San Marcos 5

1Saa ra ndixaa ndia ñuu Gadara, ña ndikaa chi inka xiyo yuꞌu tiañuꞌu kan. 2Ra te nuu suꞌva Jesús ini barca kan, saa ra ndikun ndixaa iin tiaa ra ñuꞌu tachi ndivaꞌa ini, niniꞌi taꞌan ra xiꞌin Jesús, ra tiaa yoꞌo ra ini yavi ndìì ke ndikaa ra, kanata ra ndixaa ra. 3Chi ra tiaa yoꞌo, ra yavi ndìì ke xikuu veꞌe va ra. Ra ndia nii na taꞌan ra ndikuchüun ña chikuꞌni na ra, nii xiꞌin cadena ndikuchüun na. 4Ra nii ndiäꞌvi ichi nditiin na ra, ña taan na kàà ndaꞌa ra xiꞌin xaꞌa ra, ra nii xiꞌin cadena tu chikatun na ra, su ndi köo mii xaꞌa vi ña nuu ra, chi iin xaꞌndia ndiꞌi va ra ña, ra iin vali vali xa ra ña, ndia nii na kundiëe xiꞌin ra. 5Ra iin ndisaa kii, ñuu kaꞌñu xika ra iku, ra ñuu kaꞌñu xika tu ra kumisanto va, ra iin ndaꞌyu koꞌo ra xika ra, ra iin satakueꞌe ndiꞌi ra mii ra xiꞌin yuu. 6Saa ra te xini ra xika ka va vaxi Jesús, saa ra ndikun xinu ra xaa ra xikusiti ra nuu ra. 7Ra iin kokoꞌo ndaꞌyu tachi ndivaꞌa ña ñuꞌu ini ra, ra kachi ña saa xiꞌin Jesús:

―¡Jesús, Seꞌe Ndioxi ra kaꞌnu! ¿Ni ke kuni kun xiꞌin yu? Xakundaꞌvi yu nuu kun xiꞌin nuu Ndioxi, ña na sandöꞌo kun yuꞌu. ¡Ndaꞌvi ni yu! ―kachi ña xiꞌin Jesús.

8Ra saa kachi ra ñuꞌu tachi ndivaꞌa ini kan ndikaꞌan ra, saa chi xa xaꞌndia va Jesús chiñu nuu ña ndivaꞌa kan ña na kee ña kuꞌun ña, ra suꞌva ke kachi Jesús xiꞌin ña:

―¡Tachi ndivaꞌa, kita ini ra tiaa xaan! ¡Kuaꞌan! ―kachi ra xiꞌin ña.

9Saa ndindakatuꞌun Jesús tachi ndivaꞌa kan, kachi ra saa xiꞌin ña:

―¿Ndixa nani kun? ―kachi ra xiꞌin ña.

Saa ndakuiin ña kachi ña saa:

―Legión va nani yu, saa chi kuaꞌa ni kuvi ndi ―kachi ña xiꞌin ra.

10Ra xakundaꞌvi ka vi tachi ndivaꞌa kan nuu Jesús ña na täva ra ña kuꞌun ña inka xiyo. 11Ra yachin nuu iku kan xika iin tiꞌvi chee kini xaxaꞌan ri. 12Saa xakundaꞌvi ni tachi ndivaꞌa kan nuu Jesús kachi ña saa:

―Tiꞌvi nduꞌu na kuꞌun ndi nuu xika kini kaa, ra taxi kun ndiayu ndaꞌa ndi ña na ndee ndi ini ri ―kachi ña xiꞌin ra.

13Saa ndikun taxi Jesús ndiayu ndaꞌa ña, ña na kuꞌun ña ndee ña ini kini kan, ra kuꞌva uvi mil kuvi kini kan. Ra xaꞌa sasana ndiꞌi ña ri, ra xinu ndiꞌi ri ndi̱xàà ri ndikoyo ri iin taꞌvi nuu ndikaa mini, ra ndikaꞌa ndiaa ndiꞌi ri, ra ndixiꞌi ri. 14Ra ndiyuꞌvi ka vi na ndiaa kini kan, ra kee na xinu na ndixaꞌan na ndatuꞌun na xiꞌin na ndee ñuu, ra ndatuꞌun tu na xiꞌin na ndakitaꞌan xiꞌin na chi iku va. Ra saa ndakoyo takundiꞌi na yuvi kan ra ndi̱xa̱a̱ na xini na ña kuu kan. 15Ra te ndi̱xa̱a̱ na nuu iin Jesús, ra xini na ra tiaa xindoꞌni tachi ndivaꞌa ini kan, ra xa nduvaꞌa va ra, ra xa ndakundixi va ra tikoto, ra xa yayaa va nduꞌu ra, chi xa ndukaxin va ini ra. Saa ra ndayuꞌvi ka vi ini na yuvi kan. 16Ra yuvi na xini ña ndoꞌo ra xindoꞌni tachi ndivaꞌa ini kan, xiꞌin ña ndoꞌo kini kan, ra ndatuꞌun na xiꞌin inka yuvi xaꞌa ña xini na. 17Ra saa xakundaꞌvi na nuu Jesús ña na sa ra ña mani kita ra ñuu na kuꞌun ra inka xiyo.

