Jɔn 13

Yesu Fun Sɛm O Gantɛl Tiŋsa Naŋgere

1O funɛ ka wuzu bɛgimnɛ di val la gali wuzu zen ti tel. Yesu funɛ zimu di o kpaki saha ti duglɛu di o li tɛɛnɛ nɔ maga ni a bur kila o nyan ti wati. Chenani o funɛ daŋni ba naa o dɔ wa funɛ bur gantɛl.

2Yesu wa o gantɛl tiŋsi ta funɛ di dusum diwe ka sintana fun lisi di Judas Iskariɔt, Simɔn be, zi li Yesu gantɛlu. 3Yesu funɛ zimu di o nyan naa tum un tɛɛnɛ nɔ maga ni, funɛ kpa kina maga a du o nin ni. O gbanko funɛ zimu di o nyɛn nyinbaan nɛɛ a bur a la Koosa wati. 4A saha ti Yesu fun si diwe bar diili ti ni a ur o takta a zer bara kifiisi a niŋi. 5Doone o fun yoli ni a du katɛsa ni a funɛ sɛm o gantɛl tiŋsi ta naŋgere a kpa bara kifiisi ti a fiisi ba naŋgere ta. 6O fun wa pu Simɔn Pita. O fun pɛɛsi un, “Mu kunyana, o wa deŋli wa i sɛm mu naŋgere.”

7Yesu fun ŋɔ un, “I wa zim chenani mu kaa ya nyɛ hin nan mun lalaknɔ, amaa o gantɛl ni i zi wa zimu.”

8Pita fun ŋɔ un, “Mu wa zi kut nyɛ i sɛm mu naŋgere.”

Yesu fun ŋɔ, “I vɛ nyɛ mu sɛm a, i wa zi bu ya mu gantɛl tiŋsi ta digi.”

9Simɔn Pita fun fɛti a ŋɔ, “O ya di chene, ta chaksi mu naŋgere duŋduŋ. Chaksi mu nisa awa mu nyuha gbanko.”

10Yesu fun ŋɔ un, “Nar sɔ ni, chene i bara maga wer, amaa i ka val la bar digi, i naŋgere duŋduŋnɛ i yaa sɛm.” Doone o fun burgi a ŋɔ o gantɛl tiŋsi ta ni, “Lalaknɔwa ma maga bambe wer, amaa ma nibɛgim bambi vɛ weri.” 11Yesu funɛ piin zim naa kaa li o gantɛlu. Chendaha o fun ŋɔ di ba nibɛgim bambi wa wer.

12Yesu funɛ sɛm ba naŋgere peti chen, o fun bur kaali o bar kani ti a la laari o takta ti a ŋɔ ba, “Mu zi ŋɔ ma chenani mu tum nyɛ ma nan munu. 13Ma yaa yir min ma kunyana naa la biksi ma Koosa wɛ. Chen deŋlee, domi mu sir ya ma kunyannɛ. 14Mu waa naa ya ma kunyan ti a biksi ma Koosa wɛ, fa chaksi ma naŋgere ta. Ma gbanko kichaksi dɔŋa naŋgere. 15Maa tiŋ chenani mu biksi ma di ma tiŋ chen. 16Ma nu mu sɛma nɛnɛ. Yom wa to a zen a kaali o kunyana. Nitumi wa to a zen a kaali naa tum un. 17Ma zim chenani mu daŋni ma tumu. Ma ya chen, ma tusa zi sɔɔni kinkan.

18“Sɛm naa mu sɛm ma nan, mu wa sɛm a a nyɛ ma maga nɛɛ. Min zim ba naa mu lisi a li ma tuhu niu. Ba funɛ sɔbiu a li Koosa sɛm tɔn ti ni a ŋɔ,

‘Mu wa naa di diwe nan zi li mu gantɛlu.’

Chenani ba sɔbi, sɛm nama nan zi ya wutiu. 19Mu te ŋɔ mau, chen ni ka nan wa ya, ma se zi su di min ya naa ba fun sɔbi chen wɛ. 20Ma bu nu mu wati nɛnɛ. Ba naa maga la naa mu tum a du, minnɛ ba la du chen. Ba naa maga la min a du, naa tum min chene ba la du.”

