San Lucas 13

Na nandiko ini yo xaꞌa kuachi yo saa chi tu köo ra ndoñuꞌu yo

1Ra te sandiꞌi Jesús ndikaꞌan ra xiꞌin yuvi kan. Ra saa xaa sava na ndee kan ra ndatuꞌun na xiꞌin ra kachi na saa:

―Ra Pilato ra kuu gobernador kuvi ra tiꞌvi ndia soldado ra, ra ndixaꞌan ndia ña xaꞌni ndia sava tiaa ndia kee Galilea te ñuꞌu ndia veꞌe ñuꞌu kaꞌnu ñuu Jerusalén ña xaꞌni ndia kiti soko ndia nuu Ndioxi. Ra ndakava nuu nii ndia xiꞌin nii kiti ri soko ndia nuu Ndioxi ―kachi na xiꞌin ra.

2Ra saa ndakuiin Jesús, kachi ra saa xiꞌin na:

―¿Ni ke ndakani ini ndo xaꞌa ña ndoꞌo ndia yoꞌo, a ndia iyoo ni ka kuachi va kuvi ndia nuu takundiꞌi ka yuvi tuvi ndo? 3Ra ña kachi yuꞌu xiꞌin ndo ra süvi saa iyoo ña. Chi tu na nandïko ini ndo xaꞌa kuachi ndo, ra mii saa ke ndoꞌo tu ndoꞌo va. 4Ra na xaꞌun uni na ndixiꞌi ñuu Jerusalén te nduva torre ña nani Siloé sata na, ¿ra a iyoo ni ka kuachi na kan, nuu takundiꞌi ka na ndee ñuu Jerusalén, tuvi ndo? 5Ra ña kachi yuꞌu xiꞌin ndo ra süvi saa iyoo ña. Chi tu na nandïko ini ndo xaꞌa kuachi ndo, ra kuvi tu ndoꞌo va ―kachi Jesús xiꞌin na.

Tuꞌun ndichi xaꞌa itun koxi tun nditäxi kuiꞌi

6Ra saa ndakani Jesús iin tuꞌun ndichi nuu na kachi ra saa:

―Suꞌva ndoꞌo iin tiaa ra ndichi iin itun koxi nuu ñuꞌu, ra saa kuu ra ndixaꞌan ra xitoꞌni ra a xa iyoo kuiꞌi ndaꞌa nu, kaꞌan ra. Ndi su ndia nii ri köo ndikun ndaꞌa nu ndixini ra. 7Ra saa ndikaꞌan ra xiꞌin ra ndiaa ñuꞌu ra kachi ra saa: “Xa uni kuiya ke kixi yu nanduku yu koxi ndaꞌa nu. Ra ndia nii ri köo nindaniꞌi yu ndaꞌa nu. Ra vaꞌa ka na kaꞌndia va kun nu; saa chi ña uun va ke ndichi nu ndasi nu nuu ñuꞌu yu” ―kachi ra xiꞌin ra ndiaa ñuꞌu ra. 8Ra saa ndakuiin ra ndiaa ñuꞌu kan kachi ra saa xiꞌin ra: “Tata, xikan yu ña mani nuu kun, ra na kundichi ka nu saa iin kuiya; ra na ndasavita yu ñuꞌu xaꞌa nu, ra chikaa ka yu tatan xaꞌan xaꞌa nu. 9Ra a kusana taxi va nu kuiꞌi saa; ra tu nditäxi nu kuiꞌi ra saa ke tiaꞌndia va nu”, kachi ra ndiaa ñuꞌu kan xiꞌin xitoꞌo ra ―kachi Jesús xiꞌin na.

Sandaꞌa Jesús iin ñaꞌa kii yii sábado ña ndakindiee na

10Ra saa kuu iin kii yii sábado ña ndakindiee̱ na ra ndichi Jesús sañaꞌa ra yuvi ini veꞌe ñuꞌu; 11Ra suvi mii ini veꞌe ñuꞌu kan ke ndichi tu iin ñaꞌa ña xiꞌi, ra xa xaꞌun uni kuiya vi ke kutoso sata ña. Ra tachi ndivaꞌa va ke xa saa xiꞌin ña, ra ndiküvi vaꞌa vi nundaku sata ña. 12Ra te xini Jesús ñaꞌa ña xiꞌi kan, ra saa kana ra ña xaa ña nuu ra. Ra ndikaꞌan ra xiꞌin ña kachi ra saa:

―Nana, xa nduvaꞌa va kun vichin ―kachi ra xiꞌin ña.

