Jòvánì 1

Jézù tí Có mì Mbíṛì gì tí ꞌduù gî

1Có táánò sàà kuu tí á kùṛo o bà suu to tí nô;

có táánò kû dù a i mì ndú ta Mbíṛì.

Có ꞌdo sàà táánò káa Mbíṛì.

2Ndâ Có táánò ta Mbíṛì ta o bà ꞌbìtà bà suu ndâ i.

3Wotí bà suu ndâ i táánò ꞌdáá gî a i ꞌbì Có;

ꞌbí i gbaànjé táánò mbe bàkà tí muu to tí nó á kapí ṛo Có nò wálá.

4Có táánò a ṛèngbó ꞌválá;

ꞌválá tí nò mì Có nò táánò a ngbaꞌo ji ndâ ꞌduù ꞌdáá gî,

5tí ngbaꞌo ŋìnó mbe tùngbaà gbí ꞌdíꞌdiꞌo,

tí ngbaꞌo ŋìnó náa ꞌdíꞌdiꞌo kpò yí lá.

6Mbíṛì táánò giì tuu ꞌbí ꞌdakò ta ṛè wó a Jòvánì,

7tí mbe ꞌdè yúcó ji ndâ ꞌduù.

Mbíṛì táánò tuu yí gí bà ꞌdè yúcó gítí Ngbaꞌo,

tacó wàa, ndâ ꞌduù ꞌdáá gî ꞌví ù ta nje gítí Ngbaꞌo á ꞌdo gbí có mì wó.

8Jòvánì táánò me Ngbaꞌo lá;

yí táánò a ꞌduù sínò,

tí mbe ꞌdè yúcó gítí Ngbaꞌo.

9Có táánò, tí cèe Ngbaꞌo mbe njaanga muu ndâ ꞌduù ꞌdáá gî nó kpokèjì.

10Yí táánò kuu muu to tí nô,

to tí nó náa Mbíṛì táánò je wotí ji yí bìndi yí giì suu nô,

káa ndâ ꞌduù muu to tí nó táánò ꞌdáá gî ŋò yí ni lá.

11Yí táánò gì gí ꞌdóó ꞌbá mì ndú,

káa ndâ ꞌdóó-ꞌdòò nambe wó si yí tí i lá.

12Kpêtí ká énò, yí giì je wotí bà gì tí ndâ ꞌviì mì Mbíṛì ji ndâ mbe si yí tí i,

mbe tee njembí ndú mítí wó nó gî.

13Ṛèngbó bà dù ndú tí ndâ ꞌviì mì Mbíṛì nò me ꞌdo muu to tí nó lá,

à ꞌdo me gbí bà toko bà sili mì ndâ ꞌdakò ta niì lá,

à delè giì dù me ꞌdo gbí go bà jò ṛè ndâ ꞌduù lá,

à káa Mbíṛì ká bàkà ndú tí ndâ ꞌviì mì wó.

14Có táánò gì tí ꞌduù go ndoo,

bìndi yí giì ꞌvala gbí òkò tí ndoo muu to tí nó,

tí gbolò mbe nambeè,

delè tí gbolò mbe ꞌdè yúcó.

Ze táánò ŋò ŋa bà tòngbaà mì wó,

tí ngba gbèe ꞌViì-mì-Mbíṛì ta ꞌbí ŋa ꞌviì go yí mì Bu wó wálá gî.

15Jòvánì táánò gì kû kò-kò ta ṛè Có ji ndâ ꞌduù, máa,

«Ŋìnó a ꞌduù tí nó náa ye táánò kû ꞌdè có ta ṛè wó ji yo máa,

‹ꞌDuù tí nó kèjì gí tàkò ye nó a gbolò ꞌduù ndii ye gî,

tacó yí táánò kû ꞌvala kùṛo o bà jò ye.› »

16Yí kû bàkà nambeè ji ndoo ꞌdáá gî,

tacó nambeè gbí yì wó me gbolò ngé ndii gî.

17Mbíṛì táánò tuu a Mòze ta ndâ có mì wó ji ndâ ꞌduù,

bìndi yí giì tuu a Có tí Jézù,

tí Bìndi wó tí Mbíṛì gí bà bàkà nambeè ji ndâ ꞌduù,

delè gí bà ꞌdè yúcó ji ndâ ꞌduù ꞌdáá gî.