Yesu Fun Ŋɔ Chenani Judas Zi Li O Gantɛl

(Mat. 26.20-25; Maak 14.17-21; Luk 22.21-23)

21Yesu funɛ sɛm nan peti, o bambi buri un ni kinkan. O fun ŋɔ ba, “Wutirɛ mu ŋɔ ma, ma nidigi a li ma tuhu ni zi li mu gantɛlu.”

22O gantɛl tiŋsi ta fun nyini dɔŋ se ni a la lisi, antirɛ o zi bi nan? 23Naa Yesu funɛ daŋni kinkan a li ba ni funɛ kani a mari un. 24Simɔn Pita fun baasi o nin di o nyɛ Yesu ŋɔ un chenani o du.

25Naa Yesu funɛ daŋni kinkan fun tur la mari un a pɛɛsi, “Mu kunyana, anti chen?”

26Yesu fun ŋɔ un, “Mu kaa kpa diwere a suk disa a nyɛ un. Waa ya naa mu bi chen.” O fun kpa diwe ti a suk disa a nyɛ Judas Iskariɔt, Simɔn be, ni. 27Judas funɛ la boroboro ti, sintana fun vaan zu o bambi ni. Yesu fun ŋɔ un, “Kila lalaga a la tum chenani i kaa tum.” 28Ba naa funɛ lagmi di ba di diwe chen wa fun zim chenani Yesu sɛm un chen mun. 29Ba maga malɛ funɛ nyɛn Judas nin nee. Ba bɔnɛ fun lisi di Yesu ŋɔ un di o la yau wuzu zen ti diwe. Bɔnɛ ka fun lisi di Yesu ŋɔ un di o lisi malɛ ta bɔnɛ a la nyɛ fara tim ni.

30Judas funɛ la boroboro ti, o fun vaan si a li. O funɛ ya dusum saharɛ.

Yesu Chiksi Fali Wɛ

31-32Judas funɛ kaali, Yesu fun ŋɔ o gantɛl tiŋsi ta ni, “Nidamata zi pɛgi Koosa kinkan a li chenani ba kaa ya min. Chenani Koosa zi kpa o jirima awa chaani kinkan a nyɛ n waa nibine be ni duglɛu. O wa zi vusi ka o ya chen. 33Mu bisa, mu wa ma wa zi nyɛn vusi. Mu wa kaali, ma zi dɛu mu bar nyɛniu. Ma lisi chenani mu fun ŋɔ Ju tim ta ni di ba wa kikoti a tiŋ min la doonani mu la chen. Chenani mu ŋɔ ba chen, ya ma gbanko kinnɛ. 34Chiksi fali nyɛnɛɛ mu daŋni ma tiŋ. Ma zimu di mu daŋni mau kinkan. O lawa ma gbanko kidaŋni dɔŋau a chi chen. 35Ma daŋni dɔŋa nan ni, nara maga zi zimu di ma ya mu gantɛl tiŋsiwa.”

Yesu Fun Ŋɔ Pita Ni Chenani O Zi Vɛ Un

(Mat. 26.31-35; Maak 14.27-31; Luk 22.31-34)

36Simɔn Pita fun pɛɛsi un, “Mu kunyana, leene i la?”

Yesu fun ŋɔ un, “I wa kitiŋ min a la doonani mu la chen lalaknɔ. O zi ya tamnɛ i koti a tiŋ min.”

37Pita fun bu pɛɛsi un, “Mu kunyana, yɛrɛ mu vɛ ka koti a tiŋ hin lalaknɔ? Mu saksɛu di mu sou a nyɛ hin.”

38Yesu fun burgi a pɛɛsi un, “I sir saksɛ di i sou a nyɛ minuu? Nu mu wati nɛnɛ. I zi te ŋɔ nara niu dusum nɔ di i wa zim min nɔ butora ka zimal zi yeli.”

Currently Selected:

Jɔn 13: tpmNT

Highlight

Copy