13Ra saa chindee ra ndaꞌa ra sata ña, saa ra ndikun ndundaku va sata ña, ra xaꞌa ña ^ndasakaꞌnu ña Ndioxi va. 14Saa ra ndisaa ni ini ra kuchee ndiso chiñu ndiaa veꞌe ñuꞌu kan xiꞌin Jesús xaꞌa ña sandaꞌa ra ña xiꞌi kan, kii yii sábado ña ndakindiee̱ na, ra saa ndikaꞌan ra xiꞌin yuvi na ndee kan kachi ra saa:

―I̱ñu̱ va kii ke xiniñuꞌu sachiñu yo, ra kii kan ke na kixi ndo ña nandaꞌa ndo. Ndi su küvi nandaꞌa ndo kii yii sábado ña ndakindiee yo ―kachi ra xiꞌin na.

15Ra saa ndakuiin Jesús, kachi ra saa xiꞌin ra:

―Na chiꞌña tuꞌun va kuvi ndoꞌo, saa chi, ¿a ndäxi ndo sindiki sana ndo a burru sana ndo ña kuꞌun ri koꞌo ri tiakuii kii yii ndakindiee̱ yo, su ndaxi va ndo ri? 16Ra ñaꞌa yoꞌo, ra seꞌe xikua ra Abraham va kuvi ña. Ra xa xaꞌun uni kuiya vi ke katun kiti ndivaꞌa ña ña ndoꞌo ña kueꞌe yoꞌo. ¿Ra a küvi ndaxi ña kii yii sábado tuvi ndo? ―kachi ra xiꞌin na.

17Ra ta ndikaꞌan Jesús tuꞌun yoꞌo, ra na saa ini xini ra, ra tiaa ni kukaꞌan nuu na; ndi su yuvi na kuaꞌa kan, ra kusii ka vi ini na ña xini na takundiꞌi ña xituꞌun ña xa Jesús.

Kaꞌan Jesús tuꞌun ndichi xaꞌa ndikin itun mostaza

18Ra saa ndikaꞌan Jesús inka tuku tuꞌun ndichi xiꞌin na kachi ra saa:

―¿Ndia ña ke inuu xiꞌin ichi nuu xaꞌndia Ndioxi chiñu, ra ndia ñaꞌa ke kuvi chinuu yu xiꞌin ña? 19Ra kuni yu na kundaa ini ndo, chi ta kuꞌva iyoo ndikin loꞌo itun mostaza ña chiꞌi iin tiaa nuu ñuꞌu ra, ra xaꞌnu ña nduu ña ta kuꞌva iyoo iin itun chee va, ra ndia sàà va xaa xavaꞌa chiꞌyo ndaꞌa itun ña, ra kuꞌva saa va ke iyoo nuu xaꞌndia Ndioxi chiñu ―kachi Jesús xiꞌin na.

Tuꞌun ndichi xaꞌa ixan iyá ña kita xiꞌin ixan xitavaꞌa

20Ra saa ndikaꞌan tuku Jesús kachi ra saa:

―¿Ndia ña ke kuvi chinuu yu xiꞌin nuu xaꞌndia Ndioxi chiñu? 21Ra na kundaa ini ndo chi ña kuvi chinuu yu xiꞌin ichi nuu xaꞌndia Ndioxi chiñu kuvi ña ndoꞌo iin ñaꞌa ña kavanuu loꞌo ixan iyá xiꞌin kuaꞌa ni ixan ixtavaꞌa va, ra kuaꞌa ni nduu ña ―kachi Jesús xiꞌin na.

Yuvi na koo xiꞌin Ndioxi

22Ra te ndakiꞌin Jesús kuaꞌan ra ñuu Jerusalén, ra iin takundiꞌi ñuu naꞌnu xiꞌin ñuu vali yaꞌa ra kuaꞌan ra, ra sañaꞌa ra takundiꞌi yuvi kan tuꞌun Ndioxi. 23Ra saa nindakatuꞌun iin na Jesús kachi na saa:

―Tata, ¿a loꞌo ni va kuvi na kaku? ―kachi na xiꞌin ra.

