LUUKI 24

1Ka bɛkwai maa piiligu dabsiri, Alahari daari maa, pɔ'aba maa daa doaai asuba pinipini, ka zaŋŋi turaaliseebu ban pun da n‑zaali la m‑mari n‑kyaŋŋi gballi maa ziiya. 2Ban daa paai bɛni maa, ba daa nya ka kugseaa ban daa zaŋŋi n‑ligi gballi maa noori la daa pun bilim n‑yi kpaŋŋa ka kyɛ ka. 3Ka ban daa kpɛ gballi duu maa puuni, ba daa bu nya ti Dugma Yisa ningbiŋŋu maa. 4Ka di daa gyɛri ba pam. Di saha ka dɔppa ayi di yi na n‑zaani n‑tabli ba, ka ba sutura nya'ari nyain. 5Ka dabeem daa gbaai pɔ'aba maa pam, ka ba sunni ba zugri tiŋŋa. Ka dɔppa maa daa boosi ba, ni, “Wula ka ya boori nyɔvuri daana kpiimma ziiya? 6U laa n‑ka kpa, u yisigiya. Ya teaam ŋɔn daa yɛli ya seem, ŋɔn daa na bɛ Galilii tingbaŋŋu sahanseaa la. 7U daa yɛli ya, ni, di kpa la talasi ni ba zaŋŋi Ninsaala Bii maa n‑niŋi ala'akyi dima nuusi ni, ka ba kpaasi u n‑tabli dɔpulli zugu, amaa ka u nin ti neaai kum ni daba ata daari.” 8Di saha ka pɔ'aba maa daa siri teaai Yisa ŋɔn daa pun yɛli ba seem maa, 9ka daa labi n‑kuli yiri ni, ni ba ti yɛli Yisa nyaandɔliba pii ni yinni maa, ni ba taaba zaa. 10Mariama, Magdala tiŋŋa pɔ'a la, n‑daa la, ni Gyeoowana, ni Mariama Gyeemsi ma la, ni pɔ'aseeba m‑paasi ba zugu. Ka ba daa kyaŋŋi nti mooli yɛla wa zaa lahabaari n‑ti Yisa tuumudima maa. 11Amaa ba yɛttɔ'a maa daa ŋmanni la yɛttɔ'ayɔya n‑ti ba, ka ba daa bu niŋi ba yɛdda. 12Amaa Piita mun daa doaai n‑zɔ n‑kyaŋŋi nti paai gballi maa ni, n‑sunni n‑gɔsi ka puuni n‑nya tampeela maa kɔkɔ ŋɔn dɔya. Ka u daa labi n‑kuli, ka di niŋi u alahazibu din niŋi maa zugu.

13Tɔ. Di daari maa ka ba niriba ayi daa kyaŋŋi tinkpanseaa. Tiŋŋa maa yuuri daa boonni la Imeeyusi: ka nyɛ la maala ayɔpɔi zaŋŋi m‑paai Gyɛrusalɛm. 14Ka ban daa bɛ soori maa, ba daa diri azama n‑tɔ'asiri taaba zaŋŋi n‑kyaŋŋi bunseesi an daa niŋi maa yɛla. 15Ka ban daa kyɛnni n‑sɔsiri sahanseaa maa, Yisa paai ba saani na. U daa paasi ba zugu ka ba bata zaa la'am n‑kyɛnna. 16Amaa ba daa bu nyaŋŋi m‑baŋŋi u. 17Ka u boosi ba, ni, “Azambɔ ka ya diri ni taaba ya soori wa ni?” Ka ba kpalim n‑zaani, ka ba sufu na kur sa'am ni. 18Ka ba yinni, ŋɔn yuuri boonni Kliyɔpaasi la, daa gyɛrigi n‑yɛli u, ni, “Saanseeba zaa ban bɛ Gyɛrusalɛm puuni maa m mi din niŋi daba ayi wa puuni, di yi pa la nyin kɔkɔ, fa?” 19Ka u boosi ba, ni, “Bumbɔ yɛla?” Ka ba labsi n‑yɛli u, “Yisa ŋɔn daa nyɛ Nazarɛti nira la yɛla ka ti tɔ'asira. Anabi n daa nyɛ u, ka u daa tum tunkara ka tɔ'asi yɛttɔ'aseesi an daa wulisi u yaa ŋɔn bɛ seem maa, Naawunni saani ni niriba gba saani. 20Ni, ti gyeeŋŋu toondaandima ni ti kpamma maa zaŋŋi u n‑tisi ka ba kari u sariya ka kpaasi u n‑tabli dɔpulli zugu n‑ku u. 21Amaa tirim daa mari la tama, ni, ŋɔna n ya fa Izraɛli dima m‑basi. Ka din paasi dinŋɔ zugu, zuna nyɛ la daba ata daari yɛla wa ŋɔn niŋi maa. 22Yaasa, pɔ'aseeba ban bɛ ti saani n kur kyɛ ka di gyɛri ti, dama ba da daŋŋi n‑kyaŋŋi gballi maa ni zuna asuba wa, ka bu nya u ningbiŋŋu maa; 23ka labi na n‑yɛli ti, ni, ba nya malaakadima ka ba yɛli ba, ni, u neaaya. 24Ka ti ninvugseeba gba doaai n‑kyaŋŋi gballi maa ni, ni ba nya; ka di nyɛ la hoo pɔ'aba maa ŋɔn da kur yɛli seem. Amaa ba gba da bu nya Yisa.” 25Ka ŋɔna n daa yɛli ba, ni, “Yarima yamkɔŋŋniba wa! Ya bu wumni anabidima ŋɔn daa pun tɔ'asi yɛttɔ'aseesi la, ka bu sakki n‑niŋi a yɛdda yooma! 26Ammi, di daa bu kpa talasi ni Masiiya maa nya lala namsigu maa pɔi ka naayi kpɛ u naam gyirima ziiya?” 27Di saha ka u daa gbaai u yɛttɔ'a m‑piili n‑wulisiri ba u mammaŋŋa yɛla Naawunni Litaafi ni. U daa piili la Musa sɔppu ni, halli nti paai anabidima ban daa dɔli u nyaaŋŋa.

