San Juan 8

Ndakatuꞌun na Jesús xaꞌa iin ñaꞌa ña ndatuvi xiꞌin tiaa ra küu yii ña

1Ra saa ndakiꞌin Jesús kuaꞌan ra iku nuu yoo itun Olivos. 2Ra te ndituvi inka kii ra saa nandiko ra xaa ra ini korra veꞌe ñuꞌu kaꞌnu. Ra saa ndixaa takundiꞌi yuvi kan nuu ra, ra saa ndakunduꞌu ra, ra xaꞌa sañaꞌa ra na. 3Ra saa kuu ra ndixaa va sava ndia maestro sañaꞌa ndiayu Ndioxi, xiꞌin ndia fariseo, ra ndiaka ndia iin ñaꞌa ña ndatuvi xiꞌin tiaa ra küu yii ña ndixaa ndia nuu Jesús. Ra xani ndichi ndia ña maꞌñu takundiꞌi yuvi kan. 4Ra ndikaꞌan ndia xiꞌin Jesús kachi ndia saa:

―Tata Maestro, ñaꞌa yoꞌo ra xiꞌin iin tiaa ra küu yii ña ke kanduꞌu ña ndatuvi ña. 5Ra ndiayu ña ndakoo ra Moisés ra kaꞌan va ña, ña na kuvi taꞌan na siꞌi na xa suꞌva. ¿Ra ndia kuꞌva ke kachi tu yoꞌo? ―kachi ndia xiꞌin ra.

6Ra ña ndikaꞌan ndia tuꞌun yoꞌo, ra ndia kuni sandakava va ku vi ndia ra, ña vaꞌa na niꞌi ndia kuachi taxi ndia xaꞌa ra, káꞌán ndia. Ndi su Jesús ra nuu ñuꞌu va ndakandiee ra, ra xaꞌa ra tiaa ra nuu ñuꞌu kan xiꞌin nduku ndaꞌa ra. 7Ra ndakundiee va ndia ndakatuꞌun ndia ra, ra saa ndoniꞌi ra nuu ra, ra ndikaꞌan ra xiꞌin ndia kachi ra saa:

―Tu ndia iin ndoꞌo ndia köo vaꞌa kuachi tuvi ndo, ra na kunuu ndo kakin ndo yuu va ña ―kachi ra.

8Ra saa ndakandiee tuku va ra, ra tiaa tuku va ra nuu ñuꞌu kan nduꞌu ra. 9Ra te ndiꞌi xini soꞌo ndia ña ndikaꞌan ra tuꞌun kan xiꞌin ndia, saa ra ndakiꞌin xini mii va ndia ña iyoo va kuachi ndia, ra saa xaꞌa kee ta iin ta iin mii ndia kunaꞌnu kan kuaꞌan va ndia, ndia saa ra kee tu ndia sava kan va kuaꞌan ndia, ra saa nindoo mituꞌun va ñaꞌa kan nuu nduꞌu Jesús. 10Ra saa ndoniꞌi Jesús nuu ra, ra ndia nii ka yuvi köo ndixini ra, chi ndia mituꞌun saa va ñaꞌa kan ndichi, ra saa ndikaꞌan ra xiꞌin ña kachi ra saa:

―Nana, ¿ndia chi kuaꞌan ndia taxi kuachi xaꞌa kun? ¿A ndia nii ndia ndikäꞌan ña kuvi kun? ―kachi ra xiꞌin ña. 11Ra saa ndakuiin ñaꞌa kan kachi ña saa:

―Ndia nii ndia, Tata ―kachi ña.

Ra saa ndikaꞌan Jesús xiꞌin ña kachi ra saa:

―Ni yuꞌu tu käꞌan ña kuvi va kun. Kuaꞌan ra xä ka kun kuachi ―kachi ra xiꞌin ña.

