MATIYU 11

1Tɔ: ka Yisa ŋɔn daa kpaam u nyaandɔliba pii ni ayi maa n‑naai, u daa kyaŋŋi tinkpanseesi an daa tabi bɛni maa n‑wulisiri m‑moonni yɛligu maa n‑tiri niriba.

2Di saha ka Gyɔni daa bɛ dansarika ni - Gyɔni sɔ ŋɔn daa su niriba Naawunni koom la. U daa ti wum Yisa ŋɔn daa tumni seem, ka daa tum u nyaandɔliba Yisa saani na, 3ni, “Nyin n nyɛ ŋɔn ya kyɛ na la, bee ti na gɔsim di daama soori?” 4Ka Yisa daa labsi n‑yɛli Gyɔni niriba wa, ni, “Ya labma nti yɛli Gyɔni yan wumni ka nyari seela: 5ni, zoomma nini neaara, ka gbarisi kyɛnna, ka ban mari kɔmni nyari alaafɛa, ka tubkpira daandima wumna, halli ka ban kpi gba neaari kum ni; ni, ka lahabasuŋŋu ka ba moonni n‑tiri faradima.” 6Ka laa n‑yɛli ba, “Ŋɔnkam bu birisiri n yɛla zugu mari zugsuŋŋu!” 7Gyɔni nyaandɔliba maa daa bakki n‑kyaŋŋi, ka Yisa mun daa piili n‑tɔ'asiri n‑ti daadam maa zaŋŋi n‑kyaŋŋi Gyɔni yɛla, ka boosiri ba, ni, “Bɔ ka ya daa kyaŋŋi mooni ni ya ti nya? Kyimnigu ka pɛbsigu zeera, bee? 8Bee bɔ ka ya daa lee n‑kyaŋŋi ni ya ti nya? Ninvugsɔ ŋɔn bɔbi suŋŋa? Ya bu nya? - ninvugseeba ban yeeri bunveela n kur bɛ nadima yiya ni.”; 9ka laa m‑boosi ba n‑yɛli, “Ka bɔ zugu ka ya daa lee n‑kyaŋŋi? - ni ya ti nya anabisɔ, bee? Yɛlimaŋni ka n ya yɛli ya, ni, halli u gaari anabi gba. 10Ŋɔna n nyɛ ban daa sɔbi sɔ yɛla la, ni, Naawunni yɛliya:-

‘Nnya, n tuumu nŋɔa;

N tumni u ni u ti daŋŋi i tooni:

Ŋɔna nin maali i kyɛnni maa soori n‑ti i.’

11Amaa yɛlimaŋni ka n ya yɛli ya, ni, Gyɔni Kɔsuura gaari bidibseeba pɔ'aba ŋɔn pun dɔ'ai la zaa; amaa ka n ya yɛli ya yaasa, ni, ninvugsɔ ŋɔn poora zaa ka bɛ Naawunni naam ni, di daama yi gaari ŋɔna.” 12Ka Yisa daa laa n‑yɛli, “Sahanseaa ka Gyɔni daa mooli u mooligu la, halli nti paai zuna, arizana naam yɛla ka ba moori n‑gbaari ni nimbirimoaa. 13Anabi dima la sɔppu, ni Musa zaaligu la, daa wulisiri anabitiri yɛla m‑mari yaa, halli nti paai sahanseaa ka Gyɔni daa ti kyɛ na. 14Halli ya yi ti sakki n‑deaai n yɛligu wa, n ya yɛli ya, ni, Gyɔni nyɛ la Ilaygya - sɔ ban daa yɛli u yɛla, ni, u nin labi na la. 15Ŋɔnkam mari tuba n nin wum, ŋɔn wumma!”

