LUUKI 19

1Yisa daa ti paai Gyɛrikoo n‑kpɛ timpuuni n‑gatta. 2Ka dɔsɔ daa bɛ bɛni ka u yuuri boonni Zakyeoosi. Bundaana n daa nyɛ u, ka u daa su tiŋŋa maa lampodeaari tuma fukumsi. 3U daa boori la u baŋŋi Yisa ŋɔn nyɛ sɔa, amaa niriba maa ŋɔn daa zoaai pam maa zugu u daa kɔŋŋi la u nyaabu, dama u daa nyɛ la ninvuggyiŋŋa. 4Lala zugu u daa zɔ n‑gaari ba tooni nti du kinkaŋŋa ni u ti nya u, dama Yisa daa ya dɔli la bɛni soori maa n‑gaari. 5Ka Yisa ŋɔn daa ti paai tii maa gbinni na, u kpalim n‑zaani ka gɔsi tii maa saazugu ka yɛli, “Zakyeoosi, sigma na yoomyooma, dama di kpa ma talasi ni n gbɛ i yiri ni zuna!” 6Ka Zakyeoosi daa sigi na yoomyooma n‑gyaari Yisa ni sufupeelli. 7Tɔ, ka niriba maa zaa daa nya Yisa ŋɔn kyaŋŋi nti kpɛ Zakyeoosi yiri maa, ka nyurimni ba kparima ni, n‑yɛtta, “U kyaŋŋi nti kpɛ tumbeeri daana wa yiri!” 8Amaa ka Zakyeoosi daa zɛ ti Dugma tooni n‑yɛli u, ni, “Nyama, pampaŋŋɔ n nin zaŋŋi n neema purigri n‑ti faradima, ka n yi daa fa sɔ buna yɔri, n nin laa n‑labsi di daama buna zii bunaasi zugu n‑ti u.” 9Ka Yisa daa yɛli u, “Zuna dabsiri wa tuliginsim paai i yiri wa ni na, dama nyin gba nyɛ la Ibrahim biiya. 10Dama man Ninsaala Bii daa kyɛ na ni m bɔ n‑nya ban bɔrigi m‑basi la ka tuligi ba.”

11Tɔ; ka ban daa wum lala maa, Yisa daa tɔ'asi yɛttɔ'anyɛsiri wa m‑paasi ba. Ba daa pɔtti la Gyɛrusalɛm, ka niriba maa daa teesiri, ni, u ya kyɛ ka Naawunni naam maa piili la yooma. 12Ka dizugu u daa yɛli ba, ni, “Nabisɔ n daa bɛ tinseaa puuni, ka u daa ya doaai n‑kyaŋŋi tinwa'aligu sa n‑di naam ka labi na. 13Ka dizugu u daa booli u daaba piiya na n‑zaŋŋi ligri n‑tɔri n‑ti ba sɔkam u tɔrli, ka yɛli ba, ‘Ya zaŋŋma ligri wa n‑walimni n‑ti ma, halli ni n ti yi n goorim maa n‑labi na.’ 14Tɔ, ka u daa kyaŋŋi u kyɛnni; amaa u tiŋŋa maa niriba daa bu boori u, ka ba daa tum niriba nti yɛli, ni, ba di diisi nira wa naam maa. Di zaa yɔri, u daa di naam maa. 15Ŋɔn daa di naam maa n‑naai la, u daa labi n‑kuli na, ka daa tum m‑booli ŋɔn daa zaŋŋi ligri n‑ti daabseeba maa na, nti boosi ba ni u baŋŋi ban daa zaŋŋi ligri maa n‑tum n‑nya nyoori seem. 16Tɔ, ka ŋɔn daŋŋi tooni maa daa kpɛ na nti yɛli, ‘N daana i ligri la nɔbi ni m‑paasi a taaba napɔmpiiya!’ 17Ka u yɛli u, ‘Mboo! Daabsuŋŋu n nyɛ i! Nyin su yɛttɔ'abisi fukumsi n‑zɛ yimmu maa, n nin zaŋŋi tinsi piiya fukumsi n‑niŋi i nuu ni’. 18Tɔ, ka ŋɔn pa u zugu la kpɛ na nti yɛli u dugma maa, ni, ‘N daana, i ligri la nɔbi ni m‑paasi napɔmbunu.’ 19Ka u yɛli ŋɔn mun gba, ni, ‘I nin ti su tinsi anu fukumsi.’ 20Tɔ, ka sɔ kyɛ na yaasa, ni, ‘N daana, nnya i ligri la nŋɔa. N daa zaŋŋi bɔbga m‑pɔbi a n‑dooli, dabeem ŋɔn daa mari ma la zugu. 21Dama halibeoo daana n nyɛ i; i boori ni i nya bunseelli kam zaa yɔri, ka kyeeri nyin daa bu buri seelli.’ 22Ka u yɛli u, ‘Nyin bibeoo wa! I mammaŋŋa noori ni yɛttɔ'a ka n zaŋŋi n‑lusi i! Ni, i daa mi, ni, n nyɛ la halibeoo daana, fa! - m‑boori buna yɔri, ka kyeeri man bu buri seelli! 23Tɔ! Ka bɔ n daa lee n‑niŋi i ka i daa bu zaŋŋi n ligri maa n‑dooli bankyi ni? - ka man da kuli na wa, n naa n‑kur nya nyoori m‑paasi n la'adaya maa zugu!’ 24- Ka daa ŋmaligi n‑yɛli ban zɛ bɛni maa, ni, ‘Ya deaam ligri maa u saani n‑zaŋŋi m‑paasi sɔ ŋɔn daŋŋi tooni na maa.’ 25Ka ba yɛli u, ‘Ti daana, u ligri napɔmpiiya pun bɛ la u saani!’ 26Ka u yɛli ba, ni, ‘N yɛtti ya ni, ninvugsɔ ŋɔn mari beela ya n‑nya m‑paasi, amaa ŋɔn ka seelli ŋɔna, halli ŋɔn mari seelli fiiŋ maa ka ba nin ti ya fa ka kyɛ u yɔri.’ 27Ni, ‘Amaa n dindaandimseeba ban daa bu boori ni n di naam n su ba la, ya zaŋŋma ba zaa na n‑ku ba ka n nini nya.’ ”

