San Marcos 3
3
Sandaꞌa Jesús iin ra kutuun ndaꞌa
1Saa kuu iin kii ndixaa tuku Jesús ini veꞌe ñuꞌu, ra ini veꞌe ñuꞌu kan nduꞌu iin tiaa ra ndachi ndaꞌa. 2Ra iin suꞌva nuu na fariseo ña ixtonani na Jesús, a sandaꞌa ra ra kue̱ꞌe ndaꞌa kan kii yii sábado, ra saa ke kuvi ni̱ꞌi̱ na kuachi taxi na xaꞌa Jesús, kaꞌan na. 3Saa ndikaꞌan Jesús xiꞌin ra kue̱ꞌe ndaꞌa kan, kachi ra saa:
―Ndakundichi, ra naꞌa chi maꞌñu yoꞌo ―kachi ra xiꞌin ra.
4Ra saa ndindakatuꞌun Jesús na ndee kan, kachi ra saa:
―¿Ni ke iyoo ndiayu sa yo kii yii: a ña vaꞌa, a ña väꞌa? ¿Ni ke vaꞌa sa yo: a chindiee taꞌan yo xiꞌin yuvi, a sandiꞌi yo xaꞌa na? ¿Ni ke vaꞌa tuvi ndoꞌo? ―kachi ra xiꞌin na.
Ra ndia nii mii tuꞌun na ndindäkuiin. 5Saa xakueꞌe ni Jesús ixtoꞌni ra nuu takundiꞌi na ndee kan, ra kusuchi ni tu ini ra xiꞌin va na xaꞌa ña ndiee ni ini na; chi xïin na kandixa na ña kaꞌan ra. Saa ndikaꞌan ra xiꞌin ra kue̱ꞌe ndaꞌa kan, kachi ra saa:
―Sandakaa ndaꞌa kun ―kachi ra xiꞌin ra.
Ra saa sandakaa tiaa kan ndaꞌa ra, ra ndikun nduvaꞌa va ña. 6Ra te ndakoyo na fariseo chi keꞌe, ra ndakutaꞌan na xiꞌin na partido na ndikun sata ra Herodes ra xaꞌa na kataꞌan na ndixa koo kaꞌni na Jesús.
Kuaꞌa ni yuvi xini soꞌo tuꞌun Ndioxi ña kaꞌan ndoso Jesús yuꞌu tiañuꞌu
7Saa ndakoo Jesús ñuu kan, ra ndakiꞌin ra kuaꞌan ra xiꞌin ndia itaꞌan xiꞌin ra chi yuꞌu tiañuꞌu. Ra kuaꞌa ka vi na kee Galilea xiꞌin Judea, ra ndikun na sata ra kuaꞌan na xiꞌin ra. 8Ra te nindutia ndoso tuꞌun xaꞌa Jesús ra kundaa ini takundiꞌi yuvi ña kuaꞌa ni ña ndichi xa ra, saa ra iin tiaꞌndia chee na yuvi ndixaa nuu ra, na kee Judea, na kee ñuu Jerusalén, na kee Idumea, na ndee chi inka xiyo yuꞌu itia Jordán, xiꞌin na kee ñuu ña ndikun ndiaa Tiro xiꞌin Sidón. 9Ra saa ndikaꞌan ra xiꞌin ndia itaꞌan xiꞌin ra, ña xa na koo nduvi ndia xiꞌin iin barca loꞌo, tu xika nuu mini, kundikaa ra kaꞌan ndoso ra, chi koto kundiëe ra xiꞌin na, ra ndaa na sata ra. 10Chi xaꞌa ña xa sanduvaꞌa ra kuaꞌa ni na xiꞌi ke iin takundiꞌi ka na ndiee ndoꞌo, ra iin taꞌvi taꞌan na kuaꞌan na sata ra, ña kuni na tiandiaa ndaꞌa na ra, ra nduvaꞌa na kuni na. 11Ra te kuyachin na ndoꞌo kueꞌe tachi ndivaꞌa nuu Jesús, ra ndikun iin xikusiti tachi ndivaꞌa ñuꞌu ini na kan nuu ra. Ra iin kokoꞌo ndaꞌyu ña kachi ña saa xiꞌin ra:
―Yoꞌo ku seꞌe Ndioxi ―kachi ña xiꞌin ra.
12Ra ndukueꞌe Jesús xiꞌin tachi ndivaꞌa kan, ña na käꞌan ña yo kuvi ra.
Ndikaxin Jesús uxi uvi tiaa ndia kaka chiñu nuu ra
13Te ndiꞌi, saa ndaa Jesús iin xiki. Ra ikan kana ra ndia kuni mii ra kana ra, ra saa ndixaa ndia nuu ra. 14Ra ndakaxin ra uxi uvi ndia kaka tuun xiꞌin ra, ra tiꞌvi tu ra ndia ña kuꞌun ndia kaꞌan ndoso ndia tuꞌun Ndioxi va. 15Ra taxi ra ndiayu ndaꞌa ndia ña sanduvaꞌa ndia na ndiee ndoꞌo, xiꞌin ña tava tu ndia tachi ndivaꞌa ini yuvi na ñuꞌu ña ini. 16Ra ndia yoꞌo ku ndia ndikaxin ra kaka xiꞌin ra, ra suꞌva ke nani ndia: Iin ra nani Simón, ra ndasama Jesús kivi ra ndakunani ra Pedro, 17iin ra nani Jacobo, iin ra nani Juan, ñani suvi ra Jacobo, ndia seꞌe ra Zebedeo, ndia chinduꞌu Jesús kivi nani Boanerges, ra tuꞌun yoꞌo kachi ña saa: Seꞌe taxa ña ndaꞌyu ndivi; 18ra iin ra nani Andrés, iin ra nani Felipe, iin ra nani Bartolomé, iin ra nani Mateo, iin ra nani Tomás, iin ra nani Jacobo, ra seꞌe ra Alfeo; iin ra nani Tadeo, iin ra nani Simón ra ndixika xiꞌin na partido Cananista, 19ra iin ra nani Judas Iscariote, ra ndixiko Jesús te ndiꞌi. Ra te ndiꞌi ndikaxin Jesús ndia kaka xiꞌin ra, ra saa nandiko ndia ndaxaa ndia chi veꞌe.