Jesús ku ñùꞌù ña tuun nuu na yuuvi yoꞌo

12Ra saa ndikaꞌan tuku Jesús xiꞌin yuvi kan, kachi ra saa:

―Yuꞌu kuvi ra kuu ñùꞌù ña tuun nuu ña yuuvi yoꞌo, ra yuvi na ndikun yuꞌu ra käka na nuu ñaa, saa chi ñùꞌù ña taxi ña kutiaku yuvi va ke koo nuu na ―kachi ra xiꞌin na. 13Ra saa ndikaꞌan ndia fariseo kan xiꞌin ra kachi ndia saa:

―Yoꞌo, ra mii va kun kuvi ra ndakuiin xaꞌa kun, ra ña kan ke süvi ña ndaa vi ke kaꞌan kun ―kachi ndia xiꞌin ra.

14Ra saa ndakuiin Jesús kachi ra saa xiꞌin ndia:

―Vaꞌa ni mii yu ku ra ndakuiin xaꞌa va yu, ndi su ndiaa yaꞌvi va ña kaꞌan yu. Saa chi yuꞌu ra kundaa va ini yu ndia chi ke kee yu, ra kundaa tu ini yu ndia chi ke kuꞌun va yu; ndi su ndoꞌo ra kundäa ini vi ndo ndia chi ke kee yu, ra nii kundäa tu ini ndo ndia chi kuꞌun va yu. 15Ndoꞌo, ra ta kuꞌva kuni mii va ndo ke xa ndaku ndo kuachi, ra yuꞌu ra ndia nii yuvi xandäku yu kuachi vi. 16Ra tu xa ndaku yu kuachi, ra ndaku va xa ndaku yu ña, saa chi süvi indaa yuꞌu kuvi ra xa ndaku ña, chi Tata yu Ndioxi ra tiꞌvi yuꞌu vaxi va yu kuvi ra xa ndaku ña xiꞌin yu. 17Ra ndiayu mii ndo ke kaꞌan va, tu uvi yuvi ndakuiin xaꞌa iin chiñu, saa ra ña ndixa va kuvi ña. 18Ra yuꞌu ra ndakuiin mii yu xaꞌa yu, ra ndakuiin tu Tata yu ra tiꞌvi yuꞌu vaxi va yu xaꞌa yu ―kachi Jesús xiꞌin ndia.

19Ra saa nindakatuꞌun ndia ra kachi ndia saa:

―¿Ndia chi íin Tata kun? ―kachi ndia xiꞌin ra.

Ra saa ndakuiin ra kachi ra saa xiꞌin ndia:

―Ndoꞌo, ra xïni vi ndo yuꞌu, ra nii Tata yu xïni vi ndo, saa chi tu kundaa ini ndo yoo kuu yuꞌu, saa ra kundaa tu ini ndo yoo kuu Tata va yu ―kachi ra xiꞌin ndia.

20Ra ini korra veꞌe ñuꞌu kaꞌnu nuu íin ñaꞌa ña taan na xuꞌun ña soko na ke ndichi Jesús sañaꞌa ra, ta ndikaꞌan ra tuꞌun yoꞌo, ndi su ndia nii na ndixäa ndiee ini ña tiin na ra, saa chi täan tandiaa kii ña tiin na ra.

Kaꞌan Jesús ña kuchüun na kuꞌun na nuu kuꞌun ra

21Ra saa ndikaꞌan tuku Jesús xiꞌin ndia kachi ra saa:

―Yuꞌu, ra kuꞌun va yu, ra nanduku ni ndo yuꞌu, ndi su kuvi va ndo xaꞌa kuachi ndo, saa chi nuu kuꞌun yu, ra kuchüun vi ndo kuꞌun ndo ―kachi ra xiꞌin ndia.

22Ra saa ndikaꞌan ndia judío kan xiꞌin taꞌan ndia kachi ndia saa: ―¿A ra kaꞌni mii va kuvi ra, ña kan ke kaꞌan ra ña kuchüun yo kuꞌun yo nuu kuꞌun ra? ―kachi ndia.