18Ra saa te nandaa Jesús ini barca loꞌo kan kuꞌun ra, saa xakundaꞌvi ra tiaa xindoꞌni tachi ndivaꞌa ini kan nuu Jesús ña na taxi ra kuꞌun ra xiꞌin ra. 19Su ndi ndixïin Jesús ña kuꞌun ra xiꞌin ra, chi suꞌva va kachi ra xiꞌin ra:

Kuanuꞌu̱ veꞌe kun nuu na taꞌan kun, ra ndatuꞌun kun xiꞌin na xaꞌa takundiꞌi ña vaꞌa xa Ndioxi xiꞌin kun, xiꞌin ña kundaꞌvi ini ra xini ra yoꞌo ―kachi Jesús xiꞌin ra.

20Saa ndakiꞌin ra tiaa kan kuanuꞌu ra, ra xaꞌa ra iinii kuvi ndaꞌa ñuu Decápolis ndatuꞌun ra xiꞌin na xaꞌa ña vaꞌa xa Jesús xiꞌin ra, ra ndayuꞌvi ka vi ini na yuvi kan xaꞌa ña ndoꞌo ra.

Sandaꞌa Jesús ña loꞌo seꞌe ra Jairo, xiꞌin ñaꞌa ña nditiandiaa ndaꞌa tikoto ra

21Ra te ndiko tuku Jesús ndaxàà ra xiꞌin barca chi inka xiyo yuꞌu tiañuꞌu kan, ra kuaꞌa ka vi yuvi ndakaya tuku xaa na nuu ra; ra saa nindoo ra xiꞌin na yuꞌu mini kan. 22Saa kuu ra ndixaa va iin ra xikuaꞌa, ra nani Jairo, ra kuchee nuu na veꞌe ñuꞌu, ra te xini ra Jesús, saa ra ndikun xikusiti va ra nuu ra, 23ra xakundaꞌvi ka vi ra kachi ra saa:

―Tata, seꞌe loꞌo yu ra ña xa kana nima kuvi ña, ra na sa kun ña mani kuꞌun kun xiꞌin yu ra chinduꞌu kun ndaꞌa kun sata seꞌe yu, ra na nduvaꞌa va ña ra kutiaku ña. Chi ndaꞌvi ni yu ―kachi ra xiꞌin Jesús.

24Saa ndakiꞌin Jesús kuaꞌan ra xiꞌin ra. Ra iin tiaꞌndia chee na yuvi ndikun kuaꞌan xiꞌin ndia, ra iin kuni̱ ndaa na sata ndia. 25Ra tiañu na yuvi kan, ndikaa iin ñaꞌá ña xitia ni̱i̱ kuaꞌan ña xiꞌin na, ra ñaꞌá kan ra xa uxi uvi kuiya ke ndoꞌo ña saa, ra küvi nduvaꞌa ña. 26Ra kuaꞌa ka vi na xatatan ndixika ña nuu, ra sandoꞌo ka vi na ña, ra sasiki yaa ña xuꞌun ña, su ndi ndia ña mani uun va chi ninduväꞌa ña, ra ña ndiee ka nundiee va ku kueꞌe kan xiꞌin ña. 27Ra te xini soꞌo ña ndatuꞌun na yuvi xaꞌa ña vaꞌa xa Jesús, saa ra xiña niꞌni, ña tiañu na yuvi kan, ra kuyachin ña chi sata Jesús, ra nditiandiaa ndaꞌa ña tikoto ra. 28Saa chi ndakani ini ña kaꞌan ña saa: “Tu na tiandiaa loꞌo ndaꞌa va yo tikoto ra, saa ra ndikun nduvaꞌa va yo”, kaꞌan ña. 29Saa ra ndikun xikutuvi ndixa va ña xitia ni̱i̱ ña, ra ndikun kundaa ini ña ña nduvaꞌa va ña, chi xïꞌi ka ña. 30Ra saa kundaa ini Jesús ña ke̱e ndie̱e̱ ra, ra saa ndikokuiin ra ndakotoꞌni ra nuu na yuvi kan, ra ndindakatuꞌun ra na, kachi ra saa:

―¿Yoo ku na nditiandiaa ndaꞌa tikoto yu? ―kachi ra.

