San Lucas 10

Tiꞌvi Jesús uni xiko uxi tiaa kuaꞌan ndia kaꞌan ndoso ndia tuꞌun Ndioxi

1Ra saa kuu ndikaxin Jesús uni xiko uxi tiaa, ndia ndikun sata ra, ra ta uvi, ta uvi chitaꞌan ra ndia. Ra chinuu ra ndia kuaꞌan ndia kaꞌan ndoso ndia tuꞌun Ndioxi iin takundiꞌi ñuu nuu kuꞌun ra. 2Ra saa ndikaꞌan ra xiꞌin ndia, kachi ra saa:

―Ña ndixa ke iyoo kuaꞌa ni va yuvi kumani kuni soꞌo tuꞌun Ndioxi. Ra ta kuꞌva iyoo itu ña xa vaꞌa sakee va yo, ke iyoo na, chi xa iyoo nduvi va na. Ña kan ke xiniñuꞌu ni va kaꞌan ndo xiꞌin Ndioxi ña na tiꞌvi ka ra, na chindiee taꞌan xiꞌin ndo, chi loꞌo ni va kuvi ndoꞌo na kaꞌan ndoso tuꞌun ra. 3Ra vichin kuaꞌan ndo sanduvi ndo ña ndikaꞌan yu xiꞌin ndo. Ra kuenda ni na koo ndo, chi ta iyoo ndikachi vali ri kuaꞌan tiañu ndivaꞌyu va ke iyoo ndo. 4Ra nii leka ndo kanïꞌi ndo, ra nii xuꞌun kanïꞌi ndo, ra nii küꞌun tu inka naꞌa ndixan va ndo xiꞌin ndo, ra nii kundïta ndo ña kaꞌan ndioxi ndo xiꞌin na ndakutaꞌan xiꞌin ndo ichi. Chi iin ndaku ndaku na kuꞌun va ndo. 5Ra te xa na xaa ndo iin veꞌe, ra xiꞌna ka va na kaꞌan ndioxi ndo xiꞌin na kachi ndo suꞌva: “Ña vaꞌa na koo xiꞌin ndoꞌo na ndee veꞌe yoꞌo”, kachi ndo xiꞌin na. 6Ra tu iyoo yuvi na iyoo ña vaꞌa ini, saa ra niꞌi ka na ña vaꞌa kuaꞌan xiꞌin ndo, koo xiꞌin va na, ra tu köo na, saa ra ndiko ña vaꞌa yoꞌo kuꞌun ña xiꞌin va ndo. 7Ra veꞌe nuu ndakiꞌin mani na ndoꞌo ke na koo ndo xiꞌin va na. Ra na kuxi ndo ña taxi na kuxi ndo, ra na koꞌo tu ndo tiakuii ra taxi na ndaꞌa va ndo. Saa chi takundiꞌi na xachiñu, ra iyoo va ichi na ña koo yaꞌvi na. Ra xïka ndo ta veꞌe ta veꞌe na kusun ndo. 8Ra te na xaa ndo iin ñuu, nuu ndakiꞌin mani na ndoꞌo, ra taxi na ñaꞌa kuxi ndo xiꞌin na, ra na kuxi va ndo ña. 9Ra tu iyoo na xiꞌi ñuu nuu xaa ndo, ra na sandaꞌa va ndo na. Ra kaꞌan ndo xiꞌin takundiꞌi yuvi, kachi ndo saa: “Xa kuyachin Ndioxi nuu yo ña kaꞌndia ra chiñu”, kachi ndo xiꞌin na. 10Ra tu ndixaa ndo iin ñuu ra ndixïin na ndakiꞌin mani na ndoꞌo, saa ra na kee ndo kuꞌun va ndo ra kaꞌan ndo xiꞌin na kachi ndo saa: 11“Ndia yaka ñuu ndo ña chichi xaꞌa ndi ke na sakoyo va ndi, ra saa ke kundaa ini ndo ña kundasi ndo tuꞌun Ndioxi, ra na kundaa ini ndo, chi xa kuyachin ni va Ndioxi ña kaꞌndia ra chiñu nuu ndo”, kachi ndo xiꞌin na ―kachi Jesús xiꞌin ndia itaꞌan xiꞌin ra.