28Tɔ, ka ba daa ti pɔri tinkpanseaa ban daa kyɛnni maa, u niŋi hoo ŋɔn yɛ n‑gaari la tooni. 29Amaa ka ba goaai u n‑yɛli, “Kpalimma ti saani, dama wuntaŋŋa luya ka yuŋŋu zibra.” Ka u daa kpɛ, ni u ti gbɛ ba saani. 30Ka bundirigu saha ŋɔn daa ti paai maa, ba daa la'am taaba ni ba di, ka u daa zaŋŋi la diibu n‑susi Naawunni n‑niŋi ka, ka ŋmaasi n‑ti ba. 31Di saha ka ba nini di neaai ka ba baŋŋi u, amaa ŋɔn mun lili ka kyɛ ba. 32Ka ba yɛli taaba, “Ti sufu da bu pɛligi ŋɔn da tɔ'asiri n‑ti ti soori ni la? - ŋɔn da wulisi Litaafi maa gbinni la.” 33Tɔ: ka ba yisigi di saha maa n‑labi n‑kyaŋŋi Gyɛrusalɛm. Ba daa paaya, ka nyaandɔliba piiya ni yinni maa, ni ninvugseeba ban daa bɛ ba saani la, la'am n‑ziya. 34Ka ba yɛli ba, ni, “Ti Dugma siri neaaya ka Saimoon nya u!” 35Di saha maa ka Imeeyusi dima maa daa yɛli ba din niŋi ba soori ni. Ka laa n‑yɛli ba ŋɔn ŋmaasi diibu n‑ti ba ka ba baŋŋi u seem.

36Ka ban daa kur tɔ'asiri maa, Yisa mammaŋŋa di zaani ba sunsukkuni ka puusi ba. 37Amaa dabeem daa gbaai ba pam. Ba daa teesi, ni, ba nya la kpiinyisigi. 38Ka u boosi ba, ni, “Bɔ n niŋi ka di mugsi ya, ka ya birisiri ya teesa ni maa? 39Ya nyam n nuusi, ni n nɔba wa; mani nla! Ya siisim ma n‑nya! Siiya ka numni ni kɔba hoo man mari seem wa.” 40Ka ŋɔn daa yɛli nŋɔ n‑naai la, u daa wulisi ba u nuusi ni u nɔba. 41Amaa ba sufu ŋɔn daa pɛligi seem maa zugu ba daa bu nyaŋŋi n‑niŋi lala yɛdda, ka di daa gyɛri ba pam. Ka u boosi ba, ni, “Ya mari diseebu kpa?” 42Ka ba daa zaŋŋi zinseerigu beela n‑ti u 43ka u deaai ka n‑ŋɔbi ba tooni.

44Di saha maa ka u yɛli ba, “Yɛttɔ'a wa ka n daa pun tɔ'asi ya, man ŋɔn daa na bɛ ya saani sahanseaa la. N daa yɛli ya, ni, yɛttɔ'a pam pun sɔbi n‑dooli zaŋŋi n‑kyaŋŋi n yɛla Musa zaaligu maa ni, ni anabidima yɛla ni, halli Yuuma sɔppu maa ni gba. Di kpa la talasi ni anŋɔ zaasa ŋɔn wulisi seem la nin baasi n‑niŋi.” 45Ka u neaai ba yɛm ni ba ti baŋŋi Naawunni yɛligu maa gbinni, 46ka yɛli ba, “Di sɔbiya, ni, Naawunni ŋɔn ya n‑tum Masisɔ na maa nin nya namsigu lala pɔi, ka naayi neaai kum ni daba ata daari. 47Ni, ba nin zaŋŋi Masiiya yuuri m‑piili Gyɛrusalɛm timpuuni m‑moonni lahabaari maa n‑ti duniya wa zaa niriba, ni, ba ŋmaligma ka kyɛ ba tumbeeri tuma, ni ba ti nya ba taalli kyɛ-m‑pɛŋŋi. 48Yarima n nyɛ ban nyɛ buna wa zaa sɛhara dima maa. 49Ya nyama, n nin tum sɔ na hoo m Ba Naawunni ŋɔn daa pun basi nangbambasiri n‑ti ya seem maa. Yarima muna - ya kpalimma Gyɛrusalɛm halli ka ya ti deaai yiiko din yi saazugu ni na.”

50U daa zaŋŋi ba n‑yi halli nti paai Bɛtani; ka daa duusi u nuusi saazugu n‑susi Naawunni alibarika yɛlisuma n‑niŋi ba. 51Ka ŋɔn daa na kur susiri n‑niŋni ba sahanseaa maa, u du n‑kyaŋŋi saazugu ka kyɛ ba. 52Ka ba mun daa gyeem u ka ŋmaligi n‑labi Gyɛrusalɛm ni sufupeelli pam. 53Ka kur bɛ Naawunni Gyeeŋŋu Yiri maa ni m‑puusiri Naawunni.

Currently Selected:

LUUKI 24: maw

Highlight

Copy