋŋi yan gyeemni sɔa, ti mun Yɛhudiya dima mi tin gyeemni sɔa, dama tiliginsim yi la Yɛhudiya dima maa saani na. 23Amaa saha kyɛnni na, halli ka pun paai na gba, ka ban gyeemni ti Ba Naawunni ni yɛlimaŋni la nin dɔli Sii Kasi soori n‑gyeemni u, ni yɛlimaŋni soori gba. Lala soori ka Naawunni boori ni ba dɔli n‑gyeemni u. 24Naawunni nyɛ la siiya, ka dizugu see ka ban ya gyeemni u dɔli la siiya soori maa n‑gyeemna, ni yɛlimaŋni soori gba.” 25Ka pɔ'a maa daa labsi n‑yɛli u, ni, “M mi halli, ni, ba n boonni sɔ Masiiya, bee Kirisita, la nin kyɛ na, ka u yi ti kyɛ na u nin wulisi ti bunseelli kam zaa.” 26Ka Yisa yɛli, “Mani nla - man ŋɔn tɔ'asiri n‑tiri i wa.”

27Di saha maa ka Yisa nyaandɔliba la daa labi na, ka ban daa nya u ka ŋɔn ni pɔ'a maa diri azama maa, di daa gyɛri ba pam. Amaa ba sɔ daa bu boosi pɔ'a maa, ni, “I boori la bɔa?”, bee, m‑boosi Yisa, ni, “Bɔ n kyɛ ka nyin ni pɔ'a wa diri azama?” 28Ka pɔ'a maa daa kyɛ u kɔyuuri maa ka labi n‑kyaŋŋi timpuuni nti yɛli niriba maa, 29ni, “Ya kyɛm na nti nya dɔsɔ ŋɔn yɛli ma man daa pun tum tunseesi zaa. Pa ŋɔna n nyɛ Masiiya maa?” 30Ka niriba maa daa yi tiŋŋa maa ni na, ni ba kyɛ Yisa saani na.

31Di saha maa ka Yisa nyaandɔliba daa bɛlim u, ni, “Ti Ba Rabbi, deaama diibu n‑di!” 32Ka ŋɔn mun daa labsi n‑yɛli ba, “M mari la bundirigu ni n di, ka ya ka di lahabaari maa.” 33Ka ba daa ŋmaligi m‑boosi taaba, ni, “Ka sɔ n zi bundirigu na n‑ti u, bee?” 34Ka Yisa yɛli, “Man bundirigu maa nyɛ la nŋɔa#:- n niŋni Ŋɔn tum ma na la yuubu yɛla, ka laa n‑tumni u tuma zaa nti naai. 35Ya bu nya? - ya yɛtti, ni, gɔya anaasi na kpalim ni kyi kyeebu saha, bee, m ma'ari ni? Amaa n ya yɛli ya ni, ni, ya wukkma ya nini n‑gɔsi puri maa suŋŋa - kyi maa pun bi n‑sakki kyeebu. Ni, pampaŋŋɔ 36ka ŋɔn kyeeri kyi maa deaari la u tuma ligri, ka la'asiri la kyi maa n‑doonni n‑guri nyɔvuri kan ka tariga; lala ka ŋɔn daa buri a maa, ni ŋɔn kyeeri maa gba, nin la'am taaba n‑di nya'asim. 37Lala ka yɛligu maa niŋni yɛlimaŋni, ni, ‘Ninvugsɔ n butta, ka sɔ mun n kyeera.’ 38Yarima muna - n daa tum ya ni ya kpɛ puseaa yan na bu tum ka tuma la ni, ni ya ti kyeeri kyi. Ninvugseeba pun tum ka tuma, ka ya mun deaari ba n‑nyari anfaani.”

39Tɔ, ka tiŋŋa wa Samɛrii niriba pampam daa niŋi Yisa yɛdda pɔ'a maa lahabaari zugu, dama u daa yɛli ba, ni, “U yɛli ma man daa pun tum tunseesi zaa.” 40Dizugu Samɛrii dima maa ŋɔn daa kyɛ u saani na maa, ba daa susi u, ni, u kpalimma m‑bɛ ba saani. Ka Yisa siri daa kpalim bɛni n‑niŋi daba ayi. 41Ka ba daadam pam m‑paasi niriba wa zugu daa wum u toori yɛligu ka niŋi u yɛdda di zugu. 42Ka daa yɛli pɔ'a maa, ni, “Pampaŋŋɔ di pa la nyin ŋɔn yɛli seem maa zugu ka ti niŋni yɛdda, amaa ti mammaŋŋa n wum u noori nti baŋŋi, ni, u siri nyɛ la duniya dima Tiligra maa.”

43Yisa ŋɔn daa niŋi u daba ayi bɛni n‑naai, u daa doaai n‑kyaŋŋi Galilii tingbaŋŋu ni. 44Yisa mammaŋŋa daa pun yɛli, ni, anabi ka gyirima u mammaŋŋa tiŋŋa. 45Ka ŋɔn daa ti paai Galilii la, niriba maa daa deaai u ni, dama ba gba daa kyaŋŋi la Gyɛrusalɛm nti puusi kyuu maa ka nya ŋɔn tum seem zaa kyuu maa ni.

46Ka Yisa daa naa n‑labi Galilii Kanna tinkpaŋŋa ni, bɛni ka u daa pun kyɛ ka koom la labgi daam. M‑paai bɛni ka Naaba kpambari sɔ n daa bɛ ni, ka u bii daa bɛ la Kapirinyum m‑beera. 47Ka doo maa ŋɔn daa ti wum, ni, Yisa yi Gyuudiiya m‑paai Galilii na, u daa doaai n‑kyɛ u saani na nti yɛli u, ni, u kyɛma Kapirinyum na nti tibi bii maa, ni, di kur kpalim la beela ni u kpi. 48Yisa mun daa yɛli u, ni, “Ya yi bu nya alahazibu tunkara, ya sɔ ku sakki n‑niŋi yɛdda.” 49Ka kpambari maa daa labsi n‑yɛli u, “Ay, n daana! Kur kyɛm na ka m bibila maa di kpi.” 50Ka Yisa daa yɛli u, ni, “Kyɛma! I bii maa ku kpi.” Ka doo maa daa niŋi Yisa yɛligu maa yɛdda ka daa labi n‑kuli. 51Ŋɔn daa labri n‑kunni maa, u daa tuusi la u daabseeba soori ni, ka ba daa ti u lahabaari, ni, u bii maa mari alaafɛa. 52Ka u daa boosi ba m‑baŋŋi, ni, saha kani ka bii maa nya sookyi? - ka ba daa labsi, ni, “Soosa la wuntaŋŋa, kurigu yinni saha, ka u ningbimbiisim maa sa basi u.” 53Ka doo maa daa teaai, ni, lala saha deede ka Yisa sa yɛli u, ni, “I bii maa ku kpi.” Di zugu ŋɔn ni u yiri dima zaa daa niŋi Yisa yɛdda. 54Makkri tunkanŋɔ daa paasi la buyi ka Yisa daa tum, ŋɔn daa yi Gyuudiiya n‑kyɛ Galilii tingbaŋŋu na maa.

Currently Selected:

GYƆNI 4: maw

Highlight

Copy