San Mateo 19

^Sañaꞌa Jesús na ña väꞌa ndakoo tiaa yasiꞌi ra

1Ta sandiꞌi Jesús ña sañaꞌa ra na, ra saa kee ra Galilea, ra ndakiꞌin ra kuaꞌan ra, chi Judea ña ndikaa chi inka xiyo yuꞌu itia Jordán. 2Ra iin tiaꞌndia chee yuvi ndikun kuaꞌan xiꞌin ra, ra ikan sandaꞌa ra takundiꞌi va na xiꞌi. 3Saa ra ndixaa va sava ndia fariseo nuu íin Jesús, ña ^kuni ndia kotondoso ndia ra, ra saa ndikaꞌan ndia xiꞌin ra kachi ndia saa:

―Tata Maestro, ¿a iyoo ndiayu ña ndakoo iin tiaa yasiꞌi ra, xaꞌa ndia ndia ka kuachi? ―kachi ndia xiꞌin ra. 4Saa ndakuiin Jesús kachi ra saa xiꞌin ndia:

―¿A täan kaꞌvi ndo tuꞌun Ndioxi ña ndakani kachi suꞌva, te xavaꞌa Ndioxi yuvi kii nuu, “ra xavaꞌa ra tiaa, ra xavaꞌa tu ra ñaꞌa va”? 5Ra ndikaꞌan ka tu Ndioxi kachi ra suꞌva va: “Ña kan ke tiaa, ra ndakoo va ra iva ra xiꞌin siꞌi ra, ra tandaꞌa ra xiꞌin iin ñaꞌa ña kuu yasiꞌi ra, ra uvi saa na, ra ndia sa indaa va nduu na.” 6Ra suꞌva va ke iyoo, ña kan ke süvi ka uvi yuvi kuvi na, chi sa indaa mituꞌun va nduu na. Ra na chutaꞌan Ndioxi, ra ndia nii na yuuvi yoꞌo na satäꞌvi taꞌan ñaꞌa ―kachi Jesús xiꞌin ndia.

7Ra saa ndikaꞌan ndia fariseo kachi ndia saa xiꞌin Jesús:

―Tu saa va iyoo ña, ¿ra nichuun xaꞌndia tu ra Moisés chiñu ña kachi ra saa: “Vaꞌa va ndakoo iin tiaa yasiꞌi ra, ra ña sa ra ke na sandakuita ra iin tutu, ña ndakuiin xaꞌa ra ña xa ndakoo taꞌan na, saa ra xavaꞌa va”?, kachi ra Moisés ―kachi ndia xiꞌin Jesús.

8Ra saa ndakuiin Jesús kachi ra saa:

―Xaꞌa ña ndiee ni ini va ndo kuvi ña taxi ra Moisés ndiayu ñaa ndaꞌa ndo, ña ndakoo ndo yasiꞌi ndo, ndi su te kii xaꞌa, ra süvi saa ke ndikaꞌan Ndioxi xiꞌin ndo sa ndo. 9Ña kan ke yuꞌu, ra siin va kachi yu xiꞌin ndo vichin. Tu ndia iin tiaa ra kuëe ndikiꞌvi yasiꞌi ra xiꞌin inka tiaa, ra ndakoo ra ña, ra tandaꞌa ra xiꞌin inka ñaꞌa, saa ra ndiayu Ndioxi va ke kanduu ra, ra tiaa ra ndakiꞌin tu ñaꞌa ña nindoo nuu yii kan, ra ndiayu Ndioxi ke kanduu tu ra kan va ―*kachi Jesús xiꞌin ndia.

10Ra saa ndikaꞌan ndia itaꞌan xiꞌin Jesús xiꞌin ra kachi ndia saa:

―Ra tu saa va ke iyoo ña xaꞌa na ndakoo taꞌan, saa ra vaꞌa ka va kita ña, ña na tandäꞌa vaꞌa ka vi yuvi tu saa ―kachi ndia.