16Ka Yisa daa laa n‑yɛli, ni, “Ka bumbɔ ka n ya zaŋŋi n‑ŋmansi zuna niriba wa? - Ba ŋmani la hoo biisi ban zi daa ni m‑boonni taaba n‑yɛtti, 17ni, ‘Ti peebi yiiya n‑ti ya ka ya za'asi waa, ka ti laa m‑maanni la kuuri n‑ti ya ka ya bu sakki n‑kaasira!’ 18Dinŋɔna Gyɔni daa kyɛ na ka u ba'a ka diibu ni nyuubu yɛla ni, ka ya yɛli, ni, arizimbeoo n zi u zugu ni. 19Ka man mun Ninsaala Bii ti kyɛ na ka man ni niriba la'amni n‑dira ka nyuura, ka ya yɛli, ni, ‘Ya bu nya doo wa ŋɔn nyɛ beem daana ni danyuura seem? - ka u laa n‑lɔ zoori ni lampodeaariba ni ala'akyi daandima.’ Amaa Naawunni yam tumni n‑wulisiri kamaŋŋa yɛla.”

20Di saha ka Yisa daa gbaai tinsi maa galiŋŋu - tinseesi ŋɔn daa pun bɛ ni n‑tumni u alahazibu tuma ba saani la; ka di zaa yɔri ba daa za'asi, ni, ba ku wum u yɛligu n‑kyɛ ba tumbeeri ni ba teesibeeri yɛla. 21Ni, “Zugubeoo ka ya nin nya, yarima Kɔreezini dima ni Bɛtsaida dima wa! Dama ba yi di daa tum tunkara Taaya ni Saidoon tinsi ni hoo man tumni aseesi ya tinsi maa ni la, ban tumbeeri daandima wa daa naa m‑pun yɛ tankyɛra n‑zinni m‑bugi tampɛ'alim n‑wulisiri ba sufusa'aŋŋu ŋɔn nyɛ seem, ka takki ba halibeoo beebu la ka di daa yuui. 22Amaa n yɛtti ya, ni, Zaadaari halli Taaya ni Saidoon ninvugbeeri wahala gba ku paai ya dinni. 23Yarima muna, ya Kapirinyum dima wa, ya bu duusiri la ya mansi m‑paai arizana ni? Amaa ba nin sigsi ya kpiimma tiŋŋa ni sa. Dama alahazibu tunseesi an daa tum i saani maa yi daa tum la Sɔdoom tiŋŋa puuni, ka daa naa n‑kpalim m‑bɛ ni, halli ni zuna. 24Amaa n yɛtti ya, ni, Zaadaari halli Sɔdoom ninvugbeeri wahala gba ku paai ya dinni.”

25Di saha maa Yisa daa yɛliya, “M Ba Naawunni, nyin ŋɔn su arizana ni duniya wa, m pɛ'ari i ni, dama nyin zaŋŋi yɛla wa zaa n‑sɔ'ai ka kyɛ yam dima ni baŋŋniba, ka laa n‑kasigi a n‑wulisi n‑ti bileesi. 26Ii, m Ba, yɛlimaŋni lala veela i saani. 27Bunseelli kam zaa ka m pun deaai m Ba nuu ni. Sɔ ka ni m‑mi Bii maa na'ala u Ba maa m mi u; ka sɔ mun gba ka ni m‑mi m Ba maa na'ala mani u Bii maa m mi u; m‑paasi sɔkam man u Bii maa ŋɔn nin sakki n‑kasigi m Ba maa yɛla n‑wulisi n‑ti u la.” 28Ni, “Ya ninvugseeba ban zi zikara n‑gyɛ zaa, ya kyɛma n saani na, ka n nin kyɛ ka ya vuusi. 29Kyɛ ka man ni yarim la'am n‑tumna: di ŋmani la hoo nigi ayi ŋɔn darigri na'adoo seem, ya nin ti bamsi tuma man saani, dama ninvugmaŋni n nyɛ ma, ka laa m‑mari sufubaalim. Ya nin vuusi ni sufudoaa. 30Dama n na'adoo wa ku ŋmaari ya, ka n ziya maa fa'asi ni.”

Currently Selected:

MATIYU 11: maw

Highlight

Copy