Na kiꞌvi kuachi xiꞌin Tachi Yii Ndioxi
20Ra kuaꞌa ka vi yuvi ndakaya tuku, ra nii nuu kuxi ka Jesús xiꞌin ndia itaꞌan xiꞌin ra küvi. 21Ra saa te kundaa ini na taꞌan Jesús xaꞌa ña xa ra, saa ra, ndixaa na ña kuni na ndakiꞌin na ra kuꞌun ra xiꞌin na, chi ra xaꞌa kukiꞌvi va kuvi ra kaꞌan na.
22Ra na maestro sañaꞌa ley Ndioxi ña ndakoo ra Moisés, ra ndia ñuu Jerusalén ke kee na ra ndixaa na nuu xika ra, ra kachi na saa:
―Ndie̱e̱ ti Beelzebú, mii ti kuchee vaꞌa nuu takundiꞌi ña ndivaꞌa va, ke iyoo xiꞌin ra, ña kan ke vaꞌa tava ra tachi ndivaꞌa ―kachi na xaꞌa ra.
23Saa ndakana Jesús yuvi kan ña na kuyachin na. Ra ndikaꞌan ra iin tuꞌun ndichi xiꞌin na kachi ra saa:
―¿Ndixa sa ti ndivaꞌa ña sandiꞌi ri xaꞌa inka ti ndivaꞌa taꞌan ri, tuvi ndoꞌo? Su küvi. 24Chi iin ñuu nuu kataꞌan xiꞌin taꞌan mii na yuvi, ra kuchüun na ña koo na, chi ndiꞌi xaꞌa va na. 25Ra saa tu iin veꞌe va. Tu na kataꞌan xiꞌin taꞌan mii na, saa ra kuchüun na koo na chi ndiꞌi xaꞌa va na. 26Ra kuꞌva saa ke iyoo tu ti ndivaꞌa va. Tu na ndukuiin ri taꞌvi taꞌan ri, ra kataꞌan xiꞌin taꞌan mii ri, saa ra kuchüun ri koo vi ri, chin ndiꞌi xaꞌa va ri ―kachi Jesús xiꞌin na.
27Saa ndikaꞌan ra xiꞌin na kachi ra saa:
―Ndia nii yuvi ra küvi kiꞌvi na veꞌe iin tiaa ra ndaku ni sakuiꞌna na ñaꞌa ña kuu mii ra, tu na chikätun na ra; chi xiꞌna ka va xiniñuꞌu katun na ra, ra te ndiꞌi, saa vi ke kuchuun na kiꞌvi na veꞌe ra sakuiꞌna na.
28’Ra kuni yu kaxi ni na kindoo ña yoꞌo nuu ndo, chi ña yoꞌo ra süvi siki kuvi ña: chi takundiꞌi ka kuachi ña xa na yuvi yoꞌo, xiꞌin ña ndaa yuꞌu na Ndioxi, ra koo kaꞌnu va ini Ndioxi xaꞌa ña. 29Su ndi yuvi na ndaa yuꞌu tu Tachi Yii Ndioxi, ra kaꞌan ndivaꞌa na xaꞌa ña, ra köo kaꞌnu ini Ndioxi xaꞌa na kan, ndia nii kii, ndia nii tiempo, chi ña yoꞌo kuu kuachi na ña kuiso na xiꞌin iin ndisaa kii va ―kachi Jesús xiꞌin na.
30Ra suꞌva ke kachi Jesús xiꞌin na, saa chi ndikaꞌan na ña iyoo ndie̱e̱ ti ndivaꞌa xiꞌin ra.
Xaa siꞌi Jesús xiꞌin na ñani ra nuu xika ra
31Ra saa xaa siꞌi Jesús, xiꞌin na ñani ra. Ra xikundita na chi keꞌe, ra tiꞌvi na iin na kuaꞌan kaꞌan xiꞌin ra. 32Saa ndikaꞌan na xinunduu ndee kan xiꞌin Jesús, kachi na saa xiꞌin ra:
―Chi keꞌe xaa siꞌi kun xiꞌin ñani kun nanduku na yoꞌo ―kachi na xiꞌin ra.
33Saa ndakuiin ra kachi ra saa xiꞌin na:
―¿Yoo ku na kuu siꞌi yu, ra yo ku na kuu ñani yu? ―kachi ra.
34Saa ndakotoꞌni ra nuu na ndee xini soꞌo ña kaꞌan ra, ra ndikaꞌan ra xiꞌin na, kachi ra saa:
―Na yoꞌo va ku siꞌi yu xiꞌin ñani yu. 35Chi takundiꞌi na xanduvi ña kaꞌan Ndioxi va kuvi ñani yu, xiꞌin kuꞌva yu, xiꞌin siꞌi yu ―kachi ra xiꞌin na.
Tuꞌun ndichi xaꞌa ra chiꞌi
Currently Selected:
San Marcos 3: mxvNT
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. All rights reserved