18ꞌBí ꞌduù jé mbe ŋò Mbíṛì ta ṛo wó ta gbèe ṛi muu to tí nó wálá,

à káa gbèe ꞌViì-mì-Mbíṛì ta ŋa wó wálá,

tí wú-gbí-ṛé Bu wó,

ká tùbà tí Mbíṛì ji ndoo.

Jòvánì tí mbe caka tí ndâ ꞌduù ꞌdè yúcó mì wó

19Ta ꞌbí o gbaànjé, ndâ kpo ꞌduù mì ndâ Jùdéyà giì tuu ndâ ꞌbí bu-Mbíṛì mì ndâ Jùdéyà ta ndâ ꞌbí mbe kû konì ndâ bu-Mbíṛì ta nèté, ꞌdo Jèrùzàlémè, máa, ndú ya gí bà ꞌvee Jòvánì máa, yí a ꞌdi wè? Wàa ndú ꞌví gì ta ndi kòcò wó ji ndâ yì. 20Ndâ bu-Mbíṛì tí nò mâ giì ya gí bà ꞌvee Jòvánì go có tí nó náa ndâ kpo ꞌduù mì ndú tuu ta ndú nò, Jòvánì giì ꞌdè ꞌvéṛè ji ndú lá, yí giì ꞌdè có ji ndú ngbáṛángàꞌi énó máa, «Ye me Bìndi-Mbíṛì lá.»

21Káa ndâ bu-Mbíṛì tí nò giì ꞌvee yí kákáꞌi máa, «Má énò, wò a Èlíjà tí nó táánò tí mbe ꞌdòkò có mì Mbíṛì nó wàà?»

Káa Jòvánì giì ꞌvìsì có ji ndú máa, «Ye me Èlíjà tí nò delè lá.»

Bà taꞌô ŋìnó, ndâ bu-Mbíṛì tí nò giì ꞌvee Jòvánì máa, «Wò ꞌví dù a gbolò mbe ꞌdòkò có mì Mbíṛì tí nó náa Mòze dígísèé ci ndâ ká gù ndoo máa Mbíṛì bà tuu yí ji ndú nó wàà?»

Káa Jòvánì giì ꞌvìsì có ji ndú máa, «Ngé lá! Ye me yí lá.»

22Ndâ bu-Mbíṛì tí nò giì ꞌvee Jòvánì máa, «À má énò, wò a ꞌdi? Tacó ze má dele ta ndi ze ya gí ꞌbá, wàa ze ꞌví ꞌdè ta ndi kòcò lo ji ndâ ꞌduù tí nó mbe tuu ze nô, ze dele ndi ze ya gí bà ꞌdè có ji ndú énó máa, wò a ꞌdi?»

23Káa Jòvánì giì ꞌvìsì có ji ndú máa, «Ye a ꞌduù tí nó náa Ìzáyà tí mbe ꞌdòkò có mì Mbíṛì dígísèé ꞌdè kòcò ta wotí mì Mbíṛì gítí wó máa,

‹Kòcò ꞌduù kû kò-kò gbí kángáá nga ngoò, máa,

yo bàkà kpokèjì mì Mbe tí yo jáá nô.› »

24À ta o tí nò tuu ndâ bu-Mbíṛì tí nò ya tí ji Jòvánì a ndâ mbe kpolo tí tàkìì mì ndâ Jùdéyà. 25Tacó énò, ndú giì ꞌvee Jòvánì máa, «Wò me Bìndi-Mbíṛì lá, wò me Èlíjà lá, wò delè me mbe ꞌdòkò có mì Mbíṛì tí nó mì Mòze náa yí ꞌdè có gítí wó nó ká lá. À má énò, wò kû caka tí ndâ ꞌduù tacó yè?»

26Káa Jòvánì giì ꞌvìsì có ji ndú máa, «Ye kû caka tí ndâ ꞌduù ta ngo, káa, ꞌbí ꞌduù kpónó kû ṛò tíyò kuu gbí òkò tí yo nò káa yo ŋò yí ni lá, 27ká bà giì gì gí tàkò ye. Yí a ꞌduù mbe me gbolò ndii ye tí ŋa ŋìnó náa à kpêtí káa bà dù tí vòó mbe kû njaanga tàmà ꞌdo tí kò wó sínò, ye bà ꞌde wotí tí ye gítí wálá.»