Ra saa ndakuiin ra kachi ra saa:

24―Na sa nduxa ndo ña kee ndo yeꞌe tiañu; saa chi kuaꞌa ni yuvi kuni kiꞌvi, ndi su kuchüun ka na. 25Saa chi nuña ka va yeꞌe vichin, ndi su vaxi kii ra ndakundichi va mii ra xitoꞌo veꞌe kan ra ndasi ra yeꞌe nuu ndo. Ra ndoꞌo, na kindoo chi keꞌe; ra kaꞌan ndo xiꞌin ra kachi ndo saa: “Tata, ndakuña yeꞌe nuu ndi”, kachi ndo xiꞌin ra. Ndi su kuïin ka ra ndakuña ra yeꞌe nuu ndo, chi suꞌva va kachi ra xiꞌin ndo: “Xïni yu yoo kuvi ndoꞌo”, kachi ra xiꞌin ndo. 26Ra saa xaꞌa ndo kaꞌan ndo xiꞌin ra, kachi ndo saa: “Tata, xini va ndi yoꞌo chi ndixaa va kun ñuu ndi sañaꞌa kun nduꞌu, ra xixi tu ndi xiꞌin va kun”, kachi ndo xiꞌin ra. 27Ra saa ndakuiin ra kachi ra saa: “Xa ndikaꞌan yu xiꞌin ndo, chi xïni yu yoo kuvi ndoꞌo. Kuatiaꞌa ndo nuu yu, chi yuvi väꞌa va kuvi ndoꞌo”, kachi ra xiꞌin ndo. 28Saa ra kusuchi ni ini ndo, ra xaꞌa ndo kuaku ndo ndiakua ndakaxi nuu ndo. Saa chi kuni ndo ra Abraham xiꞌin ra Isaac, xiꞌin ra Jacob, xiꞌin takundiꞌi ka na na ndikaꞌan ndoso tuꞌun yuꞌu Ndioxi xinaꞌa, ña ndee na nuu xaꞌndia Ndioxi chiñu. Ra ndoꞌo tu, küvi kiꞌvi va. 29Ra kixi takundiꞌi yuvi na kee kumi saa tutun ña yuuvi ra ndakundee na nuu mesa ña kuxi na xiꞌin Ndioxi. 30Ra na ndikun vichin ra na inuu va nduu na, ra na inuu vichin ra na ndikun va nduu na.

Xaku Jesús xaꞌa na ñuu Jerusalén

31Ra te ndiꞌi ndikaꞌan Jesús xiꞌin yuvi kan, ra saa xaa sava ndia fariseo ra ndikaꞌan ndia xiꞌin ra kachi ndia saa:

―Kita ñuu yoꞌo ra kuaꞌan inka xiyo, saa chi ra rey Herodes ra kuni ra kaꞌni ra yoꞌo ―kachi ndia xiꞌin ra.

32Ra saa ndakuiin Jesús kachi ra saa xiꞌin ndia:

―Kuaꞌan ndo ra ndatuꞌun ndo xiꞌin yukuii ñaa, chi vichin xiꞌin tiaan ra tava ka va yu tachi ndivaꞌa ra sandaꞌa tu yu na xiꞌi va, ra kii uni vi sandiꞌi yu chiñu ña xa yu, kachi ndo xiꞌin ra. 33Ndi su vichin, xiꞌin tiaan, xiꞌin isa, ra xiniñuꞌu sa ka va yu chiñu ña xiniñuꞌu sa yu, saa chi väꞌa kita ña ña kuvi iin ra kaꞌan ndoso tuꞌun yuꞌu Ndioxi inka xiyo nuu ña kuvi ra ñuu Jerusalén ―kachi Jesús xiꞌin ndia fariseo.

34Ra saa ndikaꞌan ka Jesús kachi ra saa:

―¡Ndoꞌo, na ñuu Jerusalén, kuvi na ^xaꞌni na kaꞌan ndoso tuꞌun yuꞌu Ndioxi, ra xakin ndo yuu na tiꞌvi Ndioxi vaxi! ¡Kuaꞌa ni ichi kuni yu ndachitaꞌan yu ndoꞌo, ta kuꞌva ^xa iin nduxi xiꞌin seꞌe vali ri ña ^ndataan ri ri tixi ndixin ri, ndi su ndixïin ndo! 35Ra xaꞌa ña kan ke ndoo ndaꞌa va veꞌe ndo, ra sa tu ñuu va ndo, ra na kundaa ini ndo chi küni ka ndo yuꞌu, ndia te na xaa kii ña kaꞌan ndo kachi ndo saa: “Ra vaꞌa ni kuvi ra vaxi xiꞌin kivi Tata yo Ndioxi”, kachi ndo ―kachi Jesús xiꞌin na.

Currently Selected:

San Lucas 13: mxvNT

Highlight

Copy