23Ra saa ndakuiin Jesús kachi ra saa xiꞌin ndia:

―Ndoꞌo, ra nuu ñuꞌú yoꞌo va ke ndee ndo, ndi su yuꞌu, ra ndivi va kee yu; ndoꞌo, ra na yuuvi yoꞌo va kuvi ndo, ndi su yuꞌu, ra süvi ra yuuvi yoꞌo kuvi yu. 24Ña kan ke ndikaꞌan yu xiꞌin ndo ña kuvi ndo xaꞌa kuachi ndo, saa chi tu na kuïin ndo kandixa ndo yuꞌu ña ^kuu yu tiaa ra kuu yu, saa ra kuvi va ndo xaꞌa kuachi ndo ―kachi ra.

25Ra saa nindakatuꞌun ndia Jesús kachi ndia saa:

―¿Yoo kuvi yoꞌo? ―kachi ndia.

Ra saa ndakuiin ra kachi ra saa xiꞌin ndia:

―Xa ta yachi vi ndikaꞌan yu xiꞌin ndo yoo kuvi yu. 26Iyoo ni ña kaꞌan yu xaꞌa ña ^xa ndo ra sandaku tu yu xaꞌa ña xiꞌin va ndo. Ra ña ndaa va ke kaꞌan yu saa chi ra tiꞌvi yuꞌu vaxi yu ra ña ndaa va ke kaꞌan ra, ra ña ndikaꞌan ra kan xini soꞌo yu ke, kaꞌan yu xiꞌin na yuuvi yoꞌo va ―kachi ra xiꞌin ndia.

27Ndi su ndikundäa ini vi ndia ña kaꞌan ra, xaꞌa Ndioxi ra kuu Tata ra. 28Ra saa ndikaꞌan ka Jesús xiꞌin ndia kachi ra saa:

―Te xa na ndoniꞌi ndo yuꞌu ra xaa yoꞌo vichin, ra saa vi ke kundaa ini ndo ña kuu yu tiaa ra kuu yu, ra xä yu ndia nii ña kuni mii yu, chi ña sañaꞌa Tata yu yuꞌu va ke ^xa yu. 29Saa chi íin va ra tiꞌvi yuꞌu vaxi yu xiꞌin yu; Tata yu ra täan ndakoo mituꞌun ra yuꞌu, saa chi niña xa va yu ña kuni ra ―kachi ra xiꞌin ndia.

30Ra kuaꞌa ni na kandixa Jesús, ña kachi ra saa xiꞌin na.

Ña ndaa ke saña ndika yuvi

31Ra saa ndikaꞌan Jesús xiꞌin na judío na ndakundikun sata ra kachi ra saa:

―Tu iin ndisaa kii na kundikun ndo tuꞌun ña ^kaꞌan yu xiꞌin ndo, saa ra ndoꞌo kuvi ndo ndikun ndixa yuꞌu va. 32Ra ta xa na kundaa ini ndo ña ndaa, ra ña ndaa kan ke saña ndika ndoꞌo va ―kachi ra xiꞌin na.

33Ra saa ndakuiin na kachi na saa xiꞌin ra:

―Nduꞌu ra ndiseꞌe ra Abraham va kuvi ndi, ra ndia nii ichi täan kuꞌun ndi sa chiñu ndaꞌvi ndi nuu inka yuvi. ¿Ra nichuun ke kaꞌan yoꞌo ña saña ndika ndi? ―kachi na xiꞌin ra. 34Ra saa ndakuiin Jesús kachi ra saa xiꞌin na:

―Ña ndaa kaꞌan yu xiꞌin ndo, chi takundiꞌi yuvi na xa kuachi, ra tixi kuachi kan ke ñuꞌu va na, ra xaꞌndia ña chiñu nuu va na. 35Ra na kundaa ini ndo chi na xachiñu ndaꞌvi ra kindöo vi na kan veꞌe nuu xa chiñu na iin ndisaa tiempo, ndi su na kuu seꞌe mii ra xiꞌin xitoꞌo veꞌe kan, ra iin ndisaa tiempo va ndee na kan veꞌe ra. 36Ña kan ke, tu mii ra kuu Seꞌe Ndioxi kuvi ra na saña ndika ndoꞌo, saa ra ña ndixa ke saña ndika va ndo. 37Ra xa kundaa va ini yu ña kuu ndo ndiseꞌe ra Abraham, ndi su kuni va ndo kaꞌni ndo yuꞌu, saa chi xïin ndo kandixa ndo ña kaꞌan yu xiꞌin ndo. 38Yuꞌu, ra chiñu ña sañaꞌa Tata yu yuꞌu va ke kaꞌan yu xaꞌa xiꞌin ndo, ra ndoꞌo, ra chiñu ña sañaꞌa iva siꞌi ndo ndoꞌo va ke ^xa ndo ―kachi ra xiꞌin na.