28Ndâ kpo ꞌduù mì ndâ Jùdéyà tuu ndâ bu-Mbíṛì mì ndú nò ji Jòvánì si yí gbí gbata Bètánìyà a tìto Jòròdánìyà kû caka tí ndâ ꞌduù.

29Jòvánì mâ giì zekeꞌo ta ꞌbí yé á bìndi bà ꞌdè nje mì ndú ta ndâ bu-Mbíṛì mì ndâ Jùdéyà nò, yí giì ŋò Jézù kèjì gí mì wó. Bìndi yí giì tùbà tí Jézù ji ndâ ꞌduù máa, «Yo ŋò ꞌViì-rómbo-mì-Mbíṛì, tí mbe toṛo ndâ vò i ꞌdo muu to tí nó, zô! 30Ŋìzó a yí tí ꞌduù tí nó náa ye kû ꞌdè có gítí wó máa, ‹ꞌBí ꞌduù, tí gbolò ꞌduù mbe ndii ye gî, á kèjì tàkò ye› nó ká zô. Yí me gbolò ndii ye gî, tacó yí sàà kû ꞌvala kùṛo o bà jò ye. 31Ye táánò sàà ŋò yí ni tí ꞌduù tí nó náa Mbíṛì tuu yí nó lá, káa à giì tuu ye, máa, ye dù tí mbe caka tí ndâ ꞌduù, tacó wàa, ye ꞌví tù ta bà tí wó ji ndâ Ìzìrìyélì.

32«Ye táánò ŋò Bèṛi-mì-Mbíṛì kû gì ꞌdo gbíṛì go kùlè nô, kû gì gí bà o mí muu wó. 33Ye táánò ta o tí nò ŋò yí ni lá. Káa a ꞌduù tí nó mbe tuu ye, máa, ye caka tí ndâ ꞌduù ta ngo nó, ká giì tùbà tí wó ji ye máa, ‹ꞌDuù tí nó náa wò bà ŋò Bèṛi-mì-Mbíṛì kû gì ꞌdo gbíṛì ndírí gí muu wó nó, a ꞌduù tí nò ká bà gì gí bà caka tí ndâ ꞌduù ta Bèṛi-mì-Mbíṛì nó ká nò.› 34Káa ye giì ŋò Bèṛi-mì-Mbíṛì gì ꞌdo gbíṛì gí muu ꞌdakò tí zó gî. À má énò, ye kpónó kû yù nó a gbí wó ji yo máa, yí a ꞌViì-mì-Mbíṛì.»

Ndâ mbe dù tí ndâ kpédélé mbe tala có mì Jézù

35Ta ꞌbí yé, si ndâ Jòvánì kû ṛò tíyò ta ndâ ꞌbí mbe tala có mì wó sósòꞌô ta ꞌdêꞌo, 36Jòvánì giì ŋò Jézù kû ndii ta nó. Yí giì zeke Jézù ngbóó, bìndi yí giì tùbà tí wó ji ndâ mbe tala có mì wó tí nó náa ndú kû ṛò tíyò ta ndú nó, máa, «Yo ŋò ꞌViì-rómbo-mì-Mbíṛì ta nó zô.»

37Ndâ mbe tala có mì Jòvánì nò mâ giì ꞌdi có tí nò náa yí ꞌdè ji ndú nò, ndú só giì njè nó ya gí bà ṛu ndi Jézù. 38Jézù mâ giì ꞌvìsì tí wó, yí mâ giì ŋò ndú, yí giì ꞌvee ndú máa, «Yo kû pà a yè?»

Káa ndú giì ꞌvìsì có ji Jézù máa, «Rábì» (gbí máa, Mbe nìbà i), «Wò kû dù ngò?»

39Káa Jézù giì ꞌvìsì có ji ndú máa, «Yo gì gí bà ŋò .» Ndú bà-i-nò giì ya ta sè ṛi-ꞌdêꞌo tí nó gí bà ŋò bàndò mì Jézù.