12Saa ndikaꞌan ka Jesús xiꞌin ndia, kachi ra saa:

―Ña ndaa kaꞌan yu xiꞌin ndo, chi kii ña sandaku Ndioxi kuachi na yuuvi yoꞌo, ra chee ni ka va ña ndoꞌo na ñuu nuu xïin na ndakiꞌin na tuꞌun Ndioxi vichin nuu na ñuu Sodoma, na sandiꞌi Ndioxi xaꞌa xinaꞌa ―kachi ra xiꞌin ndia.

Ndoꞌo ni yuvi na xïin ndakiꞌin ichi Ndioxi

13Ra saa ndikaꞌan Jesús kachi ra saa:

―¡Ndaꞌvi ni na ñuu Corazín, xiꞌin na ñuu Betsaida! Chi kuaꞌa ni ña xituꞌun xa yu ñuu na, ra nindïko ini na. Ra tu ñuu Tiro xiꞌin ñuu Sidón ndixa yu ña xituꞌun yoꞌo, saa ra xa yachi vi nandiko ini na kan, ra xa ndakundixi ndaꞌvi va na iin tikoto ña tumi ña kueꞌe ni, ra xa ndakundee va na nuu yaa nuꞌu, ña ndañaꞌa na mii na ña xa ^nandiko ini na xaꞌa kuachi na. 14Ra ndoꞌo ni ka va na ñuu Corazín, xiꞌin na ñuu Betsaida, nuu na ñuu Tiro, xiꞌin na ñuu Sidón, kii ña sandaku Ndioxi kuachi xiꞌin na yuuvi yoꞌo. 15Ra ndoꞌo, na ñuu Capernaum, ra kuaꞌa ni va ña xituꞌun xa yu xini ndo. Ndi su ndixïin ndo kandixa ndo, ra kuꞌun va ndo ndivi tuvi ndo, ndi su ¡ndaꞌvi ni ndo!, saa chi, ndia ndiaya kaꞌnu va saxinu Ndioxi ndoꞌo ―kachi Jesús xiꞌin na ñuu kan.

16Saa ndikaꞌan ka Jesús xiꞌin ndia itaꞌan xiꞌin ra, kachi ra saa:

―Na xini soꞌo tuꞌun ña kaꞌan ndo, ra tuꞌun yuꞌu va ke xini soꞌo na. Ra na kundasi ndoꞌo, ra yuꞌu va kuvi ra kundasi na. Ra na kundasi yuꞌu, ra ra tiꞌvi yuꞌu xaa va yu kuvi ra kundasi na ―*kachi ra.

Xa nandiko ndia uni xiko uxi

17Ta nandiko ndia uni xiko uxi ndaxaa ndia, ra kusii ka vi ini ndia ndixaa ndia nuu Jesús, ndatuꞌun ndia xiꞌin ra kachi ndia saa:

―Tata, xiꞌin kivi kun tava ndi takundiꞌi nuu tachi ndivaꞌa. Ra kandixa va ña kee ña kuaꞌan ña xiꞌin ndiee kun ―kachi ndia xiꞌin ra.

18Saa ndikaꞌan Jesús xiꞌin ndia kachi ra saa:

―Ña ndixa ke, xini va yu ke̱e timiaꞌa ndivi. Ra iin ta ndakava taxa, saa ndakava ri ndia nuu ñuꞌu chi ndikundiëe ri xiꞌin Ndioxi. 19Ra yuꞌu kuvi ra taxi ndie̱e̱ ndaꞌa ndo, ña kuañu ndo koo xiꞌin tisuꞌma; ra sa tiaa tu ndo nuu ña ndivaꞌa va. Ra ndia nii ña ndöꞌo ndo. 20Ra na kusïi ini ndo ña kandixa tachi ndivaꞌa ndoꞌo, chi na kusii ini ndo xaꞌa ña xa ndikaꞌyu kivi ndo nuu tutu Ndioxi ña nduꞌu ndivi va ―kachi Jesús xiꞌin ndia.

Kusii ni ini Jesús

21Ra mii hora kan tiaa nii kusii ini Jesús xiꞌin ndiee Tachi Yii Ndioxi, ra ndikaꞌan ra kachi ra saa:

―Ndasakaꞌnu yu yoꞌo, Tata Ndioxi, saa chi yoꞌo kuvi ra xaꞌndia chiñu ndivi ra saa tu ñuꞌu va, saa chi chikaa seꞌe va kun ña vaꞌa yoꞌo nuu na ndichi xiꞌin na kundaa ni ini, ra ndañaꞌa va kun ña nuu na ndaꞌvi, na kundäa ini, na iyoo ta kuꞌva iyoo na kuachi vali, ra saa xa kun, Tata, chi saa kuni mii kun koo va ―*kachi Jesús.