11Ra saa ndakuiin Jesús kachi ra saa xiꞌin ndia:

―Ña yoꞌo, ra süvi takundiꞌi yuvi kuvi na kuchuun kundaa ini xiꞌin ña, chi takua na ^taxi Ndioxi ña xinituni va kuvi na kundaa ini xiꞌin ña. 12Ra ña yuuvi yoꞌo ra iyoo sava na, ra tandäꞌa na chi te ñuꞌu na tixi siꞌi vi na ke niniꞌi taꞌvi na ña koo na saa, ña kan ke tandäꞌa na, ra sava tu na, ra na yuuvi yoꞌo va kuvi na xaꞌndia ñaꞌa, ña kan ke tandäꞌa ka na, ra sava tu na ra nii vaꞌa va na, ndi su xaꞌa ña kuni na sachiñu na nuu Ndioxi va ke tandäꞌa ka na. Ra na kiꞌin kuenda kuchuun koo na saa, ña tandäꞌa na, saa ra saa na koo va na ―kachi Jesús xiꞌin ndia.

Kaꞌan Jesús xiꞌin Ndioxi xaꞌa na kuachi vali

13Ra saa ndixaa sava na xiꞌin na vali seꞌe na nuu íin Jesús, ña na chinduꞌu ra ndaꞌa ra sata na vali kan, ra kaꞌan ra xiꞌin Ndioxi xaꞌa na kuni na. Ra saa ndukueꞌe ndia itaꞌan xiꞌin ra xiꞌin na ndixaa xiꞌin na kuachi vali kan. 14Ra saa ndikaꞌan Jesús xiꞌin ndia kachi ra saa:

―Säsi ndo nuu na vali ñaa. Saña ndo na, ña na kixi na nuu yu. Chi na iyoo ta kuꞌva iyoo na vali kuvi na kuchuun kiꞌvi koo xiꞌin Ndioxi nuu xaꞌndia ra chiñu va ―kachi Jesús xiꞌin ndia.

15Ra saa chinduꞌu ra ndaꞌa ra sata na kuachi vali kan ña ndikaꞌan ra xiꞌin Ndioxi xaꞌa na, ra te ndiꞌi saa ndakiꞌin ra kuaꞌan ra inka xiyo va.

Ndakatuꞌun iin ra loꞌo kuika Jesús

16Saa kuu ra xaa iin tiaa ra itia ra nindakatuꞌun ra Jesús kachi ra saa.

―Tata Maestro, ra vaꞌa, kaꞌan xiꞌin yu ndia ña ke vaꞌa sa yu, ra niꞌi yu koo yu xiꞌin Ndioxi ndia ndikaa ndikuꞌun ―*kachi ra.

17Ra saa ndakuiin Jesús kachi ra saa xiꞌin ra:

―¿Nichuun kaꞌan kun “ra vaꞌa” xiꞌin yu? Chi köo ndia nii yuvi na vaꞌa, chi indaa mituꞌun Ndioxi va kuvi ra vaꞌa. Ndi su tu kuni kun ña koo kun xiꞌin Ndioxi iin ndisaa kii, saa ra xiniñuꞌu na satoꞌo kun ndiayu Ndioxi va ―*kachi Jesús xiꞌin ra.

18Saa ndakuiin ra loꞌo kan kachi ra saa:

―¿Ra ndia ña kuu ndiayu Ndioxi ña xiniñuꞌu satoꞌo yu, Tata? ―kachi ra.

Ra saa ndikaꞌan Jesús xiꞌin ra kachi ra saa:

―Käꞌni kun ndii; ra kïꞌvi kun xiꞌin inka ñaꞌa ña küu yasiꞌi kun; ra sakuïꞌna kun; ra nii xaväꞌa ini kun ña ndatuꞌun kun xaꞌa inka yuvi; 19ra na satoꞌo kun iva kun xiꞌin siꞌi kun; ra na kuꞌvi ini kun kuni kun na taꞌan kun, ta kuꞌva kuꞌvi ini kun xini kun mii kun ―kachi Jesús xiꞌin ra.

20Ra saa ndakuiin ra loꞌo kan kachi ra saa:

―Tata, takundiꞌi ña ñaa, ra ndia loꞌo vi yu ke xaꞌa yu ^xá yu ña; ¿ra ndia ka ña ke kumani ka tu nuu yu? ―*kachi ra.