Seꞌe timiaꞌa va kuvi na kachi Jesús xiꞌin na

39Ra saa ndakuiin na kachi na saa xiꞌin ra.

―Nduꞌu ra ra Abraham va kuvi Tata ndi ―kachi na.

Ra saa ndikaꞌan Jesús kachi ra saa xiꞌin na:

―Tu ndixa seꞌe ra Abraham kuvi ndo, saa ra chiñu ña xa ra kan ke sa tu ndoꞌo va. 40Ndi su ndoꞌo, ra na kuni kaꞌni va kuvi ndo yuꞌu, xaꞌa ña ndikaꞌan yu ña ndaa ña sañaꞌa Tata yu yuꞌu xiꞌin ndo. ¡Ra ra Abraham, ra süvi saa ndixa ra kan! 41Ra ndoꞌo ra chiñu ña ^xa tata va va ndo ke ^xa ndo ―*kachi ra xiꞌin na.

Ra saa ndakuiin na kachi na saa xiꞌin ra:

―Nduꞌu, ra süvi seꞌe saka na kuvi ndi, chi indaa va kuvi Tata ndi, ra Ndioxi va kuvi ra ―*kachi na.

42Ra saa ndikaꞌan Jesús xiꞌin na kachi ra saa:

―Tu ndixa seꞌe Ndioxi kuvi ndo, saa ra kuꞌvi va ini ndo kuni ndo yuꞌu, saa chi yuꞌu, ra nuu Ndioxi ke kee va yu ña xaa yu yoꞌo. Ra süvi ña kuni mii yu ke ndixaa yu, chi Ndioxi va kuvi ra tiꞌvi yuꞌu xaa yu. 43Ndoꞌo, ra küvi kundaa ini ndo xiꞌin tuꞌun ña kaꞌan yu xiꞌin ndo, saa chi xïin ndo kuni soꞌo ndo ña kaꞌan yu xiꞌin ndo. 44Ña kan ke seꞌe timiaꞌa va kuvi ndo, ra kuenda ri kan kuvi va ndo, ña kan ke kuni ndo sa ndo chiñu ña ^xa ri. Saa chi timiaꞌa, ra ndia ta kii xaꞌa ra niña ri xaꞌni kuvi va ri. Ri kan, ra köo ña ndaku ^xa vi ri, ra nii käꞌan tu ri ña ndaa va. Ra ta kaꞌan ri tuꞌun chiꞌña, ra ta kuni mii ri ke kaꞌan va ri; saa chi ri chiꞌña tuꞌun va kuvi ri, ra ri kan kuvi iva tuꞌun chiꞌña va. 45Ra ña kaꞌan yuꞌu, ña ndaa xiꞌin va ndo ke xïin ndo kandixa ndo yuꞌu. 46¿Ra ndia iin ndoꞌo kuvi ndo kuvi kaꞌan xiꞌin yu, ña iyoo kuachi yu? Ra tu ña ndaa va ke kaꞌan yu xiꞌin ndo, saa ra, ¿nichuun ke xïin ndo kandixa ndo yuꞌu tu saa? 47Saa chi yuvi na kuu kuenda Ndioxi, ra tuꞌun Ndioxi ke ^xini soꞌo va na, ndi su ndoꞌo, ra süvi kuenda Ndioxi kuvi ndo ña kan ke xïin ndo kuni soꞌo ndo tuꞌun Ndioxi ―*kachi Jesús xiꞌin na.