22Ra saa ndikaꞌan ka ra xiꞌin yuvi kan kachi ra saa:

―Tata yu kuvi ra ndataxi takundiꞌi ñaꞌa ndaꞌa yu, ra ndia nii na xïni yo kuvi yuꞌu, ra kuu seꞌe Ndioxi, chi indaa Tata va yu kuvi ra kundaa ini yo kuvi yu, ra ndia nii tu na xïni yo kuvi ra kuu Tata va yu, chi indaa mituꞌun yuꞌu ra kuu seꞌe va ra kuvi ra xini yo kuvi ra, ra yuꞌu va kuvi ra ^ndañaꞌa Tata yu nuu na kuni mii yu ―kachi ra.

23Ra saa ndikoniꞌi Jesús, ra ndikaꞌan ra xiꞌin takua mii ndia itaꞌan xiꞌin ra, kachi ra saa:

―Vaꞌa ni ^kee na ^xini nuu ña kuu, ña xini ndo yoꞌo vichin; 24ra kaꞌan yu tuꞌun yoꞌo xiꞌin ndo, saa chi kuaꞌa ni na ndikaꞌan tuꞌun yuꞌu Ndioxi xinaꞌa, xiꞌin na xikuu rey, ra kuni ni na kuni na ña xini ndo yoꞌo vichin, ra ndixïni na ña; ra kuni ni tu na kuni soꞌo na ña xini soꞌo ndo yoꞌo vichin va, ndi su ndixïni soꞌo na ña ―kachi ra xiꞌin ndia.

Chiñu vaꞌa ña xa iin tiaa ra ñuu Samaria

25Ra saa ndakundichi iin ra maestro xini ndiayu Ndioxi ra kuyachin ra nuu iin Jesús ra ndikaꞌan ra xiꞌin ra ña kuni ra kotondoso ra ra. Ra kachi ra saa:

―Tata Maestro, ¿ni ke xiniñuꞌu sa yu ña vaꞌa niꞌi yu kutiaku yu xiꞌin Ndioxi ndia ndikaa ndikuꞌun? ―kachi ra xiꞌin Jesús.

26Saa ndakuiin Jesús kachi ra saa:

―¿Ni ke kachi ndiayu Ndioxi ña tiaa ra Moisés xinaꞌa? Ra ni ke kachi ña ña kaꞌvi kun ña? ―kachi ra xiꞌin ra.

27Ra saa ndakuiin ra maestro kan kachi ra saa:

―Suꞌva va ke kachi ña: “Na kuꞌvi ini yo kuni yo Ndioxi xiꞌin ndinuni nima yo, xiꞌin takundiꞌi ña tiaku yo, xiꞌin takundiꞌi ndie̱e̱ yo, xiꞌin takundiꞌi ña xini tuni yo; ra ta kuꞌva kuꞌvi ini yo xini yo mii yo, saa na kuꞌvi tu ini yo kuni yo inka na taꞌan va yo”, kachi ña ―kachi ra xiꞌin Jesús.

28Saa ndakuiin Jesús, kachi ra saa xiꞌin ra:

―Vaꞌa va ndakuiin kun. Ra tu na sa kun ña kaꞌan ña, saa ra niꞌi va kun kutiaku kun xiꞌin Ndioxi ―kachi Jesús xiꞌin ra.

29Ra ña kuni ra maestro xini ndiayu Ndioxi kan ña ndasa vaꞌa ra mii va ra ke ndindakatuꞌun ra Jesús, kachi ra saa:

―¿Yoo kuvi na taꞌan yo tuvi yoꞌo, Tata? ―kachi ra xiꞌin ra.

30Ra saa ndikaꞌan Jesús iin tuꞌun ndichi xiꞌin ra kachi ra saa:

―Saa ndoꞌo iin tiaa ra ke̱e ñuu Jerusalén, ra kuaꞌan ra chi ñuu Jericó. Ra ichi kan ndakoyo ndia kuiꞌna, ra ndakiꞌin ndiꞌi ndia ñaꞌa ra, ra ndia tikoto va ra ndakiꞌin ndia. Ra kani ni ndia ra; ra iin satakueꞌe ndiꞌi ndia ra; ra saloꞌo kuvi ra. 31Ra saa ndiyaꞌa sana iin sutu kuaꞌan ra ichi kan, ra ta xini ra kanduꞌu ra takueꞌe kan, saa ra iin xiyo xiyo va ndiyaꞌa ra kuaꞌan ra. 32Ra saa kuu ra ndiyaꞌa tu iin ra ndiso chiñu xiꞌin veꞌe ñuꞌu kaꞌnu va, ra seꞌe xikua ra Leví kuvi ra. Ra ta xini ra kanduꞌu ra takueꞌe kan, ra iin xiyo xiyo ndiyaꞌa tu ra kan va kuaꞌan ra. 33Ra saa ndiyaꞌa tu iin ra kee ñuu Samaria va kuaꞌan ra ichi kan, ra ta xini ra kanduꞌu ra takueꞌe kan, ra kundaꞌvi ka vi ini ra xini ra ra. 34Ra saa kuyachin ra nuu kanduꞌu ra takueꞌe kan, ra xatatan ra ra. Xiꞌin aceite xiꞌin vino, ra saa chikuꞌni ra tikoto nuu takueꞌe. Ra ta ndiꞌi saa sandaa ra ra sata burru sana ra, ra ndakiꞌin ra ra, kuaꞌan ra xiꞌin ra veꞌe tatu nuu kixi yuvi na xika ichi, ra ikan xindiaa ra ra. 35Ra ta ndituvi inka kii, ra saa tava ra uvi xuꞌun ña nani denario, ra taxi ra ña ndaꞌa ra xiꞌin veꞌe kan. Ra kuꞌva uvi kii ke chaꞌvi ra tiaa ra xiꞌin veꞌe kan. Ra ndikaꞌan ra xiꞌin ra, kachi ra saa: “Kondiaa loꞌo ra yoꞌo; ra tu na kuniñuꞌu ka kun xuꞌun kun xiꞌin ra, ra ta xa na ndiko yu saa ndachaꞌvi yu ña nuu kun”, kachi ra suꞌva xiꞌin tiaa kan ―*kachi Jesús xiꞌin ra xini ndiayu Ndioxi kan.

36Saa nindakatuꞌun Jesús ra maestro xini ndiayu Ndioxi, kachi ra saa:

―¿Ndia iin ndia uni kan kuvi ndia kuu taꞌan tiaa ra takueꞌe xa ndia kuiꞌna kan tuvi yoꞌo? ―kachi ra xiꞌin ra.

37Saa ndakuiin ra maestro xini ndiayu Ndioxi kan kachi ra saa:

―Ra kundaꞌvi ini xini ñaꞌa kuvi ra, tuvi yuꞌu ―kachi ra.

Ra saa ndikaꞌan Jesús xiꞌin ra kachi ra saa:

―Vaꞌa ni va ndakuiin kun. Kuaꞌan, ra saa ke na sa tu yoꞌo va ―kachi Jesús xiꞌin ra.

Ña Marta xiꞌin ña María

38Ra saa ndakiꞌin Jesús kuaꞌan ra xiꞌin ndia itaꞌan xiꞌin ra, ra ndixaa ndia iin ñuu loꞌo, nuu iyoo iin ñaꞌa ña nani Marta ra ndakiꞌin mani ña ndia veꞌe ña. 39Ra iyoo iin kuꞌvi ña ña nani María. Ra ta ndixaa Jesús veꞌe na, ra saa ndakunduꞌu ña María xini soꞌo ña ña ndakani ra. 40Ndi su ña Marta ra tiaa ni ndiꞌi ini ña chi iyoo ni chiñu nuu ña, ra saa kuyachin ña nuu Jesús, ra ndikaꞌan ña xiꞌin ra, kachi ña saa:

―Tata, ¿a kiꞌin kun kuenda? Ra na kaꞌan kun loꞌo xiꞌin ña María, kuꞌvi yu, ra na chindiee taꞌan ña xiꞌin yu. Saa chi ndakoò ndiꞌi va ña chiñu ndaꞌa yu ―kachi ña xiꞌin Jesús.

41Ra saa ndakuiin Jesús, kachi ra saa xiꞌin ña:

―Marta, Marta, ña ndixa ke ndiee ni ndiꞌi ini va kun, chi iyoo ni chiñu nuu kun ña sandiꞌi yoꞌo. 42Ndi su iyoo va iin chiñu ña xiniñuꞌu vaꞌa ka, ra ña María ra chiñu vaꞌa va ke ndikaxin ña, chi nduꞌu ña xini soꞌo ña. Ra ndia nii na kindiäa ña yoꞌo ndaꞌa ña ―kachi ra xiꞌin ña Marta.

Currently Selected:

San Lucas 10: mxvNT

Highlight

Copy