40ꞌBí ꞌduù gbaànjé ꞌdo gbí òkò tí ndâ mbe tala có mì Jòvánì mbe ya gí bà ŋò bàndò bà dù Jézù nò a Àndèréyà, tí náꞌvindí Sìmónè Pìyétòrò. 41Àndèréyà mâ giì ŋò bàndò bà dù Jézù gî, yí giì dele ndi wó ya gí bà pà bà tí náꞌvindí wó Sìmónè, yí mâ giì ꞌde yí gî, yí giì ꞌdè có ji yí máa, «Ze ꞌde Bìndi-Mbíṛì gî!» 42Bìndi yí giì ꞌdaka Sìmónè ya tí ji Jézù.

Jézù mâ giì ŋò Sìmónè, Jézù giì zeke Sìmónè ngbóó, bìndi yí giì ꞌdè có ji yí máa, «Wò a Sìmónè tí ꞌviì mì Jòvánì, káa ngú ṛè lo kpónó bà dù a Kéfà,» (gbí máa, Pìyétòrò, gbí máa, Duù).

43Ta yé bìndi bà ꞌde tí ndâ Jézù ta Sìmónè Pìyétòrò, Jézù giì ꞌde ꞌbí ꞌdakò ta ṛè wó a Fìlípò, si Jézù bàkà có gítí bà njè nó ꞌdo tàbèꞌdè Jòròdánìyà tacó bà ya gí Gàlìléyà cee gî. Jézù giì tèꞌé tí Fìlípò máa, yí gì gí bà ṛu ndi yì. 44Fìlípò delè káa ꞌduù Bètìsàyídà go ndâ Àndèréyà ta Pìyétòrò.

45Fìlípò mâ giì ꞌde ꞌbí ꞌdakò ta ṛè wó a Nàtànìyélè, yí giì ꞌdè có ji Nàtànìyélè máa, «Ze ꞌde ꞌduù tí nó náa Mòze táánò cu có gítí wó mí gbí wáràgà mì wó nó gî, ꞌduù tí nó náa ndâ mbe ꞌdòkò có mì Mbíṛì táánò cu có gítí wó mí gbí wáràgà mì ndú nô. Ṛè wó a Jézù, tí ꞌviì mì Jùzépè mbe gì ꞌdo Názàrètì.»

46Káa Nàtànìyélè giì ꞌvee Fìlípò máa, «A ŋa tó i yè jé ká gì ꞌdo Názàrètì?» Káa Fìlípò giì ꞌvìsì có ji Nàtànìyélè máa, «Gì gí bà ŋò yí ta ṛo lo.»

47Ndâ Fìlípò ta Nàtànìyélè bà-i-nò giì njè nó kû ya gí mì Jézù. Jézù mâ giì ŋò Nàtànìyélè kèjì gí mì wó, yí giì ꞌdè có ji yí máa, «À gbúú-gbuu zó a Ìzìrìyélì gbí dù Ìzìrìyélì ta tiṛì gbí yì wó wálá ká kèjì zô.»

48Nàtànìyélè mâ giì ꞌdi có tí nò náa Jézù ꞌdè nò, yí giì ꞌvee Jézù máa, «Wò ŋò ye ni ta yè?»

Káa Jézù giì ꞌvìsì có ji yí máa, «Ye kùtàá ŋò wò kû ki tí lo to tà mû-mbiìgá á kùṛo o bà ya Fìlípò gí bà tèꞌé tí lo.»

49Nàtànìyélè bà-i-nò giì ꞌvìsì có ji Jézù máa, «Mbe nìbà i, wò a ꞌViì-mì-Mbíṛì! Wò a gbolò gba mì ndâ Ìzìrìyélì!»

50Káa Jézù giì ꞌvìsì có ji Nàtànìyélè máa, «Wò ùnje énò máa, ye a ꞌViì-mì-Mbíṛì, tí gbolò gba mì ndâ Ìzìrìyélì, ká tacó náa ye ꞌdè có ji wò máa, ye kùtàá ŋò wò kû ki tí lo to á tà mû-mbiìgá gî nò. Káa wò bà giì ŋò ndâ ꞌbí i mbe me kpo-kpò ndii ŋìnò gî. 51Ye kû ꞌdè có ji wò ta yúcó máa, wò kèjì gí bà ŋò njekèjì gbíṛì njaanga tí gî, bìndi ndâ basìlì mì Mbíṛì kû wùùkù to ya gí yaà, gì gí to, ya gí yaà, gì gí to, muu ꞌViì-mì-ꞌDakò.»

Currently Selected:

Jòvánì 1: ndz

Highlight

Copy