Xa iyoo va Cristo ra saa kaku ra Abraham

48Ra saa ndikaꞌan na judío kan xiꞌin Jesús kachi na saa:

―Xini vaꞌa va ndi ña ndikaꞌan ndi ña kuu kun ra ñuu Samaria, ra sana kun, ra kuu mii kun tachi ndivaꞌa ―*kachi na xiꞌin ra. 49Ra saa ndakuiin Jesús kachi ra saa xiꞌin na:

―Köo tachi ndivaꞌa ndikaa ini yu, chi Tata yu Ndioxi va kuvi ra xa toꞌo yu, ña kan ke kaꞌan ñaꞌa ndo xiꞌin yu. 50Yuꞌu, ra ndïꞌi ini yu a xa toꞌo na yuꞌu a kuëe xa toꞌo na yuꞌu va, saa chi iyoo va iin ra kuni ña na sa toꞌo na yuꞌu, ra ra kan kuvi tu ra xandaku kuachi va. 51Ra ña ndaa kaꞌan yu xiꞌin ndo, chi yuvi na kandixa tuꞌun ña kaꞌan yu, ra küvi na ―kachi Jesús xiꞌin na.

52Ra saa ndikaꞌan na judío kan kachi na saa xiꞌin ra:

―Vichin ke ^kundaa kaxi va ini ndi ña ndixa ke ndikaa va tachi ndivaꞌa yoꞌo, saa chi ra Abraham xiꞌin takundiꞌi na ndikaꞌan ndoso tuꞌun yuꞌu Ndioxi, ra ndixiꞌi va na. Ra yoꞌo tu kaꞌan, ña küvi na kandixa tuꞌun ña kaꞌan va kun. 53¿Ra a chee ka va yoꞌo nuu ra xii xikua ndi Abraham ra xitiaku ta yachi? Ra kan ra ndixiꞌi va ra, ra saa tu na ndikaꞌan ndoso tuꞌun yuꞌu Ndioxi va. ¿Ra yoꞌo, ra yoo kuvi kun tuvi kun? ―kachi na xiꞌin ra. 54Ra saa ndakuiin Jesús kachi ra saa xiꞌin na:

―Tu na chinduꞌu toꞌo ni yu tuꞌun xaꞌa mii yu, saa ra köo yaꞌvi ndiaa vi ña. Saa chi ra kachi ndoꞌo kuu Ndioxi va ndo kuvi ra chinduꞌu toꞌo tuꞌun xaꞌa yu. 55Ndi su mii ña ndaa ra xïni vi ndo ra. Ra yuꞌu, ra xini va yu ra. Ra tu na kaꞌan yu ña xïni yu ra, saa ra ra chiꞌña tuꞌun kuvi tu yuꞌu va xiꞌin ndo. Ndi su yuꞌu, ra xini va yu ra ña kan ke kandixa va yu ña kaꞌan ra. 56Ra ra Abraham xii xikua ndo ra xitiaku ta yachi, ra kusii ni va ini ra te kundaa ini ra ña kixi yu; ra xini ndixa va ra ña xaa yu, saa ra tiaa ni ka va kusii ini ra ―kachi Jesús xiꞌin na.

57Ra saa ndikaꞌan tuku na judío kan xiꞌin Jesús kachi na saa:

―Ndia nii uvi xiko uxi kuiya ke täan xaa vi kun, ¿ra kaꞌan kun ña xa xini kun ra Abraham? ―kachi na. 58Ra saa ndikaꞌan Jesús xiꞌin na kachi ra saa:

―Ña ndixa ke kaꞌan yu xiꞌin ndo, saa chi te kuni ka kaku vi ra Abraham ra xa iyoo va yuꞌu ―kachi ra xiꞌin na. 59Ra saa kiꞌin na yuu kuni kakin na Jesús; ndi su ndiseꞌe va ra nuu na, ra te ndiꞌi saa kita ra ini korra veꞌe ñuꞌu kan, ra suvi mii tiañu na ke ndiyaꞌa tu ra kuaꞌan va ra.

Currently Selected:

San Juan 8: mxvNT

Highlight

Copy