21Ra saa ndakuiin Jesús kachi ra saa xiꞌin ra:

―Tu kuni kun ña kuu kun iin tiaa ra ndaku, saa ra kuaꞌan ra xiko kun takundiꞌi ñaꞌa ña iyoo nuu kun, ra saniꞌi kun xuꞌun na ndaꞌvi, ra saa ke kuu kun ra kuika ndivi nuu xaꞌndia Ndioxi chiñu, ra te ndiꞌi saa na kixi kun ra kundikun kun yuꞌu ―kachi Jesús xiꞌin ra.

22Ra te xini soꞌo ra loꞌo kan tuꞌun yoꞌo, saa ra ndakiꞌin ra kuaꞌan va ra, ndi su tiaa ni kusuchi ini ra kuaꞌan ra, saa chi kuika ni ra.

23Saa ndikaꞌan Jesús xiꞌin ndia itaꞌan xiꞌin ra kachi ra saa:

―Ña ndixa kaꞌan yu xiꞌin ndo, chi na kuika, ra tiaa ni uꞌvi kiꞌvi na ichi nuu xaꞌndia Ndioxi chiñu. 24Ra na kaꞌan ka yu xiꞌin ndo ña vaꞌa na kundaa ini ndo: Tu ña kuvi vi kuu ña, ra a iin sana vaꞌa ka va kiꞌvi iin camello chee yavi loꞌo xaꞌa iin tiku, nuu ña kiꞌvi iin ra kuika ichi nuu xaꞌndia Ndioxi chiñu ―kachi Jesús xiꞌin ndia.

25Ra te xini soꞌo ndia itaꞌan xiꞌin Jesús ña kachi ra saa, saa ra ndakanda ka vi ini ndia, ra ndikaꞌan ndia xiꞌin taꞌan ndia kachi ndia saa:

―Tu saa va ke kuu xiꞌin na kuika, saa ra, ¿yoo va kuvi na kuchuun kaku tu saa? ―kachi ndia.

26Ra saa ^ixtoꞌni Jesús nuu ndia, ra ndikaꞌan ra xiꞌin ndia kachi ra saa:

―Nuu na yuuvi yoꞌo va ke uꞌvi ni ña yoꞌo, ndi su nuu Ndioxi, ra köo ña üꞌvi ―kachi ra xiꞌin ndia.

27Saa ndikaꞌan ra Pedro xiꞌin Jesús kachi ra saa:

―Tata, nduꞌu, ra ni ke niꞌi ndi, chi ndakoo ndiꞌi va ndi ñaꞌa ña kuu mii ndi, ra ndakundikun ndi yoꞌo xika ndi xiꞌin kun ―kachi ra.

28Saa ndakuiin Jesús kachi ra saa.

―Ña ndixa kaꞌan yu xiꞌin ndo, chi te na xaa kii ña nduxaa takundiꞌi ñaꞌa, ra saa ke ndakunduꞌu yuꞌu, ra xaa yoꞌo vichin, tiayu kaꞌnu, ra ndakiꞌin yu ña kaꞌndia yu chiñu. Saa ra ndoꞌo ndia ndikun yuꞌu vichin, ra niꞌi tu ndoꞌo va iin iin tiayu naꞌnu kundee ndo, ra kaꞌndia ndo chiñu nuu uxi uvi saa na seꞌe xikua na ñuu Israel. 29Ra takundiꞌi yuvi, na ndakoo veꞌe, na ndakoo ñani, na ndakoo kuꞌva, na ndakoo siꞌi, na ndakoo iva, na ndakoo yasiꞌi, na ndakoo seꞌe, na ndakoo ñuꞌú, xaꞌa ña ndikun na yuꞌu, ra na kan, ra iin ciento ka va nduu ña ndakiꞌin na sa Ndioxi, ra niꞌi tu na ña kutiaku na xiꞌin Ndioxi ndia ndikaa ndikuꞌun va. 30Ra kuaꞌa ni tu na inuu vichin, ra ndakundikun va na kan kii ña vaxi, ra na ndikun vichin kuvi na ndakunuu va tu ―kachi Jesús xiꞌin ndia itaꞌan xiꞌin ra.

Currently Selected:

San Mateo 19: mxvNT

Highlight

Copy