28Tɔ; ka Yisa ŋɔn daa nyɛsi ba nyɛsiri wa n‑naai, u daa doaai n‑gaari ba tooni n‑kpa Gyɛrusalɛm soori. 29Ka ŋɔn daa ti pɔtti tinkpanseesi an boonni Bɛtfeegyi ni Bɛtani la, seesi an zɛ Ɔlivii Zoori la lugri na, u daa tum u nyaandɔliba ayi, ni, 30“Ya kyɛm ti tooni nti kpɛ tinkpanseaa kan zɛ ya tooni sa la. Ya yi ti paai bɛni, ya nin nya buŋŋa ka u lɔ n‑zɛya, bumbilisɔ nira ŋɔn na zi m‑ba; ya lɔrigma u m‑mari na. 31Sɔ mun yi ya yɛli ya, ni, wula zugu ka ya lɔrigri u? yan yɛlim u, ni, ya Dugma m boori u.” 32Ka ŋɔn daa tum ninvugseeba maa daa kyaŋŋi nti nya ŋɔn yɛli ba seem maa. 33Ka ban daa lɔrigri buŋŋa maa sahanseaa ka ninvugseeba ban daa su u la daa boosi ba, ni, “Wula zugu ka ya lɔrigri u ni?” 34Ka ba daa labsi n‑yɛli ba, ni, “Ti Dugma boori u ni.” 35Ka ba daa mari u m‑paai Yisa saani na, nti yeaai ba kyinkyina m‑pa buŋŋa nyaaŋŋa maa, ka daa kyɛ ka Yisa ba u. 36Ka ŋɔn daa ba u n‑kyɛnna, niriba maa daa na zaŋŋi la ba kyinkyina n‑yɛligri soori maa zugu. 37Ka ŋɔn daa ti paai luginseelli soori maa ŋɔn daa zuligri n‑sigri Ɔlivii Zoori la, u nyaandɔliba maa zaa daa piili n‑tasira pampam m‑pɛ'ari Naawunni. Sufupeelli pɛ'abu ka ba daa moonna, ban daa nya alahazibu tunkariseesi ŋɔn tum la zugu. 38Ka yɛtta#:-

“Zugsuŋŋu m bɛ n‑ti nasɔ ŋɔn zaŋŋi ti Dugma yuuri na!

Sufudoaa m bɛ arizana ni!

Naawunni ŋɔn bɛ saazugu mari gyirima pam!”

39Tɔ; ka Farisiseeba ban daa bɛ zama maa ni daa yɛli Yisa, ni, 40“Karimba! Kpaasim i nyaandɔliba maa zugu!” Ka Yisa labsi n‑yɛli ba, “N yɛtti ya ni, ba yi pun sini vuuri, halli kuga wa gba naa n‑tasi n‑yɛli.”

41Ka Yisa ŋɔn daa ti pɔtti Gyɛrusalɛm n‑gɔsi n‑nya tiŋŋa maa, u daa kum ka zugu, ni, 42“Yarima Gyɛrusalɛm dima, zuna ya yi da kur baŋŋi din nin ti ya sufudoaa, di naa n‑sɔa amaa pampaŋŋɔ ya bɛ la zibsim ni zaŋŋi n‑kyaŋŋi di zii ni!” 43Ni, “Dama saha kyɛnni na ka ya dindaandima nin ti gbi tanni n‑dooli n‑gyiligi ya tiŋŋa maa zaa, ka ta'ai ka sɔya zaa, ka di mugsi ya pam. 44Ba nin ti daai ya gooma n‑lusi yarima ni ya biisi zugu, halli ni kugri yinni gba ku laa n‑kpalim m‑pa ka kpeaa zugu, dama ya daa bu baŋŋi Naawunni ŋɔn kyɛ na nti fa ya m‑basi sahanseaa maa.”

45Ka Yisa daa paai Naawunni Gyeeŋŋu Yiri maa ni nti kpɛ bɛni m‑piili n‑katti ban daa koosiri neema Yiri maa puuni n‑yiisiri ba. 46Ka yɛli ba, ni, “Di sɔbi n‑zaali, ni, ‘N Yiri wa nyɛ la Wunsusigu Yiri.’, amaa ya zaŋŋi ka n‑labgi la ‘ta'ayigsi ŋɔn sɔ'ari seela.’ ”

47Beoo kam zaa ka Yisa daa kpeeri Naawunni Gyeeŋŋu Yiri maa ni n‑wulisiri niriba, ka Gyeeŋŋu Toondaandima ni karimbadima maa daa boori sɔseaa ba nin nya n‑ku u, ban ni tiŋŋa maa ni kpamma maa. 48Amaa ba daa bu mi ban ya niŋi seem, dama sɔkam zaa ba'a daa kur bɛ la u wulisigu maa ni.

Currently Selected:

LUUKI 19: maw

Highlight

Copy