31Saa ndakuiin ndia itaꞌan xiꞌin ra, kachi ndia saa:

―Tata, iin chindaꞌa taꞌan na yuvi vaxi na sata kun, ra ^ndakatuꞌun ka kun, yo ku na nditiandiaa ndaꞌa tikoto kun ―kachi ndia xiꞌin ra.

32Su ndi ndïxa ra xaꞌa vi ña kaꞌan ndia xiꞌin ra, chi ndakundiee ra ixtoꞌni ra nuu va na, ña ndiatu ra kundaa ini ra, yo ku na nditiandiaa ndaꞌa tikoto ra. 33Ra ñaꞌa kan ra iyuꞌvi ka vi ña, iin ndiakua kisi ña ña, chi kundaa ini ña ña nduvaꞌa ña xa ra. Saa ndixaa ña xikusiti ña nuu ra, ra ndatuꞌun ndiꞌi ña xiꞌin ra, ni xaꞌa ke xa ña saa.

34Saa ndikaꞌan Jesús xiꞌin ña kachi ra saa:

―Seꞌe, xaꞌa ña kandixa kun yuꞌu ke xa ndikaku kun. Ra kuanuꞌu veꞌe kun, ra ndïꞌi ka ini kun, chi xa nduvaꞌa va kun ―kachi ra xiꞌin ña.

35Ra te kaꞌan ka va Jesús, saa xaa na kee veꞌe ra Jairo, ra xikuaꞌa xaꞌndia chuun veꞌe ñuꞌu, kachi na saa xiꞌin ra:

―Tata, xa ndixiꞌi va seꞌe kun. Köo ka chuun ke sandiꞌi vi kun tata maestro kuꞌun ra xiꞌin yo ―kachi na xiꞌin ra.

36Saa te xini soꞌo Jesús ña kuyuꞌu na saa xaa na nuu ra Jairo, saa ndikaꞌan ra xiꞌin ra kachi ra saa:

―Kuayüꞌvi kun, indaa yuꞌu va kandixa kun ―kachi Jesús xiꞌin ra.

37Ra nditäxi Jesús kuꞌun ndiꞌi na xiꞌin ra, chi takua ra Pedro, xiꞌin ra Jacobo, xiꞌin ra Juan ñani ra Jacobo va kuvi ndia ndakiꞌin ra kuaꞌan xiꞌin ra. 38Ra te ndixaa ra veꞌe ra xikuaꞌa Jairo, ra iin niniꞌi kuu, iin siso siso ndaꞌyu na, ra xaku ka vi na ndee na. 39Saa ndikiꞌvi ndia ra ndikaꞌan Jesús xiꞌin na kachi ra saa:

―¿Nichuun xaku ni ndo? Ña loꞌo yoꞌo ra süvi ña ndixiꞌi kuvi ña, chi ña kixi va kuvi ña ―kachi ra xiꞌin na.

40Ndi su na ndixaku ndiaa va kuvi na ra. Ra saa xaꞌndia ra chiñu ña na kee takundiꞌi na chi keꞌe, ra takua iva ña loꞌo kan xiꞌin siꞌi ña, xiꞌin ndia kuaꞌan xiꞌin va ra kuvi na ndikiꞌvi xiꞌin ra nuu kanduꞌu ña loꞌo ndixiꞌi kan. 41Ra saa tiin ra ndaꞌa ña loꞌo kan, ra ndikaꞌan ra xiꞌin ña kachi ra saa:

―Talita kumi ―kachi ra xiꞌin ña; ra tuꞌun yoꞌo kachi ña saa: “Ña loꞌo, xiꞌin yoꞌo ke kaꞌan yu, ndakoo”.

42Saa ra ndikun ndakoò va ña loꞌo yoꞌo xika ña, ra uxi uvi va kuiya ke ndikaa ña, ra ndakanda ka vi ini na yuvi kan. 43Ra ndikaꞌan ka vi Jesús xiꞌin na, ña na ndatüꞌun na xiꞌin ndia nii yuvi xaꞌa ña kuu yoꞌo. Saa xaꞌndia ra chiñu nuu na vasiꞌi ña loꞌo kan, ña na taxi na ña kuxi ña.

Currently Selected:

San Marcos 5: mxvNT

Highlight

Copy